តើមានអ្វីលាក់បាំងពីក្រោយ ការតភ្ជាប់ឡើងវិញ ខ្សែទូរស័ព្ទរវាងកូរ៉េទាំងពីរ?
ចុះផ្សាយនៅថ្ងៃ៖
ស្តាប់ - ០៨:៣៥
បន្ទាប់ពីកាត់ផ្តាច់អស់រយៈពេល១ឆ្នាំ ខ្សែទូរស័ព្ទក្រហមសម្រាប់ទំនាក់ទំនងបន្ទាន់រវាងបងប្អូនគូសត្រូវកូរ៉េខាងជើង និងកូរ៉េខាងត្បូង ត្រូវបានតភ្ជាប់ឡើងវិញ នៅថ្ងៃអង្គារទី ២៧ កក្កដា។ នេះបើតាមការប្រកាសរបស់វិមានប្រធានាធិបតីកូរ៉េខាងត្បូង។ ទីភ្នាក់ងារព័ត៌មានផ្លូវរដ្ឋកូរ៉េខាងជើង KCNA ក៏បានបញ្ជាក់ដំណឹងនេះដែរ ដោយបន្ថែមថា ថ្នាក់ដឹកនាំកូរ៉េទាំងពីរ បានយល់ព្រមព្រៀងថានឹងបោះជំហានមួយធំ ដើម្បីកសាងជំនឿទុកចិត្តគ្នា ទៅវិញ ទៅមក។
កូរ៉េខាងត្បូង និងកូរ៉េខាងជើង បានប្រកាសតភ្ជាប់ខ្សែទូរស័ព្ទ ក្រហមឡើងវិញ បន្ទាប់ពីកូរ៉េខាងជើងបានសម្រេចដោយឯកតោភាគី កាត់ផ្តាច់ លែងទាក់ទងជាមួយកូរ៉េខាងត្បូង កាលពីខែ មិថុនា ឆ្នាំមុន។ នេះជាដំណឹងដ៏ភ្ញាក់ផ្អើល នៅក្នុងទំនាក់ទំនងកូរ៉េខាងជើង និងកូរ៉េខាងត្បូង ដែលបានជាប់គាំង តាំងពីជាង១ឆ្នាំមកនេះ។
គេមិនបានទន្ទឹងថា ខ្សែទូរស័ព្ទក្រហម សម្រាប់ទំនាក់ទំនងបន្ទាន់ ដែលកូរ៉េខាងជើងបានកាត់ផ្តាច់ ផឹង កាលពីឆ្នាំមុន ត្រូវតភ្ជាប់ ឡើងវិញ នៅពេលនេះទេ ព្រោះថា នៅមួយឆ្នាំមកនេះ កូរ៉េខាងជើង តែងបង្ហាញ ជំហរ បែរខ្នង មិនព្រមពិភាក្សាជាមួយកូរ៉េខាងត្បូង ទោះបីជាប្រធានាធិបតីកូរ៉េខាងត្បូង ឧស្សាហ៍ បើកដៃ អំពាវនាវឲ្យមេដឹកនាំកូរ៉េខាងជើង ត្រលប់មកចរចាឡើងវិញ ក្តី។
គេនៅចាំបានថា កូរ៉េខាងជើង បានសម្រេចបិទទូរស័ព្ទក្រហម ដោយឯកតោភាគី កាលពីឆ្នាំមុន ដោយសារតែខឹងកូរ៉េខាងត្បូង បណ្តោយឲ្យសកម្មជនបង្ហោះប៉ោងៗ ដឹកខិតប័ណ្ណរិះគន់រដ្ឋអំណាចកូរ៉េខាងជើង ទៅហោះធ្លាក់ក្នុងទឹកដីកូរ៉េខាងជើង។
ប៉ុន្តែ សម្រាប់អ្នកជំនាញ នោះគ្រាន់តែហេតុផលសំបកក្រៅប៉ុណ្ណោះ។ ហេតុផលពិតប្រាកដដែលធ្វើឲ្យព្យុងយ៉ាង កាត់ផ្តាច់ខ្សែទូរស័ព្ទ ក្រហម ដែលជាបណ្តាញទាក់ទងបន្ទាន់ តែមួយគត់ រវាងប្រទេសទាំងពីរ សម្រាប់គ្រាអាសន្ន គឺមកពីព្យុងយ៉ាងមិនសប្បាយចិត្តទាល់តែសោះ ដែលឃើញ សេអ៊ូលគ្មានលទ្ធភាពបញ្ចុះបញ្ចូលឲ្យអាមេរិក ដកទណ្ឌកម្មសេដ្ឋកិច្ចពីកូរ៉េខាងជើង។ នៅក្រោយ ជំនួបទ្វេភាគី ជាមួយ ប្រធានាធិបតីអាមេរិកត្រូវបរាជ័យ ទាំងពីរលើក នៅឆ្នាំ ២០១៨ និងឆ្នាំ ២០១៩ កូរ៉េខាងជើង តែងតែរករឿង ដាក់កំហុសលើកូរ៉េខាងត្បូងជានិច្ច។ ជាក់ស្តែង នៅតែប៉ុន្មានថ្ងៃ ក្រោយ ប្រកាសកាត់ផ្តាច់ខ្សែទូរស័ព្ទជាមួយកូរ៉េខាងត្បូង កាលពីខែមិថុនា ឆ្នាំមុន ព្យុងយ៉ាង បានបំផ្ទុះបំផ្លាញ ការិយាល័យ ទំនាក់ទំនង អន្តរកូរ៉េ តែមួយគត់ ដែលសង់ឡើងក្នុងដែនដីកូរ៉េខាងជើង។ ការបំផ្ទុះបំផ្លាញចោលទីតាំង ដែលសាងឡើងជាពិសេស សម្រាប់ស្តារទំនាក់ទំនងបងប្អូនកូរ៉េទាំងពីរ បានធ្វើឲ្យគេជឿថា កូរ៉េខាងជើង ខឹងខ្លាំងណាស់ និងមិនព្រម ងាយនឹងត្រលប់មកចរចា មានទំនាក់ទំនងល្អ ជាមួយ កូរ៉េខាងត្បូងឡើងវិញនោះទេ។
ហេតុអ្វីកូរ៉េខាងជើងសុខចិត្តមកតភ្ជាប់ ប្រព័ន្ធទំនាក់ទំនងឡើងវិញ ជាមួយកូរ៉េខាងត្បូង?
ការតភ្ជាប់ឡើងវិញ ខ្សែរទូរសព័្ទ ក្រហម ដែលនៅក្នុងនោះមានផងដែរ ទំនាក់ទំនងរវាងកងទ័ព និងបក្សនយោបាយរបស់ប្រទេសទាំងពីរ ជាលទ្ធផលនៃការចរចារវាងមេដឹកនាំកូរ៉េទាំងពីរ។ តាមវិមានប្រធានាធិបតីកូរ៉េខាងត្បូង លោកប្រធានាធិបតី មូន ចៃអ៊ីន និងមេដឹកនាំកូរ៉េខាងជើង លោកគីម ជុងអ៊ុន បានសរសេរសំបុត្រឆ្លើយឆ្លងគ្នា តាំងពីខែ មេសាមកម្ល៉េះ។ ទីភ្នាក់ងារ ព័ត៌មានរដ្ឋកូរ៉េខាងជើង នៅថ្ងៃអង្គារនេះ បានបញ្ជាក់ដំណឹងចុះផ្សាយដោយភាគីកូរ៉េខាងត្បូង ដោយបានបន្ថែមថា មេដឹកនាំកូរ៉េទាំងពីរបានយល់ព្រមព្រៀងថា នឹងប្រឹងប្រែង ស្តារជំនឿទុកចិត្តរវាងគ្នាទៅវិញទៅមក និងជំរុញ ការផ្សះផ្សាររវាងកូរ៉េទាំងពីរ។ ការតភ្ជាប់ខ្សែទូរស័ព្ទ សម្រាប់ការទាក់ទងបន្ទាន់ គឺជាជំហានដំបូង ដើម្បី ជំរុញ ទំនាក់ទំនងរវាងប្រទេសបងប្អូនសត្រូវកូរ៉េទាំងពីរ។
ម្យ៉ាងវាធ្វើឡើងនៅចំថ្ងៃ ដែលកូរ៉េខាងជើង ប្រារព្ធបុណ្យខួប រំលឹកថ្ងៃបិទបញ្ចប់សង្រ្គាមកូរ៉េ លើកទី ៦៨។ នៅថ្ងៃអង្គារទី ២៧ ខែកក្កដានេះ ប្រព័ន្ធផ្សព្វផ្សាយកូរ៉េខាងជើង បានបង្ហាញរូបភាព មេដឹកនាំកូរ៉េខាងជើង លោកគីម ជុងអ៊ុនអញ្ជើញទៅដាក់ផ្កានៅស្តូបរំលឹកវិញ្ញាណក្ខន្ធកងទ័ពកូរ៉េខាងជើង ដែលស្លាប់ពលីជីវិត នៅក្នុងសម័យសង្រ្គាមកូរ៉េ ពីឆ្នាំ ១៩៥០ ដល់ឆ្នាំ ១៩៥៣។
នៅខាងភាគីកូរ៉េខាងត្បូង នៅក្រោយ តភ្ជាប់ខ្សែទូរស័ព្ទក្រហមឡើងវិញ នៅព្រឹកថ្ងៃអង្គារនេះ ក្រសួងសម្រាប់ការបង្រួបបង្រួមកូរ៉េ ហើយនិងក្រសួងការពារជាតិកូរ៉េខាងត្បូងបានបញ្ជាក់ថា ខ្សែទូរស័ព្ទបានដំណើរការធម្មតាឡើងវិញ និងថា ពួកគេបាននិយាយឆ្លើយឆ្លងជាមួយ ភាគីកូរ៉េខាងជើង។
សម្រាប់អ្នកជំនាញ ដោយសុខចិត្ត តភ្ជាប់ខ្សែទូរស័ព្ទ ដែលជាបណ្តាញ ទំនាក់ទំនងតែមួយគត់ រវាងបងប្អូនសត្រូវ កូរ៉េទាំងពីរ មេដឹកនាំកូរ៉េខាងជើងចង់បង្ហាញ កាយវិការវិលត្រលប់ទៅ ស្តារទំនាក់ទំនងល្អជាមួយកូរ៉េខាងត្បូង ក្នុងដំណាក់កាលដំបូង និងការចរចាជាមួយ អាមេរិក ក្នុងដំណាក់កាលបន្ទាប់។
គេអាចថា មេដឹកនាំកូរ៉េខាងជើងបានឆ្លើយតបទៅនឹងការអំពាវនាវរបស់ប្រធានាធិបតីកូរ៉េខាងត្បូង និងប្រធានាធិបតីអាមេរិក លោកចូ បៃដិន ដែលបានបោះដៃ ចង់ចរចាផ្នែកការទូតជាមួយកូរ៉េខាងជើង ដើម្បី ដោះស្រាយសំណុំរឿងនុយក្លេអ៊ែររបស់កូរ៉េខាងជើង។
ហេតុអ្វីបានជាកូរ៉េខាងជើង ឆ្លើយតបនឹងការបោះដៃរបស់កូរ៉េខាងត្បូង និងអាមេរិកលើកនេះ ? គេជឿថា ការហុចដៃតបទៅវិញ របស់កូរ៉េខាងជើង នឹងអាចជួយដោះស្រាយវិបត្តិផ្ទៃក្នុង និងទំនាក់ទំនងការបរទេសរបស់កូរ៉េខាងជើង។ មេដឹកនាំកូរ៉េខាងជើង ផ្ទាល់ធ្លាប់បានទទួលស្គាល់ ពី ការលំបាកផ្នែកសេដ្ឋកិច្ច របស់កូរ៉េខាងជើង ដែលបណ្តាលមកពី ការបិទព្រំដែន ក្នុងកាលៈទេសៈកូវីដ ទណ្ឌកម្មសេដ្ឋកិច្ចរបស់អាមេរិក ហើយនិងគ្រោះមហន្តរាយធម្មជាតិ។ ដោយសុខចិត្តតភ្ជាប់ខ្សែទូរស័ព្ទ ដែលអាចជាជំហានមួយនៃការត្រលប់ទៅស្តារទំនាក់ទំនងជាមួយកូរ៉េខាងត្បូង ក្រុងព្យុងយ៉ាង អាចរំពឹងចង់បានជំនួយ សេដ្ឋកិច្ចពីកូរ៉េខាងត្បូងផង និងសង្ឃឹមឲ្យអាមេរិក ផ្តល់ដង្ហើមដក ដល់កូរ៉េខាងខាងជើង តាមរយៈការបន្ធូរបន្ថយ ទណ្ឌកម្មសេដ្ឋកិច្ច។
ខ្សែទូរស័ព្ទ ក្រហម មានវាសនាមិនទៀងទាត់
ទូរស័ព្ទក្រហម គឺជាមធ្យោបាយទាក់ទងគ្នាបន្ទាន់រវាងថ្នាក់ដឹកនាំប្រទេសទាំងពីរ ចាប់តាំងពីសង្គ្រាមកូរ៉េ នៅទសវត្ស១៩៥០។ ប៉ុន្តែ កន្លងមក បណ្តាញទំនាក់ទំនង ផ្នែកយោធា និងនយោបាយត្រូវរអាក់រអួល ជាញយដង ដោយសារ តែ កូរ៉េខាងជើង បានសម្រេចអត្តនោម័ត កាត់ផ្តាច់ភឹង ដោយសារតែខឹង មិនពេញចិត្តនឹងកូរ៉េខាងត្បូង ដោយប្រការណាមួយ។
ឧទាហរណ៍ នៅពេលទំនាក់ទំនងជាមួយកូរ៉េខាងត្បូង កាន់តែតានតឹង និយាយមិនត្រូវគ្នា កូរ៉េខាងជើង បានបិទខ្សែទូរស័ព្ទ មិននិយាយរកកូរ៉េខាងត្បូង។ ប៉ុន្តែ នៅឆ្នាំ ២០១៣ ដោយសារតែ ឃើញ រដ្ឋបាលអាមេរិករបស់លោកអូបាម៉ា ពិភាក្សាជាមួយចិន ដែលជាសម្ព័ន្ធមិត្តសំខាន់ របស់កូរ៉េខាងជើង កូរ៉េខាងជើង បានបន្ថយភាពតានតឹង ដោយសុខចិត្តបើកទូរស័ព្ទ ចរចាជាមួយភាគីកូរ៉េខាងត្បូងឡើងវិញ។
នៅឆ្នាំ ២០១៦ ដោយសារតែ ខឹងកូរ៉េខាងត្បូង បិទតំបន់សេដ្ឋកិច្ចកៃសុង ក្នុងទឹកដីកូរ៉េខាងជើង នៅក្រោយកូរ៉េខាងជើង បាញ់សាកល្បងក្បាលគ្រាប់នុយក្លេអ៊ែរ កូរ៉េខាងជើងបានកាត់ផ្តាច់ទូរស័ព្ទម្តង រហូតដល់ឆ្នាំ ២០១៨ ទើបបើកឡើងវិញ នៅមុនពេលជំនួបកំពូលមេដឹកនាំកូរ៉េទាំងពីរ ហើយនិងជំនួបកំពូល កូរ៉េខាងជើង និងអាមេរិក។
ដោយចោទប្រកាន់រដ្ឋាភិបាល និងកងទ័ពកូរ៉េខាងត្បូងថាបានបណ្តែតបណ្តោយ ឲ្យសកម្មជនប្រឆាំង បង្ហោះ ប៉ោងៗ បាចសាចខិតបណ្ណដែលមានន័យឃោសនារិះគន់ ថ្នាក់ដឹកនាំកូរ៉េខាងជើង ក្រុងព្យុងយ៉ាង ក៏បានសម្រេចជាថ្មីម្តងទៀត បិទចោល ទូរស័ព្ទក្រហម នៅឆ្នាំ ២០២០ មុននឹងត្រូវតភ្ជាប់ឡើងវិញ នៅថ្ងៃអង្គារនេះ។ ជាការសន្និដ្ឋាន ការស្តារទំនាក់ទំនង ខ្សែទូរស័ព្ទ រវាងកូរ៉េទាំងពីរ នៅតែ ស្ថិតក្នុងសភាពផុយស្រួយខ្លាំង ដោយគេមិនដឹងថា តើកូរ៉េខាងជើង នឹងអាចកាត់ផ្តាច់សាជាថ្មី នៅពេលណាទៀត នោះទេ។ អ្វីៗគឺអាស្រ័យទៅលើការសម្រេចរបស់កូរ៉េខាងជើងតែមួយប៉ុណ្ណោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ