របាយការណ៍ AIE៖សង្រ្គាមអ៊ុយក្រែនកំពុងពន្លឿនពិភពលោកឲ្យងាកទៅរកថាមពលបៃតង
ចុះផ្សាយនៅថ្ងៃ៖
ស្តាប់ - ០៦:៥៥
នៅថ្ងៃព្រហស្បតិ៍ ទី២៧ តុលានេះ ទីភ្នាក់ងារថាមពលអន្តរជាតិហៅកាត់ជាភាសាបារាំង AIE បានចេញផ្សាយរបាយការណ៍ប្រចាំឆ្នាំស្តីពីថាមពលក្នុងលោក។ នៅក្នុងរបាយការណ៍ AIE បានមើលឃើញថា សង្រ្គាមអ៊ុយក្រែនកំពុងរុញពិភពលោកឲ្យងាកទៅរកថាមពលបៃតងកាន់តែលឿនជាងមុន។ តែ AIE មិនភ្លេចព្រមានពីគម្លាតកាន់តែឆ្ងាយរវាងក្រុមប្រទេសអ្នកមាន និងក្រុមប្រទេសអ្នកក្រនៅក្នុងការវិនិយោគលើថាមពលបៃតង។ បន្ទាប់មក AIE បានលើកឡើងពីកម្រិតឧស្ម័នផ្ទះកញ្ចក់ដល់កំពូលនៅឆ្នាំ ២០២៥ មុននឹងធ្លាក់ចុះនៅឆ្នាំ ២០៥០។
សង្រ្គាមរុស្ស៊ីឈ្លានពានអ៊ុយក្រែនកំពុងរុញអឺរ៉ុបឲ្យធ្លាក់ក្នុងវិបត្តិថាមពលសព្វថ្ងៃ។ តែសង្រ្គាមមួយនេះក៏បានបង្ខំឲ្យបស្ចិមលោក ក្នុងនោះមានអឺរ៉ុបបានចាត់វិធានការដាក់ទណ្ឌកម្មសេដ្ឋកិច្ចប្រឆាំងរុស្ស៊ីដោយកាត់បន្ថយការទិញថាមពលពីរុស្ស៊ី ពិសេសឧស្ម័ន ប្រេង និងធ្យូងថ្ម។ ជាការឆ្លើយតបវិញ រុស្ស៊ីបានប្រើថាមពលជាអាវុធដោយបិទក្បាលរ៉ូប៊ីណេឧស្ម័នឈប់លក់ឧស្ម័នទៅឲ្យអឺរ៉ុប។ សម្រាប់អឺរ៉ុប រឿងប្រេង និងធ្យូងថ្មមិនចំណោតទេ ព្រោះអឺរ៉ុបមិនសូវពឹងច្រើនលើរុស្ស៊ី និងក៏អាចងាយរកទិញពីកន្លែងផ្សេងបាន។ តែចំណោតខ្លាំងទាក់ទងនឹងឧស្ម័នដែលអឺរ៉ុបបានពឹងច្រើនលើរុស្ស៊ី នោះបើទោះបីជាមានប្រទេសខ្លះបានពឹងតិច ឬពឹងច្រើនក៏ដោយ។
អ៊ីចឹងហើយបានជានៅពេលនេះ អឺរ៉ុបកំពុងធ្លាក់ក្នុងវិបត្តិថាមពលដោយខ្វះភ្លើងអគ្គិសនី និងឧស្ម័នប្រើប្រាស់ ខណៈដែលរដូវរងារឈានចូលកាន់តែជិត។ តាមទីភ្នាក់ងារថាមពលអន្តរជាតិ នេះហើយជាដើមចម និងជាមេរៀនដែលបានធ្វើឲ្យអឺរ៉ុបផ្តើមបែរងាកទៅរកថាមពលផ្សេងក្រៅពីថាមពលបានមកពីប្រេង ឧស្ម័ន និងធ្យូងថ្ម។ ថាមពលផ្សេងដែលទីភ្នាក់ងារអន្តរជាតិចង់និយាយនេះ ជាថាមពលបៃតងដែលមិនចេះរីងស្ងួត និងប្រាកដប្រជា។ ដូច្នេះសម្រាប់ទីភ្នាក់ងារថាមពលអន្តរជាតិ សង្រ្គាមអ៊ុយក្រែនបានដាស់តឿនពិភពលោក ពិសេសអឺរ៉ុបឲ្យបង្កើនការវិនិយោគកាន់តែលឿនលើថាមពលបៃតងដែលបានផ្តល់អត្ថប្រយោជន៍សំខាន់ចំនួនពីរ ទី១ មិនបំពុលបរិយាកាស និងទី២ មិនត្រូវការពឹងលើអ្នកដទៃ។
បរិមាណកាបូនឡើងដល់កំពូលក្នុងឆ្នាំ ២០២៥ និងធ្លាក់ចុះនៅឆ្នាំ ២០៥០
នៅចំពោះមុខពេលនេះ និងដើម្បីបំពេញការខ្វះថាមពលប្រើប្រាស់ ប្រទេសខ្លះគ្មានជម្រើសផ្សេងក្រៅពីបង្កើនការប្រើប្រេង ឧស្ម័ន និងធ្យូងថ្ម។ ទង្វើនេះជាការបង្កើនឧស្ម័នផ្ទះកញ្ចក់នៅក្នុងបរិយាកាស ព្រោះប្រេង ឧស្ម័ន និងធ្យូងថ្មជាប្រភពថាមពលផូស៊ីលដែលបង្កចេញជាឧស្ម័នកាបូនិច ឬកាបូន ឬមួយហៅឧស្ម័នផ្ទះកញ្ចក់។ ឧស្ម័នប្រភេទនេះជាប្រភពចម្បងនៃការឡើងកម្តៅលើភពផែនដីរបស់យើងសព្វថ្ងៃ។ ក្រៅពីនេះ មេតានក៏បានរួមចំណែកនៅក្នុងការបញ្ចេញឧស្ម័នផ្ទះកញ្ចក់ដែរ។ ក៏ដូចជារៀងរាល់ឆ្នាំ ទីភ្នាក់ងារថាមពលអន្តរជាតិបានសិក្សាលើសេណារីយ៉ូនៃការប្រើថាមពលបានមកពីប្រភពចំនួន ៣ នៅក្នុងរបាយការណ៍របស់ខ្លួន គឺប្រេង ឧស្ម័ន និងធ្យូងថ្ម។
តាមទីភ្នាក់ងារថាមពលអន្តរជាតិ កំណើននៃការប្រើប្រេង ឧស្ម័ន និងធ្យូងថ្មពេលនេះកំពុងធ្វើឲ្យពិភពលោកថប់ដង្ហើម និងបង្កឲ្យមានការឡើងកម្តៅផែនដី។ តែទីភ្នាក់ងារថាមពលអន្តរជាតិមិនភ្លេចបញ្ជាក់ថា ជាមួយនឹងការសន្យា និងការប្រឹងប្រែងរបស់រដ្ឋាភិបាលក្នុងការវិនិយោគលើថាមពលបៃតង កម្រិតឧស្ម័នផ្ទះកញ្ចក់ឡើងដល់ចំណុចកំពូលក្នុងឆ្នាំ ២០២៥ ពោលមានបរិមាណ ៣៧ ០០០លានតោន និងធ្លាក់ចុះនៅ ៣២ ០០០លានតោននៅឆ្នាំ ២០៥០។ ទោះជាយ៉ាងនេះក៏ដោយ ទីភ្នាក់ងារថាមពលអន្តរជាតិបានយល់ឃើញថា កំណើនសីតុណ្ហភាពផែនដីជាមធ្យមមានប្រមាណ ២,៥អង្សារធៀបនឹងសម័យមុនឧស្សាហកម្ម។ កំណើន ២,៧អង្សារគឺឆ្ងាយពី ១,៥អង្សារដែលជាកម្មវត្ថុនៃកិច្ចព្រមព្រៀងក្រុងប៉ារីសស្តីពីអាកាសធាតុអនុម័តក្នុងឆ្នាំ ២០១៥។
ការប្រឹងប្រែងនៅមិនទាន់គ្រប់គ្រាន់ដើម្បីបញ្ជៀសផលវិបាកអាកាសធាតុ
នៅក្នុងរបាយការណ៍ ទីភ្នាក់ងារថាមពលអន្តរជាតិបានទាមទារឲ្យមានការប្រឹងប្រែងបន្ថែមទៀត ហើយការប្រឹងប្រែងនេះត្រូវចាប់ផ្តើមពីការកាត់បន្ថយគម្លាតដែលកំពុងមានខ្លាំងរវាងក្រុមប្រទេសអ្នកក្រ និងក្រុមប្រទេសអ្នកមាននៅក្នុងការវិនិយោគលើថាមពលបៃតង។ បន្ទាប់មក ទីភ្នាក់ងារថាមពលអន្តរជាតិបានគូសបញ្ជាក់ជាថ្មីពីតម្រូវការវិនិយោគយ៉ាងច្រើនសម្បើមនៅក្នុងថាមពលស្អាត។ ថាមពលស្អាតនេះមានទាំងថាមពលបៃតង ថាមពលគ្មានកាបូន ដូចជានុយក្លេអ៊ែរ រួមទាំងនៅក្នុងវិស័យច្រើនទៀត ដូចយ៉ាងការផលិតរថយន្តអគ្គិសនី។
តាមសេណារីយ៉ូរបស់ទីភ្នាក់ងារថាមពលអន្តរជាតិ ការវិនិយោគនៅក្នុងថាមពលស្អាតត្រូវមានទឹកប្រាក់ជាង ២ ០០០ ០០០លានដុល្លារពីពេលនេះទៅឆ្នាំ ២០៣០ និងកើនឡើងទ្វេដងដល់ ៤ ០០០ ០០០លានដុល្លារដើម្បីអាចឈានទៅសម្រេចកម្មវត្ថុសូន្យកាបូននៅឆ្នាំ ២០៥០។ តាមរយៈរបាយការណ៍របស់ទីភ្នាក់ងារថាមពលអន្តរជាតិពេលនេះនាំឲ្យគេយល់បានភ្លាមថា ការវិនិយោគនៅក្នុងវិស័យថាមពលស្អាតត្រូវតែបង្កើន ១គុណនឹង៣ពីពេលនេះទៅឆ្នាំ ២០៣០៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ