កូរ៉េខាងជើងបដិសេធដាច់ខាតសំណើ ផ្តល់ជំនួយជាថ្នូរនឹងការបោះបង់នុយក្លេអ៊ែរ
ចុះផ្សាយនៅថ្ងៃ៖
ស្តាប់ - ០៦:១១
នៅថ្ងៃសុក្រទី ១៩សីហា២០២២នេះ ប្អូនស្រីដ៏មានឥទ្ធិពលរបស់មេដឹកនាំកូរ៉េខាងជើង គីម ជុងអ៊ុន បានប្រកាសច្រានចោល ជាសាធារណៈ សំណើរបស់រដ្ឋាភិបាលកូរ៉េខាងត្បូង ដែលចង់ផ្តល់ជំនួយសេដ្ឋកិច្ច ជាថ្នូរនឹងការបោះបង់អាវុធនុយក្លេអ៊ែរ។ សម្រាប់លោកស្រី គីម យ៉ូជុង នេះជាសំណើដែលមិនសមហេតុផលសោះ។
ដូចអ្វីដែលអ្នកវិភាគបានគិត កូរ៉េខាងជើងបានប្រកាសច្រានចោលយ៉ាងក្តែងៗ នៅថ្ងៃនេះ សំណើរបស់កូរ៉េខាងត្បូងហើយ ថែមទាំងបានចោទប្រកាន់រដ្ឋាភិបាលសេអូល ដោយប្រើពាក្យធ្ងន់ៗទៀត ...
ថ្ងៃនេះជាលើកទីមួយ តំណាងជាន់ខ្ពស់កូរ៉េខាងជើងដែលគ្មាននរណាក្រៅអំពីប្អូនស្រីដ៏មានឥទ្ធិពលរបស់លោកគីមជុងអ៊ុនបានឆ្លើយតប ជាសាធារណៈទៅនឹងសំណើរបស់លោកប្រធានាធិបតីកូរ៉េខាងត្បូង លោក យូន ស៊ុកយោល។
មោទនភាពជាតិ
នៅក្នុងសេចក្តីថ្លែងការណ៍ ចុះផ្សាយដោយទីភ្នាក់ងារសារព័ត៌មានផ្លូវការកូរ៉េខាងជើង KCNA លោកស្រី គីម យ៉ូជុង បានស្រែកឱ្យប្រធានាធិបតីកូរ៉េខាងត្បូងថាគួរតែបិទមាត់កុំនិយាយប្រសើរជាង។ នៅពេលឃើញសំណើ “កិច្ចសហប្រតិបត្តិការសេដ្ឋកិច្ច” មកដោះដូរ ជាតិ នឹងកម្មវិធីនុយក្លេអ៊ែរដែលជាមោទនភាពជាតិ ជាក្តីស្រមៃ និងជាក្តីសង្ឃឹមដ៏មហិមារបស់កូរ៉េខាងជើង ទើបគេដឹងច្បាស់ថាលោក យូន ឆោត និងដូចកូនក្មេង។ នេះជាសម្តីរបស់លោកស្រី គីម យ៉ូជុង ដោយបន្ថែមទៀតថា កូរ៉េខាងជើងនឹងមិនចូលអង្គុយ ចរចា ទល់មុខប្រធានាធិបតីកូរ៉េខាងត្បូងរូបនេះទេ។ ជាចុងក្រោយ ប្អូនស្រីរបស់មេដឹកនាំកូរ៉េខាងជើង ដែលល្បីខាងមានសម្តីមុត បានចោទកូរ៉េខាងត្បូងថា កែច្នៃសំណើចាស់ដែលព្យុងយ៉ាងធ្លាប់ច្រានចោលរួចមកហើយ។
ការិយាល័យប្រធានាធិបតីកូរ៉េខាងត្បូង បានសម្តែងការសោកស្តាយយ៉ាងខ្លាំង នៅពេលបានឮសេចក្តីថ្លែងការណ៍បែបទំនើងរបស់ គីម យូជុង ដោយចាត់ទុកប្រតិកម្មរបស់ព្យុងយ៉ាងថាមិនបានរួមចំណែកនាំសន្តិភាព និងភាពរុងរឿងដល់តំបន់ឧបទ្វីប និងអនាគតរបស់កូរ៉េខាងជើងផ្ទាល់ទេ។ ប៉ុន្តែកូរ៉េខាងត្បូងនៅតែរក្សាសំណើផ្តល់ជំនួយដល់កូរ៉េខាងជើងដដែល។
ជំនួយសេដ្ឋកិច្ចនិងទំនើបកម្ម
នាឱកាសប្រារព្វខួបនៃការបិទបញ្ចប់ដែនអំណាចអាណានិគមនិយមជប៉ុនលើកូរ៉េ កាលពីថ្ងៃចន្ទ និងម្តងទៀត នៅពុធ ដែលត្រូវជាថ្ងៃទី ១០០នៃការឡើងកាន់តំណែងជាប្រធានាធិបតីកូរ៉េខាងត្បូង លោក យូន ស៊ុកយោល បានប្រកាសបង្ហាញជាថ្មី ផែនការផ្តល់ជំនួយដ៏ធំមួយ ដល់ព្យុងយ៉ាង ជាថ្នូរនឹងការបោះបង់កម្មវិធីនុយក្លេអ៊ែរ។
ក្នុងជំហរពង្រឹងមហិទ្ធិរិទ្ធយោធា និងដោយយល់ថា ការរំសាយអាវុធនុយក្លេអ៊ែរ គឺកត្តាចាំបាច់ ក្នុងការផ្តល់សន្តិភាពជានិរន្តឱ្យឧបទ្វីបកូរ៉េ លោក ប្រធានាធិបតីកូរ៉េខាងត្បូង យូន ស៊ុកយោល បានលម្អិតថា ជំនួយសម្រាប់កូរ៉េខាងជើងមិនមែនមានត្រឹមតែជា ជំនួយស្បៀងអាហារ ថាមពល ទេ តែក៏មានដែរការជួយធ្វើទំនើបកម្មហេដ្ឋារចនាសម្ព័ន្ធផ្សេងៗ ដូចជា កំពង់ផែ អាកាសយានដ្ឋាន និងមន្ទីរពេទ្យ ឱ្យតែកូរ៉េខាងជើងព្រមបោះបង់កម្មវិធីនុយក្លេអ៊ែរ។ ផែនការនេះ នឹងជួយស្តារសេដ្ឋកិច្ចកូរ៉េខាងជើងឱ្យប្រសើរឡើង ជាលំដាប់ និងជាដំណាក់ៗ ព្រមទាំងលើកកម្ពស់កំរិតជីវភាពប្រជាជនទៀត។
តាមការពិតផែនការនេះធ្លាប់ត្រូវបានលោក យូន បង្ហើបឱ្យដឹងម្តង កាលពីខែឧសភា ក្នុងពេលថ្លែងសុន្ទរកថាចូលកាន់តំណែងថា ជាផែនការដ៏មហិមា។ ហើយកូរ៉េខាងជើង ក៏ធ្លាប់បានឱ្យដឹងតាំងពីយូរមកហើយដែរ ថានឹងមិនព្រមទទួលយកសំណើបែបនេះជាដាច់ខាត។
កូរ៉េខាងជើង ត្រៀមប្រើអាវុធនុយក្លេអ៊ែរ
បើតាមនាយកមជ្ឈមណ្ឌលសិក្សាកូរ៉េខាងជើង នៅវិទ្យាស្ថាន Sejon លោក Cheong Seong-Chang សេចក្តីប្រកាសរបស់លោកស្រី គីម យ៉ូជុង ថ្ងៃនេះ ជាការអះអាងបញ្ជាក់ដ៏ច្បាស់លាស់ថាព្យុងយ៉ាងនឹងមិនបោះបង់អាវុធនុយក្លេអ៊ែរជាដាច់ខាត។ ដូច្នេះបើតាមអ្នកជំនាញរូបនេះដដែល រដ្ឋាភិបាលកូរ៉េខាងត្បូង របស់លោក យូន ត្រូវសើរើមើល មូលដ្ឋានគ្រឹះនៃនយោបាយរបស់ខ្លួនឡើងវិញ ដោយចៀសមិនរួចឡើយ។ យោលទៅលើខ្លឹមសារនិងអត្ថន័យវាយប្រហារបែបបុគ្គលរបស់លោកស្រី គីម យូជូងលើរូបលោកប្រធានាធិបតី យូន ស៊ុកយោល ទំនាក់ទំនងកូរ៉េខាងជើងនិងខាងត្បូង ត្រូវជួបការលំបាកខ្លាំង ក្នុងអំឡុងពេល៥ឆ្នាំ នៃអាណត្តិរបស់ប្រធានាធិបតីថ្មី។ លោកយូនថាការរំសាយកម្មវិធីនុយក្លេអ៊ែរជាមូលដ្ឋានគ្រឹះនៃ សន្តិភាព ហើយថ្ងៃនេះ ជាមួយនឹងការចំអកឱ្យលោកយូន លោកស្រី គីម យ៉ូជុង ចង់ប្រាប់ថាកូរ៉េខាងជើងប្រឆាំងខ្លាំងបំផុតនឹងកូរ៉េខាងត្បូង។ នេះបើតាមការយល់ឃើញរបស់លោកសាស្ត្រាចារ្យ យ៉ាង ម៉ូជិន Yang Moo-Jin នៃសាកលវិទ្យាល័យសិក្សាកូរ៉េខាងជើង។
បន្ទាប់ពីស្ងប់ស្ងាត់អស់មួយខែ ម្យិលម្ង៉ៃ ព្យុងយ៉ាងបានបាញ់បង្ហោះមីស៊ីលបណ្តែតចំនួនពីរគ្រាប់ ទៅក្នុងសមុទ្ទលឿង។ ជាប្រភេទអាវុធមីស៊ីលដែលមិនជាប់ទណ្ឌកម្មអង្គការសហប្រជាជាតិ ដូចការសាកល្បងមុនៗទេ។ តាំងពីចូលខែមករា២០២២មក កូរ៉េខាងជើងបានធ្វើការបាញ់សាកល្បងមីស៊ីល ជាបន្តបន្ទាប់ យ៉ាងច្រើនបំផុត ក្នុងនោះមានមួយជាមីស៊ីលបាលីស្ទិកអន្តរទ្វីប ដែលកូរ៉េខាងជើងធ្លាប់បាញ់សាកល្បងម្តងកាលពីឆ្នាំ២០១៧។ អាមេរិកនិងកូរ៉េខាងត្បូងយល់ថា របបព្យុងយ៉ាងអាចនឹងសាកល្បងអាវុធនុយក្លេអ៊ែរ លើកទី៧ ក្នុងពេលឆាប់ៗនេះផង។
កូរ៉េខាងជើងបានបង្កើនការសាកល្បងហើយបង្កើនពាក្យគំរាមឥតឈប់ទៀត។ កាលពីសប្តាហ៍មុន ព្យុងយ៉ាងបានគំរាមសងសឹកមរណៈ ប្រឆាំងកូរ៉េខាងត្បូង ពីបទបានចម្លងមេរោគកូវីដមកក្នុងទឹកដីខ្លួន។ កាលពីខែកក្កដា លោក គីម ជុងអ៊ុន បានគំរាមដោយផ្ទាល់ថា កូរ៉េខាងជើងត្រៀមជាស្រេចនឹងប្រើអាវុធនុយក្លេអ៊ែរ ប្រយុទ្ធតតាំងជាមួយអាមេរិកនិងកូរ៉េខាងត្បូង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ