សំណួរចាក់ស្រេះនៅក្រោយហេតុការណ៍ការសម្លាប់រង្គាលនៅមណ្ឌលថែទាំកុមារថៃ
ចុះផ្សាយនៅថ្ងៃ៖
ស្តាប់ - ០៧:៥៣
ប្រទេសថៃកាន់ទុក្ខ នៅមួយថ្ងៃក្រោយហេតុការណ៍បាញ់ ចាក់សម្លាប់មនុស្សនៅមជ្ឈមណ្ឌលថែទាំកុមារ នៅប៉ែកខាងជើងប្រទេស។ នៅថ្ងៃសុក្រនេះ ព្រះមហាក្សត្រ និងនាយករដ្ឋមន្រ្តីថៃ នឹងធ្វើដំណើរទៅសួរសុខទុក្ខ អ្នករបួស នៅមន្ទីរពេទ្យ និងទៅកន្លែងកើតមានសោកនាដកម្ម ជាទីដែលមនុស្សយ៉ាងតិច ៣៧នាក់ ត្រូវឃាតករបាញ់ និងចាក់សម្លាប់ដោយ ឃោឃៅបំផុត កាលពីថ្ងៃព្រហស្បតិ៍។ នៅក្រោយហេតុការណ៍កាលពីថ្ងៃម្សិលមិញនៅប្រទេសថៃ គេបានចោទសួរពីដើមហេតុដែលនាំឲ្យមានការសម្លាប់រង្គាលជាពិសេសទៅលើកុមារ។ ម្យ៉ាង សោកនាដកម្ម នៅខេត្ត ណង បួរ ឡាំភូ ក្បែរព្រំដែនឡាវ បានធ្វើឲ្យគេចោទសំណួរពីបញ្ហាជួញដូរគ្រឿងញៀន និងការប្រើប្រាស់អាវុធ នៅក្នុងប្រទេសថៃ។
នៅមួយថ្ងៃក្រោយ ហេតុការណ៍បាញ់ និងចាក់សម្លាប់ មនុស្ស នៅមណ្ឌលថែទាំក្មេងតូច នៅភាគខាងជើងប្រទេស ប្រទេសថៃកាន់ទុក្ខ ដោយការទម្លាក់ទង់ជាតិ ពាក់កណ្តាលដង ចំណែក ព្រះមហាក្សត្រ និងនាយករដ្ឋមន្រ្តីថៃបានធ្វើដំណើរទៅសួរសុខទុក្ខ អ្នករបួស និងគ្រួសារ សាច់ញាតិរបស់ជនរងគ្រោះ ដែលត្រូវឃាតករ បាញ់ និងចាក់សម្លាប់កាលពីថ្ងៃព្រហស្បតិ៍ម្សិលមិញ។ ប្រជាជនថៃ និងពិភពលោកនៅតែរន្ធត់ ប៉ុន្តែ នៅតែចង់ដឹងពីដំណើរដើមហេតុដែលធ្វើឲ្យកើតមានសោកនាដកម្មសម្លាប់មនុស្សយ៉ាងតិច ៣៧នាក់ ដែលនៅក្នុងនោះ មាន២៣នាក់ ជាកុមារ។
ជាពិសេស ឪពុកម្តាយ របស់កុមារតូចៗ និងក្រុមគ្រួសាររបស់ជនរងគ្រោះ ដែលនៅតែយំទួញសោក មិនអស់ចិត្ត ពីការបាត់បង់ ដ៏ខ្លោចផ្សារ មនុស្សជាទីស្រឡាញ់របស់ខ្លួន។ គ្រប់គ្នា មិននឹកស្មានថា នៅក្នុងមជ្ឈមណ្ឌលថែទាំក្មេងតូច នៅក្នុងភូមិដ៏តូចស្ងប់ស្ងាត់ ក្នុងខេត្ត ណង បួរ ឡាំភូ ដែលនៅជាប់ព្រំដែនឡាវ បែរជាជួបរឿងដ៏អាក្រក់បែបនេះទេ។ ហើយក៏គ្មាននរណាអាចដឹងទេថា Panya Khamrab អាយុ ៣៤ឆ្នាំដែលជាអតីតប៉ូលិស នៅទីនោះ បែរជាប្រើកាំភ្លើង និងកាំបិតចាក់សម្លាប់មនុស្ស នៅមណ្ឌលថែទាំកុមារយ៉ាងដូច្នេះដែរ។
តាមតួលេខចុងក្រោយរបស់អាជ្ញាធរសុខាភិបាលថៃ មនុស្ស យ៉ាងតិច ៣៧នាក់ ដែលនៅក្នុងនោះ មានកុមារ ២៣នាក់ ត្រូវ ឃាតករPanya Khamrab សម្លាប់ដោយប្រើកាំភ្លើង និងកាំបិត។
តាមនាយកមជ្ឈមណ្ឌលថែទាំកុមារ ខាងលើ ហេតុការណ៍សម្លាប់រង្គាល ចាប់ផ្តើម ឡើងនៅម៉ោងអាហារថ្ងៃត្រង់ នៅពេលឃាតករដើរទៅបាញ់សម្លាប់គ្រូបង្រៀន នៅកន្លែងបាយ ខាងក្រៅមណ្ឌល។ បន្ទាប់មក ឃាតករ បានរុញធាក់ទម្លាយទ្វារ ចូលទៅបាញ់សម្លាប់បុគ្គលិក និងចាក់សម្លាប់ក្មេងទាំងអស់ នៅក្នុងបន្ទប់ ដែលមានចំនួន ២៤នាក់ ដែលមានអាយុ ២-៣ឆ្នាំ។
តាមនាយកខាងលើ ក្មេងគេងនៅក្នុងបន្ទប់ទាំងអស់មាន២៣នាក់ ត្រូវឃាតករចាក់សម្លាប់ ដោយនៅសល់តែក្មេងម្នាក់គត់ដែលនៅរួចរស់ជីវិត ដោយសារតែពេលនោះ គេកំពុងគេងដណ្តប់ភួយជិត ដែលឃាតករមើលមិនឃើញ។ ជាទូទៅ មណ្ឌលថែទាំកុមារតូច ទទួលមើលក្មេង ៩២នាក់ ប៉ុន្តែ នៅថ្ងៃកើតហេតុ គេទទួលមើលក្មេងតែ ២៤នាក់ប៉ុណ្ណោះ ព្រោះថា ឪពុកម្តាយផ្សេងទៀតមិនបានយកកូន មកដាក់នៅមណ្ឌល ដោយសារអាកាសធាតុមិនល្អ ផង និងដោយសារចៃដន្យ ឡានក្រុងខូចផង។
សំណួរចាក់ស្រេះស្តីពីមូលហេតុដែលធ្វើឲ្យឃាតករ បាញ់ ចាក់សម្លាប់គ្រូបង្រៀន និងកុមារ
តើឃាតករ Panya Khamrabខឹងគុំគួននឹងជនរងគ្រោះពីរឿងអ្វី ជាពិសេសកុមារដែលមានអាយុ ត្រឹម ២ ៣ឆ្នាំ?
គេនៅតែមិនយល់ ថា ហេតុអ្វីបានជាឃាតករ Panya Khamrab អាចលើកដៃចាក់សម្លាប់កុមារបាញ់សម្លាប់ ស្រ្តីគ្រូបង្រៀន ដែលកំពុងមានផ្ទៃពោះ ៨ខែ បានយ៉ាងដូចម៉េច?
រហូតមកដល់ម៉ោងនេះ ប៉ូលិសនៅតែមិនទាន់ដឹងមូលហេតុពិតប្រាកដ។ ការស៊ើបអង្កេតក៏នឹងត្រូវការពេលវេលាយូរបន្តិច ព្រោះថា ឃាតករ ដែលជាអ្នកបង្កហេតុ បានបាញ់សម្លាប់ខ្លួន នៅក្រោយសម្លាប់ ភរិយា និងកូនប្រុសរបស់ខ្លួនរួចទៅហើយដែរ។
យ៉ាងណាក៏ដោយ ទោះគេមិនដឹងពីមូលហេតុដែលធ្វើឲ្យ Panya Khamrab ដើរសម្លាប់មនុស្សប៉ុន្តែ គេបានដឹងខ្លះៗពីដំណើរដើមទងរបស់ឃាតករ ដូចជាPanya Khamrab ត្រូវបានគេបណ្តេញចេញពីកាងារ ប៉ូលិស កាលពីខែ មិថុនា ដោយសាររឿងប្រើគ្រឿងញៀន។
សាក្សីជាគ្រូបង្រៀននៅមជ្ឈមណ្ឌលថែទាំកុមារ ម្នាក់ បាននិយាយថា គេស្គាល់ Panya Khamrab ច្បាស់ណាស់ ព្រោះថា ឃាតកររូបនេះ ធ្លាប់យកកូនប្រុស មកឲ្យនៅរៀននៅមជ្ឈមណ្ឌលដែរ ប៉ុន្តែ ទើបតែ បាត់មុខ ទៅ ១ខែចុងក្រោយ នេះ។ ម្យ៉ាង នៅភូមិ គ្រប់គ្នាធ្លាប់ស្គាល់ Panya Khamrab ថា ដំបូងឡើយ គេជាប៉ូលិសស្លូតរួសរាយ ប៉ុន្តែ ក្រោយមក បានក្លាយជាអ្នកប្រើគ្រឿងញៀនយ៉ាងចាស់ដៃ។ នៅថ្ងៃព្រហស្បតិ៍ ពោលគឺនៅប៉ុន្មានម៉ោងមុន ទៅបាញ់និងចាក់សម្លាប់មនុស្ស នៅមណ្ឌលថែទាំកុមារ Panya Khamrab ត្រូវបានតុលាការបើកសវនាការជំនុំជម្រះ លើបទចោទប្រកាន់ ប្រើ និងជួញដូរថ្នាំញៀន។ តុលាការត្រូវចេញសាលក្រមនៅថ្ងៃសុក្រនេះ ថា តើ អតីតប៉ូលិស Panya Khamrab មានទោស ប្រើ និងជួញដូរថ្នាំញៀនដែរឬទេ។ សាក្សី ដែលរត់គេចខ្លួន ពីការតាមចាក់សម្លាប់របស់ Panya Khamrab ម្នាក់បាននិយាយប្រាប់ទូរទស្សន៍ថៃ ថា នៅពេលកំពុងប្រព្រឹត្តអំពើឃាតកម្ម Panya Khamrab ទំនងកំពុងស្ថិតក្រោមឥទ្ធិពលរបស់ថ្នាំញៀន។ ប៉ុន្តែ ប្រធានប៉ូលិសជាតិថៃ បាននិយាយនៅក្នុងសន្នីសិទកាសែត នៅថ្ងៃសុក្រថា លទ្ធផលតេស្តឈាមរបស់ Panya Khamrab បានបង្ហាញថា Panya Khamrabគ្មានគ្រឿងញៀនក្នុងខ្លួនទេ នៅពេលកំពុងធ្វើសកម្មភាពដើរចាក់សម្លាប់មនុស្ស។
សោកនាដកម្មនៅស្រុក Na Klang កាលពីថ្ងៃព្រហស្បតិ៍ បានរំលេចឲ្យឃើញ ពីការរីកសាយភាយនៃការប្រើ និងជួញដូរ គ្រឿងញៀន នៅប្រទេសថៃ ជាទីដែលតម្លៃគ្រឿងញៀនបានធ្លាក់ថយចុះខ្លាំង ដោយសារតែការផ្គត់ផ្គង់មានច្រើនជាង តម្រូវការ។ នេះបើតាមរបាយការណ៍របស់អង្គការសហប្រជាជាតិ ដែលបានរិះគន់ថៃ ថាជាប្រទេសដែលមានការចរាចរណ៍ សារធាតុញៀន និងផលិតគ្រឿងញៀន ធំជាងគេ នៅអាស៊ីអាគ្នេយ៍។
ម្យ៉ាងទៀត ទោះការបាញ់សម្លាប់មនុស្សជារឿងកម្រនៅប្រទេសថៃ ប៉ុន្តែ ថៃ នេះក៏ត្រូវបានគេចាត់ជាប្រទេសអាស៊ីអាគ្នេយ៍មួយដែលមានការចរាចរណ៍អាវុធច្រើនណាស់ដែរ បន្ទាប់ពីអាមេរិក។ តាមអង្គការ Gunpolicy.org ប្រជាជនថៃ ១៥នាក់ ក្នុងចំណោម ១០០នាក់ មានអាវុធក្នុងដៃ ចំណែក ប្រជាជនអាមេរិក ១២០ ក្នុង១០០នាក់ ពោលគឺប្រជាជនអាមេរិកម្នាក់ មានអាវុធលើសពី១ដើម។
កាំភ្លើងដែលឃាតករប្រើ សម្រាប់បាញ់សម្លាប់ជនរងគ្រោះជាកាំភ្លើងស្របច្បាប់
ប៉ូលិសថៃបាននិយាយពិតមែនថា ឃាតករ Panya Khamrab បានប្រើកាំភ្លើងស្របច្បាប់ បាញ់សម្លាប់មនុស្ស កាលពីថ្ងៃព្រហស្បតិ៍ម្សិលមិញ ប៉ុន្តែ មិនបានបញ្ជាក់ថា តើនោះជាកាំភ្លើងសម្រាប់មុខងារប៉ូលិស ឬជាកាំភ្លើង ដែល Panya Khamrab បានទិញដោយខ្លួនឯង ដោយស្របច្បាប់។ បើសិនជាកាំភ្លើងសម្រាប់មុខងារប៉ូលិស ហេតុអ្វីបានជា Panya Khamrab នៅតែអាចមានវានៅជាប់ខ្លួន នៅពេល Panya Khamrab ត្រូវបានគេបណ្តេញចេញពីការងារប៉ូលិសតាំងពីខែមិថុនា រួចទៅហើយនោះ។ ហេតុអ្វីបានជាគេមិនដកហូតកាំភ្លើង នៅក្រោយ Panya Khamrab លែងមានតួនាទីជាប៉ូលិស ? ទាំងនេះ ជាអ្វីដែលប៉ូលិសថៃ កំពុងស៊ើបអង្កេត។
សោកនាដកម្ម បាញ់ ចាក់សម្លាប់មនុស្ស នៅស្រុក Na Klang ក្នុងខេត្តណងបួ ឡាំភុ ឆ្លុះបញ្ចាំងផងដែរពីអំពើហិង្សាសម្លាប់មនុស្ស ដោយសារការប្រើកាំភ្លើង។
ទោះការសម្លាប់មនុស្សទ្រង់ទ្រាយធំ កម្រកើតមាន នៅថៃ ប៉ុន្តែ នៅប្រទេសថៃ ដែលសំបូរចរាចរណ៍ កាំភ្លើង ខុសច្បាស់ អាជ្ញាធរតែងបារម្ភពីការផ្ទុះអាវុធហិង្សា នៅក្នុងប្រទេស។
តាមរបាយការណ៍របស់អង្គការតាមដានឃ្លាំមើលអាវុធ ឈ្មោះ Gunpolicy.orgនៅឆ្នាំ ២០១៧ ថៃ មានអ្នកកាន់អាវុធជាលក្ខណៈ ឯកជន ជាង ១០លាននាក់ ដែលនៅក្នុងនោះ មាន៦លានដើមដែលចុះបញ្ជីស្របច្បាប់។
ច្បាប់គ្រប់គ្រងអាវុធនៅប្រទេសថៃ តឹងរ៉ឹង ព្រោះអ្នកដែលអាវុធខុសច្បាប់ ត្រូវប្រឈមនឹងទោសជាប់ពន្ធាគារ ១០ឆ្នាំ និងប្រាក់ពិន័យ ៥៣៥ដុល្លារ ប៉ុន្តែ ដោយសារ ថៃត្រូវបានគេចាត់ទុកជាទីផ្សារងងឹត លក់អាវុធ សំខាន់ មួយ នៅតំបន់អាស៊ី អាគ្នេយ៍ នាំមុខកម្ពុជា និងវៀតណាម នោះការទិញប្រើប្រាស់អាវុធ ប្រព្រឹត្តអំពើហិង្សាសម្លាប់មនុស្ស ដូចជា នៅស្រុក Na Klang កាលពីថ្ងៃម្សិលមិញ គឺជារឿងដែលអាចកើតមានឡើង គ្រប់ពេលវេលា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ