ស្រីលង្កាបានជាប់គាំង ហើយបរិមាណប្រេងបម្រុងបានធ្លាក់ចុះនៅក្រោមកម្រិតតម្រូវការប្រើប្រាស់ប្រចាំថ្ងៃ
នៅក្នុងប្រទេសស្រីលង្កា ក្រសួងថាមពលបានប្រកាសក្នុងថ្ងៃអាទិត្យ ទី៣ កក្កដាថា បរិមាណប្រេងបម្រុងបានធ្លាក់ដល់កម្រិតមួយនៅក្រោមកម្រិតតម្រូវការប្រចាំថ្ងៃ។ ប្រឈមនឹងបញ្ហាកង្វះប្រេងពេលនេះ ក្រុមហ៊ុនឡានក្រុងឯកជនបានកាត់បន្ថយការធ្វើចរាចរណ៍ឡានក្រុងពី ២០ ០០០គ្រឿងនៅទូទាំងប្រទេសមកនៅត្រឹម ១ ០០០គ្រឿងក្នុងមួយថ្ងៃចាប់ពីដើមខែកក្កដានេះ។ ចំណែកនៅតាមស្ថានីយលក់ប្រេង គេសង្កេតឃើញរថយន្ត និងរម៉កកង់បីចតចាំបន្តកន្ទុយគ្នាច្រើនគីឡូម៉ែត្រដើម្បីចាក់សាំង។ តាមលោករដ្ឋមន្រ្តីថាមពល ប្រទេសនឹងទទួលបានប្រេងសាំងនៅចន្លោះថ្ងៃទី ២២ និង ២៣ កក្កដាខាងមុខ។
ចុះផ្សាយនៅថ្ងៃ៖
ស្តាប់ - ០២:៣៤
តាមរដ្ឋមន្រ្តីក្រសួងថាមពល ប្រេងដែលស្រីលង្កាកំពុងមានក្នុងស្តុកសព្វថ្ងៃមានប្រមាណជា ៤ ០០០តោន។ ចំនួននេះមានកម្រិតទាបជាងតិចតួចលើកម្រិតដែលស្រីលង្កាត្រូវការប្រើប្រាស់ក្នុងមួយថ្ងៃ។ នេះស បញ្ជាក់ឲ្យឃើញថា ស្រីលង្កាអស់ប្រេងប្រើចាប់ពីដើមខែកក្កដានេះរហូតដល់ពេលទទួលបានប្រេងថ្មី។ តាមរដ្ឋមន្រ្តីថាមពល ប្រេងថ្មីនឹងមកដល់នៅចន្លោះថ្ងៃទី២២ និងថ្ងៃទី២៣ កក្កដា។ នៅតាមស្ថានីយលក់ប្រេងក្នុងទីក្រុងកូឡុំបូ មានស្ថានីយភាគច្រើនលែងមានប្រេងសាំង ឬប្រេងម៉ាស៊ូតលក់តាំងពីច្រើនថ្ងៃកន្លងមក។
ផលវិបាកកើតចេញពីការខ្វះប្រេងនេះ ក្រុមហ៊ុនឡានក្រុងឯកជនបានកាត់បន្ថយសេវាដឹកជញ្ជូនរបស់ខ្លួននៅដើមខែកក្កដានេះ។ « យើងដាក់ឡានក្រុងប្រមាណតែ ១ ០០០គ្រឿងប៉ុណ្ណោះឲ្យដំណើរការនៅទូទាំងប្រទេសក្នុងចំណោមឡានក្រុងទាំង ២០ ០០០គ្រឿង » នេះជាការថ្លែងរបស់ប្រធានសមាគមឡានក្រុងឯកជន។ តាមប្រធានសមាគមឡានក្រុងឯកជនរូបនេះដដែល ស្ថានការណ៍នឹងធ្លាក់កាន់តែធ្ងន់ធ្ងរ ព្រោះគេមិនដឹងរកទិញប្រេងម៉ាស៊ូតពីណាទេ។ ក្រៅពីខ្វះប្រេង ស្រីលង្កាក៏កំពុងជួបការខ្វះភ្លើងអគ្គិសនីដែរ។ ក្នុងថ្ងៃអាទិត្យ ទី៣ កក្កដា ការិយាល័យ និងហាងលក់ទំនិញមួយចំនួនបានបិទទ្វារដោយគ្មានភ្លើងអគ្គិសនីប្រើប្រាស់។
ក្នុងថ្ងៃចន្ទ ទី៤ កក្កដានេះ ស្ថានការណ៍នឹងកាន់តែដុនដាបដោយសារតែធនាគារ និងក្រុមហ៊ុនឯកជនបើកទ្វារធ្វើការ។ ចំណែកស្ថាប័នរដ្ឋាភិបាលមិនចាំបាច់ រួមទាំងសាលារៀនត្រូវបានរដ្ឋបិទទ្វាររហូតដល់ថ្ងៃទី១០ កក្កដា។ គួរបញ្ជាក់ថា តាំងពីច្រើនខែមកហើយដែលពលរដ្ឋស្រីលង្កាទាំង ២២លាននាក់បានរស់នៅដោយខ្វះសព្វគ្រប់ ពិសេសខ្វះភ្លើងអគ្គិសនី ប្រេងសាំង និងស្បៀង។ រដ្ឋអស់លុយដើម្បីទិញស្បៀង ប្រេង និងផលិតផលចាំបាច់មួយចំនួន។ រដ្ឋគ្មានលទ្ធភាពសងបំណុលគេចំនួន ៥១ ០០០លានដុល្លារ។ ក្នុងខែមេសា រដ្ឋាភិបាលក្រុងកូឡុំបូបានប្រកាសពីការខកខានសងបំណុល និងកំពុងចរចារកលុយពីមូលនិធិរូបិយវត្ថុអន្តរជាតិ។ តាំងពីទទួលបានឯករាជ្យក្នុងឆ្នាំ ១៩៤៨ ប្រទេសអាស៊ីមួយនេះមិនដែលជួបវិបត្តិសេដ្ឋកិច្ចដុនដាបហៅមិនឮដូចពេលនេះទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ