តើយន្តហោះប៊ូអ៊ីង របស់ អ៊ុយក្រែន ផ្ទុះធ្លាក់ នៅអ៊ីរ៉ង់ ដោយសារមូលហេតុអ្វី ឲ្យប្រាកដ?
ចុះផ្សាយនៅថ្ងៃ៖
អ៊ីរ៉ង់នៅថ្ងៃសុក្រទី ១០ មករា បានចេញមុខ បដិសេធទាត់ចោល ការលើកឡើងរបស់ក្រុមប្រទេសលោកខាងលិច នាំមុខដោយអាមេរិក កាណាដា និងអង់គ្លេស ដែលថា យន្តហោះប៊ូអ៊ីង ដឹកអ្នកដំណើរ របស់ក្រុមហ៊ុនអាកាសចរណ៍ អ៊ុយក្រែន បានផ្ទុះធ្លាក់ដោយសារ រងត្រូវគ្រាប់មីស៊ីលរបស់អ៊ីរ៉ង់។ នៅក្នុងសន្នីសិទកាសែត នៅថ្ងៃសុក្រនេះ នៅទីក្រុងតេហេរ៉ង់ ប្រធានអង្គការអាកាសចរណ៍ស៊ីវិលអ៊ីរ៉ង់បានបញ្ជាក់ច្បាស់ៗថា យន្តហោះ អ៊ុយក្រែន គ្មានបានរង ត្រូវគ្រាប់មីស៊ីលនោះទេ។ នៅក្នុងរឿងផ្ទុះធ្លាក់យន្តហោះអ៊ុយក្រែន កាលពីថ្ងៃពុធ ដែលបានសម្លាប់អ្នកដំណើរទាំងអស់ ១៧៦នាក់ ក្រុមប្រទេសលោកខាងលិច និងអ៊ីរ៉ង់ មានការលើកឡើងផ្ទុយគ្នា។
នៅក្នុងសន្នីសិទកាសែត នៅថ្ងៃសុក្រនេះ ប្រធានអង្គការអាកាសចរន៍ស៊ីវិលអ៊ីរ៉ង់បានបញ្ជាក់ថា យន្តហោះ ប៊ូអ៊ីងរបស់អ៊ុយក្រែន គ្មានរងត្រូវគ្រាប់មីស៊ីលនោះទេ។ ប្រធានអាជ្ញាធរអាកាសចរណ៍ស៊ីវិលអ៊ីរ៉ង់បានលើកឡើងដូច្នេះ នៅបន្ទាប់ពីក្រុមប្រទេសលោកខាងលិច ដែលនៅក្នុងនោះ មានផងដែរ នាយករដ្ឋមន្រ្តីកាណាដាបានអះអាងថា យន្តហោះ របស់ក្រុមហ៊ុនអាកាសចរណ៍អ៊ុយក្រែនអាចត្រូវគ្រាប់ មីស៊ីល អ៊ីរ៉ង់។
នៅក្នុងសន្នីសិទកាសែត កាលពីថ្ងៃម្សិលមិញ នៅទីក្រុងអូតាវ៉ា លោកនាយករដ្ឋមន្រ្តី កាណាដា Justine Trudeau បាននិយាយថា កាណាដា បានទទួលព័ត៌មានជាច្រើន ពីភ្នាក់ងារស៊ើបការណ៍សម្ងាត់កាណាដា ហើយនិងប្រទេសសម្ព័ន្ធមិត្ត ដែលបង្ហាញថា យន្តហោះប៊ូអ៊ីង របស់ក្រុមហ៊ុនអាកាសចរណ៍ អ៊ុយក្រែនបានផ្ទុះធ្លាក់ ដោយសារត្រូវគ្រាប់មីស៊ីលអ៊ីរ៉ង់។
សម្រាប់នាយករដ្ឋមន្រ្តី កាណាដា វាអាចជារឿងឧប្បតិ្តហេតុ ពោលគឺយន្តហោះអ៊ុយក្រែន អាចរងត្រូវគ្រាប់មីស៊ីល ដោយគ្មានការប៉ុនប៉ង ទុកមុនពីភាគីអ៊ីរ៉ង់។ ប៉ុន្តែ យ៉ាងណាក៏ដោយ កាណាដា មានសំណួរ និងរង់ចាំង ចង់បានចម្លើយពីរឿងនេះ ព្រោះថា នៅក្នុងចំណោមជនរងគ្រោះ ទាំង ១៧៦នាក់ដែលស្លាប់ នៅក្នុងគ្រោះថ្នាក់ផ្ទុះធ្លាក់យន្តហោះ អ៊ុយក្រែន មាន ៦៣នាក់ មានសញ្ជាតិកាណាដា។
នៅថ្ងៃម្សិលមិញដែរ មន្រ្តីអាមេរិកាំងបីនាក់ បាននិយាយប្រាប់ទីភ្នាក់ងារព័ត៌មានអង់គ្លេស Reuters ថា រដ្ឋាភិបាលអាមេរិកក៏វាយតម្លៃដែរថា អ៊ីរ៉ង់បានច្រឡំបាញ់ទម្លាក់យន្តហោះ ដឹកអ្នកដំណើររបស់ក្រុមហ៊ុនអ៊ុយក្រែន។ វ៉ាស៊ីនតោន បានសន្និដ្ឋានយ៉ាងដូច្នេះ ជាមួយនឹងការជឿជាក់ខ្ពស់បំផុត បន្ទាប់ពីរូបភាព ផ្កាយរណប បង្ហាញ ស្នាម ដាន គ្រាប់មីស៊ីល ពីរគ្រាប់ដែលគេបាញ់ចេញពីដី នៅ ២នាទី ក្រោយ ដែលយន្តហោះដឹកអ្នកដំណើររបស់ក្រុមហ៊ុន អ៊ុយក្រែន ហោះចេញ ពីព្រលានយន្តហោះ អន្តរជាតិ នៅទីក្រុងតេហេរ៉ង់។
សម្រាប់អ្នកជំនាញ សេណារីយ៉ូ ដែលថា យន្តហោះប៊ូអ៊ីងរបស់ក្រុមហ៊ុនអ៊ុយក្រែន អាចត្រូវគ្រាប់មីស៊ីល ជាសេណារីយ៉ូ ដែលគួរឲ្យជឿជាក់ច្រើនជាងគេ ព្រោះថា យន្តហោះអ៊ុយក្រែន បានផ្ទុះធ្លាក់ នៅតែប៉ុន្មានម៉ោង ក្រោយ ដែលអ៊ីរ៉ង់ បានបាញ់មីស៊ីលជាច្រើនគ្រាប់សំដៅ មូលដ្ឋានទ័ព អាមេរិក នៅទឹកដីអ៊ីរ៉ាក់។ អ្នកជំនាញ អាមេរិក ជឿថា អ៊ីរ៉ង់ ដែលអាចត្រៀមខ្លួន ប្រុងប្រៀប ការពារខ្លួន ពីការវាយប្រហារ វាយបក ណាមួយ ពីអាមេរិក នៅក្រោយការបាញ់មីស៊ីលសំដៅមូលដ្ឋានទ័ពអាមេរិក នៅអ៊ីរ៉ង់ គឺ បានពង្រឹង ដាក់ឲ្យដំណើរការ ប្រព័ន្ធខែលមីស៊ីល ដែលផលិតនៅប្រទេសរុស្ស៊ី។ ដោយសារតែ រ៉ាដារបស់យន្តហោះ ប៊ូអ៊ីង របស់ក្រុមហ៊ុនអ៊ុយក្រែន ស្រដៀងគ្នាទៅនឹងសញ្ញាយន្តហោះចម្បាំង អាមេរិក ភាគីអ៊ីរ៉ង់ អាចបាញ់ច្រលំ ដោយនឹកស្មានថា វាជាយន្តហោះអាមេរិក ដែលចូលមកបាញ់សងសឹកអ៊ីរ៉ង់ នៅក្រោយ អ៊ីរ៉ង់ បាញ់មីស៊ីលសំដៅមូលដ្ឋានទ័ពអាមេរិក នៅអ៊ីរ៉ាក់។
ប្រធានាធិបតី អាមេរិក លោកដូណាល់ ត្រាំ វិញ មិនបានបញ្ជាក់ការវាយតម្លៃ ជាឯកជនរបស់ភ្នាក់ងារស៊ើបការណ៍សម្ងាត់អាមេរិកទេ ប៉ុន្តែ លោកនិយាយថា លោកសង្ស័យ និងមិនជឿថា យន្តហោះ អ៊ុយក្រែនធ្លាក់ដោយសារបញ្ហាបច្ចេកទេស។ លោកត្រាំ និយាយនិយាយថា “វាធ្លាក់ ដោយសារអ្នកណាម្នាក់ យល់ច្រឡំ”។
អ៊ីរ៉ង់អះអាងថា យន្តហោះ អ៊ុយក្រែន គ្មានរងត្រូវគ្រាប់មីស៊ីល ទេ
នៅក្នុងសន្នីសិទកាសែត នៅថ្ងៃសុក្រនេះ ប្រធានអង្គការអាកាសចរណ៍ស៊ីវិលអ៊ីរ៉ង់ បានបញ្ជាក់ សាជាថ្មី ជាមួយនឹងការជឿជាក់ខ្ពស់ដែលថា យន្តហោះអ៊ុយក្រែន ដែលផ្ទុះធ្លាក់កាលពីថ្ងៃពុធ គ្មានរងត្រូវគ្រាប់មីស៊ីលនោះទេ។ ប៉ុន្តែ លោកទទួលស្គាល់ថា យន្តហោះ ប៊ូអ៊ីង របស់ក្រុមហ៊ុន អ៊ុយក្រែន មានភ្លើងឆេះ ពី៦០ ទៅ ៧០វិនាទី មុននឹងធ្លាក់ចុះមកដី។ តាមប្រធានអាកាសចរណ៍ជាតិអ៊ីរ៉ង់ យន្តហោះ មានភ្លើងឆេះ មុននឹងធ្លាក់ មិនមែនមានន័យថា យន្តហោះ រងត្រូវគ្រាប់មីស៊ីលនោះទេ។
ប្រធានអាជ្ញាធរអាកាសចរណ៍ស៊ីវិលអ៊ីរ៉ង់ បានអំពាវនាវឲ្យគេរង់ចាំ លទ្ធផល នៃការស៊ើបអង្កេត ហើយនិងព័ត៌មានសំខាន់ ដែលគេអាចវិភាគ ដកស្រង់ចេញពី ប្រអប់ខ្មៅទាំងពីរ មុននឹងធ្វើការសន្និដ្ឋានណាមួយ។ ផ្ទុយពីព័ត៌មានចុះផ្សាយ ដែលថា អ៊ីរ៉ង់ បដិសេធ មិនផ្តល់ប្រអប់ខ្មៅ ទៅឲ្យអាមេរិក អាជ្ញាធរអាកាសចរណ៍ស៊ីវិលអ៊ីរ៉ង់បានបើកទ្វារ បោះដៃ អញ្ជើញ ក្រុមអ្នកជំនាញ របស់សហព័ន្ធ គ្រប់គ្រងអាកាសចរណ៍ស៊ីវិលអាមេរិក ហើយនិងអ្នកជំនាញ របស់ប្រទេស ផ្សេងទៀត ដែលមានជនរងគ្រោះ នៅក្នុងគ្រោះថ្នាក់ ផ្ទុះធ្លាក់យន្តហោះ អ៊ុយក្រែន ឲ្យចូលរួម ក្នុងការស៊ើបអង្កេត រួមជាមួយភាគីអ៊ីរ៉ង់។
តាមប្រធានាធិបតី អ៊ុយក្រែន អ្នកជំនាញអ៊ុយក្រែន ជាង ៥០នាក់ បានធ្វើដំណើរទៅដល់ទីក្រុងតេហរ៉ង់ កាលពីថ្ងៃ ព្រហស្បតិ៍ ដើម្បី ស្វែងរកភស្តុតាង និងចូលរួមស៊ើបអង្កេតជាមួយ អាជ្ញាធរអ៊ីរ៉ង់។ ប្រធានាធិបតីអ៊ុយក្រែន មិនបានទាត់ចោល សេណារីយ៉ូ ដែលថា យន្តហោះ រងត្រូវគ្រាប់មីស៊ីល ប៉ុន្តែ អ៊ុយក្រែន នៅរង់ចាំព័ត៌មានលម្អិត ពី ប្រអប់ខ្មៅ មុននឹងធ្វើការសន្និដ្ឋាន ណាមួយ។
ហេតុការណ៍លើកនេះ ធ្វើឲ្យគេនឹកទៅដល់ យន្តហោះ ដឹកអ្នកដំណើរអ៊ីរ៉ង់ ដែលត្រូវអាមេរិកបាញ់ទម្លាក់ នៅក្នុងសង្រ្គាម ឈូង សមុទ្រពែរ្ស
ដរាបណា គេនៅមិនទាន់អាចវិភាគព័ត៌មាននៅក្នុងប្រអប់ខ្មៅ របស់យន្តហោះ គេនៅតែមិនដឹង តើយន្តហោះ ប៊ូអ៊ីង របស់ក្រុមហ៊ុនអ៊ុយក្រែន ឆេះ និងធ្លាក់ដល់ដី ដោយសារអ្វី។ គេត្រូវរង់ចាំ ពេលយូរតទៅទៀត ទម្រាំដឹងចម្លើយ ព្រោះថា ការស៊ើបអង្កេត និងការវិភាគ លើទិន្នន័យ ក្នុងប្រអប់ខ្មៅ ទាមទារពេលវេលាយូរ ហើយមានតែប្រទេសមួយចំនួនទេ ដូចជា អាមេរិក បារាំង និងអាល្លឺម៉ង់ ដែលមានអ្នកជំនាញ វិភាគទិន្នន័យក្នុងប្រអប់ខ្មៅ។
បើសិន ជាព័ត៌មាននៅក្នុងប្រអប់ខ្មៅ បង្ហាញថា យន្តហោះ រងត្រូវគ្រាប់មីស៊ីលរបស់ប្រព័ន្ធខែលមីស៊ីលអ៊ីរ៉ង់ ដូចការវាយតម្លៃរបស់មន្រ្តីស៊ើបការណ៍អាមេរិក មែន នោះ រឿងនេះ នឹងធ្វើឲ្យគេនឹកទៅដល់ហេតុការណ៍ដែលនាវាចម្បាំងរបស់អាមេរិក បានបាញ់ទម្លាក់យន្តហោះស៊ីវិល ដឹកអ្នកដំណើរ អ៊ីរ៉ង់ កាលពីឆ្នាំ ១៩៨៨ នៅអំឡុង សម័យសង្គ្រាមឈូងសមុទ្រពែរ្ស។ កាលណោះ នាវាចម្បាំងអាមេរិក ដែលឈរជើង ប្រចាំការ នៅដើមបូព៌ា ដើម្បី ការពារសុវត្ថិភាព ឲ្យកប៉ាល់ដឹកប្រេង អាមេរិក បានបាញ់ច្រលំ ទៅលើយន្តហោះពាណិជ្ជកម្ម អ៊ីរ៉ង់ ដោយបានសម្លាប់ អ្នកដំណើរទាំងអស់ ២៩០ នាក់។
អាមេរិកដំបូង ឡើយ និយាយយក រួចខ្លួនដោយថា ដោយសារតែ អ្នកបើកបរយន្តហោះ ដឹកអ្នកដំណើរអ៊ីរ៉ង់ មិនព្រមឆ្លើយ ផ្តល់សញ្ញា ទៅភាគីអាមេរិក ទើបអាមេរិកសម្រចចិត្តបាញ់មីស៊ីល សំដៅយន្តហោះដែលអាមេរិកជឿថា ជាយន្តហោះ ចម្បាំងអ៊ីរ៉ង់ ដែលគ្រោះថ្នាក់ដល់នាវាចម្បាំងអាមេរិក។
នៅ ឆ្នាំ ១៩៨៩ មួយឆ្នាំក្រោយហេតុការណ៍ អ៊ីរ៉ង់បានប្តឹងអាមេរិកទៅតុលាការព្រហ្មទណ្ឌអន្តរជាតិ។ ប៉ុន្តែ នៅក្រោយមក អាមេរិកដែលសំដែងការសោកស្តាយចំពោះការបាត់បង់ជីវិតប្រជាជនស៊ីវិល បានសុខចិត្ត ចរចាសម្របសម្រួល និងបង់ថ្លៃសងជម្ងឺចិត្តដល់គ្រួសារជនរងគ្រោះអ៊ីរ៉ង់ទាំងអស់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ