ប្រធានាធិបតីបារាំងលោកម៉ាក្រុងផ្តើមទស្សនកិច្ចលើកទី២ នៅអាមេរិកនៅក្នុងបរិបទសង្រ្គាមអ៊ុយក្រែន
ចុះផ្សាយនៅថ្ងៃ៖
ស្តាប់ - ០៦:៣២
នៅថ្ងៃអង្គារ ទី២៩ វិច្ឆិកា ប្រធានាធិបតីបារាំងលោកម៉ាក្រុងផ្តើមទស្សនកិច្ចផ្លូវរដ្ឋរយៈពេល ៣ថ្ងៃនៅសហរដ្ឋអាមេរិកតាមការអញ្ជើញរបស់ប្រធានាធិបតីអាមេរិកលោកចូ បៃដិន។ នេះជាទស្សនកិច្ចផ្លូវរដ្ឋលើកទី២ របស់លោកម៉ាក្រុងនៅសហរដ្ឋអាមេរិក បន្ទាប់ពីទស្សនកិច្ចផ្លូវរដ្ឋលើកទី១ កាលពីខែមេសា ឆ្នាំ ២០១៨។ កំណត់សម្គាល់មួយទៀត ទស្សនកិច្ចផ្លូវរដ្ឋលើកទី២ របស់លោកម៉ាក្រុងនៅអាមេរិកពេលនេះធ្វើឡើងនៅក្នុងបរិបទនៃសង្រ្គាមរុស្ស៊ីឈ្លានពានអ៊ុយក្រែន។
មានចំណុចកត់សម្គាល់មួយចំនួនដែលគួរនិយាយ ទី១ ទស្សនកិច្ចផ្លូវរដ្ឋរបស់ប្រធានាធិបតីបារាំងលោកម៉ាក្រុងនៅអាមេរិកពេលនេះជាទស្សនកិច្ចផ្លូវរដ្ឋទី១ ដែលប្រធានាធិបតីអាមេរិកលោកបៃដិនបានរៀបចំទទួល និងទី២ លោកម៉ាក្រុងជាប្រធានាធិបតីបារាំងទី១ ដែលត្រូវបានរដ្ឋបាលអាមេរិកអញ្ជើញឲ្យទៅបំពេញទស្សនកិច្ចផ្លូវរដ្ឋចំនួនពីរដង។ តែទស្សនកិច្ចផ្លូវរដ្ឋចំនួនពីរដងបានធ្វើឡើងនៅក្នុងរដ្ឋបាលអាមេរិកខុសប្រធានាធិបតីគ្នា និងនៅក្នុងបរិបទមិនដូចគ្នា។ ទស្សនកិច្ចផ្លូវរដ្ឋលើកទី១ បានធ្វើឡើងកាលពីខែមេសា ឆ្នាំ ២០១៨ នៅក្នុងជំនាន់ប្រធានាធិបតីអាមេរិកលោកដូណាល់ ត្រាំ។ កាលណោះ លោកត្រាំ និងលោកម៉ាក្រុងជាប្រធានាធិបតីដែលទើបចូលកាន់តំណែងថ្មីថ្មោងដូចគ្នា។
នៅក្នុងទស្សនកិច្ចផ្លូវរដ្ឋលើកទី២ របស់លោកម៉ាក្រុងពេលនេះ លោកម៉ាក្រុងមិនមែនជាប្រធានាធិបតីដែលទើបកាន់តំណែងថ្មីថ្មោងដូចលោកបៃដិនទេ នោះទោះបីជាលោកបៃដិនធ្លាប់កាន់តំណែងអនុប្រធានាធិបតីនៅក្នុងជំនាន់ប្រធានាធិបតីអាមេរិកលោកបារ៉ាក់ អូបាម៉ាក៏ដោយ។ ទោះជាយ៉ាងនេះក្តី បារាំងបានសាទរ និងចាត់ទុកការអញ្ជើញរបស់លោកបៃដិនជាកិត្តិយសមួយដែលលោកបៃដិនផ្តល់ឲ្យបារាំងជាជាងឲ្យប្រទេសអឺរ៉ុបផ្សេងទៀត។ ចំណែកអ្នកនាំពាក្យក្រុមប្រឹក្សាសន្តិសុខជាតិនៃសេតវិមានលោកចន កឺប៊ីបានថ្លែងដោយសរសើរលោកម៉ាក្រុងជាប្រធានាធិបតីស្វាហាប់ក្នុងនាមបារាំងជាប្រទេសមហាអំណាចនុយក្លេអ៊ែរមួយនៅអឺរ៉ុប។
អ៊ុយក្រែនជាប្រធានរឿងមិនអាចខ្វះបាន
វត្តមានលើកទី២ របស់ប្រធានាធិបតីបារាំងលោកម៉ាក្រុងលើទឹកដីអាមេរិកពេលនេះធ្វើឡើងនៅក្នុងបរិបទនៃសង្រ្គាមរុស្ស៊ីឈ្លានពានអ៊ុយក្រែន។ ដូច្នេះចង់ ឬមិនចង់ អ៊ុយក្រែនជាប្រធានរឿងមិនអាចខ្វះបាននៅក្នុងជំនួបទ្វេភាគីម៉ាក្រុង បៃដិន រួមទាំងទំនាក់ទំនងទ្វេភាគីអឺរ៉ុប អាមេរិក និយាយជារួម និងទំនាក់ទំនងទ្វេភាគីបារាំង អាមេរិក និយាយដោយឡែក។ តែគេអាចនិយាយបានថា សង្រ្គាមរុស្ស៊ីឈ្លានពានអ៊ុយក្រែនបានដាស់បស្ចិមលោកឲ្យភ្ញាក់ខ្លួនជាងពេលណាៗទាំងអស់។ តាមរយៈសង្រ្គាមដែលគ្មាននរណានឹកស្មានដល់មួយនេះបានធ្វើឲ្យបស្ចិមលោកទាញបានមេរៀនច្រើនណាស់ ពិសេសអសមត្ថភាពក្នុងការឆ្លើយតបនឹងមហិច្ឆតាយោធារបស់រុស្ស៊ី។
ពិតណាស់នៅក្នុងសង្រ្គាមអ៊ុយក្រែន អឺរ៉ុប និងអាមេរិកបានពួតដៃគ្នាគាំទ្រ និងជួយអ៊ុយក្រែនគ្រប់បែបយ៉ាង ពិសេសអាវុធ ព្រមទាំងដាក់ទណ្ឌកម្មសង្កត់ ក រុស្ស៊ីតាមផ្លូវសេដ្ឋកិច្ច។ តែទន្ទឹមគ្នានេះ អឺរ៉ុប និងអាមេរិកហាក់គ្មានជំហរដូចគ្នានៅក្នុងដំណោះស្រាយដើម្បីបញ្ចប់សង្រ្គាមមួយនេះ។ ខណៈដែលលោកបៃដិនគិតតែពីផ្តល់ជំនួយឲ្យអ៊ុយក្រែន និងគាបរុស្ស៊ី លោកម៉ាក្រុងបានជួយអ៊ុយក្រែន និងបន្តមានកិច្ចសន្ទនាជាមួយប្រធានាធិបតីរុស្ស៊ីលោកពូទីនដោយសង្ឃឹមថា សង្រ្គាមបិទបញ្ចប់នៅតុចរចាក្នុងថ្ងៃណាមួយដែលភាគីជម្លោះសម្រេចចូលតុចរចា។ តែគំនិតរបស់លោកម៉ាក្រុងរបៀបនេះហាក់បានធ្វើឲ្យលោកបៃដិនទើសទាល់ចិត្តយ៉ាងខ្លាំង។
បារាំងមិនសប្បាយចិត្តនឹងនយោបាយការពារនិយមរបស់អាមេរិក
ទំនាក់ទំនងទ្វេភាគីបារាំង អាមេរិកហាក់កំពុងបន្តបំពុលដោយសម្ព័ន្ធត្រីភាគីអាមេរិក អូស្រ្តាលី និងអង់គ្លេសហៅ AUKUS ដែលបានចុះហត្ថលេខាក្នុងក្រុងវ៉ាស៊ីនតោនកាលពីខែកញ្ញា ឆ្នាំ ២០២១។ តាមរយៈសម្ព័ន្ធត្រីភាគី AUKUS មួយនេះកាលណោះបានធ្វើឲ្យបារាំងក្តៅស្លឹកត្រចៀក ខឹងសម្បារយ៉ាងខ្លាំង។ មូលហេតុ គឺមកពីអូស្រា្តលីបានលុបចោលកិច្ចសន្យាទិញនាវាមុជទឹកបារាំងចំនួន ១២គ្រឿងដែលមានទឹកប្រាក់ ៣១ពាន់លានអឺរ៉ូ និងបានងាកទៅទិញនាវាមុជទឹកអាមេរិកដើរដោយនុយក្លេអ៊ែរវិញ។ ទង្វើរបស់អូស្រា្តលីកាលណោះបានធ្វើឲ្យបារាំងពិបាកលេប ទោះបីជាអូស្រា្តលីប្រឹងលើកយកហេតុផលអ្វីទៅពន្យល់ក៏ដោយ។
លើសពីនេះ បារាំងមិនញញើតវាយប្រហារអាមេរិកចំមុខដោយចោទជាទង្វើក្បត់រវាងសម្ព័ន្ធមិត្ត។ ប្រមុខការទូតបារាំងពេលនោះលោកហ្សង់អ៊ីវ ឡឺឌ្រីយ៉ង់បានប្រើពាក្យធ្ងន់ៗ និងមិនសំចៃមាត់ដាក់អាមរិកថា មានចិត្តវៀចវេរ មើលងាយ និងនិយាយភូតភរ។ តែរឿងមួយជារឿងកន្លងហួសដែលប្រហែលលោកម៉ាក្រុងមិនលើកទៅនិយាយទេ។ ប្រធានរឿងដែលលោកម៉ាក្រុងត្រូវនិយាយដោយខានមិនបានទាក់ទងនឹងពាណិជ្ជកម្ម។ នេះជារឿងវិវាទមួយដែលលោកម៉ាក្រុងត្រូវនិយាយត្រង់ទៅ ត្រង់មកជាមួយលោកបៃដិន។
ក្រុងប៉ារីសកំពុងមិនសប្បាយចិត្តនឹងមហាផែនការវិនិយោគរាប់ពាន់លានដុល្លាររបស់លោកបៃដិនដែលបានជួយគាំទ្រវិស័យរថយន្ត និងវិស័យថាមពលបៃតងសម្រាប់តែរោងចក្រសហគ្រាសអាមេរិក។ លោកម៉ាក្រុងបានចាត់ទុកមហាផែនការវិនិយោគមួយនេះរបស់លោកបៃដិនជាមហាផែនការអាត្មានិយមដែលការពារតែផលប្រយោជន៍អាមេរិក។ អ្វីដែលលោកម៉ាក្រុងចង់បាន គឺចង់ឲ្យលោកបៃដិនគិតគូរផងដែរពីរោងចក្រសហគ្រាសអឺរ៉ុប ពិសេសបារាំងដែលកំពុងបោះទុនរកស៊ីលើទឹកដីអាមេរិក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ