បន្ទាប់ពីបានរង់ចាំអស់ច្រើនឆ្នាំ តេឡេស្កុបអវកាសជេមស៍វេបបានបង្ហាញរូបភាពដ៏អស្ចារ្យលើកទី១
ចុះផ្សាយនៅថ្ងៃ៖
ស្តាប់ - ០៦:៤៧
នៅថ្ងៃចន្ទ ទី១១ កក្កដា ក្រុមហ៊ុនអវកាសណាហ្សាបានបង្ហាញពិភពលោកនូវរូបភាពដែលតេឡេស្កុបអវកាសជេមស៍វេប (James Webb) ថតបានជាលើកទី១។ គឺជារូបភាពដ៏អស្ចារ្យដែលបង្ហាញពីការបណ្តុំរបស់កាឡាក់ស៊ីនៅក្រោយប៊ីកប៊ែង (Big Bang) កាលពីជាង ១៣ពាន់លានឆ្នាំមុន។ ក្រោយរូបភាពលើកដំបូងដ៏អស្ចារ្យនេះ ណាហ្សាគ្រោងបញ្ចេញនូវរូបភាពថ្មីៗទៀតនាថ្ងៃអង្គារ ទី១២ កក្កដានេះ។
តេឡេស្កុបអវកាសជេមស៍វេប (James Webb) ត្រូវបានបាញ់បង្ហោះកាលពីថ្ងៃទី២៥ ធ្នូ ឆ្នាំ ២០២១ និងបានទៅដល់គោលដៅដែលគេចង់បាននៅចម្ងាយ ១លាន ៥សែនគីឡូម៉ែត្រពីផែនដីកាលពីថ្ងៃទី២៣ មករាដើមឆ្នាំ ២០២២។ ក្រោយពីបានបំពេញបេសកម្មរយៈពេល ៦ខែ តេឡេស្កុបអវកាសជេមស៍វេបបានបញ្ជូនរូបភាពលើកទី១ ឲ្យផែនដីក្នុងថ្ងៃទី១១ កកដា។ ដូចដែលគេបានរង់ចាំ គឺជារូបភាពដ៏អស្ចារ្យ ព្រោះជារូបភាពពណ៌ និងច្បាស់ខ្លាំងដូចដែលគេថតនៅជិតបង្កើយ។ គួររម្លឹកបន្តិចថា ពិភពលោកធ្លាប់មានតេឡេស្កុបអវកាសច្រើនប្រភេទដូចជាតេឡេស្កុបអវកាសហឺបល Spitzer Kepler ហើយថ្មីចុងក្រោយ គឺតេឡេស្កុបជេមស៍វេបដែលធំ និងទំនើបជាងគេ។
ថ្ងៃដែលណាហ្សាបានបង្ហាញរូបភាពវិទ្យាសាស្រ្ត និងជាពណ៌ដ៏អស្ចារ្យផ្តល់ដោយតេឡេស្កុបអវកាសជេមស៍វេបលើកទី១ ត្រូវបានប្រធានាធិបតីអាមេរិកលោកបៃដិនចាត់ទុកជាថ្ងៃប្រវត្តិសាស្រ្តសម្រាប់មនុស្សជាតិ។ សម្រាប់ណាហ្សា រូបថតផ្តល់ដោយតេឡេស្កុបជេមស៍វេបគឺជារូបភាពអាំងហ្រ្វារូដែលថតបានឆ្ងាយរាប់ពាន់លានឆ្នាំពន្លឺ និងច្បាស់ដែលគេមិនធ្លាប់បានធ្វើទេមកដល់ពេលនេះ។ តែណាហ្សាមិនភ្លេចបញ្ជាក់ថា ទំរាំថតបានរូបភាពជាពណ៌ និងច្បាស់ដែលបង្ហាញឲ្យឃើញនូវវត្តមានកាឡាក់ស៊ីយ៉ាងស្អេកស្កាស់មួយនេះ តេឡេស្កុបអវកាសជេមស៍វេបបានចំណាយពេលសង្កេតរយៈពេល ១២ម៉ោងកន្លះ។
តាមរយៈរូបភាពដែលតេឡេស្កុបអវកាសជេមស៍វេបថតបានពេលនេះ ណាហ្សាអាចផ្តើមការងារស្រាវជ្រាវរបស់ខ្លួនដើម្បីស្វែងយល់ឲ្យកាន់តែច្បាស់ និងស៊ីជម្រៅពីទំហំ អាយុ ប្រវត្តិ និងការ កកើតរបស់កាឡាស៊ីទាំងនោះ។
លក្ខណៈពិសេស និងសមត្ថភាពរបស់តេឡេស្កុបអវកាសជេមស៍វេប
តេឡេស្កុបអវកាសជេមស៍វេបមានលក្ខណៈពិសេសខ្លាំងមែនទែន បើធៀបនឹងតេឡេស្កុបអវកាសហឺបល។ អ្វីដែលតេឡេស្កុបហឺបលមិនអាចមើលឃើញ ពិសេសនៅចម្ងាយឆ្ងាយ តេឡេស្កុបជេមស៍វេបអាចមើលឃើញ។ អ្វីដែលតេឡេស្កុបហឺបលមិនអាចញែកដាច់ពីគ្នា និងកំណត់អត្តសញ្ញាណរបស់កាឡាក់ស៊ីមួយៗបាន តេឡេស្កុបជេមស៍វេបអាចធ្វើបាន។ តាមពិត តេឡេស្កុបជេមស៍វេបមានជំនាញខាងចាប់ពន្លឺប្រភេទអាំងហ្វ្រារូ។ តាមរយៈកញ្ចក់ដែលមានមុខកាត់ដល់ទៅ ៦ម៉ែត្រកន្លះ មានស្រោបមាសពីលើ និងមានបំពាក់នូវឧបករណ៍វិទ្យាសាស្រ្តទំនើបៗ តេឡេស្កុបជេមស៍វេបមានសមត្ថភាពឆ្លុះមើលឃើញផ្កាយ និងកាឡាក់ស៊ីដែលស្ថិតនៅចម្ងាយរហូតដល់ទៅ ១៣ពាន់៦រយលានឆ្នាំពន្លឺពីភពផែនដី។
ចម្ងាយ ១៣ពាន់៦រយលានឆ្នាំពន្លឺមានន័យថា ពន្លឺដែលចេញពីផ្កាយ ឬកាឡាក់ស៊ីទាំងអស់នោះត្រូវចំណាយពេលដល់ទៅ ១៣ពាន់៦រយលានឆ្នាំទើបអាចធ្វើដំណើរមកដល់ភពផែនដី និងប៉ះនឹងកញ្ចក់របស់តេឡេស្កុបជេមស៍វេប ឬគេអាចនិយាយបញ្ច្រាសវិញថា ពន្លឺដែលមកប៉ះនឹងកញ្ចក់តេឡេស្កុបជេមស៍វេបជាពន្លឺដែលចេញពីផ្កាយ និងកាឡាក់ស៊ីតាំងពី ១៣ពាន់៦រយលានឆ្នាំមុន។ ដូច្នេះ រូបភាពដែលតេឡេស្កុបជេមស៍វេបឆ្លុះមើលឃើញជារូបភាពផ្កាយ និងកាឡាក់ស៊ីក្នុងទម្រង់ដើមកាលពី ១៣ពាន់៦រយលានឆ្នាំមុន ពោលជាផ្កាយ និងកាឡាក់ស៊ីដំបូងៗបង្អស់។
ជាមួយនឹងតេឡេស្កុបជេមស៍វេប អ្នកវិទ្យាសាស្រ្តអាចសិក្សាកាន់តែលម្អិតពីវដ្តនៃជីវិតរបស់ផ្កាយ ពិសេសការចាប់កំណើតរបស់ផ្កាយ និងការកកើតភពដំបូងៗនៅជុំវិញផ្កាយដែលទើបនឹងចាប់កំណើត។ ជាមួយនឹងលក្ខណៈពិសេស និងសមត្ថភាពរបស់តេឡេស្កុបអវកាសជេមស៍វេបនេះ ការចំណាយដើម្បីផលិតតេឡេស្កុបមួយនេះក៏បានចាយលុយច្រើនដែរ គឺ ១០ ០០០លានដុល្លារដោយមានការសហការរបស់អាមេរិក សហភាពអឺរ៉ុប និងប្រទេសកាណាដា។
ភពថ្មីដែលមានទម្រង់ និងអំណោយផលសម្រាប់ជីវិតសត្វលោកដូចផែនដី?
មកទល់ពេលនេះ គេនៅមិនទាន់អាចនិយាយបានពីវត្តមានភពថ្មីដែលមានទម្រង់ និងអំណាយផលសម្រាប់ជីវិតមនុស្សដូចផែនដីនៅឡើយទេ។ តេឡេស្កុបអវកាសជេមស៍វេបទើបតែបានផ្តើមបេសកម្មរបស់ខ្លួន និងនៅមានរូបភាពដ៏អស្ចារ្យជាច្រើនផ្សេងទៀតដែលតេឡេស្កុបមួយនេះនឹងបង្ហាញជាបន្តបន្ទាប់ដល់ផែនដីនាពេលមុខ។ រហូតមកដល់ពេលនេះ គេដឹងថាផ្កាយចាប់កំណើតពីសារធាតុតូចល្អិតដែលនៅប្រមូលផ្តុំគ្នាប្រៀបដូចជាដុំពពកដែលគេឲ្យឈ្មោះ « ណេប៊ុយឡា » (Nebula)។ អ៊ីចឹងហើយបានជានៅតាមតំបន់ដែលមានផ្កាយ ឬបណ្តុំផ្កាយកំពុងចាប់កំណើតតែងតែបានហ៊ុមព័ទ្ធទៅដោយធូលីបិទបាំងដែលគ្មានតេឡេស្កុបអវកាសកន្លងមកអាចឆ្លុះមើលឃើញផ្កាយ និងភពដែលកំពុងស្ថិតក្នុងដំណាក់កាលកកើតដំបូងៗបានទេ។
តែជាមួយនឹងតេឡេស្កុបអវកាសជេមស៍វេប ភាពស្រពិចស្រពិល និងអាថ៍កំបាំងទាំងនេះលែងចោទជាបញ្ហាទៀតឡើយ។ សមត្ថភាពចាប់ពន្លឺអាំងហ្វ្រារូរបស់តេឡេស្កុបជេមស៍វេបអាចឆ្លុះមើលធ្លុះស្រទាប់ល្អងធូលីរបស់ណេប៊ុយឡា និងអាចផ្តិតយកបាននូវរូបភាពកាន់តែច្បាស់ និងលម្អិតពីយន្តការនៃការកកើតផ្កាយ ក៏ដូចជាដំណើរការកកើតភពនៅជុំវិញផ្កាយដែលទើបនឹងចាប់កំណើត។ តាមពិត តេឡេស្កុបជេមស៍វេបគ្មានសមត្ថភាពឆ្លុះមើលអ្វីៗដែលមាននៅលើផ្ទៃដីភពផ្សេងបានទេ។ អ្វីដែលជេមស៍វេបអាចធ្វើបាននៅក្នុងការសិក្សាស្វែងរកជីវិតក្រៅភព គឺប្រមូលទិន្នន័យលម្អិតពីស្រទាប់បរិយាកាសដើម្បីឲ្យអ្នកវិទ្យាសាស្រ្តកំណត់ពីសារធាតុគីមីដែលមាននៅក្នុងស្រទាប់បរិយាកាស។
តាមរយៈទិន្នន័យដែលប្រមូលបាន អ្នកវិទ្យាសាស្រ្តអាចកំណត់បានថាតើភពមួយណាដែលសារធាតុគីមីចាំក្នុងការឈានទៅបង្កើតឲ្យលក្ខខណ្ឌ និងអំណោយផលដល់ជីវិតដូចនៅផែនដីបច្ចុបប្បន្ន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ