អ៊ីរ៉ង់ផ្គើនសហរដ្ឋអាមេរិកដោយដឹកប្រេងចំនួន ៥កប៉ាល់ទៅឲ្យវ៉េណេស៊ុយអេឡា
ចុះផ្សាយនៅថ្ងៃ៖
ស្តាប់ - ០៥:២២
នៅថ្ងៃអាទិត្យ ទី២៤ វិច្ឆិកា ប្រធានាធិបតីវ៉េណេស៊ុយអេឡាលោកនីកូឡា ម៉ាឌុយរ៉ូបានសាទរចំពោះវត្តមានកប៉ាល់ដឹកប្រេងអ៊ីរ៉ង់ទី១ នៅក្នុងដែនទឹកវ៉េណេស៊ុយអេឡា។ ទន្ទឹមនឹងសាទរវត្តមានប្រេងអ៊ីរ៉ង់ លោកម៉ាឌុយរ៉ូក៏បានថ្លែងសរសើរពីទំនាក់ទំនងល្អរវាងវ៉េណេស៊ុយអេឡា និងអ៊ីរ៉ង់ រួចដៀមដាមដាក់អាមេរិកថា គ្មានថ្ងៃដែលប្រជាជននៃប្រទេសទាំងពីរលត់ជង្គុងនៅចំពោះមុខចក្រពត្តិនិយមអាមេរិកឡើយ។ គួររម្លឹកថា អ៊ីរ៉ង់ និងវ៉េណេស៊ុយអេឡាកំពុងមានទំនាក់ទំនងតានតឹងជាមួយអាមេរិក និងកំពុងជាប់ទណ្ឌកម្មអាមេរិកក្នុងវិស័យប្រេងដូចគ្នា។ តើទង្វើរបស់អ៊ីរ៉ង់ចំពោះវ៉េណេស៊ុយអេឡាពេលនេះមិនមែនជាការផ្គឺនអាមេរិកទេ ឬយ៉ាងណា និងថា តើរដ្ឋបាលអាមេរិករបស់លោកត្រាំអាចមានចំណាត់ការអ្វីខ្លះ ?។
ប្រេងដែលអ៊ីរ៉ង់បានបញ្ជូនទៅឲ្យវ៉េណេស៊ុអេឡាមានចំនួន ៥កប៉ាល់ក្នុងបរិមាណសរុប ១លាន ៥សែនធុង។ បើគ្មានឧសបគ្គអ្វីទេ ប្រេងទាំង ៥កប៉ាល់បើកឆ្លងកាត់មហាសមុទ្រអាត្លង់ទិកនឹងទៅដល់កំពង់ផែវ៉េណេស៊ុយអេឡានៅប៉ុន្មានថ្ងៃខាងមុខ។ នេះពិតជាដំណឹងល្អមួយដែលប្រធានាធិបតីវ៉េណេស៊ុយអេឡាលោកនីកូឡា ម៉ាឌុយរ៉ូមិនអាចមិនសាទរបានទេ។ តែអ្វីដែលលោកម៉ាឌុយរ៉ូសរសើរមិនដាច់មាត់នោះ គឺទំនាក់ទំនងល្អរវាងវ៉េណេស៊ុយអេឡា និងអ៊ីរ៉ង់ ព្រមទាំងមិនញញើតវាយប្រហារលើអាមេរិកដែលលោកចាត់ទុកជាចក្រពត្តិនិយម។ « ប្រជាជនយើងទាំងពីរជាអ្នកសន្តិភាពនិយមដែលចង់បានការអភិវឌ្ឍន៍ យើងទាំងពីរជាប្រជាជនឧទ្ទាម និងប្រជាជនបដិវត្តដែលគ្មានថ្ងៃលុតជង្គង់នៅចំពោះមុខចក្រពត្តិនិយមអាមេរិកឡើយ » នេះជាការថ្លែងរបស់លោកម៉ាឌុយរ៉ូក្នុងថ្ងៃអាទិត្យ ទី២៤ ឧសភា។
ប្រជាជនយើងទាំងពីរដែលមនុស្សខ្លាំងនៅវ៉េណេស៊ុយអេឡារូបនេះចង់និយាយ គឺប្រជាជនវ៉េណេស៊ុយអេឡា និងប្រជាជនអ៊ីរ៉ង់ដែលកំពុងជាប់ក្នុងសំណាញ់ទណ្ឌកម្មអាមេរិកលើវិស័យប្រេងដូចគ្នា។ អ៊ីរ៉ង់បានយល់ច្បាស់ណាស់ថា អ្វីដែលខ្លួនបានធ្វើនេះជាការបំពានលើទណ្ឌកម្មអាមេរិក និងអាចរុញទំនាក់ទំនងជាមួយអាមេរិកដែលកំពុងតានតឹងស្រាប់ឲ្យធ្លាក់ដុបដាបរឹតតែខ្លាំង។ មិនត្រឹមតែមិនខ្វល់ប៉ុណ្ណោះទេ តែថែមទាំងហ៊ានព្រមានក្រុងវ៉ាស៊ីនតោននាប៉ុន្មានថ្ងៃមុនថា បើអាមេរិកហ៊ានរារាំងកប៉ាល់ប្រេងអ៊ីរ៉ង់សម្រាប់វ៉េណេស៊ុយអេឡា អាមេរិកដែលមាននាវាចម្បាំងនៅក្នុងតំបន់នឹងអាចទទួលផលវិបាកជាក់ជាមិនខាន។
រហូតមកដល់ពេលនេះ គេនៅមិនទាន់ឃើញមានប្រតិកម្មអ្វីពីរដ្ឋបាលអាមេរិករបស់លោកដូណាល់ ត្រាំទេ។ ចំណែកមេបញ្ជាការកងទ័ពអាមេរិកប្រចាំតំបន់ការ៉ាអ៊ីបឧត្តមនាវី Craig Faller បានថ្លែងថា អាមេរិកបន្តតាមដានមើលដោយក្តីបារម្ភចំពោះសកម្មភាពរបស់អ៊ីរ៉ង់ជាមួយវ៉េណេស៊ុយអេឡា។ តែឧត្តមនាវី Faller មិនបាននិយាយដល់កប៉ាល់ដឹកប្រេងរបស់អ៊ីរ៉ង់ទៅឲ្យវ៉េណេស៊ុយអេឡាឡើយ។ មែនទែនទៅ សង្រ្គាមពាក្យសម្តីរវាងអាមេរិក និងអ៊ីរ៉ង់ ហើយរវាងអាមេរិក និងវ៉េណេស៊ុយអេឡាមិនមែនជារឿងថ្មី ហើយក៏ប្រហែលជាគ្មានសង្ឃឹមអាចបិទបញ្ចប់នាពេលឆាប់ៗខាងមុខដែរ។ ម្នាក់ស្ថិតនៅដើមបូព៌ា និងម្នាក់ទៀតស្ថិតនៅអាមេរិកខាងត្បូងមែន តែអ៊ីរ៉ង់ និងវ៉េណេស៊ុយអេឡាមានសត្រូវរួមដូចគ្នា គឺសហរដ្ឋអាមេរិក។
ដូច្នេះជារឿងធម្មតាដែលក្រុងការ៉ាកាស់រួមដៃជាមួយក្រុងតេហេរ៉ង់ដើម្បីត ទល់នឹងក្រុងវ៉ាស៊ីនតោន។ លោកម៉ាឌុយរ៉ូជាប្រមុខរដ្ឋបរទេសទី១ ចេញមុខថ្កោលទោសអាមេរិកដែលបានបាញ់សម្លាប់ឧត្តមសេនីយអ៊ីរ៉ង់កាសឹម សូឡីម៉ានីកាលពីខែមករាក្នុងប្រទេសអ៊ីរ៉ាក់។ តើការដែលអ៊ីរ៉ង់ដឹកប្រេងទៅឲ្យវ៉េណេស៊ុយអេឡាពេលនេះជាកាយវិការជួយគ្នាក្នុងគ្រាមានអាសន្ន ឬមួយក៏ដើម្បីប្រយោជន៍ខ្លួនឯងដែរ ?។ គឺទាំងពីរ ព្រោះប្រេងដែលអ៊ីរ៉ង់ដឹកទៅវ៉េណេស៊ុយអេឡាមិនមែនជាជំនួយមនុស្សធម៌ទេ តែជាជំនួញ។ ក្នុងនាមជាប្រទេសជង្រុកប្រេងមួយ វ៉េណេស៊ុយអេឡាដែលកំពុងមានវិបត្តិសេដ្ឋកិច្ចធ្ងន់ធ្ងរដោយសារទណ្ឌកម្មបានស្គាល់ផលិតកម្មប្រេងឆៅដាំក្បាលចុះ និងរោងចក្រចម្រាញ់ប្រេងបិទទ្វារ។ បច្ចុប្បន្ន វ៉េណេស៊ុយអេឡាបូមប្រេងតែជាង ៦២០ ០០០ធុងប៉ុណ្ណោះក្នុងមួយថ្ងៃ ពោលតិចជាងឆ្ងាយណាស់ពី ១០ឆ្នាំមុនដែលបូម ៣លានធុងក្នុងមួយថ្ងៃ។
ដូច្នេះសម្រាប់ក្រុងការ៉ាកាស់ ប្រេងអ៊ីរ៉ង់ពិតជាខ្យល់អុកស៊ីសែនដែលអនុញ្ញាតឲ្យពលរដ្ឋវ៉េណេស៊ុយអេឡាអាចបន្តដកដង្ហើមស្រួលបន្តិចឡើងវិញ។ ចំណែកក្រុងតេហេរ៉ង់ ការលក់ប្រេងឲ្យវ៉េណេស៊ុយអេឡាក៏បានជួយខ្លួនឲ្យទទួលបានលុយ និងបញ្ចេញស្តុកប្រេងដែលសល់ច្រើនដោយទណ្ឌកម្មអាមេរិក។ តែសំណួរដែលចោទមានពីរ ទី១ តើវ៉េណេស៊ុយអេឡាដែលកំពុងត្រដរខ្យល់ស្រាប់មានលុយពីណាទៅឲ្យអ៊ីរ៉ង់ ?។ រដ្ឋាភិបាលក្រុងការ៉ាកាស់មិនបាននិយាយអ្វីទេនៅលើរឿងនេះ តែមេបក្សប្រឆាំងលោកហ័ន ហ្កាយដូបានចោទលោកម៉ាឌុយរ៉ូពីបទដោះដូរជាមួយនឹងមាសដែលយកចេញពីតំបន់រ៉ែនៅប៉ែកខាងត្បូងប្រទេសដោយខុសច្បាប់។ សំណួរទី២ ប្រេងអ៊ីរ៉ង់អាចជួយដោះទាល់វ៉េណេស៊ុយអេឡាបានតែ ១ខែប៉ុណ្ណោះ រួចចុះសម្រាប់ខែ និងឆ្នាំបន្ទាប់ទៀតបានប្រេងពីណាទៅប្រើ ព្រោះបើអត់ប្រេងទេ សកម្មភាពសេដ្ឋកិច្ចក៏ជាប់គាំងដែរ ?។
លោកស្រី Giovanna de Michelle អ្នកជំនាញខាងទំនាក់ទំនងអន្តរជាតិបានបញ្ជាក់ថា ការដែលអ៊ីរ៉ង់បញ្ជូនប្រេងទៅឲ្យវ៉េណេស៊ុយអេឡាពេលនេះអាចធ្វើឲ្យអ៊ីរ៉ង់ទទួលទណ្ឌកម្មបន្ថែមពីរដ្ឋបាលអាមេរិករបស់លោកត្រាំ និងក៏កំពុងធ្វើឲ្យលោកត្រាំទើសទាល់ចិត្តខ្លាំងដែរ។ តែលោកស្រីមិនជឿថា វាអាចឈានឲ្យមានការប្រឈមមុខផ្លូវអាវុធដាក់គ្នាទេ។ មិនអាចព្រោះទី១ លោកត្រាំកំពុងឈឺក្បាលខ្លាំងនឹងវិបត្តិកូវីដ១៩ និងទី២ អាមេរិកកំពុងត្រៀមរៀបចំបោះឆ្នោតជ្រើសរើសប្រធានាធិបតីថ្មីនៅខែវិច្ឆិកាខាងមុខ។ ណាមួយកំពុងជួបវិបត្តិកូវីដ១៩ ពេញទំហឹង និងណាមួយជិតដល់ពេលរៀបចំបោះឆ្នោតផង វាមិនមែនជាឱកាសល្អដែលក្រុងវ៉ាស៊ីនតោនត្រូវបើកសមរភូមិប្រយុទ្ធថ្មីនោះទេ នេះជាការសន្និដ្ឋានរបស់លោកស្រី Michelle៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ