សម្តេចប៉ាប ហ្វ្រង់ស័រធ្វើដំណើរទៅកាណាដាដើម្បីនិយាយសុំទោសជនជាតិដើមភាគតិច
ចុះផ្សាយនៅថ្ងៃ៖
ស្តាប់ - ០៧:១៨
ប្រមុខសង្ឃកាតូលិក សម្តេចប៉ាបហ្រ្វង់ស័រ បានចាកចេញពីទីក្រុងរ៉ូម នៅថ្ងៃអាទិត្យទី ២៤ កក្កដា ដើម្បីផ្តើមទស្សនកិច្ចរយៈពេល ៦ថ្ងៃ នៅប្រទេសកាណាដា។ ជាធម្មយាត្រា ទទួលបរិវាសកម្ម ឬដំណើរទទួលទោស ដែលប្រមុខសង្ឃកាតូលិកធ្វើឡើង ដើម្បីរសាយស្លាកស្នាមឈឺចាប់ពីអតីតកាល។ ទស្សនកិច្ចរបស់សម្តេចប៉ាបហ្វ្រង់ស័រនៅកាណាដា ធ្វើឡើង នៅបន្ទាប់ពី កាណាដា រន្ធត់ និងភ្ញាក់ផ្អើលជាខ្លាំង ដែលបានរកឃើញផ្នូរអនាមិក នៅទីតាំងស្នាក់នៅរៀនសូត្ររបស់កូនក្មេងជនជាតិដើមភាគតិច កាលពីពាក់កណ្តាលឆ្នាំមុន។
សម្តេចប៉ាប ហ្វ្រង់ស័របានចាកចេញពីទីក្រុងរ៉ូម នៅព្រឹកថ្ងៃអាទិត្យ ដើម្បីបំពេញទស្សនកិច្ចរយៈពេល ៦ថ្ងៃ នៅប្រទេសកាដាណា។ ជាមួយនឹងហេតុការណ៍ដ៏រន្ធត់ នៅកាណាដា ពោលគឺ នៅក្រោយការរកឃើញ កាលពីខែមិថុនា ឆ្នាំ ២០២១ ផ្នូរអនាមិក កប់សពកូនក្មេងជនជាតិដើមភាគតិចប្រមាណ ១៣០០ នៅតាមទីតាំងស្នាក់នៅរៀនសូត្រ ដែលគ្រប់គ្រងដោយវិហារកាតូលិកនៅកាណាដា ទស្សនកិច្ចរបស់ប្រមុខសង្ឃកាតូលិកនៅកាណាដា ជាព្រឹត្តិការណ៍ដែលគេរង់ចាំជាយូរមកហើយ។
សម្តេចប៉ាប ហ្វ្រង់ស័រ ជាប្រមុខសង្ឃកាតូលិកទី២ ដែលចេញទៅធ្វើទស្សនកិច្ចនៅកាណាដា នៅបន្ទាប់ពីសម្តេចប៉ាបហ្សង់ប៉ូល2 ដែលបានបំពេញទស្សនកិច្ចនៅកាណាដា កាលពី២០ឆ្នាំមុន។ មានព្រះជន្ម ៨៥ព្រះវស្សា និងមានសុខភាពមិនសូវរឹងមាំ ដោយសារជំងឺជង្គង់ ប្រមុខសង្ឃកាតូលិក សម្តេចប៉ាបហ្វ្រង់ស័រ ធ្លាប់បានលុបចោល គម្រោងទៅកាន់ទ្វីបអាហ្វ្រិក ប៉ុន្តែ ព្រះអង្គនៅតែរក្សាគម្រោងទស្សនកិច្ចនៅកាណាដា។
សម្តេចប៉ាប ហ្វ្រង់ស័រធ្វើទស្សនកិច្ចទៅកាណាដាលើកនេះ នៅក្នុងគោលដៅអាទិភាព សំខាន់តែមួយគត់ គឺទៅនិយាយសុំទោស សហគមន៍ជនជាតិដើមភាគតិច ឬប្រជាជាតិដំបូងនៅកាណាដា នៅចំពោះមុខសោកនាដកម្មដែលមានកើតមាននៅតាមទីតាំងស្នាក់នៅ រៀនសូត្ររបស់កូនក្មេង ជនជាតិដើមភាគតិច ដែលគ្រប់គ្រងដោយវិហាកាតូលិក។
ទស្សនកិច្ចរបស់សម្តេចប៉ាប នៅកាណាដាផ្តោតទាំងស្រុង ទៅលើជំនួបជាមួយ សហគមន៍ជនជាតិដើមភាគតិច ដែលមួយចំនួន ធ្លាប់រងគ្រោះដោយសារការរំលោភធ្វើបាប ការធ្វើទារុណកម្ម នៅទីតាំងស្នាក់នៅរៀនសូត្រ ដែលគ្រប់គ្រងដោយវិហារកាតូលិក។
កាណាដាមានជនជាតិភាគតិច ឬប្រជាជាតិដំបូង តំណាង ឲ្យ៥%នៃប្រជាជនកាណាដាសរុប។ ប្រជាជាតិដើមដំបូង មានបីក្រុមដូចជា ក្រុមជនជាតិឥណ្ឌាក្រហម ជនជាតិអ៊ីន្វី និងជនជាតិកូនកាត់។
នៅចន្លោះ ឆ្នាំ ១៨៨០ និងឆ្នាំ ១៩៩៦ កុមារជនជាតិដើមភាគតិច ប្រមាណ ១៥០ ០០០នាក់ ត្រូវបានគេចាប់បង្ខំ កាត់ផ្តាច់ចេញពី ឪពុកម្តាយ គ្រួសារ ដើម្បីបញ្ជូនឲ្យទៅរស់នៅអគាររៀនសូត្ររបស់រដ្ឋ ដែលគ្រប់គ្រងដោយវិហារកាតូលិក។ ជារួម មានអគារអប់រំប្រភេទនេះ ចំនួន ១៣០កន្លែង នៅទូទាំងប្រទេសកាណាដា។
នៅកន្លែងស្នាក់នៅគ្រប់គ្រងដោយមន្រ្តីសង្ឃកាតូលិក កុមារជនជាតិដើមភាគតិច មិនត្រឹមរស់នៅឃ្លាតឆ្ងាយពីឪពុកម្តាយ ប៉ុន្តែ ពួកគេត្រូវលត់ដំ ហាមមិនឲ្យនិយាយភាសាដើម និងអនុវត្តវប្បធម៌របស់ជនជាតិភាគតិច។ លើសពីនោះ ពួកគេភាគច្រើនរងការធ្វើបាប ការធ្វើទារុណកម្មផ្លូវកាយ ផ្លូវចិត្ត និងរងការបៀនបៀនផ្លូវភេទ ពីសំណាក់មន្រ្តីសង្ឃ។
របាយការណ៍របស់គណៈកម្មការស៊ើបអង្កេតជាតិកាណាដា ដែលមានឈ្មោះថា ប្រល័យពូជសាសន៍វប្បធម៌ បានបង្ហាញថា កុមារជាង ៦ពាន់នាក់បាត់បង់ជីវិត នៅអគារអប់រំគ្រប់គ្រងដោយវិហារកាតូលិក ដែលក្នុងនោះ ពាក់កណ្តាលស្លាប់ដោយសារមិនបានទទួលការយកចិត្តទុកដាក់ព្យាបាល នៅពេលកើតមានជំងឺរាតត្បាត។
គណៈកម្មការស៊ើបអង្កេត ជាតិកាណាដា បានបើកការស៊ើបអង្កេត ពីរឿងនេះ នៅបន្ទាប់ពីគេរកឃើញផ្នូរកុមារអនាមិក ជាង ១៣០០ នៅតាមអគារស្នាក់នៅ រៀនសូត្រដែលគ្រប់គ្រងវិហារកាតូលិក កាលពីពាក់កណ្តាលឆ្នាំមុន។
ប្រមុខសង្ឃគ្មានប្រតិកម្មអ្វីច្រើន ដោយគ្រាន់តែសំដែងការសោកស្តាយ ចំពោះសោកនាដកម្មកើតទៅលើកុមារជនជាតិដើមភាគតិចនៅកាដាណា។ ប៉ុន្តែ ទើបនៅខែមេសាកន្លងទៅ នៅពេលទទួលជួបអ្នកតំណាងជនជាតិដើមភាគតិចកាណាដា នៅ នៅវ៉ាទីកង់ ទើបប្រមុខសង្ឃកាតូលិក សម្តេចប៉ាបបានចេញនិយាយសុំទោសជាលើកទី១។
ប្រមុខសង្ឃកាតូលិក សម្តេចប៉ាបហ្រ្វង់ស័រ ធ្វើដំណើរទៅសុំទោសផ្ទាល់នៅ កាណាដា
នៅខែមេសា ឆ្នាំ ២០២១ សម្តេចប៉ាបធ្លាប់បានថ្លែងជាសាធារណៈ សុំទោស នៅចំពោះ មុខអ្នកតំណាងជនជាតិដើមភាគតិច ប៉ុន្តែ ជនជាតិដើមភាគតិច ឬប្រជាជាតិដំបូងនៅកាណាដា យល់ថា ការសុំទោសពិតប្រាកដ គួរតែធ្វើឡើងនៅទឹកដីកាណាដា ជាទីដែល មានរឿងហេតុ សោកនាដកម្មបានកើតឡើង។
នៅក្នុងជំនួប ជាមួយសម្តេចសង្ឃនៅទីក្រុងរ៉ូម អ្នកតំណាងជនជាតិដើមភាគតិច បានសំនូមពរឲ្យសម្តេចសង្ឃនិយាយសុំទោសដោយផ្ទាល់នៅប្រទេសកាណាដា។ ព្រះអង្គក៏យល់ព្រម ព្រោះថា នៅចំពោះមុខសោកនាដកម្ម ដែលជារឿងអាស្រូវដ៏ធំធេងរបស់វិហារកាតូលិក ព្រះអង្គគ្មានជម្រើសអ្វីផ្សេងនោះទេ។
នៅកាណាដា សម្តេចប៉ាបនឹងទៅជួបសំណេះសំណាលជាមួយជនរងគ្រោះ អ្នករួចរស់ជីវិតពីការធ្វើទារុណកម្មនៅតាមអគារស្នាក់នៅគ្រប់គ្រងដោយវិហារកាតូលិក។ ព្រះអង្គនឹងនិមន្តទៅគោរពវិញ្ញាណក្ខន្ធផងដែរ នៅទីវាលដែលគេកប់សាកសពកូនក្មេងជនជាតិដើមភាគតិច។ សម្រាប់ជនរងគ្រោះ ដែលជាជនជាតិដើមភាគតិច វត្តមានផ្ទាល់របស់សម្តេចសង្ឃកាតូលិកនៅកាដាណា សំខាន់ណាស់ ព្រោះវាអាចជាការបញ្ជាក់ ការទទួលស្គាល់ជាសាធារណៈ នូវកំហុស ឆ្គង អំពើហិង្សា ភាពអយុត្តិធម៌ ដែលមន្រ្តីវិហារកាតូលិក បានប្រព្រឹត្តទៅលើជនជាតិដើមភាគតិច កាលពីអតីតកាល។
ម្យ៉ាង នៅក្នុងទស្សនកិច្ចផ្ទាល់របស់ប្រមុខសង្ឃកាតូលិក នៅកាណាដា ប្រជាជាតិដើមដំបូង អាចទាមទារសុំយក កេរ្តិ៍ដំណែលដើមរបស់ពួកគេមកវិញ ព្រោះថា សម្បត្តិវប្បធម៌របស់ដូនតារបស់ពួកគេ មួយចំនួន កំពុងដាក់តាំងនៅសារមន្ទីររបស់បុរីវ៉ាកង់។
ហេតុអ្វីបានជាការសុំទោសរបស់ប្រមុខសង្ឃកាតូលិកសំខាន់?
ការនិយាយសុំទោសរបស់សម្តេចប៉ាប ហ្វ្រង់ស័រ សំខាន់ណាស់សម្រាប់ប្រជាជាតិដើមដំបូងរបស់កាណាដា ដែលធ្លាប់រងគ្រោះ ជាង១០០ឆ្នាំ ដោយសារនយោបាយគ្រប់គ្រងរបស់វិហារកាតូលិក។
ជាមួយការនិយាយសុំទោសរបស់ប្រមុខសង្ឃកាតូលិក នៅទឹកដីកាណាដា ជនរងគ្រោះសង្ឃឹមថា ការឈឺចាប់ របួសស្នាមរបស់ពួកគេ ដែលជាលទ្ធផលនៃនយោបាយគ្រប់គ្រងរបស់វិហារកាតូលិក នៅកាណាដា នឹងត្រូវបានគេដឹងលឺ ទទួលស្គាល់នៅក្នុងពិភពលោក។ បន្ទាប់ពីនេះ ពួកគេនឹងអាចផ្សះផ្សារឡើងវិញ ជាមួយវិហារកាតូលិក។ ក្រៅតែពីការផ្សះផ្សាពួកគេសង្ឃឹមចង់បានផងដែរ សំណងជំងឺចិត្តដើម្បីជួយពួកគេ ដែលភាគច្រើនកំពុងរស់នៅក្នុងភាពអន្ធការ ដោយសារតែ ជំងឺបាក់ទឹកចិត្ត។ អតីតកូនសិស្សមួយចំនួន ធ្លាប់បានដាក់ពាក្យប្តឹងទាមទារសំណងម្តងហើយ កាលពីឆ្នាំ ១៩៨០។ ទើប នៅឆ្នាំ ២០០៧ប៉ុណ្ណោះ ដែល សន្ធិសញ្ញាស្តីពីការដោះស្រាយបញ្ហាទាក់ទងនឹងអគារស្នាក់នៅរបស់វិហាកាតូលិក បានសម្រេចទទួលស្គាល់ការខូចខាត និងបង្កើតមូលនិធិ ជាង ១,៩ពាន់លានដុល្លារកាណាដា សម្រាប់សងជំងឺចិត្ត ដល់អតីតសិស្សជនជាតិដើមភាគតិច ដែលមានប្រមាណ ជិត ៩ពាន់នាក់។
ថ្មីៗនេះ សន្និសីទមេដឹកនាំសាសនាកាតូលិកនៅកាណាដា បានប្រកាសផ្តល់ថវិកា ៣០លានដុល្លារ សម្រាប់គម្រោងជួយជនរងគ្រោះ ដែលធ្លាប់ស្នាក់នៅ អគារអប់រំរបស់វិហាកាតូលិក។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ