អ៊ីរ៉ង់គ្រោងពិនិត្យសើរើច្បាប់ស្តីពីការពាក់ទទូរក្រណាត់លើក្បាល
រងរញ្ជួយដោយចលនាបាតុកម្មប្រឆាំងរដ្ឋាភិបាលដែល អូសបន្លាយជាង២ខែ អ៊ីរ៉ង់ប្រកាសសើរើច្បាប់ស្តីពីការពាក់ទទូរក្រណាត់លើក្បាលរបស់ស្រ្តីអ៊ីរ៉ង់ ដែលជាដើមចមនៃកំហឹងរបស់បាតុករ។ តាមរដ្ឋអាជ្ញាអ៊ីរ៉ង់ដែលដកស្រង់សំដីដោយទីភ្នាក់ងារព័ត៌មានរដ្ឋ ISNA សភា និងតុលាការអ៊ីរ៉ង់នឹងពិនិត្យមើលចំណុចដែលនិយាយពីកាតព្វកិច្ចទទូរក្រណាត់បាំងក្បាលរបស់ស្រី្តអ៊ីរ៉ង់។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២៥
អ៊ីរ៉ង់ជួបភាពវឹកវរ និងបាតុកម្មតវ៉ា ប្រឆាំងរដ្ឋាភិបាល ចាប់តាំងពីស្រ្តីអ៊ីរ៉ង់ នាង ម៉ាសា អាម៉ានី ស្លាប់នៅក្នុងពេលឃុំខ្លួនរបស់ប៉ូលិសសីលធម៌ កាលពីពាក់កណ្តាលខែ កញ្ញា។ នៅក្នុងបាតុកម្មដែលអូសបន្លាយជិត ៣ខែ បាតុករ ប្រុសស្រីអ៊ីរ៉ង់មិនចុះញ៉មការបង្រ្កាបហិង្សារបស់ប៉ូលិស នៅតែស្រែកជេរផ្តាសា កងឆ្មាំបដិវត្ត និងទាមទារឲ្យមេដឹកនាំផ្តាច់ការចុះចេញពីអំណាច។ ដើម្បី បង្ហាញការប្រឆាំងរបស់ខ្លួន ស្រ្តីបាតុករមួយចំនួនបានដុតចោលក្រណាត់ទទូរក្បាល ដែលជាសញ្ញានៃរឹតត្បិត សិទ្ធិសេរីភាពស្រ្តី នៅអ៊ីរ៉ង់។ នៅតំបន់ភាគខាងជើង ដែលជាទីកំណើតរបស់នាង អាម៉ានី ស្រ្តីអ៊ីរ៉ង់ ភាគច្រើនបានផ្គើនច្បាប់សីលធម៌ ដោយលែងពាក់ទទូរក្រណាត់លើក្បាលតទៅទៀត។
នៅអ៊ីរ៉ង់ ច្បាប់ទាមទារឲ្យស្រ្តីត្រូវតែពាក់ទទូរក្រណាត់លើក្បាល ចូលជាធរមាន នៅខែមេសា ឆ្នាំ ១៩៨៣ ពោលគឺ នៅបីឆ្នាំក្រោយក្រុមអ៊ីស្លាមធ្វើបដិវត្តចូលកាន់អំណាច។ បន្ទាប់មក រដ្ឋាភិបាលដឹកនាំដោយប្រធានាធិបតី អភិរក្សជ្រុលនិយម លោកម៉ាមូដ អាម៉ាន់ឌីណេហ្សាដ បានបង្កើតប៉ូលិសសីលធម៌ ដើម្បីរឹតបន្តឹងការអនុវត្តច្បាប់ ទៅលើមនុស្សស្រី នៅអ៊ីរ៉ង់។
ថ្លែងនៅក្នុងទីក្រុងសក្តិសិទ្ធិ Qom ភាគខាងត្បូងរដ្ឋធានីតេហេរ៉ង់ កាលពីថ្ងៃសុក្រ រដ្ឋអាជ្ញាអ៊ីរ៉ង់ លោក Mohammad Jafar Montazeri បានប្រកាសថា គណៈកម្មការសភាទទួលបន្ទុក វប្បធម៌នឹងជួបពិភាក្សា ជាមួយ មន្រ្តីតុលាការនៅថ្ងៃពុធសប្តាហ៍ក្រោយ ដើម្បីពិនិត្យមើលថា តើគួរកែប្រែច្បាប់ស្តីពីកាតព្វកិច្ចពាក់ទទូរក្រណាត់លើក្បាលដែរឬទេ។ ច្បាប់ ដែលជាដើមចមនៃការផ្ទុះចលនាបាតុកម្មប្រឆាំង នៅអ៊ីរ៉ង់។
រដ្ឋអាជ្ញាអ៊ីរ៉ង់មិនបានបញ្ជាក់ថា តើនៅក្នុងការកែប្រែច្បាប់ គេប្រុងរឹតបន្តឹងបន្ថែម ឬក៏បន្ធូរបន្ថយមកវិញ ខ្លះ ដើម្បីសម្រាលកំហឹងរបស់បាតុករអ៊ីរ៉ង់។
នៅថ្ងៃសៅរ៍ ឧត្តមក្រុមប្រឹក្សាសន្តិសុខជាតិអ៊ីរ៉ង់បានប្រកាសថា នៅក្នុងអំឡុងបាតុកម្មជាង ២ខែមកនេះ មនុស្សជាង ២០០នាក់ ស្លាប់ គិតទាំងប្រជាជនស៊ីវិល កម្លាំងរក្សាសន្តិសុខ កុបករ និងក្រុមប្រឆាំងបដិវត្តន៍។ អង្គការសិទ្ធិមនុស្សអ៊ីរ៉ង់ ដែលមានទីតាំងនៅទីក្រុងអូស្លូ ប្រទេស ន័រវែសបាននិយាយថា យ៉ាងហោច មនុស្ស៤៤៨នាក់ ត្រូវបានកងកម្លាំងអ៊ីរ៉ង់ សម្លាប់ ធ្វើឃាត នៅក្នុងយុទ្ធនាការបង្រ្កាប បាតុកម្ម នៅទូទាំងប្រទេស។
ប្រធានគណៈកម្មការសិទ្ធិមនុស្សរបស់អង្គការសហប្រជាជាតិ វិញបានវាយតម្លៃ ថា មនុស្សជាង ១៤ ០០០នាក់ ដែលនៅក្នុងនោះមានផងដែរ កុមារ ត្រូវបានអាជ្ញាធរអ៊ីរ៉ង់ចាប់ឃុំខ្លួន ចាប់តាំងពីផ្ទុះកើតមានចលនាបាតុកម្មប្រឆាំងអំណាចផ្តាច់ការរបស់របបអ៊ីស្លាមអ៊ីរ៉ង់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ