ការសិក្សាបង្ហាញថា ១ភាគ៣នៃព្រៃអាម៉ាហ្សូនីរងការខូចខាតដោយស្នាដៃរបស់មនុស្ស
ការកាប់បំផ្លាញព្រៃឈើមិនមែនជាមូលហេតុតែមួយគត់ ដែលគំរាមកំហែងព្រៃអាម៉ាហ្សូន។ ការសិក្សាចំនួន ២ ចុះផ្សាយ នៅក្នុងទស្សនាវដ្តី Science កាលពីថ្ងៃព្រហស្បតិ៍បានបង្ហាញថា មួយភាគបីនៃព្រៃអាម៉ាហ្សូនរងការខូចខាត ដោយសារសកម្មភាពរបស់មនុស្ស។ តាមអ្នកស្រាវជ្រាវវិទ្យាសាស្រ្ត ប្រេស៊ីល និងអាមេរិក ព្រៃអាម៉ាហ្សូនដែលរងការខូចខាត មានទំហំធំធេង ជាងការសង្កេតកន្លងមក។
ចុះផ្សាយនៅថ្ងៃ៖
ស្តាប់ - ០២:៣៤
នៅពេលគេនិយាយពីការគំរាមកំហែងទៅលើព្រៃអាម៉ាហ្សូន គេគិតភ្លាមទៅដល់ការកាប់បំផ្លាញព្រៃឈើ។ ប៉ុន្តែ បើតាមការសិក្សាថ្មីរបស់អ្នកវិទ្យាសាស្រ្ត ការខូចខាត រិចរិលព្រៃឈើ ដោយសារសកម្មភាពរបស់មនុស្ស ក៏ជាកត្តាសំខាន់ ដែលគំរាមកំហែងព្រៃអាម៉ាហ្សូន។ តាមការសិក្សា ពីរចុងក្រោយ ដែលចុះផ្សាយនៅក្នុងទស្សនាវដ្តីThe Science ៥,៥%នៃតំបន់ព្រៃអាម៉ាហ្សូន បានរងការខូចខាត ដោយស្នាដៃរបស់មនុស្ស ដែលមានដូចជា ការធ្វើអាជីវកម្ម កាប់ព្រៃឈើ ការកាប់រានទន្រ្ទានព្រៃ សម្រាប់យកដីធ្វើកសិកម្មចិញ្ចឹមសត្វ និងភ្លើងឆេះព្រៃជាដើម។
ការសិក្សាពីរដែលចូលរួមចងក្រងដោយអ្នកវិទ្យាសាស្រ្តអាមេរិក និងប្រេស៊ីលជាង៥០នាក់ បានបង្ហាញថា នៅចន្លោះឆ្នាំ ២០០១ និងឆ្នាំ ២០១៨ កត្តាភ្លើងឆេះព្រៃ ការធ្វើអាជីវកម្មព្រៃឈើ ការកាប់រានទន្រ្ទានព្រៃ ដើម្បីយកដីធ្វើកសិកម្ម និងគ្រោះរាំងស្ងួត បានទៅបំផ្លាញរិចរិលតំបន់ព្រៃអាម៉ាហ្សូន ប្រមាណ ៣៨% ដែលមានទំហំ២,៥លានគីឡូម៉ែត្រការ៉េ ឬស្មើផ្ទៃដីប្រទេសអាល់ហ្សេរី។
តាមការវិភាគរបស់អ្នកវិទ្យាសាស្រ្ត ដោយសារការប្រែប្រួលអាកាសធាតុ គ្រោះរាំងស្ងួតមានកាន់ញឹកញយៗ នៅតំបន់ព្រៃអាម៉ាហ្សូន ដែលគ្របដណ្តប់ប្រទេសចំនួន ៨នៅអាមេរិកខាងត្បូង។ ជាលទ្ធផល តំបន់ព្រៃឈើកាន់តែងាប់រិចរិល ភ្លើងឆេះព្រៃ កើតឡើងកាន់តែញឹកញាប់ ហើយនិងបញ្ចេញឧស្ម័នកាបូនិកក្រាសក្រែលទៅក្នុងបរិយាកាស។ នៅត្រង់ចំណុចនេះ អ្នកវិទ្យាសាស្រ្តបានព្រមានពីគ្រោះថ្នាក់ ភ្លើងឆេះព្រៃអាម៉ាហ្សូន កាន់តែធំជាងមុន នៅថ្ងៃអនាគត បើសិនជាគ្រោះរាំងស្ងួតកើតមានជាច្រើនឆ្នាំជាប់គ្នា។
តាមការវាយតម្លៃរបស់អ្នកវិទ្យាសាស្រ្ត ព្រៃអាម៉ាហ្សូនដែលរងការខូចខាតដោយសារគ្រោរាំងស្ងួត សកម្មភាពរបស់មនុស្ស អាចបង្កការប៉ះពាល់ដល់ប្រព័ន្ធជីវចម្រុះ និងជាប្រភពបញ្ចេញឧស្ម័នកាបូនិក ច្រើន ដូចសកម្មភាពកាប់បំផ្លាញព្រៃឈើ។
ការសិក្សា ចុះដោយទស្សនាវដ្តីThe Natureកាលពីខែកក្កដាឆ្នាំ ២០២១បានបង្ហាញថា នៅប៉ុន្មានទសវត្សរ៍មកនេះ តំបន់ភាគខាងត្បូងរបស់ព្រៃអាម៉ាហ្សូនបានប្រែក្លាយពីអណ្តូងស្រូបយកឧស្ម័នកាបូនិក ទៅជាអ្នកបញ្ចេញឧស្ម័នកាបូនិក ដែលជាឧស្ម័នផ្ទះកញ្ចក់ ដើមហេតុនៃការឡើងកំដៅផែនដី។
សម្រាប់អ្នកវិទ្យាសាស្រ្ត ការទប់ស្កាត់ការកាប់បំផ្លាញព្រៃឈើតែមួយមុខមិនគ្រប់គ្រាន់ដើម្បីការពារជីវិតព្រៃអាម៉ាហ្សូន។ រដ្ឋាភិបាល របស់ប្រទេសពាក់ព័ន្ធចាំបាច់ត្រូវប្រញាប់ធ្វើច្បាប់ និងអនុវត្តតឹងរ៉ឹង ព្រមទាំងការវិនិយោគ ដើម្បីស្រោចស្រង់ សង្រ្គោះព្រៃអាម៉ាហ្សូន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ