តើមានអ្វីបង្កប់នៅពីក្រោយចលនាបះបោររបស់យុវជននៅអ៊ីរ៉ង់ពេលនេះ?
ចុះផ្សាយនៅថ្ងៃ៖
ស្តាប់ - ០៤:៣៩
ក្នុងពេលដែលភាពតានតឹងរវាងអាមេរិក និងអ៊ីរ៉ង់កំពុងស្ងប់ស្ងាត់បន្តិច ស្ថានភាពផ្ទៃក្នុងនៅអ៊ីរ៉ង់ហាក់បានកម្រើកឡើងវិញជាមួយនឹងក្បួនបាតុកម្មរបស់មហាជន ពិសេសក្រុមយុវជនតាំងពីថ្ងៃសៅរ៍ ទី១១ឆ្លងចូលថ្ងៃចន្ទ ទី១៣ មករា។ ថ្នាក់ដឹកនាំអ៊ីរ៉ង់គ្រប់ស្ថាប័នតាំងពីស្ថាប័នរដ្ឋាភិបាល យោធា និងសាសនាត្រូវបានក្រុមបាតុករយុវជនអ៊ីរ៉ង់ចោទពីបទភូតភរក្នុងរឿងគ្រោះថ្នាក់ធ្លាក់យន្តហោះប៊ូអ៊ីង ៧៣៧ របស់ក្រុមហ៊ុនអាកាសចរណ៍អ៊ុយក្រែនកាលពីថ្ងៃទី៨ មករា បន្ទាប់ពីយន្តហោះនោះទើបហោះចេញពីអាកាសយានដ្ឋានក្រុងតេហេរ៉ង់បានប៉ុន្មាននាទី។ គ្រោះថ្នាក់កាលណោះបានបណ្តាលឲ្យស្លាប់អ្នកដំណើរទាំង ១៧៦នាក់។ នៅក្នុងជំហានដំបូង រដ្ឋអំណាចអ៊ីរ៉ង់បានលើកឡើងពីបញ្ហាបច្ចេកទេស តែបានទទួលសារភាពនៅ ៣ថ្ងៃក្រោយមកថា ទាហានឆ្មាំបដិវត្តន៍អ៊ីរ៉ង់ជាអ្នកបាញ់យន្តហោះនោះដោយអចេតនា។ តើការនិយាយភូតភររបស់រដ្ឋអំណាចក្នុងរឿងធ្លាក់យន្តហោះនេះឬដែលជាដើមចមនៃការងើបបះបោររបស់ពលរដ្ឋអ៊ីរ៉ង់ពេលនេះ?
ក្នុងរយៈពេលតែមួយប៉ប្រិចភ្នែកសោះ ពលរដ្ឋអ៊ីរ៉ង់បានបង្វែរពីការគាំទ្ររដ្ឋាភិបាលរបស់ខ្លួនប្រឆាំងអាមេរិកដែលបានសម្លាប់ឧត្តមសេនីយអ៊ីរ៉ង់កាសឹម សូឡីម៉ានីក្នុងយប់ថ្ងៃទី២ ឆ្លងចូលថ្ងៃទី៣ មករានៅអ៊ីរ៉ាក់ទៅជាការប្រឆាំងរដ្ឋាភិបាលខ្លួនឯងនៅក្នុងសំណុំរឿងគ្រោះថ្នាក់ធ្លាក់យន្តហោះអ៊ុយក្រែនកាលពីថ្ងៃទី៨ មករាទៅវិញ។ គ្រោះថ្នាក់ធ្លាក់យន្តហោះដែលបានសម្លាប់អ្នកដំណើរទាំង ១៧៦នាក់ពិតជាសោនាដកម្មធំធេងណាស់ ព្រោះក្នុងចំណោមអ្នកស្លាប់ភាគច្រើនច្រើនជាជនជាតិអ៊ីរ៉ង់ ឬមានដើមកំណើតអ៊ីរ៉ង់។ សម្រាប់ក្រុមគ្រួសារជនរងគ្រោះក៏ដូចជាពលរដ្ឋអ៊ីរ៉ង់ភាគច្រើនផ្សេងទៀត គឺជាពេលវេលាកាន់ទុក្ខ និងគោរពវិញ្ញាណក្ខន្ធចំពោះអ្នកដែលបានបាត់បង់ជីវិតទៅ។ តែក្នុងពេលជាមួយគ្នានេះ ពិធីកាន់ទុក្ខក៏បានប្រែរូបភាពទៅជាការប្រឆាំងនឹងរដ្ឋាភិបាលរបស់ប្រធានាធិបតីលោកហាសាន រ៉ូហានី កងឆ្មាំបដិវត្តន៍ និងប្រមុខសាសនាអ៊ីស្លាមអ៊ីរ៉ង់ដ៏មានឥទ្ធិពលលោកអាលី ខាមេណី។
ក្រុមបាតុករអ៊ីរ៉ង់បានកើតទុក្ខ មិនសុខចិត្តនឹងការបង្វែរដាន និងការនិយាយភូតភររបស់រដ្ឋអំណាចស្តីពីមូលហេតុពិតនៃការធ្លាក់យន្តហោះអ៊ុយក្រែន។ គួររម្លឹកថានៅក្នុងថ្ងៃធ្លាក់ភ្លាមៗ រដ្ឋអំណាចទីក្រុងតេហេរ៉ង់បានចេញមុខលើកឡើងពីបញ្ហាបច្ចេកទេស តែមានប្រទេសខ្លះដូចយ៉ាងអាមេរិកបានសង្ស័យពីការបាញ់គ្រាប់មីស៊ីលរបស់អ៊ីរ៉ង់រួចទៅហើយ។ គឺទើបតែនៅ ៣ថ្ងៃក្រោយមកទើបទាហានឆ្មាំបដិវត្តអ៊ីរ៉ង់បានចេញមុខសារភាពថា ខ្លួនជាបានបាញ់យន្តហោះនោះ តែជាការបាញ់ដោយភាន់ច្រឡំ។ ក្រោយការសារភាពរបស់ទាហានឆ្មាំបដិវត្តអ៊ីរ៉ង់ ប្រធានាធិបតីលោករ៉ូហានីក៏បានសម្តែងការសុំទោសជាសាធារណៈដែរ។ គួរបញ្ជាក់ថា ការបាញ់គ្រាប់មីស៊ីលរបស់អ៊ីរ៉ង់សំដៅយន្តហោះអ៊ុយក្រែនក្នុងថ្ងៃទី៨ មករាបានធ្វើឡើង ប៉ុន្មានម៉ោងក្រោយពីទាហានឆ្មាំបដិវត្តន៍អ៊ីរ៉ង់បានបាញ់គ្រាប់មីស៊ីលទៅលើមូលដ្ឋានយោធាអាមេរិកក្នុងទឹកដីអ៊ីរ៉ាក់។
ដូច្នេះចង់ឬមិនចង់ ការព្យាយាមបង្វែរដាន និងការនិយាយភូតភររបស់រដ្ឋអំណាចស្តីពីមូលហេតុពិតនៃការធ្លាក់យន្តហោះអ៊ុយក្រែនពិតជាដើមចមនៃកំហឹងរបស់ពលរដ្ឋពេលនេះ ពិសេសក្រុមយុវជន។ បើពិនិត្យមើលមួយភ្លែតទៅ វាជារឿងមួយធម្មតា តែបើពិនិត្យមើលឲ្យបានស៊ីជម្រៅបន្តិចទៅ វាអាចជារឿងមួយគាប់ជួនគ្នាល្អណាស់ទៅនឹងព្រឹត្តិការណ៍បះបោរកាលពីខែវិច្ឆិកា ឆ្នាំ ២០១៩។ កាលណោះ មានពលរដ្ឋអ៊ីរ៉ង់ប្រុស ស្រី ក្មេង ចាស់ជាច្រើនពាន់នាក់មកពីគ្រប់ស្រទាប់វណ្ណៈ និងសឹងនៅគ្រប់ខេត្ត ក្រុងបានចុះផ្លូវធ្វើបាតុកម្មប្រឆាំងរដ្ឋាភិបាលដែលបានសម្រេចដំឡើងថ្លៃតម្លៃប្រេង។ បាតុកម្មកាលណោះត្រូវបានកម្លាំងប៉ូលិសបង្រ្កាបយ៉ាងហិង្សាដោយបណ្តាលឲ្យមានស្លាប់ របួស និងចាប់ខ្លួនជាច្រើននាក់។ ចំណែកបាតុកម្មលើកនេះក៏ត្រូវបានទទួលការបង្រ្កាបដូចគ្នា។
គេអាចនិយាយបានថា ដើមចមនៃបាតុកម្មលើកមុន និងលើកនេះមិនដូចគ្នាទេ ព្រោះលើកមុនជារឿងសេដ្ឋកិច្ច តែលើកនេះជារឿងនយោបាយ។ តែគេក៏ត្រូវហ៊ានទទួលស្គាល់ថា បាតុកម្មទាំងពីរមានបង្កប់ជ្រៅដោយកំណើនកំហឹងក្តៅក្រហាយរបស់ប្រជាជនចំពោះរបបសព្វថ្ងៃ និយាយជារួម និងចំពោះថ្នាក់ដឹកនាំបច្ចុប្បន្ន និយាយដោយឡែក។ « ពួកគេនិយាយកុហក។ សត្រូវរបស់យើងមិនមែនអាមេរិកទេ សត្រូវរបស់យើង គឺនៅទីនេះ » នេះជាសម្រែករបស់ក្រុមបាតុករ។ « ស្លាប់ទៅអ្នកកាន់អំណាចផ្តាច់ការ » នេះជាសារជេរ ប្រមាថដែលក្រុមបាតុករផ្ញើត្រង់ទៅកាន់ប្រមុខសាសនាអ៊ីស្លាមអ៊ីរ៉ង់ដ៏មានឥទ្ធិពលលោកអាលី ខាមេណី។ ឃើញថាក្នុងរូបភាពណាក៏ដោយ ការងើបបះជាបន្តបន្ទាប់របស់ពលរដ្ឋអ៊ីរ៉ង់ប្រឆាំងរដ្ឋអំណាចជាសក្ចីកម្មមួយដែលបញ្ជាក់ថា ពួកគេចង់ឲ្យមានការផ្លាស់ប្តូរដោយលែងមានសង្ឃឹម និងគ្មានជំនឿទុកចិត្តលើការដឹកនាំរបស់រដ្ឋាភិបាលបច្ចុប្បន្នទៀតឡើយ ទោះនៅក្នុងវិស័យនយោបាយ ឬសេដ្ឋកិច្ច។ សេដ្ឋកិច្ចដែលកំពុងបន្តញាំញីដោយទណ្ឌកម្មអាមេរិកាំង។
ពិតណាស់ ព្រឹត្តិការណ៍សម្លាប់ឧត្តមសេនីយកាសឹម សូឡីម៉ានីពីអាមេរិកជារឿងដែលពលរដ្ឋអ៊ីរ៉ង់មិនអាចអត់ឱន និងបំភ្លេចបានទេ។ តែអ្វីដែលសំខាន់នៅចំពោះមុខ គឺការបន្តរស់ក្នុងភាពថ្លៃថ្នូរ។ ក្រុមអ្នកវិភាគបានមើលឃើញថា ភាពវឹកវរផ្ទៃក្នុងនៅអ៊ីរ៉ង់ពេលនេះជារឿងគ្រោះថ្នាក់សម្រាប់របបដឹកនាំសព្វថ្ងៃ ពិសេសនៅប៉ុន្មានសប្តាហ៍មុនការរៀបចំបោះឆ្នោតសភាដែលគ្រោងរៀបចំនៅថ្ងៃទី២១ កម្ភៈខាងមុខ។ តើអាមេរិកមានបានលូកដៃនៅពីក្រោយវិបត្តិផ្ទៃក្នុងអ៊ីរ៉ង់ពេលនេះទេ។ តិច ឬច្រើន និងដោយផ្ទាល់ ឬដោយប្រយោល គឺពិតជាមាន នេះជាការលើកឡើងរបស់ក្រុមអ្នកវិភាគ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ