អាល្លឺម៉ង់ រំពឹងចុះកិច្ចព្រមព្រៀងពាណិជ្ជកម្មសេរី ជាមួយអាមេរិកឡាទីន ឲ្យបានឆាប់
ចុះផ្សាយនៅថ្ងៃ៖
ស្តាប់ - ០៧:០២
ជាលើកទី១ អធិការបតីអាល្លឺម៉ង់ បំពេញដំណើរទស្សនកិច្ច ចំនួន៥ថ្ងៃ នៅក្នុងតំបន់អាមេរិកឡាទីន។ លោក អូឡាហ្វ ស្ហុលស៍ ទៅដល់អាហ្សង់ទីន នៅថ្ងៃសៅរ៍ ដោយនាំប្រធានក្រុមហ៊ុនសហគ្រាសអាល្លឺម៉ង់ ធំៗ ជាង១០ អមដំណើរទៅជាមួយផង។ ថ្ងៃអាទិត្យ លោកទៅស៊ីលី មុននឹងបញ្ចប់ទស្សនកិច្ច ពីរថ្ងៃទៀត នៅ ប្រេស៊ីល។ ប្រេស៊ីល ជាទីដែលគេចាត់ទុកថា តំបន់សេដ្ឋកិច្ចទី១ របស់អាមេរិកឡាទីន។ ថ្នាក់ដឹកនាំអាល្លឺម៉ង់ សង្ឃឹមថានឹងចុះកិច្ចព្រមព្រៀងដោះដូរពាណិជ្ជកម្មសេរី ជាមួយប្រទេសក្នុង សហព័ន្ធពន្ធគយរួម របស់អាមេរិកឡាទីន។
អធិការបតីអាល្លឺម៉ង់ ជ្រើសរើស អាហ្សង់ទីន ស៊ីលី និងប្រេស៊ីល ដើម្បីបំពេញទស្សនកិច្ចលើកទី១ នៅតំបន់អាមេរិកឡាទីន។
បើសរុបពីសក្កានុពលសេដ្ឋកិច្ចនៃប្រទេសធំទាំងបី ក្នុង តំបន់អាមេរិកឡាទីន ដែលមានចំនួនប្រជាជនសរុប ២៧៨លាននាក់ គឺជាទីផ្សារមួយយ៉ាងធំសម្រាប់ការលក់ដូរទំនិញ និងរកស៊ីវិនិយោគ។
ចំពោះក្រសែភ្នែក អាល្លឺម៉ង់ នៅក្នុងតំបន់អាមេរិកឡាទីន ពិសេសគឺប្រទេសទាំងបីនេះ ជាតំបន់ដែលសម្បូរធនធានរ៉ែ និង ឧស្ម័ន ហើយម្យ៉ាងទៀត ក៏សម្បូរ វត្ថុធាតុដើម ដើម្បីផលិតអាគុយប្រើសម្រាប់រថយន្តអគ្គិសនី។ ការផលិតរថយន្តដើរដោយប្រព័ន្ធអគ្គិសនី គឺជាគោលដៅអាទិភាពមួយរបស់អាល្លឺម៉ង់។
បច្ចុប្បន្ននេះ ប្រេស៊ីល ក្រោមការវិលត្រឡប់មកកាន់អំណាចវិញជាថ្មី របស់លោក លូឡា គឺ អាល្លឺម៉ង់ ហាក់កក់ក្តៅចិត្ត និងផ្តើមវិលត្រឡប់ទៅសើរើ កិច្ចព្រមព្រៀងដោះដូរពាណិជ្ជកម្មសេរី និងផ្តើមគិតគូរពីកិច្ចគាំពារបរិស្ថានផង។
ប្រេស៊ីល នៅក្រោមអាណត្តិដឹកនាំរបស់លោក ហ្សាអៀរ បុលសូណារ៉ូ គឺបានធ្វើគេគ្រប់គ្នាព្រួយបារម្ភថាពីការបំផ្លិចបំផ្លាញធនធានធម្មជាតិ ព្រៃអាម៉ាស្សូន។ បន្ទាប់ពីន័រវែស គឺ អាល្លឺម៉ង់ ជាប្រទេសម្ចាស់ជំនួយធំទី២ ដែលផ្តល់កម្ចីឥនទាន និងផ្តល់ជំនួយមូលនិធិហិរញ្ញវត្ថុ ដើម្បីការពារអភរិក្សតំបន់ព្រៃអាម៉ាស្សូន។ អាម៉ាស្សូន ត្រូវគេចាត់ទុកថាជាសួតដកដង្ហើមរបស់ពិភពលោក។ ប៉ុន្តែ អាល្លឺម៉ង់ បានផ្អាកផ្តល់ជំនួយនេះទៅវិញ នៅឆ្នាំ២០១៩ ក្រោយអាណត្តិដឹកនាំរបស់លោកអតីតប្រធានាធិបតី បុលសូណារ៉ូ ។ ប្រេស៊ីល ក្នុងដៃលោក លូឡា គឺអាល្លឺម៉ង់ សម្រេចផ្ទេរលុយ៣៥ពាន់លានដុល្លារភ្លាម នៅដើមឆ្នាំនេះ ដើម្បីជួយគាំទ្រដល់កិច្ចការពារបរិស្ថាននៅអាម៉ាស្សូន។
សហព័ន្ធពន្ធគយរួម មានសារៈសំខាន់ដូចម្តេចចំពោះអាល្លឺម៉ង់?
សហព័ន្ធពន្ធគយរួម ហៅថា Mercosur គឺឋិតក្នុងក្របខ័ណ្ឌ កិច្ចព្រមព្រៀងដោះដូរពាណិជ្ជកម្មសេរី។ សព្វថ្ងៃនេះ វាមានបួនប្រទេស គឺ ប្រេស៊ីល អាហ្សង់ទីន អ៊ុយរ៉ាហ្កាយ និង បារ៉ាហ្កាយ។ ប្រេស៊ីល ជាប្រទេសធំ មានប្រជាជនច្រើន និងដែលមានសេដ្ឋកិច្ចជឿនលឿនជាងគេនៅអាមេរិកឡាទីន ហើយអាហ្សង់ទីន គឺជាមូលដ្ឋានដៃគូរកស៊ីធំជាងគេរបស់អាល្លឺម៉ង់។ អាល្លឺម៉ង់ ជាប្រទេសមានសេដ្ឋកិច្ចជឿនលឿនលំដាប់លេខ១ ក្នុងសមាជិកសហភាពអឺរ៉ុប។ តាមរយៈទំនាក់ទំនងនេះ គឺថ្នាក់ដឹកនាំប្រទេសទាំងខាងចង់តភ្ជាប់ សហព័ន្ធពន្ធគយរួម របស់អាមេរិកឡាទីន ទៅនឹងសហភាពអឺរ៉ុបតែម្តង ដើម្បីបានចំណេញផលប្រយោជន៍រកស៊ីទាំងអស់គ្នា។
កិច្ចព្រមព្រៀងពីរតំបន់នេះ ចុះហត្ថលេខា នៅឆ្នាំ២០១៩ ក៏ប៉ុន្តែ មិនទាន់ត្រូវរដ្ឋសមាជិកផ្តល់សច្ចាប័ន និងត្រូវអាក់ខានក្រោមអាណត្តិដឹកនាំរបស់អតីតប្រធានាធិបតីប្រេស៊ីលចាស់។
នៅអាទិត្យ ថ្នាក់ដឹកនាំអាល្លឺម៉ង់ និងអាហ្សង់ទីន បានឯកភាពព្រមគ្នាថានឹងពន្លឿន ឲ្យសម្រេចបានកិច្ចព្រមព្រៀងដោះដូរពាណិច្ជកម្មសេរី ឲ្យបានឆាប់ៗ។ ក្នុងរឿងនេះ ប្រធានាធិបតីអាហ្សង់ទីន ថាបានទទួលភ្លើងខៀវពី ប្រេស៊ីល ដែរ។ ចំណែក នាយករដ្ឋមន្ត្រីអាល្លឺម៉ង់ ក្នុងបទសម្ភាសមួយ បានបញ្ជាក់ថានឹងជួយសម្របសម្រួល បញ្ចុះបញ្ជូលខាងប្រទេសសមាជិកសហភាពអឺរ៉ុប។
តំបន់អាមេរិកឡាទីនគឺជាដែនអាទិភាពថ្មីមួយទៀត របស់អាល្លឺម៉ង់។ អាល្លឺម៉ង់ ដែលបាត់បង់ដំណើនសេដ្ឋកិច្ចខ្លះ ព្រោះតែប៉ះពាល់ដល់វិបត្តិកូវីដ១៩ផង និងដោយសង្គ្រាមឈ្លានពានរុស្ស៊ីនៅអ៊ុយក្រែនផង។ ដើម្បីបំពេញតម្រូវការសេដ្ឋកិច្ចពាណិជ្ជកម្មរបស់ខ្លួន អាល្លឺម៉ង់ បានចុះកិច្ចសន្យាពាណិជ្ជកម្មជាច្រើនជាមួយ ប្រទេសចិន កាលពីពេលថ្មីៗ។ ហើយនៅពេលនេះទៀត អាល្លឺម៉ង់ ក៏ងាកទៅតំបន់អាមេរិកឡាទីន ថែមទៀត។ តំបន់នេះ ចិន ក៏បានទៅវាតទីរកស៊ីជាច្រើនដែរមកហើយ។ ក៏ប៉ុន្តែ ថ្នាក់ដឹកនាំអាល្លឺម៉ង់ ជឿជាក់លើប្រទេសអឺរ៉ុបនិងក្រុមហ៊ុនអឺរ៉ុប ដែលអធិការបតីអាល្លឺម៉ង់ អូឡាហ្វ ស្ហុលស៍ គូសបញ្ជាក់ថា «យើងល្អប្រសើរជាងពួកគេ»។
ជំហរសំណុំរឿងសង្គ្រាមអ៊ុយក្រែន
ប្រទេសទាំងបី អាហ្សង់ទីន ស៊ីលី និងប្រេស៊ីល ដែលថ្នាក់ដឹកនាំប្រទេសអាល្លឺម៉ង់ បំពេញទស្សនកិច្ចលើកនេះ គឺសុទ្ធសឹងតែមានជំហរស្រពិចស្រពិលចំពោះសំណុំរឿងសង្គ្រាមអ៊ុយក្រែន។
ពីចំណែកម្ខាង ចំពោះមុខអង្គការសហប្រជាជាតិ គឺ ប្រទេសទាំងបី បានថ្កោលទោសចំពោះការធ្វើសង្គ្រាមចម្បាំងឈ្លានពានពីសំណាក់រុស្ស៊ីទៅលើអ៊ុយក្រែន។ ក៏ប៉ុន្តែ ចំណែកម្ខាងទៀត នៅពេលដែលនិយាយដល់ការនាំគ្នាដាក់ទណ្ឌកម្មលើរុស្ស៊ី ប្រទេសទាំងបីនេះ មិនព្រមអនុម័តយល់ស្របដើម្បីសម្រេចដាក់ទណ្ឌកម្មប្រឆាំងនឹងរដ្ឋបាលក្រុងម៉ូស្កូនោះទេ។
មិនតែប៉ុណ្ណោះ ប្រធានាធិបតីប្រេស៊ីល លោក លូឡា មានម្តងនោះ ថែមទាំងរិះគន់ប្រធានាធិបតីអ៊ុយក្រែន ផងថា លោក ហ្សេឡេនស្គី ក៏ជាមនុស្សដែលត្រូវទទួលខុសត្រូវក្នុងសង្គ្រាមនេះ ដូចនឹងលោក ពូទីន ដែរ។
រីឯ អាហ្សង់ទីន វិញ ប្រធានាធិបតី Alberto Fernández គឺសុំមិនអធិប្បាយអ្វីទេ ចំពោះការបញ្ជូនរងក្រោះ អាវុធធនធ្ងន់ ពីសំណាក់អាល្លឺម៉ង់ ទៅឲ្យ អ៊ុយក្រែន។ ក៏ប៉ុន្តែ ប្រធានាធិបតីអាហ្សង់ទីន រូបនេះ គូសបញ្ជាក់ថា អាហ្សង់ទីន ក៏ដូចជាប្រទេសក្នុងតំបន់អាមេរិកឡាទីនដែរ នឹងមិនសន្យាផ្តល់អាវុធឲ្យអ៊ុយក្រេន ឬប្រទេសណាដើម្បីបង្កជម្លោះ នោះឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ