កូរ៉េខាងជើងប្រកាសត្រៀមជាស្រេចនឹងប្រើអាវុធនុយក្លេអ៊ែរ
មេដឹកនាំកូរ៉េខាងជើង លោក គីម ជុងអ៊ុនបានប្រកាសនៅថ្ងៃពុធទី ២៧កក្កដា ថាកូរ៉េខាងជើងត្រៀមលក្ខណៈជាស្រេចហើយនឹងប្រើប្រាស់អាវុធនុយក្លេអ៊ែរ ដើម្បីប្រយុទ្ធតតាំងនឹងកងកម្លាំងអាមេរិកនិងកូរ៉េខាងត្បូង ក្នុងពេលអនាគត។ នេះបើតាមសម្រង់អត្ថបទចុះផ្សាយក្នុងទំព័រសារព័ត៌មានផ្លូវការកូរ៉េខាងជើង Korean Central News Agency ចេញថ្ងៃព្រហស្បតិ៍ទី ២៨កក្កដា ២០២២។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៨
នៅចំពោះមុខអតីតយុទ្ធជនសម័យសង្គ្រាមកូរ៉េ (១៩៥០-៥៣) ដែលមកជួបជុំគ្នាប្រារព្ធខួបលើកទី ៦៩ឆ្នាំនៃការបិទបញ្ចប់សង្គ្រាម តាមរយៈការចុះកិច្ចព្រមព្រៀងឈប់បាញ់ ឬជាទិវាជ័យជំនះសម្រាប់កូរ៉េខាងជើង លោក គីម ជុងអ៊ុន បានប្រកាសថា កងកម្លាំងយោធានុយក្លេអ៊ែររបស់ប្រទេស បានប្រមូលផ្តុំគ្នារួចជាស្រេចនឹងបំពេញបេសកកម្ម បញ្ចេញមហិទ្ធិរិទ្ធដ៏ខ្លាំងក្លា គួរជាទីទុកចិត្ត ប្រកបដោយប្រសិទ្ធភាព និងយ៉ាងលឿនរហ័ស។
ទីភ្នាក់ងារសារព័ត៌មានផ្លូវការកូរ៉េខាងជើង ចេញផ្សាយនៅថ្ងៃព្រហស្បតិ៍បានចុះផ្សាយសម្រង់សេចក្តីថ្លែងការណ៍របស់ប្រមុខគីមជុងអ៊ុនទៀតថា “យោធាកូរ៉េខាងជើង បានត្រៀមលក្ខណៈប្រឈមតតាំងគ្រប់ស្ថានការណ៍ទាំងអស់ រាប់ទាំងការប្រយុទ្ធជាមួយកងកម្លាំងយោធាអាមេរិកផង។ ចង់ប្រើសកម្មភាពយោធាប្រឆាំងនឹងកូរ៉េខាងជើង ដែលមានអាវុធនុយក្លេអ៊ែរ ពិតជាមិនសមហេតុផលទេ និងជាការសកម្មភាពបំផ្លាញខ្លួនឯងយ៉ាងគ្រោះថ្នាក់បំផុត។ រាល់ការប៉ុនប៉ង ប្រើកម្លាំងទ័ពប្រឆាំងព្យុងយ៉ាង នឹងទទួលទណ្ឌកម្មតបវិញ គឺការកម្ទេចរដ្ឋាភិបាលសេអ៊ូល និងយោធាកូរ៉េខាងត្បូង ឱ្យហ្មត់។ នេះបើតាមសេចក្តីថ្លែងការណ៍របស់លោក គីម ជុងអ៊ុន ដដែល ដោយឆ្លៀតរិះគន់ និងគំរាម ប្រធានាធិបតីកូរ៉េខាងត្បូងថ្មី លោក យូន ស៊ុកយោល ដែលសន្យាប្រកាន់ជំហរតឹងតែងខ្លាំងដាក់កូរ៉េខាងជើង។
សុន្ទរកថាគំរាមរបស់លោកគីមជុងអ៊ុន ប្រព្រឹត្តទៅជួនចំពេលដែលអ្នកទទួលខុសត្រូវអាមេរិកនិងកូរ៉េខាងត្បូង បានប្រកាសថាព្យុងយ៉ាងបានបង្ហើយការងារសម្រាប់ធ្វើការសាកល្បងនុយក្លេអ៊ែរជាលើកទីមួយហើយ គិតចាប់តាំងពីឆ្នាំ២០១៧មក។ ហើយអាមេរិកនិងកូរ៉េខាងត្បូង ក៏បានព្រមានត្រៀមដាក់ទណ្ឌកម្មធ្ងន់ធ្ងរនិងយ៉ាងលឿនលើរបបព្យុងយ៉ាង ព្រមទាំងរៀបចំកម្លាំងទ័ពថ្មីប្រសិនបើព្យុងយ៉ាងហ៊ានសាកល្បងនុយក្លេអ៊ែរមែន។ នៅសប្តាហ៍នេះ និងរហូតដល់ថ្ងៃទី ២៩កក្កដា អាមេរិកនិងកូរ៉េខាងត្បូង បានរៀបចំធ្វើលំហាត់សឹកនៅជិតតំបន់គ្មានកងទ័ពជាប់ព្រំដែនកូរ៉េទាំងពីរ ដោយមានប្រតិបត្តិការរបស់កងឧទ្ធម្ភាចក្រប្រយុទ្ធ Apache ដោយបាញ់គ្រាប់ពិតផង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ