រដ្ឋាភិបាលជប៉ុនកែប្រែយុទ្ធសាស្ត្រការពារជាតិ ដើម្បីប្រឈម តទល់មហាអំណាចចិន
ចុះផ្សាយនៅថ្ងៃ៖
ស្តាប់ - ០៧:៤៣
ជប៉ុនកែប្រែយុទ្ធសាស្រ្តការពារជាតិ នៅក្នុងទ្រង់ទ្រាយដ៏ធំមិនធ្លាប់មាន។ នៅថ្ងៃសុក្រនេះ រដ្ឋាភិបាលជប៉ុនរបស់លោកនាយករដ្ឋមន្រ្តី ហ្វូមីអូ គីស៊ីដាបានអនុម័តឯកសារចំនួន៣ ស្តីពីការបង្កើនសមត្ថភាពការពារសន្តិសុខជាតិជប៉ុន តាមរយៈការបង្កើនថវិកាកងទ័ព នៅក្នុងបរិបទនៃភាពតានតឹងភូមិសាស្រ្តនៅក្នុងតំបន់។ តើការសើរើយុទ្ធសាស្រ្តការពារជាតិ មានន័យយ៉ាងណាសម្រាប់ជប៉ុន
រដ្ឋាភិបាលជប៉ុនរបស់លោកហ្វូមីអូ គីស៊ីដា នៅថ្ងៃសុក្រនេះ បានអនុម័តលើឯកសារចំនួន បី ស្តីពីការផ្លាស់ប្តូរយុទ្ធសាស្រ្តការពារជាតិ។
ចំណុចសំខាន់ដែលមាននិយាយនៅក្នុងគោលនយោបាយការពារជាតិថ្មី គឺការបង្កើនថវិកាកងទ័ពជាតិជប៉ុនឲ្យដល់ ២%នៃផលិតផលក្នុងស្រុកសរុប សម្រាប់រយៈពេល ៥ឆ្នាំ (ពីឆ្នាំ២០១៣ ដល់ឆ្នាំ ២០២៧)។ សព្វថ្ងៃនេះ កញ្ចប់ថវិកាជាតិ ជប៉ុន តំណាងឲ្យ១%នៃផលិតផលក្នុងស្រុកសរុប។ ប៉ុន្តែ សម្រាប់រយៈពេល ៥ឆ្នាំទៅមុខ ថវិកាកងទ័ពជប៉ុននឹងមានកើនឡើងដល់៣០០ពាន់លានដុល្លារ។
ជប៉ុនបង្កើនថវិកាកងទ័ពឲ្យដល់៣០០ពាន់លានដុល្លារ សម្រាប់ផ្លាស់ប្តូរយុទ្ធសាស្រ្តកងទ័ពដែលមានដូចជា៖
-បង្កើនសមត្ថភាពវាយប្រហារតបវិញ។ ជប៉ុនបានសើរើ យុទ្ធសាស្រ្តសន្តិសុខជាតិ ដែលបង្កើតឡើង នៅឆ្នាំ ២០១៣ ដើម្បីអាចមានសមត្ថភាព វាយប្រហារដល់ទីតាំងបាញ់ចេញមីស៊ីលរបស់សត្រូវ។ គោលដៅរបស់ជប៉ុន គឺចង់បានទិញ និងផលិត មីស៊ីលដែលអាចបាញ់ទៅដល់ទីឆ្ងាយៗ ដូចជាឆ្នេររបស់ចិន និងកូរ៉េខាងជើង ដែលជប៉ុនចាត់ទុកជាប្រភពគំរាមកំហែងសន្តិសុខជាតិជប៉ុន។
ដើម្បីពង្រឹងសមត្ថភាពវាយប្រហារតបវិញ ជប៉ុនគ្រោងនឹងទិញ មីស៊ីលបណ្តែតរបស់អាមេរិក Tomahawkចំនួន ៥០០ដើម និងមីស៊ីលបាញ់ចម្ងាយឆ្ងាយ ប្រភេទ SM6។
-ទី២ គឺអភិវឌ្ឍមីស៊ីលអ៊ីពែសូនិក។ ទៅតាមគោលនយោបាយការពារជាតិថ្មី ជប៉ុនចង់ពង្រាយមីស៊ីលបណ្តែតចម្ងាយឆ្ងាយ ឲ្យបាន១ពាន់ដើម។ ដើម្បីធ្វើដូច្នេះបាន ជប៉ុនត្រូវកែលម្អមីស៊ីលប្រឆាំងនាវាចម្បាំង របស់ខ្លួនឡើងវិញ។ សព្វថ្ងៃនេះ មីស៊ីលបណ្តែតប្រភេទ 12ដែលផលិតដោយក្រុមហ៊ុនជាតិជប៉ុន Mitsubishi អាចមានសមត្ថភាពវាយប្រហារក្នុងរយៈចម្ងាយ តែ ២០០គីឡូម៉ែត្រប៉ុណ្ណោះ ប៉ុន្តែ ជប៉ុនចង់ធ្វើទំនើបកម្មដើម្បីផលិតមីស៊ីលដែលអាចហោះបានចម្ងាយ១០០០គីឡូម៉ែត្រ។ ថវិកាកងទ័ពដ៏ក្រាស់ក្រែល របស់ជប៉ុននឹងត្រូវប្រើផងដែរ សម្រាប់អភិវឌ្ឍមីស៊ីលអ៊ីពែសូនិក ដែលលឿនជាងសំឡេង៥ដង និងសាងសង់ឃ្លាំងស្តុកទុកមីស៊ីល ចំនួន ១៣០កន្លែងបន្ថែមទៀត នៅលើទឹកដីជប៉ុន។
-ចំនុចសំខាន់ទី៣នៃការកែប្រែយុទ្ធសាស្រ្ត គឺការបង្កើនវត្តមានទ័ព ៣ដង នៅភាគខាងត្បូងជប៉ុន នៅតាមកោះ ដែលស្ថិតទៅជិតតៃវ៉ាន់ និងប្រទេសចិនដីគោក។ កងទ័ពជប៉ុនដែលមានបំពាក់ដោយមីស៊ីលបាលីស្ទិក នឹងត្រូវបង្កើនចំនួន ពី ២ពាន់ ទៅ៣ពាន់នាក់ នៅអូគីណាវ៉ា និងនៅជ្រោយកោះ ភាគនិរតីរបស់ ជប៉ុន។
ដោយផ្លាស់ប្តូរយុទ្ធសាស្រ្តការពារជាតិ ជប៉ុននឹងប្រមូលផ្តុំកងទ័ពអាកាស កងទ័ពជើងគោក និងកងទ័ពជើងទឹក ឲ្យមកស្ថិតនៅក្រោមការបញ្ជាតែមួយរបស់សេនាធិការដ្ឋាន។ គោលដៅ គឺដើម្បីអាចឆ្លើយតប រហ័ស ក្នុងស្ថានភាពអាសន្ន។ នៅក្នុងន័យនេះ រដ្ឋាភិបាលគ្រោងផងដែរ នឹងប្រើកំពង់ផែ និងព្រលានយន្តហោះស៊ីវិលសម្រាប់កងទ័ព នៅក្នុងករណីចាំបាច់ ទោះក្នុងកាលៈទេសៈ ប្រទេសមិនជួបសង្រ្គាមក្តី។
ជប៉ុនកំពុងផ្ទុយនឹងរដ្ឋធម្មនុញ្ញសន្តិនិយមរបស់ខ្លួន?
រដ្ឋធម្មនុញ្ញសន្តិនិយម របស់ជប៉ុនបានកំណត់ថា ជប៉ុនគ្មានកងទ័ពសម្រាប់ធ្វើសង្រ្គាម ប៉ុន្តែ ជប៉ុនមានកងទ័ពស្វ័យការពារ ពោលគឺ មានសមត្ថភាព ត្រឹមការពារខ្លួន នៅពេលមានការវាយប្រហារ មុន មកលើខ្លួនតែប៉ុណ្ណោះ។
យុទ្ធសាស្រ្តវាយប្រហារតបវិញ ធ្លាប់បង្កើតឲ្យមានភាពចម្រូងចម្រាសនៅក្នុងសង្គមជប៉ុន ក្នុងហេតុផលថា ការវាយប្រហារ តបវិញ អាចជាលេសសម្រាប់ធ្វើសង្រ្គាម វាយប្រហារលើទឹកដីបរទេស ដែលផ្ទុយ ប្រាសចាកពីរដ្ឋធម្មនុញ្ញសន្តិនិយមរបស់ជប៉ុន។
ប៉ុន្តែ រដ្ឋាភិបាលជប៉ុន ដឹកនាំដោយគណបក្សអភិរក្សនិយម តែងនិយាយការពារថា ក្នុងកាលៈទេសៈដែលសន្តិសុខរបស់ជប៉ុនកំពុងប្រឈមនឹងការគំរាមកំហែង ដូចជាមីស៊ីលរបស់កូរ៉េខាងជើង ដែលបាញ់រំលងជាច្រើនដងទឹកដីជប៉ុន យុទ្ធសាស្រ្តការពាររបស់ជប៉ុនលែងមានប្រសិទ្ធិភាពទៀតហើយ។ ប្រឈមនឹងការពង្រឹងកម្លាំងយោធារបស់មហាអំណាចចិន ដែលទើបបាញ់មីស៊ីលធ្លាក់ចូលក្នុងតំបន់ដែនទឹកសមុទ្រជប៉ុន ដើម្បីគំរាមតៃវ៉ាន់ នៅអំឡុងទស្សនកិច្ចរបស់ប្រធានរដ្ឋសភាអាមេរិក កាលពីពេលថ្មីៗនេះ ជប៉ុនចាំបាច់ត្រូវតែ មានយុទ្ធសាស្រ្តវាយប្រហារតបវិញ ពោល គឺត្រូវមានសមត្ថភាពវាយប្រហារដល់ទីតាំងបាញ់ចេញ មីស៊ីលរបស់សត្រូវតែម្តង។
ជប៉ុនត្រូវធ្វើទំនើបកម្មកងទ័ព ដើម្បីកាត់បន្ថយវិសមភាពកម្លាំងយោធារវាងជប៉ុននិងចិន ក្នុងវិស័យមីស៊ីលផង និងដើម្បីប្រឈមនឹងការគំរាមគំហែងកាន់តែខ្លាំងរបស់កូរ៉េខាងជើងផង។ ភាពតានតឹងអន្តរជាតិ បង្កឡើងដោយសង្គ្រាមឈ្លានពានអ៊ុយក្រែនពីសំណាក់រុស្ស៊ី និងការគំរាមកំហែង ប្រើកម្លាំងយោធារបស់ចិន ដើម្បីវាយយកតៃវ៉ាន់ ដែលស្ថិតនៅជាប់ ជប៉ុន បានធ្វើឲ្យជប៉ុន សើរើវិស័យការពារជាតិរបស់ខ្លួនឡើងវិញ។
នៅក្នុងឯកសារស្តីពីយុទ្ធសាស្រ្តសន្តិសុខជាតិ ដែលរដ្ឋាភិបាលរបស់លោកគីស៊ីដា ទើបអនុម័ត នៅថ្ងៃសុក្រនេះ ជប៉ុនប្រើពាក្យ ខ្លាំងៗ ចាត់ទុកចិន ថា ជាការប្រឈមខ្លាំងសម្រាប់សន្តិសុខជាតិជប៉ុន។ កូរ៉េខាងជើង ចិន និងរុស្ស៊ី ជាមេបង្កការគំរាមកំហែង។ នៅក្នុងបរិបទនៃវិបត្តិពិភពលោក ដែលបណ្តាលមកពីសង្រ្គាមរុស្ស៊ីឈ្លានពានអ៊ុយក្រែន ឯកសារស្តីពីគោលនយោបាយការពារជាតិជប៉ុនបានព្រមានពីវិបត្តិដូចគ្នានេះ ដែលអាចកើតឡើងនៅឥណ្ឌូប៉ាស៊ីហ្វិក និងតំបន់អាស៊ីខាងកើត។ សម្រាប់ជប៉ុន ចិនកំពុងផ្គើនគំរាមសណ្តាប់ធ្នាប់ពិភពលោក តាមរយៈការរួបរួម ពង្រឹងចំណងយោធាជាមួយរុស្ស៊ី។
ចិនចេញមុខប្រតិកម្មប្រឆាំង?
ចិនតាមរយៈអ្នកនាំពាក្យក្រសួងការបរទេស បានប្រតិកម្មប្រឆាំងភ្លាមនឹងការសើរើគោលននយោបាយការពារជាតិរបស់ជប៉ុន។ សម្រាប់ភាគីចិន ជប៉ុនកំពុងដើរងាកចេញពីផ្លូវសន្តិភាព លែងផ្តល់តម្លៃដល់ទំនាក់ទំនងទ្វេភាគីជាមួយចិន។ នៅចំពោះមុខជប៉ុនដែលចង់ពង្រឹងសមត្ថភាពកងទ័ពតាមរយៈការបង្កើនថវិកាការពារជាតិ ប៉េកាំងឧស្សាហ៍ព្រមានពីការវិលត្រលប់នៃនយោបាយវាតទីនិយមរបស់ជប៉ុន ដែលធ្លាប់ធ្វើឲ្យចិនរងគ្រោះ កាលពីអតីតកាល។
ជប៉ុនបង្កើនថវិកាកងទ័ពដ៏មហសាលា
ដើម្បីដើរស្របជាមួយគោលនយោបាយរបស់អូតង់ ដែលចង់ឲ្យប្រទេសសមាជិកបង្កើនកញ្ចប់ថវិកាកងទ័ពឲ្យដល់ ២%នៃផលិតផលក្នុងស្រុកសរុប ជប៉ុនបានបង្កើនថវិកាកងទ័ពរបស់ខ្លួន ៥៦% បើប្រៀបធៀបនឹងកញ្ចប់ថវិកា សម្រាប់រយៈពេល ៥ឆ្នាំកន្លងទៅ។ ជាមួយថវិកាកងទ័ព ៣០០ពាន់លានដុល្លារ ជប៉ុននឹងស្ថិតនៅចំណាត់ថ្នាក់ទី ៣ នៅក្នុងពិភពលោក នៅក្រោយអាមេរិក និងចិន ក្នុងនាមប្រទេសដែលចំណាយច្រើនទៅលើវិស័យកងទ័ព។
នៅជប៉ុន ថវិកាកងទ័ព ៣០០ពាន់លានដុល្លារ សម្រាប់រយៈពេល៥ឆ្នាំ មានតម្លៃស្មើនឹងមួយភាគ១០ នៃថវិកាជាតិសរុបរបស់ជប៉ុន។ ដើម្បីបានថវិការាប់ម៉ឺនលានដុល្លារ សម្រាប់ផ្គត់ផ្គង់វិស័យកងទ័ព រដ្ឋាភិបាលជប៉ុនអាចបង្កើនពន្ធ ជាពិសេសពន្ធលើបារី បង្កើនការលក់មូលប័ត្របំណុល ឬកាត់បន្ថយការចំណាយលើវិស័យដទៃទៀត។ តាមកាសែតក្នុងស្រុកជប៉ុន គណបក្សកាន់អំណាចរបស់លោកនាយករដ្ឋមន្រ្តី គីស៊ីដាកំពុងពិចារណាលើចំណុចខាងលើ ដើម្បីអាចបំពេញកេសថវិកាកងទ័ពជប៉ុន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ