លោកស៊ី ជីនពីង ទៅបំពេញទស្សនកិច្ចនៅអារ៉ាប៊ីសាអូឌីត
លោកប្រធានាធិបតីចិន ស៊ី ជីនពីង បានទៅដល់ទីក្រុងរីយ៉ាត ប្រទេសអារ៉ាប៊ីសាអូឌីត នៅព្រឹកថ្ងៃពុធនេះ។ នេះគឺជាទស្សនកិច្ចក្រៅប្រទេសលើកទី៣ហើយ សម្រាប់លោកស៊ី ជីនពីង នៅក្នុងបរិបទកូវីដ១៩ ដែលបានបង្ខំឲ្យលោក កាត់បន្ថយយ៉ាងខ្លាំងដល់ការធ្វើដំណើរចេញក្រៅប្រទេស។ ក្នុងនាមអារ៉ាប៊ីសាអូឌីត ជាប្រទេសផលិតប្រេងធំជាងបំផុត ទស្សនកិច្ចរបស់លោកស៊ី ជីនពីង នាពេលនេះ គឺមានសារៈសំខាន់យុទ្ធសាស្ត្រខ្លាំងណាស់ សម្រាប់វិស័យថាមពលចិន ក្នុងខណៈដែលប្រេងរបស់រុស្ស៊ី កំពុងតែត្រូវជាប់ទណ្ឌកម្មរារាំង។
ចុះផ្សាយនៅថ្ងៃ៖
ស្តាប់ - ០២:១៥
ក្នុងរយៈពេល៣ថ្ងៃនៃដំណើរទស្សនកិច្ច លោកស៊ីជីនពីងនឹងជួបសន្ទនា ជាមួយព្រះចៅសាល់ម៉ាន់ ព្រមទាំងជួបជាមួយព្រះអង្គម្ចាស់រាជទាយាទ ម៉ូហាម៉េត បេនសាល់ម៉ាន់។ បន្ថែមពីនេះ នៅថ្ងៃសុក្រ លោកស៊ី ជីនពីង នឹងចូលរួមក្នុងជំនួបកំពូលនៃក្រុមប្រឹក្សា សហប្រតិបត្តិការតំបន់ឈូងសមុទ្រ ដែលមានប្រទេសសមាជិកចំនួន៦។ យោងតាមបណ្តាញព័ត៌មានផ្លូវការអារ៉ាប៊ីសាអូឌីត លោក ប្រធានាធិបតីចិន នឹងឆ្លៀតទៅជួបជាមួយថ្នាក់ដឹកនាំក្រុមប្រទេសអារ៉ាប់ផងដែរ។
យោងតាមការវិភាគ ប្រេងគឺជាសំណុំរឿងធំបំផុត ដែលលោកស៊ី ជីនពីងនឹងនិយាយជាមួយថា្នក់ដឹកនាំអារ៉ាប៊ីសាអូឌីត។ អារ៉ាប៊ីសាអូឌីត ជាប្រទេសផលិតប្រេងធំជាងគេ ហើយចិនវិញ គឺជាប្រទេសដែលនាំចូលប្រេងច្រើនជាងគេ។ នៅក្នុងបរិបទសង្គ្រាមនៅអ៊ុយក្រែន ក្រុមប្រទេសG7 រួមជាមួយសហភាពអឺរ៉ុប បានសម្រេចដាក់ទណ្ឌកម្មលើរុស្ស៊ី ដោយកំណត់តម្លៃប្រេងរុស្ស៊ី មិនឲ្យលើសពី៦០ដុល្លារ ក្នុងមួយធុងបារីល។ ប្រការនេះ បានធ្វើឲ្យមានការបារម្ភខ្លាំង ទាក់ទិននឹងបញ្ហាគ្មានប្រេងនៅលើទីផ្សារ ក្នុងករណីដែលរុស្ស៊ីឈប់នាំចេញ។ ទន្ទឹមគ្នានេះទៀត ក្រុមប្រទេសផលិតប្រេង OPEP+ ដែលមានអារ៉ាប៊ីសាអូឌីត និងរុស្ស៊ីជាមេដឹកនាំនោះ ទើបតែបានសម្រេច បន្តកាត់បន្ថយការផលិត ចំនួន២លានធុងបារីលក្នុងមួយថ្ងៃ រហូតដល់ដាច់ឆ្នាំ២០២៣ ដើម្បីកាត់បន្ថយស្តុក ហើយរក្សាតម្លៃលក់ឲ្យនៅខ្ពស់។
ផ្អែកតាមលោក Ali Shihabi អ្នកវិភាគម្នាក់ស្និទនឹងរដ្ឋាភិបាលអារ៉ាប៊ីសាអូឌីត គឺក្នុងទស្សនកិច្ចនេះ ចិននិងអារ៉ាប៊ីសាអូឌីត អាចនឹងចុះកិច្ចព្រមព្រៀងមួយចំនួនជាមួយគ្នា។ ក្រៅពីសំណុំរឿងប្រេង ភាគីចិនទំនងជាចង់និយាយដើម្បីឲ្យក្រុមហ៊ុនខ្លួន មានវត្តមានចូលរួមនៅក្នុងគម្រោងមហាសាល របស់ព្រះអង្គម្ចាស់ម៉ូហាម៉េត បេនសាល់ម៉ាន់។ ជាគម្រោងស្ថាបនាទីក្រុងទំនើប ឈ្មោះ NOAM ដែលមានតម្លៃទឹកប្រាក់ចំនួន ៥០០ពាន់លានដុល្លារ។ គម្រោងដ៏ធំមហិមានេះ នឹងត្រូវប្រើបច្ចេកវិទ្យាទំនើបការពារសន្តិសុខ ដូចជាកាម៉េរ៉ាចាប់មុខមនុស្សជាដើម ហើយដែលចិនប្រើច្រើននិងឈានមុខគេ។
ដោយឡែក លោក Nayef al-Hajraf អគ្គលេខាធិការក្រុមប្រឹក្សាសហប្រតិបត្តិការឈូងសមុទ្រ បានលើកឡើងថា វត្តមានរបស់លោកស៊ី ជីនពីងក្នុងជំនួបកំពូលនៅថ្ងៃសុក្រ គឺមានសារៈសំខាន់ណាស់ ក្នុយងនាមចិនជាដៃគូពាណិជ្ជកម្មធំបំផុត របស់តំបន់នេះ។
គួរកត់សំគាល់ដែរថា ទស្សនកិច្ចរបស់លោកស៊ី ជីនពីងនៅអារ៉ាប៊ីសាអូឌីត នាពេលនេះ ក៏ត្រូវសហរដ្ឋអាមេរិកតាមដានយ៉ាងម៉ដ្ឋចត់ផងដែរ ខណៈកន្លងមក អារ៉ាប៊ីសាអូឌីត គឺជាសម្ព័ន្ធរបស់អាមេរិកប្រចាំតំបន់ឈូងសមុទ្រ។ ជាសម្ព័ន្ធភាព ដែលគេតែងតែនិយាយដោយកាត់ថា យកប្រេងដូរជាមួយអាវុធនិងសន្តិសុខ។ តែយ៉ាងណា គេជឿថាសម្រាប់ពេលនេះ អារ៉ាប៊ីសាអូឌីត នៅតែបន្តចង់បានអាវុធពីអាមេរិក ព្រោះចិននៅមិនទាន់អាចមានលទ្ធភាពបំពេញតម្រូវការផ្នែកការពារសន្តិសុខឲ្យអារ៉ាប៊ីសាអូឌីតបាននៅឡើយទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ