អ៊ីរ៉ង់ទទួលស្គាល់ថាបានបាញ់យន្តហោះអ៊ុយក្រែនឱ្យធ្លាក់ដោយអចេតនា
ចុះផ្សាយនៅថ្ងៃ៖
ស្តាប់ - ០៦:០៨
នៅទីបំផុត បីថ្ងៃក្រោយគ្រោះថ្នាក់យន្តហោះដឹកអ្នកដំណើររបស់ក្រុមហ៊ុនអាកាសចរណ៍អ៊ុយក្រែននៅក្រុងតេហេរ៉ង់ អ៊ីរ៉ង់បានចេញមុខ ប្រកាសសុំទោស និងទទួលស្គាល់នៅថ្ងៃសៅរ៍នេះថាយោធាអ៊ីរ៉ង់បានបាញ់ទម្លាក់យន្តហោះប៊ូអ៊ីង៧៣៧ របស់អ៊ុយក្រែនឱ្យធ្លាក់ ស្លាប់មនុស្សអស់១៧៦នាក់ ប៉ុន្តែជាការបាញ់ដោយអចេតនាទេ។ ជាមួយនឹងពាក្យសុំទោស យោធាអ៊ីរ៉ង់ក៏បានចង្អុលមុខបន្ទោសថាអាមេរិកក៏មានទំនួលខុសត្រូវក្នុងគ្រោះសោកនាដកម្មនេះដែរ។
ប្រធានាធិបតីអ៊ីរ៉ង់ បានប្រកាសបង្ហាញការសោកស្តាយ និងប្រកាសចាត់ទុកកំហុសអចេនានេះថាមិនអាចអនុគ្រោះអត់អោនបានឡើយ។ អគ្គមគ្គុទេសក៍ ខាមេណី ដ៏មានអំណាចបានទាមទារឱ្យយោធាផ្តល់របាយការណ៍លម្អិត និងផ្តល់សំណង ឱ្យបានគ្រប់ចំពោះទង្វើធ្វេសប្រហែសរបស់ខ្លួន។ បើតាមភ្នាក់ងារFars ស្និទ្ធនឹងក្រុមអភិរក្សនិយមអ៊ីរ៉ង់ អគ្គមគ្គុទេសក៍ខាមេណី បានដឹងថាគ្រោះថ្នាក់ធ្លាក់យន្តហោះប៊ូអ៊ីង ជាកំហុសរបស់មនុស្ស តាំងពីល្ងាចម្សិលមិញ ទើបចេញបញ្ជាឱ្យយោធាប្រកាសទទួលស្គាល់ ជាផ្លូវការនៅថ្ងៃនេះ។
បញ្ជាការដ្ឋានកងទ័ពអ៊ីរ៉ង់ ដែលមិនបានចេញស្រដីសោះពីមុនមក បានចេញមុខ សុំទោស និងទទួលស្គាល់ថា តាមរយៈសេចក្តីថ្លែងការណ៍ទៅកាន់ប្រជាជាតិ។ យោធាអ៊ីរ៉ង់បានពន្យល់យ៉ាងលម្អិតអំពីហេតុការណ៍ដែលនាំឱ្យមានការបាញ់មីស៊ីលច្រលំថា ដោយមានការគំរាមកំហែងពីសំណាក់ប្រធានាធិបតីអាមេរិក និងពីយោធាអាមេរិក ចង់វាយប្រហារលើទីតាំងចំនួន៥២កន្លែងខ្លះជាទីតាំងវប្បធម៌ផង កងកម្លាំងយោធាអ៊ីរ៉ង់ ក៏បានលើកំរិតត្រៀមអាសន្នខ្ពស់បំផុត។ ក្រោយការបាញ់មីស៊ីលទៅលើមូលដ្ឋានទ័ពអាមេរិកភ្លាម យន្តហោះចម្បាំងអាមេរិកជាច្រើនគ្រឿងបានឆ្វែលព័ទ្ធប្រទេសអ៊ីរ៉ង់ ជាហេតុធ្វើឱ្យកងទ័ពការពារដែនអាកាសបង្កើនអាសន្នបន្ថែមមួយកំរិតទៀត។ ទន្ទឹមពេលជាមួយគ្នានោះ យន្តហោះប៊ូអ៊ីងអ៊ុយក្រែន ដែលបានហោះចេញពីអាកាសយានដ្ឋាន ស្រាប់តែបត់ទិសខិតទៅជិតមជ្ឈមណ្ឌលយោធា ឆ្មាំបដិវត្ត ជ្រុល និងក្នុងរយៈកម្ពស់មួយដែលនាំឱ្យគេគិតស្មានថាជាយន្តហោះសត្រូវ។ ដោយសារលក្ខខណ្ឌទាំងអស់នេះ និងដោយកំហុសមនុស្ស និងដោយគ្មានបំណង មីស៊ីលរយៈចម្ងាយខ្លី ក៏បានបាញ់ចំយន្តហោះប៊ូអ៊ីងអ៊ុយក្រែន បណ្តាលឱ្យស្លាប់ជនស៊ីវិលអស់១៧៦។
បើតាមមេបញ្ជាការឆ្មាំបដិវត្ត នាយទាហានកាន់ប្រតិបត្តិការម្នាក់ ច្រលំយន្តហោះដឹកអ្នកដំណើរថាជាមីស៊ីលបណ្តែត និងមានពេលតែ១០វិនាទីប៉ុណ្ណោះក្នុងការសម្រេចចិត្ត ប៉ុន្តែដោយសារមានបណ្តាញទូរគមនាគមន៍មិនល្អ នាយទាហានក៏ចុចបាញ់មិនបានទទួលបញ្ជាពីថ្នាក់លើទេ។
ឆ្មាំបដិវត្តអ៊ីរ៉ង់ ដែលសុំចូលរួមរំលែកទុក្ខដល់គ្រួសារជនរងគ្រោះអ៊ីរ៉ង់និងបរទេសទាំងអស់នោះ និងសម្តែងការសុំទោស ដោយសន្យាថាបន្តធ្វើកំណែទម្រង់ដំណើរការប្រតិបត្តិការដើម្បីកុំឱ្យមានកំហុសបែបនេះកើតឡើងបានទៀត។ អគ្គមេបញ្ជាការយោធាអ៊ីរ៉ង់បានសន្យាបញ្ជូន ឧត្តមសេនីយ៍-អ្នកទទួលខុសត្រូវក្នុងកំហុសនេះ កាត់ទោសតាមផ្លូវច្បាប់។
ថ្វីបើយោធាអ៊ីរ៉ង់បានប្រកាសទទួលស្គាល់កំហុស និងបានទម្លាក់ទំនួលខុសត្រូវលើ យោធាឆ្មាំបដិវត្តមែន ប៉ុន្តែថ្នាក់ដឹកនាំអ៊ីរ៉ង់គ្រប់ជាន់ថ្នាក់ រាប់ទាំងក្រុមឆ្មាំបដិវត្តផង ក៏បានទម្លាក់ទំនួលខុសត្រូវមួយផ្នែកទៀតទៅលើសហរដ្ឋអាមេរិក ព្រោះកំហុសមនុស្សនេះកើតឡើងដោយសារតែវិបត្តិដែលបង្កឡើងដោយអាមេរិក។
ប្រតិកម្មអ៊ុយក្រែន កាណាដា
អ៊ុយក្រែន បានទាមទារឱ្យអ៊ីរ៉ង់ដាក់ទណ្ឌកម្ម/ដាក់ទោសអ្នកប្រព្រឹត្តកំហុស និងទាមទារសំណងជាប្រាក់ចំពោះការខូចខាត និងការបាត់បង់ជីវិត។ ជាងនេះទៅទៀត អ៊ុយក្រែន សង្ឃឹមនិងរំពឹងថាអ៊ីរ៉ង់នឹងដឹកនាំការអង្កេតឱ្យឆាប់រហ័សនិងប្រកបសុភវិនិច្ឆ័យ។ លោក ហ្សេឡេស្គី នឹងជួបជជែកតាមទូរស័ព្ទជាមួយសមភាគីអ៊ីរ៉ង់ នៅពេលបន្តិចទៀត មុននឹងថ្លែងសារទៅកាន់ប្រជាជាតិអ៊ុយក្រែន។ តំណាងរាស្ត្រអ៊ុយក្រែនម្នាក់ បានសម្តែងការសរសើរអ៊ីរ៉ង់ដែលហ៊ានទទួលកំហុស។
ចំណែកខាងកាណាដាវិញ លោកនាយករដ្ឋមន្ត្រី បានទាមទារឱ្យអ៊ីរ៉ង់មានតម្លាភាព បើកអង្កេតស៊ីជម្រៅ និងពេញលេញ ដើម្បីវែករកមុខអ្នកទទួលខុសត្រូវពិតៗ។ រុស្ស៊ីដែលធ្លាប់មានប្រវត្តិជាប់ចោទជាអ្នកបាញ់យន្តហោះMH17នៅអ៊ុយក្រែន ក៏ជំរុញឱ្យគ្រប់ភាគីចងចាំ ជាមេរៀននិងមានវិធានការ ដើម្បីកុំជួបសោកនាដកម្មធ្លាក់យន្តហោះបែបនេះទៀត។
សម្រាប់បារាំងវិញ រដ្ឋមន្ត្រីក្រសួងការពារជាតិបានយល់ផ្សេងថា ពេលនេះជាវេលាដ៏សំខាន់ដែលត្រូវចាប់ឱ្យជាប់ នាំអ៊ីរ៉ង់ដែលទើបទទួលស្គាល់កំហុសបាញ់ទម្លាក់យន្តហោះស៊ីវិល ជាឱកាសដ៏ប្រពៃក្នុងការចាប់ផ្តើមឡើងវិញ ជជែកពិភាក្សាគ្នា ស្តីពីសំណុំរឿងនុយក្លេអ៊ែរ ដើម្បីការពារកិច្ចព្រមព្រៀងនុយក្លេអ៊ែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ