ប្រធានាធិបតីរុស្ស៊ីលោកពូទីនកំពុងបន្តផ្លុំខ្យល់ក្តៅ និងខ្យល់ត្រជាក់ដាក់អឺរ៉ុបក្នុងរឿងឧស្ម័ន
ចុះផ្សាយនៅថ្ងៃ៖
ស្តាប់ - ០៧:០០
នៅថ្ងៃព្រហស្បតិ៍ ទី២១ កក្កដា ក្រុមហ៊ុនឧស្ម័នរុស្ស៊ី Gazprom បានផ្តើមបង្ហូរឧស្ម័នតាមបំពង់ Nord Stream ១ ជាថ្មី ក្រោយពីបានបិទដើម្បីជួសជុលរយៈពេល ១០ថ្ងៃ។ តែភាពស្រពិចស្រពិលកំពុងបន្តមានទាក់ទងនឹងបរិមាណដែលបានបង្ហូរ។ ចំណែកប្រធានាធិបតីរុស្ស៊ីលោកពូទីនបានបន្តផ្លុំខ្យល់ក្តៅ និងខ្យល់ត្រជាក់នៅក្នុងរឿងឧស្ម័ននេះ។ យ៉ាងណាក៏ដោយ សហភាពអឺរ៉ុបបានស្នើឲ្យប្រទេសសមាជិកផ្តើមកាត់បន្ថយការប្រើឧស្ម័នចំនួន ១៥%។
ការដែលក្រុមហ៊ុនឧស្ម័នរុស្ស៊ី Gazprom បានផ្តើមបង្ហូរឧស្ម័នតាមបំពង់ Nord Stream ១ ជាថ្មីជាដំណឹងល្អសម្រាប់អឺរ៉ុប ពិសេសសម្រាប់ប្រទេសអាល្លឺម៉ង់ដែលបានពឹងលើឧស្ម័នរុស្ស៊ីខ្លាំងជាងគេនៅក្នុងចំណោមប្រទេសសមាជិកអឺរ៉ុបផ្សេងទៀត។ គួររម្លឹកបន្តិចថា ឧស្ម័នបង្ហូរតាមបំពង់ Nord Stream ១ ត្រូវបានក្រុមហ៊ុនឧស្ម័នរុស្ស៊ី Gazprom លក់ទៅឲ្យអាល្លឺម៉ង់ និងបណ្តាប្រទេសអឺរ៉ុបប៉ែកខាងលិចផ្សេងទៀត។ នៅពេលដែល Gazprom បានប្រកាសបិទរ៉ូប៊ីណេបំពង់ Nord Stream ១ រយៈពេល ១០ថ្ងៃកាលពីថ្ងៃទី១១ កក្កដាដើម្បីជួសជុល អាល្លឺម៉ង់បានភ័យស្លន់ស្លោជាងគេដោយបារម្ភខ្លាច Gazprom បិទលែងបើកឡើងវិញ។
ឥឡូវនេះ អាល្លឺម៉ង់ហាក់បានធូរទ្រូងឡើងវិញ តែកំពុងស្ថិតក្នុងភាពស្រពិចស្រពិលដោយមិនដឹងពីបរិមាណឧស្ម័នដែលGazprom បានបញ្ជូនជាថ្មីនៅពេលនេះ។ បើតាមទីភ្នាក់ងារថាមពលអាល្លឺម៉ង់ គឺមានបរិមាណតែ ៣០% ប៉ុណ្ណោះដែល Gazprom បានបញ្ជូន ពោលគឺតិចជាង ១០% នៅមុនពេលបិទដើម្បីធ្វើការជួសជុល។ គួរបញ្ជាក់ថា នៅមុនពេលបិទរ៉ូប៊ីណេដើម្បីជួសជុលបំពង់ Nord Stream ១ កាលពី ១០ថ្ងៃមុន Gazprom បានកាត់បន្ថយការបញ្ជូនឧស្ម័នតាមបំពង់បង្ហូរនេះនៅត្រឹម ៤០% តាំងពីពាក់កណ្តាលខែមិថុនា។ ហេតុផលពេលនោះត្រូវបាន Gazprom បញ្ជាក់ថា មានទួរប៊ីនមួយបានបញ្ជូនទៅត្រួតពិនិត្យដើម្បីជួសជុលនៅក្នុងប្រទេសកាណាដា។
ពិតណាស់ ការដែល Gazprom បានបង្ហូរឲ្យក្នុងបរិមាណ ៣០% ឬ ៤០% គឺគ្រាន់បើជាង ០%។ តែសម្រាប់អាល្លឺម៉ង់ ទោះ ៣០% ឬ ៤០% ក៏នៅមិនទាន់គ្រប់គ្រាន់ដើម្បីធានាលើតម្រូវការក្នុងស្រុកនាពេលរដូវរងារខាងមុខដែរ។ គួររម្លឹកថានៅមុនផ្ទុះសង្រ្គាមអ៊ុយក្រែន បរិមាណឧស្ម័នដែលសហភាពអឺរ៉ុបបាននាំចូល មានជាង ៤៨% បានទិញពីរុស្ស៊ី។ ចំណែកអាល្លឺម៉ង់វិញបានទិញពីរុស្ស៊ីដល់ទៅ ៥៥%។
ចុះបើរុស្ស៊ីបិទក្បាលរ៉ូប៊ីណេរហូត?
ក្បាលរ៉ូប៊ីណេកំពុងស្ថិតក្នុងដៃរុស្ស៊ីដែលរុស្ស៊ីអាចបិទ បើកពេលណាក៏បាន។ តែចំណោតគឺស្ថិតលើផលវិបាកដែលកើតចេញពីការបិទ បើក ហើយផលវិបាកនេះមានទាំងនៅខាងអ្នកលក់ដែលជាភាគីរុស្ស៊ី និងខាងអ្នកទិញដែលជាភាគីអឺរ៉ុប។ គួរបញ្ជាក់ថា តាំងពីថ្ងៃដែលរុស្ស៊ីបានលើកទ័ពចូលឈ្លានពានអ៊ុយក្រែន បស្ចិមលោក និយាយជារួម និងសហភាពអឺរ៉ុប និយាយដោយឡែកបានព្យាយាមដាក់ទណ្ឌកម្មសេដ្ឋកិច្ចលើរុស្ស៊ីតាមគ្រប់រូបភាពទាំងអស់។ កម្មវត្ថុ គឺខ្ទប់ដង្ហើមសេដ្ឋកិច្ចរុស្ស៊ីដើម្បីឲ្យរុស្ស៊ីបញ្ឈប់សង្រ្គាមនៅអ៊ុយក្រែន។
ក្នុងចំណោមវិធានការទណ្ឌកម្មប្រឆាំងរុស្ស៊ី ប្រេង និងឧស្ម័នរុស្ស៊ីជាផ្ទាំងស៊ីប និងជាកន្លែងចុកចាប់ខ្លាំងជាងគេសម្រាប់រុស្ស៊ី។ ចូលកុំភ្លេចថា លុយដែលរុស្ស៊ីទទួលបានពីការលក់ប្រេង និងឧស្ម័នឲ្យអឺរ៉ុបមានទំហំធំធេងខ្លាំងណាស់។ អឺរ៉ុបគិតថា វិធានការទណ្ឌកម្មមួយនេះជាការផ្តាច់ចំណូលពីរុស្ស៊ីសម្រាប់ចំណាយលើសង្រ្គាមអ៊ុយក្រែន។ តែគេក៏មិនត្រូវភ្លេចនិយាយទេថា ការឈប់ទិញប្រេង និងឧស្ម័នរុស្ស៊ីក៏បានធ្វើឲ្យអឺរ៉ុបឈឺចុកចាប់ដូចគ្នា។ អ៊ីចឹងហើយបានជាពេលនេះ ប្រធានាធិបតីរុស្ស៊ីលោកពូទីនកំពុងបន្តផ្លុំខ្យល់ក្តៅផង និងត្រជាក់ផងក្នុងរឿងឧស្ម័ននេះ។
មនុស្សខ្លាំងរុស្ស៊ីរូបនេះបានទម្លាយឲ្យដឹងក្នុងសប្តាហ៍នេះថា បំពង់បង្ហូរឧស្ម័ន Nord Stream ១ អាចមានសមត្ថភាពដំណើរការតែ ២០% ប៉ុណ្ណោះនាពេលខាងមុខ ព្រោះ Gazprom ត្រូវការយកទួរប៊ីនផ្សេងទៀតទៅត្រួតពិនិត្យ ជុសជុល។ តែអឺរ៉ុបយល់ថា នេះគ្រាន់ជាលេស និងបានចោទលោកពូទីនពីបទយកឧស្ម័នធ្វើជាអាវុធប្រឆាំងអឺរ៉ុប។
សន្សំសំចៃឧស្ម័នជាផ្លូវដែលសហភាពអឺរ៉ុបកំពុងសំឡឹងឃើញពេលនេះ
សហភាពអឺរ៉ុបបានផ្តើមកាត់បន្ថយការទិញប្រេង និងឧស្ម័នរុស្ស៊ីបន្តិចម្តងៗដើម្បីឈានទៅឈប់ទិញទាំងស្រុង។ តែសួរថា តើអឺរ៉ុបនឹងឈប់ទិញប្រេង និងឧស្ម័នរុស្ស៊ីមុនគេ ឬមួយក៏រុស្ស៊ីជាអ្នកឈប់លក់ប្រេង និងឧស្ម័នឲ្យអឺរ៉ុបមុនគេ។ បើអឺរ៉ុបជាអ្នកផ្តើមមុនគេប្រហែលមិនសូវអីប៉ុន្មានទេ តែបើរុស្ស៊ីជាផ្តើមមុនគេវិញ គឺអឺរ៉ុបច្បាស់ជាជួបគ្រោះមហន្តរាយថាមពលដោយចៀសមិនរួច។ ចូរកុំភ្លេចថា រឿងប្រេងមិនសូវចំណោតប៉ុន្មានទេ ព្រោះអឺរ៉ុបអាចរកទិញពីប្រទេសផ្សេងបាន។ តែរឿងឧស្ម័នហាក់ដូចយ៉ាប់បន្តិច ព្រោះវាជាផលិតផលដែលពិបាកដឹកជញ្ជូន។
អ៊ីចឹងហើយបានជានៅពេលនេះ អឺរ៉ុបកំពុងត្រៀមសេណារីយ៉ូដើម្បីទប់នឹងការដែលរុស្ស៊ីបិទក្បាលរ៉ូប៊ីណេឧស្ម័នទាំងស្រុងនៅថ្ងៃណាមួយ។ សេណារីយ៉ូដែលគណៈកម្មការអឺរ៉ុបបានស្នើឡើងក្នុងថ្ងៃពុធ ទី២០ កក្កដា គឺផែនការសន្សំសំចៃការប្រើឧស្ម័នចំនួន ១៥% នៅក្នុងប្រទេសសមាជិកអឺរ៉ុបទាំងអស់។ អនុប្រធានគណៈកម្មការអឺរ៉ុបបានព្រមានថា ប្រទេសសមាជិកនីមួយៗត្រូវចាត់វិធានការកាត់បន្ថយការប្រើឧស្ម័នពីឥឡូវទៅដើម្បីបញ្ជៀសភាពអាសន្ន និងគ្រោះមហន្តរាយនាពេលខាងមុខ។ តាមប្រធានគណៈកម្មការអឺរ៉ុបលោកស្រីអួរស៊ូឡា វ៉ុនឌែរ ឡេយែន សហភាពអឺរ៉ុបអាចបន្ថយការប្រើឧស្ម័នប្រចាំឆ្នាំក្នុងបរិមាណ ៤៥ ០០០លានម៉ែត្រគូប។ គួរបញ្ជាក់ថាក្នុងឆ្នាំ ២០២០ រុស្ស៊ីបានលក់ឧស្ម័នឲ្យអឺរ៉ុបក្នុងបរិមាណប្រមាណជា ១៥៣ ០០០លានម៉ែត្រគូប។
គេនៅមិនទាន់ដឹងថា តើផែនការរបស់គណៈកម្មការអឺរ៉ុបឲ្យប្រើឧស្ម័នសន្សំសំចៃពេលនេះនឹងអាចទៅរួចឬអត់ទេ ព្រោះប្រទេសសមាជិកនីមួយៗត្រូវយកទៅពិនិត្យ និងជជែកនាពេលខាងមុខ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ