អាមេរិកអនុម័តកញ្ចប់ថវិកាដ៏មហាសាល ក្នុងនោះ៤៥ពាន់លានសម្រាប់អ៊ុយក្រែន
ចុះផ្សាយនៅថ្ងៃ៖
ស្តាប់ - ០៦:១១
គ្មានទេពាក្យថា Shutdown សម្រាប់សហរដ្ឋអាមេរិកពេលនេះ ! ច្បាប់ថវិកាឆ្នាំ២០២៣ ទើបត្រូវបានសភា និងព្រឹទ្ធសភាអាមេរិកអនុម័តនៅយប់ថ្ងៃសុក្រទី ២៣ធ្នូ។ ជាកញ្ចប់ហិរញ្ញវត្ថុដែលមានទំហំមហាសាលដល់ទៅ ១៧០០ពាន់លានដុល្លារ សម្រាប់ឱ្យរដ្ឋបាលលោកបៃដិន សម្រេចអាទិភាពនានា ក្នុងនោះ៤៥ពាន់លានដុល្លារសម្រាប់អ៊ុយក្រែន។ ច្បាប់ហិរញ្ញវត្ថុនេះនឹងចូលជាធរមាន នៅពេលប្រធានាធិបតីបៃដិន ចុះហត្ថលេខា។
សភាអាមេរិកបានបោះឆ្នោតអនុម័តច្បាប់ថវិកាឆ្នាំ២០២៣ ក្នុងសំឡេងគាំទ្រ២២៥ទល់នឹង២០១ប្រឆាំង បញ្ចៀសវិបត្តិជាប់គាំងរដ្ឋបាលសហព័ន្ធ ឬហៅថា Shutdown ដែលអាមេរិកធ្លាប់ជួបប្រទះកន្លងមក។ ជាច្បាប់ថវិកាដ៏សំខាន់ ដែលមិនត្រឹមសម្រាប់បម្រើរដ្ឋ សម្រាប់បើកប្រាក់ខែជូនមន្ត្រីរដ្ឋការទេ តែជាការបង្ហាញឱ្យឃើញថារដ្ឋអាមេរិកមានដំណើរការល្អ។ នេះបើតាមការអះអាងរបស់អ្នកទទួលខុសត្រូវក្រុមសមាជិកសភាបក្សប្រជាធិបតេយ្យ លោក Steny Hoyer។ នៅក្នុងសេចក្តីថ្លែងការណ៍ លោកប្រធានាធិបតីអាមេរិក ចូ បៃដិន បានសរសេរថា ច្បាប់ហិរញ្ញវត្ថុនេះ ល្អសម្រាប់សេដ្ឋកិច្ចជាតិ សម្រាប់ភាពប្រកួតប្រជែងអាមេរិក និងសម្រាប់ប្រជាពលរដ្ឋទាំងមូល។ លោកនឹងចុះហត្ថលេខាផ្តល់សុពលភាព ភ្លាម នៅពេលច្បាប់បានបញ្ជូនមកដល់ការិយាល័យលោក។
មានទំហំសរុប១,៧ទ្រីលានឬត្រូវជា១៧០០ពាន់លានដុល្លារ ច្បាប់ថវិកានេះជាកញ្ចប់ហិរញ្ញវត្ថុសម្រាប់ផ្តល់ឱ្យរដ្ឋសហព័ន្ធ ប្រើប្រាស់ក្នុងវិស័យការពារជាតិ អប់រំ សុខាភិបាល ឬវិស័យដឹកជញ្ជូន ហើយ នៅក្នុងនោះ ៤៥ពាន់លានដុល្លារ ជាកញ្ចប់ថវិកាសម្រាប់ជាជំនួយដល់អ៊ុយក្រែន ក្នុងទម្រង់ជាជំនួយសេដ្ឋកិច្ច យោធា និងមនុស្សធម៌ផង។
ហ្សេឡេនស្គី
ការអនុម័តច្បាប់ប្រព្រឹត្តទៅតែមួយថ្ងៃក្រោយដំណើរទស្សនកិច្ចរបស់លោកហ្សេឡេនស្គី ប្រធានាធិបតីអ៊ុយក្រែន នៅសហរដ្ឋអាមេរិកទៀត។ សមាជិកសភាអាមេរិកភាគច្រើនបានសម្តែងការទទួលស្វាគមន៍ លោកហ្សេឡេនស្គី យ៉ាងកក់ក្តៅបំផុត ដូច្នេះវាគ្មានអ្វីដែលគួរសង្ស័យចំពោះលទ្ធផលដ៏វិជ្ជមាននៃអនុម័តច្បាប់ទេ។
ប្រធានសភាបក្សសាធារណរដ្ឋ បានសាកល្បងអំពាវនាវឱ្យសមាជិករបស់ខ្លួន បោះឆ្នោតប្រឆាំងដែរ ដើម្បីអាចរក្សាជំហរនិងលទ្ធភាពទូលំទូលាយ នៅឆ្នាំក្រោយ ពេលចូលកាន់តួនាទីអាណត្តិថ្មី។ ប៉ុន្តែសមាជិកព្រឹទ្ធសភាបក្សសាធារណរដ្ឋ មិនដឹងមិនឮសេចក្តី អំពាវនាវនោះឡើយ ដោយផ្តល់ការគាំទ្រជាង២០សំឡេងដល់បក្សប្រជាធិបតេយ្យ ក្នុងការអនុម័តច្បាប់ថវិកាលើកនេះ (៦៨ទល់នឹង២៩) កាលពីថ្ងៃព្រហស្បតិ៍ ពោលគឺមួយថ្ងៃមុនការអនុម័តរបស់សភា។
លោកស្រី ណាន់ស៊ី ប៉េឡូស៊ី ប្រធានព្រឹទ្ធសភាផុតអាណត្តិ បានស្វាគមន៍ ការអនុម័តច្បាប់នេះ ជាពិសេសចំពោះកញ្ចប់ថវិកាសម្រាប់ជួយអ៊ុយក្រែន ក្នុងវិស័យសន្តិសុខ សេដ្ឋកិច្ច និងមនុស្សធម៌។ លោកស្រីបានស្រង់ឃ្លារបស់លោកប្រធានាធិបតីហ្សេឡេនស្គីថា ជំនួយអាមេរិកនេះ ដូចប្រសាសន៍លោកហ្សេឡេនស្គី មិនមែនជាការដាក់ទានទេ តែជាការធានាសន្តិសុខ និងជារួមគ្នាធ្វើការ។
ការអនុម័តច្បាប់ថវិកានេះ គឺការបោះឆ្នោតដ៏សំខាន់ចុងក្រោយបង្អស់ ដែលបក្សប្រជាធិបតេយ្យ បក្សកាន់អំណាចរបស់លោកចូបៃដិន មានសំឡេងភាគច្រើន។ ចាប់ចូលឆ្នាំ២០២៣ កាលណា បក្សសាធារណរដ្ឋនឹងកាន់កាប់សភាវិញហើយ ព្រោះក្នុងសម័យបោះឆ្នោតពាក់កណ្តាលអាណត្តិបក្សសាធារណរដ្ឋបានទទួលអាសនៈច្រើនជាង នឹងក្លាយបក្សមានសំឡេងភាគច្រើននៅក្នុងសភាម្តង។
វិសោធនកម្មច្បាប់ សតវត្សរ៍ទី ១៩
នៅក្នុងច្បាប់ថវិកាអនុម័តថ្ងៃនេះ មានផ្នែកមួយគឺជាធ្វើវិសោនកម្មច្បាប់សតវត្សរ៍ ទី១៩ ដើម្បីបញ្ជាក់ឱ្យបានច្បាស់លាស់ថា អនុប្រធានាធិបតីអាមេរិក មិនអាចធ្វើអន្តរាគមន៍ដោយផ្ទាល់ ទៅរារាំង លទ្ធផលបោះឆ្នោតនានាទេ។
លោកដូណាល់ ត្រាំ ធ្លាប់បានប្រើ ភាពស្រពិចស្រពិលនៃអត្ថបទច្បាប់ចាស់ ជំរុញឱ្យលោក Mike Pence កាលនៅជាអនុប្រធានាធិបតីអាមេរិករបស់លោក ទៅរារាំងដំណើរឡើងកាន់អំណាចរបស់លោកចូបៃដិន ក្រោយពីបានទទួលជោគជ័យនៅក្នុងការបោះឆ្នោតប្រធានាធិបតីឆ្នាំ២០២០ ដែលកាលណោះបក្សសាធារណរដ្ឋមិនចង់ទទួលស្គាល់លទ្ធផលឆ្នោត។ នេះជាចំណែកមួយដែលជាដើមហេតុនាំឱ្យមានព្រឹត្តិការណ៍វាយសម្រុកចូលក្នុងវិមានកាពីតូល កាលពីថ្ងៃទី៦មករា២០២១។ ឥលូវលោកដូណាល់ ត្រាំ បានប្រកាសឈរឈ្មោះបេក្ខជនប្រធានាធិបតីជាថ្មីទៀត សម្រាប់ឆ្នាំ២០២៤។ លោកត្រាំ បានចាត់ទុកការធ្វើវិសោនកម្មច្បាប់នេះ ថា ជាច្បាប់សម្រាប់ពួកឆ្វេងជ្រុលនិយម និងក្រុមឡុបប៊ី។
គួរកត់សម្គាល់ថា នៅសភា សមាជិកសភាបក្សសាធារណរដ្ឋភាគច្រើនបានបោះឆ្នោតប្រឆាំងទេ។ ឯនៅព្រឹទ្ធសភា អត្ថបទច្បាប់នេះ បានទទួលការអនុម័តទាំងពីរបក្ស។ ប្រធានសមាជិកសភាបក្សសាធារណរដ្ឋបានឆ្លៀតបញ្ចេញសំដីបរិហារនិង រិះគន់ រយៈពេលកន្លះម៉ោងដែរ ដែលនេះជាសញ្ញាប្រាប់ឱ្យដឹងជាមុនថាមានចរន្តផ្ទុយបញ្ច្រាសគ្នា ដែលជាហានិភ័យនាំឱ្យមានភាពជាប់គាំងការងារ នៅពេលបក្សសាធារណរដ្ឋក្លាយជាដឹកនាំសភាអាមេរិកអាណត្តិថ្មី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ