លោកចូ បៃដិនផ្តើមទស្សនកិច្ច នៅអឺរ៉ុប ដើម្បីបញ្ជាក់ការវិលត្រលប់របស់អាមេរិក
ប្រធានាធិបតីអាមេរិក លោកចូ បៃដិន បានទៅដល់ ប្រទេសអ៊ីតាលី នៅថ្ងៃសុក្រនេះ និងត្រូវជួបសន្ទនាជាមួយសម្តេចសង្ឃកាតូលិក ហ្វ្រង់ស័រ នៅបុរីវ៉ាទីកង់។ នៅថ្ងៃសៅរ៍ ស្អែក លោកចូ បៃដិននឹងចូលរួមក្នុងជំនួបកំពូលក្រុមប្រទេសមហាអំណាចឧស្សាហកម្ម G20 មុននឹងធ្វើដំណើរទៅប្រទេសអង់គ្លេស នៅថ្ងៃអាទិត្យ ចុងសប្តាហ៍ ដើម្បី ចូលរួមក្នុងសន្និសីទអន្តរជាតិស្តីពីអាកាសធាតុ។ វត្តមានរបស់មេដឹកនាំអាមេរិក នៅក្នុងជំនួបកំពូល G20 និងសន្និសីទអន្តរជាតិស្តីពីអាកាសធាតុ បញ្ជាក់ពីការវិលត្រលប់របស់អាមេរិក ដែលចង់នាំមុខគេ ក្នុងការប្រយុទ្ធប្រឆាំងការប្រែប្រួលអាកាសធាតុ។
ចុះផ្សាយនៅថ្ងៃ៖
ស្តាប់ - ០២:៣៣
ប្រធានាធិបតីអាមេរិកលោកចូ បៃដិន ចាប់ផ្តើមទស្សនកិច្ចនៅទឹកដីអឺរ៉ុបជាមួយ ជំនួបបិទទ្វារជាមួយ សម្តេចសង្ឃកាតូលិក ហ្វ្រង់ស័រនៅបុរីវ៉ាទីកង់។ ជាផ្លូវការ ប្រមុខសង្ឃកាតូលិក និងមេដឹកនាំអាមេរិក នឹងនិយាយគ្នាពីរឿងប្រែប្រួលអាកាសធាតុ ភាពក្រីក្រ និងជំងឺរាតត្បាត ប៉ុន្តែ មិនលើកនិយាយពីសិទ្ធិរំលូតកូនដែលជាប្រភពនៃការខ្វែងគំនិតគ្នានោះទេ។
នៅល្ងាចថ្ងៃសុក្រ ប្រធានាធិបតីអាមេរិកជួបនាយករដ្ឋមន្រ្តី អ៊ីតាលី ដែលជាម្ចាស់ផ្ទះ រៀបចំជំនួបកំពូលG20 ដែលត្រូវប្រព្រឹត្តទៅ នៅចុងសប្តាហ៍នេះ។ នៅ អ៊ីតាលី លោកចូ បៃដិន មានផែនការជួបពិភាក្សាផ្ទាល់ជាមួយ ប្រធានាធិបតីបារាំង លោកអេម៉ានុយអែល ម៉ាក្រុង ដើម្បីបន្ធូរបន្ថយភាពតានតឹង ជាមួយប្រទេសសម្ព័ន្ធមិត្ត។ បារាំងនៅមិនទាន់ស្ងប់ ថយកំហឹងនៅឡើយទេ បន្ទាប់ពី អាមេរិកបានឆក់យកកិច្ចសន្យារបស់បារាំង ដែលត្រូវលក់នាវាមុជទឹកឲ្យអូស្ត្រាលី។
នៅក្នុងយន្តហោះសំដៅទីក្រុងរ៉ូម ទីប្រឹក្សាសន្តិសុខជាតិរបស់សេតវិមាន លោក Jack Sollivanបាននិយាយប្រាប់អ្នកកាសែតថា កិច្ចប្រជុំរវាងលោកចូ បៃដិន និងប្រធានាធិបតីបារាំងជាកិច្ចប្រជុំបែបស្ថាបនា និងថា មានសំណុំរឿងជាច្រើន ដែលនៅក្នុងនោះ បារាំងនិងអាមេរិក មានផលប្រយោជន៍ និង ទស្សនវិស័យរួមគ្នា។ តាម ទីប្រឹក្សាសន្តិសុខជាតិអាមេរិក មេដឹកនាំរបស់ប្រទេសទាំងពីរ ចង់ផ្សះផ្សារគ្នា នៅក្រោយវិបត្តិការទូត ដោយសារតែសំណុំរឿងលក់នាវាមុជទឹកឲ្យអូស្ត្រាលី។
ប្រធានាធិបតីអាមេរិកចង់ឆ្លៀតឱកាសផងដែរ យកជំនួបកំពូល G20នៅអ៊ីតាលី និងសន្និសីទស្តីពីអាកាសធាតុនៅអង់គ្លេស ដើម្បី ធានាសម្ព័ន្ធមិត្ត និងសហគមន៍អន្តរជាតិថា អាមេរិកបានវិលត្រលប់មកនាំមុខគេ ក្នុងសំណុំរឿងអន្តរជាតិ ជាពិសេស រឿងប្រយុទ្ធប្រឆាំងនឹងការប្រែប្រួលអាកាសធាតុ។
សម្រាប់ប្រឹក្សាសន្តិសុខជាតិអាមេរិក លោកJack Sollivan អាមេរិកបានវិលត្រលប់មកធ្វើជាអ្នកដឹកនាំគេ ក្នុងសំណុំរឿងអាកាសធាតុ។
គេវាយតម្លៃថា ប្រធានាធិបតីអាមេរិកទំនងជានឹងអាចលើកនិយាយពីផែនការថវិកាអាមេរិកជាង ៥៥០ពាន់លានដុល្លារ សម្រាប់ការចំណាយទៅលើផែនការកាត់បន្ថយការបញ្ចេញឧស្ម័នកាបូនិក ឧស្ម័នផ្ទះកញ្ចក់ដែលជាប្រភពធ្វើឲ្យផែនដីឡើងកំដៅ។ នៅថ្ងៃព្រហស្បតិ៍ទី ២៨តុលា ប្រធានាធិបតីអាមេរិក នៅតែមិនទាន់ អាចបញ្ចុះបញ្ចូលសមាជិកគណបក្សប្រជាធិបតេយ្យរបស់លោក នៅសភាអ្នកតំណាងរាស្រ្ត ឲ្យគាំទ្រផែនការចំណាយ ជាង ១,៨ទ្រីលានដុល្លារ ដែលនៅក្នុងនោះ មានជាង ៥៥០ពាន់លានដុល្លារ សម្រាប់បញ្ហាអាកាសធាតុ។
គ្មានការគាំទ្រពីគណបក្សរបស់លោកដែលមានសំឡេងភាគច្រើននៅសភាអ្នកតំណាងរាស្រ្ត លោកចូ បៃដិន ដែលចង់យកកញ្ចប់ថវិការាប់ពាន់លានដុល្លារ ធ្វើជាអំណះអំណាង បញ្ជាក់ការចូលរួមនាំមុខរបស់អាមេរិក ដើម្បីប្រយុទ្ធប្រឆាំង នឹងការប្រែប្រួអាកាសធាតុ ត្រូវខកបំណង ដោយត្រូវធ្វើដំណើរមកចូលរួម សន្និសីទស្តីពីអាកាសធាតុ ដោយបាតដៃទទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ