អ៊ីរ៉ង់ប្រហារជីវិតមនុស្ស៤នាក់ ក្នុងបទធ្វើការឲ្យក្រុមចារកិច្ចអ៊ីស្រាអែល
ចុះផ្សាយនៅថ្ងៃ៖
ស្តាប់ - ០៧:៥២
នៅប្រទេសអ៊ីរ៉ង់ មនុស្ស៤នាក់ ត្រូវអាជ្ញាធរ ប្រហារជីវិត ដោយការព្យួរក នៅព្រឹកថ្ងៃអាទិត្យទី ៤ ធ្នូ។ តាមវិបសៃតិ៍ផ្លូវការរបស់ក្រសួងយុត្តិធម៌អ៊ីរ៉ង់ អ្នកទាំង៤ ដែលត្រូវគេព្យួរក ត្រូវរងចោទប្រកាន់ថា បានធ្វើការឲ្យក្រុមស៊ើបការណ៍សម្ងាត់អ៊ីស្រាអែលដើម្បី បំផ្លាញផលប្រយោជន៍ជាតិអ៊ីរ៉ង់។ តាមការចុះផ្សាយរបស់ទីភ្នាក់ងារព័ត៌មានរដ្ឋអ៊ីរ៉ង់ រដ្ឋអាជ្ញាបានប្រកាសរំលាយចោលប៉ូលិសសីលធម៌ ដែលជាដើមហេតុនៃការផ្ទុះបាតុកម្មប្រឆាំង នៅអ៊ីរ៉ង់។
អ៊ីរ៉ង់បានប្រហារជីវិត ដោយការព្យួរក មនុស្ស៤នាក់ដែលអាជ្ញាធរអ៊ីរ៉ង់ ចោទប្រកាន់ថា បានលួចធ្វើការដើម្បីប្រយោជន៍របស់អ៊ីស្រាអែល ដែលជាសត្រូវសួពូជរបស់អ៊ីរ៉ង់។ ការប្រហារជីវិតអ្នកទោស ធ្វើឡើងនៅក្នុងកាលៈទេសៈមួយដែលអ៊ីរ៉ង់កំពុងជួបភាពតានតឹងនៅក្នុងប្រទេស ដោយសារចលនាបាតុកម្មប្រឆាំងរដ្ឋអំណាចចេះតែអូសបន្លាយ នៅក្រោយ នារីអ៊ីរ៉ង់ម្នាក់ស្លាប់នៅក្នុងពេលឃុំខ្លួនរបស់ប៉ូលិសសីលធម៌។
តាមខ្លឹមសារលម្អិត របស់ក្រសួងយុត្តិធម៌អ៊ីរ៉ង់ ករណីព្យួរកអ្នកទោស៤នាក់ នៅថ្ងៃនេះ គ្មានជាប់ពាក់ព័ន្ធហេតុការណ៍ធ្វើបាតុកម្ម សព្វថ្ងៃនេះទេ ព្រោះថា អ្នកទាំងបួននាក់ ត្រូវបានប៉ូលិសអ៊ីរ៉ង់ចាប់ខ្លួនតាំងពីខែ ឧសភា ចំណែកបាតុកម្មដែលអង្រួនរញ្ជួយអ៊ីរ៉ង់សព្វថ្ងៃ ទើបកើតមាន នៅខែកញ្ញា ពោលគឺនៅក្រោយ នារីអ៊ីរ៉ង់ នាងអាមីរី ស្លាប់នៅក្នុងពេលឃុំខ្លួនរបស់ប៉ូលិសសីលធម៌។
បើយោងទៅតាមសេចក្តីប្រកាសរបស់តុលាការយុត្តិធម៌អ៊ីរ៉ង់ មនុស្ស ៧នាក់ ត្រូវបានតុលាការផ្តន្ទាទោស ក្នុងបទចោទប្រកាន់ លួចធ្វើការសម្ងាត់ជាមួយក្រុមចារកិច្ចអ៊ីស្រាអែល Mossaតាមរយៈ ការចាប់ជំរិត បំផ្លាញ ទ្រព្យសម្បត្តិរដ្ឋអ៊ីរ៉ង់។ នៅពេលមនុស្ស៤នាក់ ត្រូវតុលាការកំពូលសម្រេចរក្សាទោសប្រហារជីវិត អ្នកទោស ៣នាក់ ផ្សេងទៀត ត្រូវតុលាការផ្តន្ទាទោស ឲ្យជាប់ពន្ធនាគារ ពី ៥ ទៅ១០ ឆ្នាំ សម្រាប់ការផ្សំគំនិត ផ្តល់ជំនួយសម្រាប់ការប្រព្រឹត្តបទឧក្រិដ្ឋ ប្រឆាំងសន្តិសុខជាតិអ៊ីរ៉ង់។
នេះមិនមែនជាលើកទី១ ដែលអ៊ីរ៉ង់ប្រហារជីវិតជនជាតិរបស់ខ្លួន ក្នុងបទចោទប្រកាន់លួចធ្វើការឲ្យក្រុមស៊ើបការណ៍សម្ងាត់បរទេស របស់អ៊ីស្រាអែល និងអាមេរិក។ កាលពីខែកក្កដាកន្លងទៅ អ៊ីរ៉ង់បានចាប់ខ្លួនមនុស្សជាច្រើននាក់ ក្នុងបទមានជាប់ទាក់ទងធ្វើការឲ្យក្រុម Mossad ដែលជាចារកម្មឆ្នើមរបស់អ៊ីស្រាអែល នៅទឹកដីបរទេស។ ជាញយដង អ៊ីរ៉ង់បានចោទប្រកាន់អ៊ីស្រាអែលថា ប្រើក្រុមចារកិច្ចរបស់ខ្លួន ដើម្បីវាយប្រហារទីតាំងសំខាន់ៗរបស់អ៊ីរ៉ង់ ដូចជា រោងចក្រនុយក្លេអ៊ែរ ឬមូលដ្ឋានយោធា។ អ៊ីរ៉ង់នៅបានចោទប្រកាន់អ៊ីស្រាអែលផងដែរថា ជាអ្នកលួចធ្វើឃាតឥស្សរជនធំៗរបស់អ៊ីរ៉ង់ ដែលនៅក្នុងនោះមានផងដែរ អ្នកវិទ្យាសាស្រ្តអ៊ីរ៉ង់។
នៅពេលអ៊ីស្រាអែលរងការចោទប្រកាន់ថា អ្នកប៉ុនប៉ង បំផ្លិចបំផ្លាញទីតាំងយុទ្ធសាស្រ្តរបស់អ៊ីរ៉ង់ អាមេរិកឯណោះវិញ ត្រូវអ៊ីរ៉ង់ចោទប្រកាន់ថា ជាអ្នកព្យាយាមប៉ុនប៉ងផ្តួលរំលំរបបអ៊ីស្លាម តាមរយៈការធ្វើវិទ្ធង្សនា បាតុកម្មបះបោរប្រឆាំងរដ្ឋអំណាចអ៊ីរ៉ង់។ ជាក់ស្តែង បាតុកម្មអូសបន្លាយ ជិត៣ខែមកនេះ ក៏ត្រូវបានរដ្ឋអំណាចអ៊ីរ៉ង់ចោទប្រកាន់ថា ជាស្នាដៃ របស់អាមេរិកដែរ។
ចាប់តាំងពីកើតមានបាតុកម្មនៅខែកញ្ញា អាជ្ញាធរអ៊ីរ៉ង់ចាប់ឃុំខ្លួន ជនបរទេស៤០នាក់
ចាប់តាំងពីកើតមានចលនាបាតុកម្មប្រឆាំងការរឹតត្បិតសិទ្ធិសេរីភាព នៅអ៊ីរ៉ង់ ដែលដំបូងឡើយ ផ្ទុះកើតចេញមកពីនារីអ៊ីរ៉ង់ នាងអាមីរី ស្លាប់នៅក្នុងពេលឃុំខ្លួនរបស់ប៉ូលិសសីលធម៌ មានជនបរទេស ៤០រូបដែលត្រូវអាជ្ញាធរអ៊ីរ៉ង់ចាប់ឃុំខ្លួន។ មួយចំនួនត្រូវចាប់ខ្លួន ក្នុងពេលចូលរួមក្នុងបាតុកម្ម ដើម្បីសំដែងសាមគ្គីភាពជាមួយ ប្រជាជនអ៊ីរ៉ង់ ដែលធ្វើបាតុកម្មតវ៉ាដើម្បីសិទ្ធិសេរីភាព។ ចំណែកមួយចំនួនទៀត មិនបានចូលរួមផ្ទាល់ក្នុងបាតុកម្ម ក៏ត្រូវប៉ូលិសអ៊ីរ៉ង់ចាប់ឃុំខ្លួនដែរ ក្នុងបទចោទប្រកាន់ថា ជាអ្នកចារកិច្ចរបស់រដ្ឋបរទេស ដែលមានបេសកកម្ម ញុះញង់អុជអាលឲ្យមានកុបកម្ម និងបាតុកម្មហិង្សា ប្រឆាំងរដ្ឋអំណាចអ៊ីរ៉ង់។
អង្គការការពារសិទ្ធិមនុស្ស និងរដ្ឋាភិបាលបរទេសដែលមានជនជាតិរបស់ខ្លួន កំពុងជាប់ឃុំខ្លួនក្នុងទឹកដីអ៊ីរ៉ង់ បានចោទប្រកាន់អាជ្ញាធរអ៊ីរ៉ង់ថា បានចាប់ខ្លួនមនុស្សដោយកម្រោល គ្មានភស្តុតាងច្បាស់លាស់។
រដ្ឋាភិបាលបារាំងផ្ទាល់បានចេញមុខទាត់ចោលការចោទប្រកាន់របស់អ៊ីរ៉ង់ដែលថា បារាំងបញ្ជូនជនជាតិរបស់ខ្លួនឲ្យទៅស៊ើបយកការណ៍សម្ងាត់នៅអ៊ីរ៉ង់។ គិតរហូតមកដល់ថ្ងៃនេះ មានជនជាតិបារាំង ៧នាក់ ដែលកំពុងជាប់ក្នុងចំរឹងដែកអ៊ីរ៉ង់ ក្នុងបទចោទប្រកាន់ថា ធ្វើការឲ្យក្រុមស៊ើបការណ៍សម្ងាត់បរទេស។
នៅថ្ងៃសៅរ៍ទី៣ធ្នូ លោកប្រធានាធិបតីបារាំង ម៉ាក្រុងបានចាត់ទុកការចោទប្រកាន់របស់អ៊ីរ៉ង់ ថា ជាការភូតកុហក ព្រោះថា ជនជាតិបារាំង ដែលត្រូវអ៊ីរ៉ង់ចាប់ខ្លួន ទាំងអស់គ្នា សុទ្ធតែជាអ្នកស្រាវជ្រាវ សង្គម ប៉ុន្តែ មិនមែនជាចារកិច្ចអ្វីនោះទេ។ ប្រធានាធិបតីបារាំង បានបញ្ជាក់សាជាថ្មីនឹងដាក់សម្ពាធ ទាមទារឲ្យរដ្ឋអំណាចអ៊ីរ៉ង់ដោះលែងជនជាតិបារាំង ទាំង៧រូបឲ្យមានសេរីភាព។
បាតុកម្មចុងក្រោយនៅអ៊ីរ៉ង់ បានធ្វើឲ្យបារាំង និងអ៊ីរ៉ង់ កាន់តែតានតឹងដាក់គ្នា។ នៅថ្ងៃព្រហស្បតិ៍ក្រសួងការបរទេសអ៊ីរ៉ង់បានកោះហៅឯកអគ្គរដ្ឋទូតបារាំង ប្រចាំអ៊ីរ៉ង់ បន្ទាប់ពីសភាបារាំងបោះឆ្នោតលើសេចក្តីសម្រេចគាំទ្រចលនាធ្វើបាតុកម្មទាមទារសេរីភាពនៅអ៊ីរ៉ង់។
អាជ្ញាធរអ៊ីរ៉ង់ ប្រកាសលុបចោលប៉ូលិសសីលធម៌
ការប្រកាសរំលាយប៉ូលិសសីលធម៌អាចជាដំណឹងល្អមួយ សម្រាប់ស្រ្តីអ៊ីរ៉ង់ ដែលអស់ជាច្រើនមកហើយ ត្រូវរស់នៅក្នុងភាពភ័យខ្លាច ក្រោមក្រសែភ្នែកតាមដានរបស់ប៉ូលិសសីលធម៌។
បង្កើតឡើងនៅឆ្នាំ ២០០៦ ដើម្បីរឹតបន្តឹង ច្បាប់អ៊ីស្លាម ដែលតម្រូវឲ្យស្រ្តីពាក់ទទូរក្រណាត់លើក្បាល ប៉ូលិសសីលធម៌មានអំណាច ព្រមាន មុននឹងចាប់ឃុំខ្លួន និងពិន័យស្រ្តីដែលប៉ូលិសចោទប្រកាន់ថា ស្លៀកពាក់មិនត្រឹមត្រូវ ឬមិនបានរុំក្រណាត់បិទបាំងក្បាល តាមច្បាប់អ៊ីស្លាម។
ប៉ុន្តែ នៅថ្ងៃសៅរ៍ទី ៣ធ្នូ រដ្ឋអាជ្ញាអ៊ីរ៉ង់បានប្រកាសថា ប៉ូលិសសីលធម៌ ត្រូវបានរំលាយចោល ព្រោះប៉ូលិសសីលធម៌គ្មានសមត្ថភាព ជាមន្រ្តីតុលាការ។ ការប្រកាសរបស់រដ្ឋអាជ្ញារអ៊ីរ៉ង់ធ្វើឡើងនៅមួយថ្ងៃក្រោយ រដ្ឋអាជ្ញាររូបនេះបានអះអាងថា គេនឹងអាចសើរើច្បាប់អ៊ីស្លាមដែលមានចែងពីការពាក់ទទូរក្រណាត់លើក្បាល របស់ស្រ្តី នៅអ៊ីរ៉ង់។
ដោយប្រកាសរំលាយចោល ប៉ូលិសសីលធម៌ ដែលជាដើមចមនៃបាតុកម្មប្រឆាំងរដ្ឋអំណាច អ៊ីរ៉ង់ ច្បាស់ណាស់ថា អ៊ីរ៉ង់ចង់បន្ធូរកំហឹងរបស់បាតុករ ព្រោះកុំភ្លេចថា គឺ នៅក្នុងពេលចាប់ឃុំខ្លួន របស់ប៉ូលិសសីលធម៌ ដែលស្រ្តីអ៊ីរ៉ង់ នាងអាមីរីស្លាប់ រហូតបណ្តាលឲ្យមានកើតកំហឹង តវ៉ា ប៉ូលិសសីលធម៌។
តើការរំលាយប៉ូលិសសីលធម៌នឹងអាចធ្វើឲ្យប្រជាជនអ៊ីរ៉ង់អស់កំហឹងឈប់ធ្វើបាតុកម្មតវ៉ាដែរឬទេ? គេមិនប្រាកដនោះទេ ព្រោះ ថា បាតុកម្មប្រឆាំងនឹងប៉ូលិសសីលធម៌ នៅពេលនេះ បានរាលដាលទៅជាបាតុកម្ម នៅទូទាំងប្រទេស ដើម្បី ទាមទារសិទ្ធិសេរីភាពសម្រាប់ស្រ្តីអ៊ីរ៉ង់។ បាតុករបានគ្រោងរួចហើយថា នឹងបន្តធ្វើបាតុកម្មនៅថ្ងៃចន្ទស្អែកនេះ ដើម្បីដាក់សម្ពាធបន្ថែមលើរដ្ឋអំណាចអ៊ីរ៉ង់ ឲ្យគោរព ផ្តល់សិទ្ធិសេរីភាពដល់ស្រ្តីអ៊ីរ៉ង់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ