លោកស៊ីជីនពីងសន្យាបើកសករាជថ្មីនៃទំនាក់ទំនងចិននិងអារ៉ាប់នៅឈូងសមុទ្ទពែក្ស
ចុះផ្សាយនៅថ្ងៃ៖
ស្តាប់ - ០៦:៣៧
ក្នុងថ្ងៃបិទបញ្ចប់ទស្សនកិច្ច នៅរាជាណាចក្រប្រេងកាតអារ៉ាប៊ីសាអូឌីត លោកប្រធានាធិបតីចិន ស៊ី ជីនពីងបានចូលរួមក្នុងជំនួបកំពូលជាមួយបណ្តាមេដឹកនាំអារ៉ាប ដែលប៉េកាំងចាត់ទុកជាព្រឹត្តិការណ៍ដ៏សំខាន់។ ជាងនេះទៀត លោកស៊ីជីនពីង បាន ប្រកាសរឹតចំណងទំនាក់ទំនង ចំណងសន្តិសុខ និងថាមពលជាមួយបណ្តាប្រទេសនៅតំបន់ឈូងសមុទ្ទពែក្ស ដែលសម្ព័ន្ធមិត្តរបស់សហរដ្ឋអាមេរិក។
ថ្វីបើព្រះមហាក្សត្រនិងរាជបុត្រស្នងរាជ មិនយាងមកទទួលដល់ព្រហានយន្តហោះដូចពេលទទួលប្រធានាធិបតីអាមេរិកចូបៃដិនកាលពីខែកក្កដាមែន តែអារ៉ាប៊ីសាអូឌីតបានផ្តល់កត្តិយសខ្លាំងណាស់លោកស៊ីជីនពីង ដោយទទួលស្វាគមន៍ ដូចស្តេច ! យន្តហោះអ៊ែរឆាយណាដឹកប្រធានាធិបតីចិន ត្រូវហោះអមដោយយន្តហោះចម្បាំងបួនគ្រឿង។ ពេលចុះចតដល់ព្រលាន យន្តហោះ៦គ្រឿងផ្សេងទៀត ហោះបាញ់ផ្សែងលអផ្ទៃមេឃ ក្រហមលឿង ពណ៌តំណាងទង់ជាតិចិន ហើយមានការបាញ់កាំភ្លើងធំ២១គ្រាប់អបអរដំណើរមកដល់របស់លោកស៊ីជីងពីងទៀត។ ពេលចូលគាល់ស្តេច រថយន្តប្រធានាធិបតីចិន ត្រូវអមដំណើរដោយក្បួនទ័ពសេះជាកិត្តិយសរហូតដល់រាជវាំង។
បើតាមអ្នកនាំពាក្យក្រសួងការបរទេសចិន ទស្សនកិច្ចនេះជាព្រឹត្តិការណ៍ការទូត ដ៏សំខាន់បំផុត និងខ្ពង់ខ្ពស់បំផុត រវាងចិននិងពិភពលោកអារ៉ាប់ គិតចាប់តាំងពីថ្ងៃបង្កើតសាធារណរដ្ឋប្រជាមានិតចិនមក។ ជាសករាជថ្មីនៃទំនាក់ទំនងចិនជាមួយពិភពអារ៉ាប់ ជាមួយរដ្ឋអារ៉ាប់ក្នុងតំបន់ឈូងសមុទ្ទពែក្ស និងជាមួយអារ៉ាប៊ីសាអូឌីត។ នេះជាប្រសាសន៍របស់លោកស៊ីជីនពីង។ សារព័ត៌មានរដ្ឋចិនបានធ្វើអត្ថាធិប្បាយបន្ថែម នៅក្នុងសករាជថ្មី ពិភពអារ៉ាប់សំលឹងទៅទិសខាងកើត មិនមែនទៅលិច (សហរដ្ឋអាមេរិក)ទេ។
ចិនចង់ទិញប្រេងជាលុយយ័ន
ក្នុងជំនួបទ្វេភាគី ប៉េកាំង និងរីយ៉ាដ បានគូសបញ្ជាក់អំពីភាពសំខាន់នៃការរក្សាស្ថិរភាពទីផ្សារប្រេងកាត និង បានចុះកិច្ចព្រមព្រៀង ប្រមាណជា៤០ ក្នុងវិស័យផ្សេងៗ រាប់តាំងពីវិស័យអ៊ីដ្រូហ្សែន ដល់វិស័យលំនៅដ្ឋាន ក្នុងតម្លៃជាង២៧ពាន់លានអឺរ៉ូ តែគ្មានទេព័ត៌មានលម្អិត។ នៅថ្ងៃទីបី ដែលជាថ្ងៃចុងក្រោយនៃទស្សនកិច្ចនៅអារ៉ាប៊ីសាអូឌីត លោក ស៊ី ជីនពីង បានចូលរួមក្នុងជំនួបកំពូលចិន-ក្រុមប្រឹក្សាកិច្ចសហប្រតិបត្តិការឈូងសមុទ្ទពែក្ស និងជំនួបកំពូលចិន-អារ៉ាប់ ដែលមាន១២ប្រទេសចូលរួម គឺ ៦ប្រទេសរបស់ក្រុមប្រឹក្សាកិច្ចសហប្រតិបត្តិការឈូងសមុទ្ទពែក្ស (អារ៉ាប៊ីសាអូឌីត អូម៉ង់ កូវែត បារ៉ែន អេមីរ៉ាតអារ៉ាប់រួម ព្រមទាំងកាតា) និងអេហ្ស៊ីប ស៊ូដង់ អ៊ីរ៉ាក់ ម៉ារ៉ុក លីបង់និងប៉ាឡេស្ទីន។
ជំនួបកំពូលចប់ លោកស៊ីជីនពីងបានប្រកាសថា ចិននឹងបន្តគាំទ្រដោយឥតងាករេ ប្រទេសក្នុងក្រុមប្រឹក្សាកិច្ចសហប្រតិបត្តិការឈូងសមុទ្ទពែក្ស ហើយនឹងបន្តនាំចូលប្រេងឆៅក្នុងបរិមាណដ៏ច្រើន ពីក្រុមប្រទេសទាំងនេះ ដោយថែមទាំងសន្យា ពង្រីកកិច្ចសហប្រតិបត្តិការ ដល់វិស័យផ្សេងទៀត មានជាអាទិ៍ការនាំចូលឧស្ម័នធម្មជាតិពង្រាវ។
ចំណុចដ៏សំខាន់មួយទៀត គឺ លោកស៊ីជីនពីង ចង់ទូទាត់ការទិញប្រេងនិងឧស្ម័នឬហ្កាស ជាលុយយ័ន តាមរយៈយន្តការដែលមានមូលដ្ឋាននៅក្រុងសៀងហៃ។ សេចក្តីសម្រេចទូទាត់បែបនេះ ប្រសិនបើបានការព្រមព្រៀងពីក្រុមប្រទេសអ្នកនាំចេញប្រេងនៅឈូងសមុទ្ទពែក្ស នឹងធ្វើឱ្យលុយដុល្លារអាមេរិក ដែលជារូបិយបណ្ណគោលក្នុងពាណិជ្ចកម្មសកលធ្លាក់ថ្លៃជាប្រាកដ។ នេះបើតាមការសេចក្តីថ្លែងការណ៍របស់លោកស៊ីជីនពីង។ គេមិនដឹងថាតើរីយ៉ាដយល់ព្រមដែរឬយ៉ាងណាទេ តែនៅក្នុងសន្និសីទកាសែត ប្រមុខការទូតអារ៉ាប៊ីសាអូឌីត បានប្រាប់ទៅអ្នកកាសែតថា គ្មានអ្វីបន្ថែមពីលើសេចក្តីប្រកាសរបស់លោកស៊ីជីនពីងឡើយ។
ពីមិនគួរឱ្យរាប់អាន ទៅជាមិនអាចខ្វះបាន
ទស្សនកិច្ចរបស់លោកស៊ីជីនពីង មិនមែនកំណត់ត្រឹមតែរឿងថាមពល ប្រេង ឬឧស្ម័នទេ តែក៏មានបង្កប់ប្រយោជន៍ភូមិសាស្ត្រនយោបាយដែរ។
ទស្សនកិច្ចនៅអារ៉ាប៊ីសាអូឌីតជាលើកទីមួយគិតចាប់តាំងពីឆ្នាំ២០១៦នេះ ប្រព្រឹត្តទៅជួនចំពេលដែលមានការប្រកួតប្រជែងជាមួយសហរដ្ឋអាមេរិក ដែលជាដៃគូយោធាជាយុទ្ធសាស្ត្ររបស់ក្រុមប្រទេសអារ៉ាប់នៅឈូងសមុទ្ទពែក្ស។ ប៉ុន្តែទំនាក់ទំនងជាប្រវត្តិសាស្ត្ររវាងអាមេរិកនិងអារ៉ាប៊ីសាអូឌីត មានភាពតានតឹងខ្លាំងណាស់នារយៈពេលចុងក្រោយនេះ ដោយហេតុតែ បញ្ហារំលោភសិទ្ធិមនុស្ស និងប្រេងកាតនេះឯង។ ធ្លាប់ត្រូវបានអាមេរិកចាត់ទុកជាប្រទេសមិនគួរឱ្យរាប់រក ព្រោះបានធ្វើឃាតអ្នកកាសែត រីយ៉ាដបានបដិសេធមិនដំឡើងផលិតកម្មបូមប្រេង ដើម្បីបញ្ចុះតម្លៃនៅលើទីផ្សារ តាមសំណើលោកប្រធានាធិបតីចូបៃដិន កាលពីខែកក្កដាទៀត។ អាមេរិកខឹងច្រឡោត រហូតព្រមាននាឱកាសទស្សនកិច្ចរបស់លោកស៊ីជីនពីងនេះ អំពីការចង់ពង្រីកឥទ្ធិពលត្រួតត្រាពិភពលោករបស់ចិន។
សម្រាប់អារ៉ាប៊ីសាអូឌីត ចំណងជាមួយសហរដ្ឋអាមេរិកនៅតែរឹងមាំជានិច្ច។ ប៉ុន្តែអារ៉ាប៊ីសាអូឌីតក៏ត្រូវការមានទំនាក់ទំនងជាមួយអ្នកផ្សេង ដើម្បីភាពប្រកួតប្រជែង និងជាលក្ខណៈពហុប៉ូលដោយសហការជាមួយគ្រប់ដៃគូ។ ម្យ៉ាងវិញទៀត ការងាកទៅរកចិន ជាការកាត់បន្ថយកុំឱ្យសេដ្ឋកិច្ចជាតិអារ៉ាប៊ីសាអូឌីតរំពឹងតែលើប្រភពថាមពល។
នេះជាឱកាសមួយដែលក្រុមប្រទេសអារ៉ាប់ដូចយ៉ាងអារ៉ាប៊ីសាអូឌីត ចង់បង្ហាញអំពីស្វ័យភាពរបស់ខ្លួន ចំពោះអាមេរិក តែក៏បានអនុញ្ញាតឱ្យចិនបានពង្រឹងឯករាជ្យភាពរបស់គេ ហើយមិនផ្តុំរំពឹងខ្លាំងតែលើអ៊ីរ៉ង់មួយ ក្នុងការផ្គត់ផ្គង់ប្រេង។ ជាទស្សនៈវិស័យដ៏ល្អ ព្រោះកាលពីឆ្នាំ២០២១ ប៉េកាំងបានចុះកិច្ចសន្យាយុទ្ធសាស្ត្រជាមួយអ៊ីរ៉ង់រយៈពេលដល់ទៅ២៥ឆ្នាំ។ តែពេលនេះអ៊ីរ៉ង់កំពុងរង្គើដោយវិបត្តិនយោបាយ។ អ្នកវិភាគសំឡឹងឃើញថា ក្រៅពីស្វះស្វែងផ្តល់សន្ទុះ និងពង្រីកដែនឥទ្ធិពលរបស់ខ្លួន តាមរយៈគម្រោងផ្លូវមួយខ្សែក្រវ៉ាត់មួយ មហាយក្សចិនក៏ព្យាយាមស្វែងរកសន្តិសុខថាមពលប្រេងដែរ ដោយចាំបាច់ត្រូវមានទំនាក់ទំនងល្អជាមួយអារ៉ាប៊ីសាអូឌីត និងក្រុមបណ្តាប្រទេសអារ៉ាប់ក្នុងតំបន់។ ជំហរស្មើភាពជាមួយអារ៉ាប៊ីសាអូឌីតផង អ៊ីរ៉ង់ផង និងអ៊ីស្រាអែលផង កំពុងចាប់ហុចផ្លែផ្កាឱ្យចិននៅថ្ងៃនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ