កូរ៉េខាងជើង សុខចិត្តបើក ទូរស័ព្ទក្រហម ឆ្លើយឆ្លងជាមួយកូរ៉េខាងត្បូង
ថ្ងៃពុធ ទី៣មករានេះ ថ្នាក់ដឹកនាំកូរ៉េខាងជើង ប្រកាសថា លោក គីម ជុងអ៊ុន សុខចិត្តបើកទូរស័ព្ទក្រហម ឆ្លើយឆ្លងចរចាជាមួយកូរ៉េខាងត្បូង។ សេចក្តីប្រកាសនេះ ធ្វើឡើងនៅក្នុងទូរទស្សន៍ជាតិ ដោយលោក Ri Son Gwon ប្រធានគណកម្មាធិការទទួលបន្ទុកចរចាបង្រួបបង្រួមរបស់កូរ៉េខាងជើង។ ភាគីខាងកូរ៉េខាងត្បូង រីករាយស្វាគមន៍ចំពោះការចរចា តែភាគីអាមេរិករបស់លោក ដូណាល់ ត្រាំ ហាក់នៅសង្ស័យ និងមិនទុកចិត្តចំពោះកូរ៉េខាងជើង។
ចុះផ្សាយនៅថ្ងៃ៖
ការប្រកាសបើកទូរសព្ទក្រហម ភ្ជាប់ទំនាក់ទំនងឆ្លើយឆ្លងគ្នារវាងកូរ៉េទាំងពីរនេះ គឺធ្វើឡើងតែមួយថ្ងៃប៉ុណ្ណោះ បន្ទាប់ពីមេដឹកនាំ គីម ជុងអ៊ុន បញ្ជាក់ពីការបញ្ជូនកីឡាករកូរ៉េខាងជើង ចូលរួមប្រកួតកីឡាអូឡាំពិក នៅកូរ៉េខាងត្បួង។ ចំពោះកូរ៉េខាងត្បួង នេះគឺជាសញ្ញាណល្អនៃដំណើរការចរចាគ្នា។ ទីក្រុង សេអ៊ូល រីករាយស្វាគមន៍ណាស់ចំពោះការបើកទូរសព្ទក្រហមឆ្លើយឆ្លងគ្នាឡើងវិញ។
សូមបញ្ជាក់ថា លោក គីម ជុងអ៊ុន បានបិទទូរសព្ទក្រហមនេះចោល មិនឆ្លើយឆ្លង ជាង២ឆ្នាំមកហើយ គឺតាំងតែពីដើមឆ្នាំ២០១៦មកម្ល៉េះ នៅពេលដែលកូរ៉េខាងជើង បាញ់សាកល្បងមីស៊ីលបំពាក់ក្បាលគ្រាប់នុយក្លែអ៊ែរ។ ទូរសព្ទក្រហម គឺជាមធ្យោបាយទាក់ទងគ្នាបន្ទាន់រវាងថ្នាក់ដឹកនាំប្រទេសទាំងពីរ ចាប់តាំងពីសង្គ្រាមកូរ៉េ នៅទសវត្ស១៩៥០មក។
ចំពោះអាមេរិករបស់លោក ដូណាល់ ត្រាំ ដែលជាសម្ព័ន្ធមិត្តកូរ៉េខាងត្បួង គឺនៅតែមិនទុកចិត្តកូរ៉េខាងជើងនោះឡើយ។ លោកប្រធានាធិបតីមាត់ឆៅ ដូណាល់ ត្រាំ ហាក់នៅសង្ស័យចំពោះភាពស្មោះត្រង់របស់ គីម ជុងអ៊ុន។ ថ្នាក់ដឹកនាំទាំងពីរ ថែមទាំងនៅថ្លែងឌឺដងដាក់គ្នាថែមទៀត។ ឆ្លើយបតនឹង គីម ជុងអ៊ុន ដែលថា លោកមានប៊ូតុងបញ្ជាបាញ់គ្រាប់នុយក្លែអ៊ែរនៅនឹងតុកន្លែងធ្វើការ, ប្រធានាធិបតីអាមេរិក ថាលោកមានប៊ូតុងចុចគ្រាប់នុយក្លែអ៊ែរ ធំជាង និងមានប្រសិទ្ធិភាព ហើយដំណើរការបានល្អទៀត ។
តែយ៉ាងណាក៏ដោយ ការបើកទូរសព្ទក្រហមសម្រាប់ចរចារវាងកូរ៉េទាំងពីរ គឺជាសញ្ញាណល្អ ដែលថ្នាក់ដឹកនាំកូរ៉េខាងជើង បញ្ជាក់ថា អាចជាផ្លូវចរចាទៅលើប្រធានបទជាច្រើន រាប់ទាំងរឿងនុយក្លែអ៊ែរផង។ ក៏ប៉ុន្តែ ចំពោះអាមេរិក ការចរចាអាចប្រព្រឹត្តទៅបាន ដោយមានលក្ខខណ្ឌ គឺកូរ៉េខាងជើង ត្រូវតែបញ្ឈប់គម្រោងនុយក្លែអ៊ែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ