លោកហ្សេឡេនស្គីប្រាប់សភាខុនហ្រ្កេសថា ប្រាក់ជំនួយអាមេរិកមិនមែនជាការដាក់ទានទេ តែជាការវិនិយោគដើម្បីសន្តិសុខសកល
កាលពីថ្ងៃពុធទី២១ធ្នូ លោកប្រធានាធិបតីអ៊ុយក្រែន បានធ្វើដំណើរទៅទីក្រុងវ៉ាស៊ីនតោន។ ជាដំណើរចាកចេញទៅក្រៅប្រទេស លើកទីមួយហើយរបស់លោកហ្សេឡេនស្គី បន្ទាប់ពីរុស្ស៊ីបានលើកទ័ពធ្វើសង្គ្រាមនៅអ៊ុយក្រែន តាំងតែពីខែកុម្ភៈមក។ នៅក្នុងដំណើរទស្សនកិច្ចប៉ុន្មានម៉ោងនេះ លោកវ្លូឌីមៀរ ហ្សេឡេនស្គី បានចូលទៅជួបលោកចូ បៃដិន នៅសេតវិមាន និងបានថ្លែងសុន្ទរកថានៅចំពោះមុខអង្គសភាខុនហ្ក្រេសសហរដ្ឋអាមេរិក ដើម្បីសម្ដែងការអរគុណ ចំពោះប្រជាជនក៏ដូចជាថ្នាក់ដឹកនាំនយោបាយអាមេរិក ដែលបានជួយទំនុកបម្រុងគាំទ្រមកលើអ៊ុយក្រែន។ តាមការគ្រោងទុក អាមេរិកនឹងប្រគល់ប្រព័ន្ធមីស៊ីល Patriot មកឲ្យអ៊ុយក្រែន ព្រមទាំងកញ្ចប់ថវិកាថ្មីចំនួនជិត ៤៥ពាន់លានដុល្លារបន្ថែមទៀត។
ចុះផ្សាយនៅថ្ងៃ៖
ស្តាប់ - ០២:៥៩
លោកប្រធានាធិបតីអ៊ុយក្រែន វ្លូឌីមៀរ ហ្សេឡេនស្គី បានថ្លែងសុន្ទរកថា រយៈពេលជាង២០នាទី ក្រោមសំឡេងទះដៃយ៉ាងកងរំពង ព្រមទាំងការក្រោកឈរគោរព ជាច្រើនលើក ពីសំណាក់សមាជិកសភាខុនហ្ក្រេសសហរដ្ឋអាមេរិក។ ក្នុងទឹកមុខដ៏រឹងមាំក្លាហាន ជាមួយសំលៀកបំពាក់ពណ៌កាគីទាហាន លោកហ្សេឡេនស្គី បានថ្លែងថា ផ្ទុយពីអ្វីដែលគេគ្រប់គ្នា ធ្លាប់បានគិតស្មានទុកថាអ៊ុយក្រែននឹងចាញ់សង្គ្រាម តែពេលនេះ អ៊ុយក្រែន នៅតែរស់មានជីវិត នៅតែឈរតស៊ូប្រយុទ្ធយ៉ាងរឹងមាំ ដដែរ។ លោកបន្តថា អ៊ុយក្រែននឹងមិនចុះចាញ់ជាដាច់ខាត។ លោកហ្សេឡេនស្គី ក៏បានភ្ជាប់ រុស្ស៊ីជាមួយអ៊ីរ៉ង់ ថាគឺជាប្រទេសមេភេរវកម្មទាំង២ ដែលពិភពលោកត្រូវតែរួមគ្នាប្រយុទ្ធប្រឆាំង។
លោកហ្សេឡេនស្គី ក៏បានថ្លែងសេចក្តីដឹងគុណ ដ៏ស្មោះអស់ពីចិត្ត ចំពោះការគាំទ្រទាំងស្មារតី និងផ្នែកថវិកា ពីសំណាក់សហរដ្ឋ ដើម្បីឲ្យអ៊ុយក្រែន មានលទ្ធភាព និងសមត្ថភាពប្រយុទ្ធដើម្បីការពារសិទ្ធិសេរីភាព ព្រមទាំងលទ្ធិប្រជាធិបតេយ្យ ៖
« ជំនួយថវិកាគឺពិតជាចំណុចដ៏សំខាន់បំផុត ហើយខ្ញុំសូមថ្លែងអំណរគុណយ៉ាងជ្រាលជ្រៅ ចំពោះទឹកចិត្តរបស់អ្នកទាំងអស់គ្នា។ ខ្ញុំសូមអរគុណ ចំពោះកញ្ចប់ថវិកា ដែលអ្នកបានសម្រេចផ្តល់មកឲ្យយើងរួចហើយ ព្រមទាំងកញ្ចប់ថវិកាថ្មីមួយទៀត ដែលអ្នកមានបំណងសម្រេចនាពេលខាងមុខ។ ជំនួយថវិការបស់អ្នកមកឲ្យយើង វាមិនមែនជាការដាក់ទាននោះទេ តែវាគឺជាការវិនិយោគ ដើម្បីការពារសន្តិសុខសកលលោក ព្រមទាំងការពារលទ្ធិប្រជាធិបតេយ្យ ។ ហើយថវិកានេះ គឺអ៊ុយក្រែនបានយកទៅប្រើប្រាស់ ប្រកបដោយការទទួលខុសត្រូវបំផុត។ »
សូមបញ្ជាក់ផងដែរថា មុននឹងចូលទៅថ្លែងសុន្ទរកថា នៅមុខអង្គសភាខុនហ្ក្រេស លោកហ្សេឡេនស្គី បានចូលទៅជួបលោកប្រធានាធិបតីចូ បៃដិន នៅសេតវិមាន។ ក្នុងជំនួបនោះ លោកចូ បៃដិន បានថ្លែងថា វីរភាពដ៏អង់អាចក្លាហានរបស់ប្រជាជាតិអ៊ុយក្រែន គឺជាកម្លាំងបណ្តាលចិត្តដ៏មានឥទ្ធិពលបំផុត មកលើរូបលោកផ្ទាល់ ក៏ដូចជាពិភពលោកទាំងមូល។ លោក ចូ បៃដិនបានបញ្ជាក់ថាសហរដ្ឋអាមេរិកនឹងបន្តជួយអ៊ុយក្រែន តាមរយៈការប្រគល់ឲ្យនូវប្រព័ន្ធមីស៊ីលPatriot ដើម្បីឲ្យអ៊ុយក្រែនការពារខ្លួន។ លោកបានបន្ថែមទៀតថា ការឈ្លានពានអ៊ុយក្រែនពីសំណាក់រុស្ស៊ី បានធ្វើឲ្យសម្ព័ន្ធមិត្តលោកខាងលិច ដែលមានអឺរ៉ុបនិងអូតង់ កាន់តែរឹងមាំ សាមគ្គីគ្នាខ្លាំងឡើងថែមទៀត។
លោកហ្សេឡេនស្គី បានបញ្ជាក់ប្រាប់ទៅលោក ចូ បៃដិនវិញថា អ៊ុយក្រែនត្រូវការសន្តិភាពដែលមានយុត្តិធម៌ ពោលគឺជាសន្តិភាព ដែលនឹងមិនធ្វើឲ្យអ៊ុយក្រែន បាត់បង់ទឹកដីសូម្បីតែមួយចង្អាម។៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ