ការបោះឆ្នោតពាក់កណ្តាលអាណត្តិ៖ តើបក្សប្រជាធិបតេយ្យរបស់លោកចូ បៃដិននឹងអាចរបូតបាត់សភាដែរឬទេ?
ចុះផ្សាយនៅថ្ងៃ៖
ស្តាប់ - ០៥:៤៨
នៅអាមេរិក ការបោះឆ្នោតពាក់កណ្តាលអាណត្តិ បានចាប់ផ្តើម នៅថ្ងៃអង្គារទី ៨វិច្ឆិកានេះ។ ប្រជាជនអាមេរិកប្រមាណ ៤២លាននាក់ បានចេញទៅបោះឆ្នោត តាំងពីមុនថ្ងៃអង្គារ។ នៅក្នុងការបោះឆ្នោតដែលតែងរៀបចំឡើង នៅពីរឆ្នាំម្តង ពោលគឺនៅក្នុងពេលប្រធានាធិបតីកាន់តំណែងបានពាក់កណ្តាលអាណត្តិ ពលរដ្ឋអាមេរិកត្រូវបោះឆ្នោតជ្រើសរើសសមាជិករដ្ឋសភា (ឬសភាតំណាង) មួយភាគបីនៃសមាជិកព្រឹទ្ធសភា និងអភិបាលរដ្ឋ ព្រមទាំងអភិបាលក្រុង និងសមាជិកសភានៅតាមរដ្ឋនីមួយៗ។ ការបោះឆ្នោតពាក់កណ្តាលអាណត្តិកម្រនឹងផ្តល់លទ្ធផលល្អ សម្រាប់រដ្ឋាភិបាលកាន់អំណាច។ តើលោកប្រធានាធិបតីចូ បៃដិនអាចប្រឈមនឹងផលវិបាកអ្វី បើសិនគណបក្សប្រជាធិបតេយ្យបរាជ័យ នៅក្នុងការបោះឆ្នោតលើកនេះ?
ពលរដ្ឋអាមេរិកត្រូវទៅចូលរួមនៅក្នុងការបោះឆ្នោតពាក់កណ្តាល ដែលត្រូវចាប់ផ្តើមនៅថ្ងៃអង្គារទី ៨វិច្ឆិកានេះ។ ការបោះឆ្នោតលើកនេះ ត្រូវបានគេមើលឃើញថា ជាការបោះឆ្នោតដ៏សំខាន់ និងប្រកួតប្រជែងគ្នាខ្លាំងរវាងគណបក្សកាន់អំណាចគឺគណបក្សប្រជាធិបតេយ្យ របស់លោកចូ បៃដិន និងគណបក្សសាធារណរដ្ឋ ដែលជាបក្សប្រឆាំង។
ការបោះឆ្នោត ពាក់កណ្តាលអាណត្តិ ដែលតែងរៀបចំឡើង នៅរៀងរាល់២ឆ្នាំម្តង ដើម្បីផ្លាស់ប្តូរសមាជិករដ្ឋសភាទាំងស្រុង និងសមាជិក១ភាគបី នៃសមាជិកព្រឹទ្ធសភា កម្រនឹងផ្តល់លទ្ធផលជាវិជ្ជមានទៅខាងគណបក្សកាន់អំណាច។
ការបោះឆ្នោត ពាក់កណ្តាលអាណត្តិ ជាពេលវេលាដែលប្រជាជនអាមេរិកត្រូវវាយតម្លៃការដឹកនាំបានពីរឆ្នាំ ឬពាក់កណ្តាលអាណត្តិរបស់ប្រធានាធិបតី។ ជាទូទៅ ប្រជាជនដែលមិនសប្បាយចិត្តនឹងនយោបាយដឹកនាំ របស់ប្រធានាធិបតី តែងងាកទៅបោះឆ្នោត គាំទ្រឲ្យគណបក្សប្រឆាំង ឲ្យបានទទួលសំឡេងច្រើនគ្រប់គ្រង រដ្ឋសភា និងព្រឹទ្ធសភា ដើម្បី ជាមេរៀន ដាក់ទណ្ឌកម្មគណបក្សរបស់ប្រធានាធិបតី។
នៅក្នុងការបោះឆ្នោតពាក់កណ្តាលអាណត្តិលើកនេះ សមាជិករដ្ឋសភាទាំង ៤៣៥រូប នឹងត្រូវបោះឆ្នោតជ្រើសរើសថ្មី។ ចំណែក សមាជិកព្រឹទ្ធសភាអាមេរិក ដែលមានចំនួន សរុប ១០០រូប នឹងមានសមាជិក ១ភាគ៣ ពោល គឺ ៣៥រូបដែលត្រូវផុតអាណត្តិ ហើយនិងត្រូវបោះឆ្នោតជ្រើសរើសថ្មី។
ការស្ទង់មតិបានបង្ហាញពីសំណាងឈ្នះច្រើនរបស់គណបក្សសាធារណរដ្ឋ ដែលជាគណបក្សប្រឆាំង ព្រោះថា គណបក្សនេះ ត្រូវការឈ្នះ ប្រមាណតែ ពី ១០ ទៅ ២៥អាសនៈ បន្ថែមទៀត ប៉ុណ្ណោះ គឺអាចចូលគ្រប់គ្រងរដ្ឋសភាបានហើយ។ ការប្រកួតប្រជែងខ្លាំងរវាងបក្សទាំងពីរ មាននៅក្នុងរដ្ឋគន្លឹះ មួយចំនួន ដូចជា រដ្ឋ ចចា វីស្កូស៊ីន ណេវាដា ឬ ប៉េនស៊ីវ៉ាល់នី អារីហ្សូណា ជាដើម។
ដើម្បីទាក់ទាញប្រជាជនអាមេរិកាំង បេក្ខជនបក្សសាធារណរដ្ឋ សម្រុករិះគន់ បរិហារខ្លាំងៗនយោបាយ អសមត្ថភាពរបស់រដ្ឋបាល លោកចៃបៃដិន ដែលកំពុងធ្វើឲ្យអាមេរិកធ្លាក់ក្នុងវិបត្តិអតិផរណាធ្ងន់ធ្ងរ មិនធ្លាប់មាន (៨,២%)។ បក្សសាធារណរដ្ឋផ្តោតសំខាន់ ពីវិបត្តិទំនិញឡើងថ្លៃ ព្រោះគេដឹងថាវាជារឿងសំខាន់ សម្រាប់ឆ្នាំងបាយរបស់ប្រជាជនអាមេរិក។ គណបក្សប្រជាធិបតេយ្យវិញ បានព្យាយាមនិយាយការពារ នយោបាយសេដ្ឋកិច្ចរបស់លោកចូ បៃដិន ដែលសន្យាប្រឹងគ្រប់មធ្យោបាយដើម្បីបញ្ចុះអត្រាអតិផរណា ប៉ុន្តែ មិនសូវជាស្តាប់ចូលត្រចៀករបស់ប្រជាជនអាមេរិក ព្រោះថា ការពិតជាក់ស្តែង ទំនិញនៅតែឡើងថ្លៃ ដែលធ្វើឲ្យប៉ះពាល់ដល់ជីវភាពរបស់ប្រជាជនអាមេរិក។
តើការបោះឆ្នោតពាក់កណ្តាលអាណត្តិសំខាន់ប៉ុណ្ណាសម្រាប់លោកចូ បៃដិន?
ការបោះឆ្នោតពាក់កណ្តាលអាណត្តិសំខាន់ណាស់ សម្រាប់អនាគតនយោបាយរបស់លោកចូ បៃដិន។ ដើម្បីទាក់ទាញពលរដ្ឋអាមេរិកនៅបន្តបោះឆ្នោត ផ្តល់សំឡេងភាគច្រើនដល់គណបក្សប្រជាធិបតេយ្យ ឲ្យបន្តគ្រប់គ្រងរដ្ឋសភា និងព្រឹទ្ធសភា លោកចូ បៃដិនចង់ឲ្យប្រជាជនអាមេរិកបន្តការផ្តល់ទំនុកចិត្ត ដើម្បីឲ្យលោកអាចអនុវត្តនយោបាយរបស់លោក ដូចជាច្បាប់ រំលូតកូន ច្បាប់ថវិកាសម្រាប់ដើម្បីកំណែទម្រង់ហេដ្ឋារចនាសម្ព័ន្ធ នយោបាយអាកាសធាតុ។
លោកចូ បៃដិនបាននិយាយហើយថា បើសិនគណបក្សប្រជាធិបតេយ្យទទួលជ័យជំនះ នៅក្នុងការបោះឆ្នោតពាក់កណ្តាលអាណត្តិនោះ លោកនឹងជំរុញ ឲ្យគេបង្កើតច្បាប់សហព័ន្ធ ដើម្បីការពារសិទ្ធិរំលូតកូន។ ប៉ុន្តែ បើសិនបក្សប្រជាធិបតេយ្យរបស់លោកបាត់បង់សំឡេងភាគច្រើន ទាំងនៅសភាអ្នកតំណាងរាស្រ្ត និងនៅព្រឹទ្ធសភា នោះ កម្មវិធីនយោបាយ កំណែទម្រង់របស់លោកចូ បៃដិននឹងត្រូវ ជាប់គាំង ដោយសារតែគណបក្សប្រឆាំងដែលអាចចូលគ្រប់គ្រងសភា រង់ចាំតែ បោះឆ្នោតប្រឆាំងច្បាប់របស់ប្រធានាធិបតី។ នៅពេលនោះ លោកចូ បៃដិនមានតែប្រើសិទ្ធិវេតូរបស់ប្រធានាធិបតី សម្រាប់ប្រឆាំងការសម្រេចរបស់សភា ដែលគ្រប់គ្រងដោយបក្សប្រឆាំង។
ការបោះឆ្នោតពាក់កណ្តាលអាណត្តិអាចជាតេស្តសម្រាប់ការបោះឆ្នោតប្រធានាធិបតីអាមេរិកអាណត្តិក្រោយ ឆ្នាំ ២០២៤
ការបោះឆ្នោតពាក់កណ្តាលលើកនេះ មានបង្កប់រួចទៅហើយ នូវយុទ្ធនាការឃោសនា សម្រាប់ការបោះឆ្នោតប្រធានាធិបតី ឆ្នាំ ២០២៤ នៅពេលគេឃើញលោកដូណាល់ ត្រាំ អតីតប្រធានាធិបតី ចេញមុខឃោសនា នៅស្ទើរគ្រប់រដ្ឋអាមេរិក។ លោកដូណាល់ ត្រាំ ផ្ទាល់មិនទាន់បានប្រកាសផ្លូវការថា លោកនឹងឈរឈ្មោះ សម្រាប់ការបោះឆ្នោតប្រធានាធិបតីឆ្នាំ ២០២៤ ប៉ុន្តែ លោកបានពន្លយ ថា លោកនឹងប្រកាសដំណឹងភ្ញាក់ផ្អើល នៅសប្តាហ៍ក្រោយ។
លោកចូ បៃដិន ធ្លាប់បានព្រមានរួចហើយពីគ្រោះថ្នាក់សម្រាប់លទ្ធិប្រជាធិបតេយ្យ បើសិនគណបក្សសាធារណរដ្ឋទទួលជ័យជំនះ នៅក្នុងការបោះឆ្នោតពាក់កណ្តាលអាណត្តិ។ នៅក្នុងចំណោមបេក្ខជនគណបក្សសាធារណរដ្ឋ មានបេក្ខជនមួយចំនួនធំ បានដើរតាមលោកដូណាល់ ត្រាំ ដោយបាននិយាយថា គេទំនងមិនទទួលលទ្ធផលសំឡេងឆ្នោត នៅពេលពួកគេទទួលបរាជ័យ។ ដោយចោទ លោកចូ បៃដិន បានលួចប្លន់សំឡេងឆ្នោតរបស់លោកនៅឆ្នាំ ២០២០ លោកដូណាល់ត្រាំបានបង្កឲ្យមានចលាចល អនាធិបតេយ្យ ការសម្រុកចូលវិមានកាពីតូល កាលពីខែវិច្ឆិកា ឆ្នាំ ២០២០។
អ្វីដែលគេបារម្ភខ្លាំង គឺខ្លាចថា ការបោះឆ្នោតពាក់កណ្តាលអាណត្តិលើកនេះនឹងអាចជួបលទ្ធផល ដូច ការបោះឆ្នោត ប្រធានាធិបតី ឆ្នាំ ២០២០ បន្ទាប់ពី បេក្ខជនមួយភាគធំ ដែលជាអ្នកគាំទ្រលោកដូណាល់ត្រាំ ផ្កាប់មុខ ចេញមុខនិយាយថា ពួកគេអាចជំទាស់ មិនទទួលស្គាល់លទ្ធផលឆ្នោត។
ក្រសួងយុត្តិធម៌អាមេរិកបានបង្ហាញថា គេនឹងបញ្ជូនអ្នកសង្កេតការណ៍ ទៅកាន់រដ្ឋចំនួន២៤ ដើម្បីតាមដាន ក្រែងកើតមានភាពមិនប្រក្រតី។ វិធានការនេះ ធ្វើឡើងនៅក្នុងបរិបទមួយ ដែលភាពតានតឹងជុំវិញ ការបោះឆ្នោត បានកើនឡើងកំដៅ នៅអាមេរិក។ តាមវិបសៃតិ៍ Opensecrets ថវិកាប្រមាណ ១៧ពាន់លានដុល្លារ ដែលជាចំនួនដ៏ច្រើនមិនធ្លាប់មាន នៅក្នុងប្រវត្តិបោះឆ្នោតអាមេរិក ត្រូវបានគេចំណាយ នៅក្នុងការបោះឆ្នោតពាក់កណ្តាលអាណត្តិលើកនេះ ពោលគឺច្រើនជាង ការបោះឆ្នោត កាលពីឆ្នាំ ២០១៨។
សារៈសំខាន់នៃការបោះឆ្នោតពាក់កណ្តាលអាណត្តិលើកនេះ បានស្តែងឡើងផងដែរ តាមរយៈការចូលរួមដ៏ច្រើន របស់អ្នកបោះឆ្នោត។ តាមវិទ្យាស្ថាន គម្រោងបោះឆ្នោតអាមេរិក គិតមកដល់ថ្ងៃចន្ទ ប្រជាជនអាមេរិកាំងជាង ៤២លាននាក់ បានទៅបោះឆ្នោត ទុកជាមុន។ ៤២លាននាក់ ជាចំនួនដ៏ច្រើន បើប្រៀបធៀបនឹងចំនួនអ្នកចូលរួមនៅក្នុងការបោះឆ្នោតប្រធានាធិបតី កាលពីឆ្នាំ ២០២០៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ