លោកនីកូឡា ម៉ាឌូរ៉ូ អះអាងថាបានបង្ក្រាបទាន់ពេល នូវផែនការអាមេរិកដែលចង់ចាប់ខ្លួនលោក
លោកនីកូឡា ម៉ាឌូរ៉ូ ប្រធានាធិបតីវ៉េណេស៊ុយអេឡា បានប្រកាសតាមបណ្តាញព័ត៌មាន កាលពីថ្ងៃព្រហស្បតិ៍ ទី៧ឧសភា ថា ជនជាតិអាេមរិក២នាក់ ដែកសមត្ថកិច្ចវ៉េណេស៊ុយអេឡា ចាប់ឃាត់ខ្លួន កាលពីថ្ងៃចន្ទកន្លងទៅ គឺជាអតីតទាហានអាមេរិក។ ការឃាត់ខ្លួននេះ គឺជាការបង្រ្កាបបានទាន់ពេលវេលា នូវផែនការចូលឈ្លានពានតាមផ្លូវសមុទ្រ បញ្ជាដោយរដ្ឋាភិបាលសហរដ្ឋអាមេរិក ក្នុងគោលបំណងធ្វើរដ្ឋប្រហារ និងចាប់ខ្លួនលោកម៉ាឌូរ៉ូ។ នេះបើតាមការអះអាង របស់លោកម៉ាឌូរ៉ូផ្ទាល់។
ចុះផ្សាយនៅថ្ងៃ៖
ស្តាប់ - ០២:៣២
លោកនីកូឡា ម៉ាឌូរ៉ូ បានចោទទៅលើរដ្ឋាភិបាលសហរដ្ឋអាមេរិក ថាបានរៀបផែនការ ចូលឈ្លានពានតាមច្រកសមុទ្រ ដើម្បីធ្វើរដ្ឋប្រហារ និងចាប់ខ្លួនលោកម៉ាឌូរ៉ូ បញ្ជូនទៅសហរដ្ឋអាមេរិក។ តែជាសំណាងល្អ ផែនការនេះ ត្រូវបានកងកម្លាំងវ៉េណេស៊ុយអេឡា បង្ក្រាបបានទាន់ពេលវេលា កាលពីថ្ងៃអាទិត្យកន្លងទៅ។ មនុស្សជាង២០នាក់ ដែលសុទ្ធជាកម្លាំងស្នូលនៃប្រតិបត្តិការរបស់អាមេរិកនេះ ត្រូវបានចាប់ខ្លួន ដែលក្នុងនោះមាន២នាក់ ជាអតីតទាហានអាមេរិក។ នេះបើតាមការប្រកាស របស់លោក ម៉ាឌូរ៉ូ។
នៅតាមកញ្ចក់ទូរទស្សន៍ លោក ម៉ាឌូរ៉ូ បានលើកបង្ហាញលិខិតឆ្លងដែនរបស់ជនជាតិអាមេរិកទាំង២នាក់ ម្នាក់ឈ្មោះ Luke Denman និងម្នាក់ទៀត ឈ្មោះ Airan Berry ដែលសុទ្ធតែជាអតីតទាហានអាមេរិក។ លោកម៉ាឌូរ៉ូ ក៏បានលើកបង្ហាញ បណ្ណការងារបញ្ជាក់ថាជនទាំង២នេះ ធ្វើការឲ្យក្រុមហ៊ុនសន្តិសុខឯកជនមួយ ឈ្មោះថា Silvercorp USA។ យោងតាមមេធាវីម្នាក់ ឈ្មោះ Josnars Baduel ដែលត្រូវគេចាប់ខ្លួនដែរ បានលើកឡើងថា អតីតទាហានអាមេរិកទាំង២ ធ្លាប់ជាសមាជិកក្នុងក្រុមអង្គរក្សរបស់លោកដូណាល់ ត្រាំ។
Silvercorp USA គឺជាក្រុមហ៊ុនរបស់អតីតទាហានអាេមរិកម្នាក់ទៀត ឈ្មោះ Jordan Goudreau។ យោងតាមលោកម៉ាឌូរ៉ូ ក្រុមហ៊ុនសន្តិុសុខឯកជនឈ្មោះ Silvercorp USA បានចុះកិច្ចសន្យាក្នុងតម្លៃ២១២លានដុល្លារ ជាមួយនឹងក្រុមប្រឆាំងដឹកនាំដោយលោក រ្ហាន់ ហ្កៃដូ ដើម្បីចូលមកវេណេស៊ុយអេឡា បើកប្រតិបត្តិការចាប់ខ្លួនលោកប្រធានាធិបតីម៉ាឌូរ៉ូ យកទៅសហរដ្ឋអាមេរិក។
នៅក្នុងវីដេអូផ្សព្វផ្សាយតាមទូរទស្សន៍ជាតិវ៉េណេស៊ុយអេឡា អតីតទាហានអាមេរិកទាំង២នាក់ បានសារភាពពីផែនការនេះ ហើយអះអាងទៀតថា គឺ លោក Jordan Goudreau ម្ចាស់ក្រុមហ៊ុនសន្តិសុខSilvercorp USA បានទទួលបញ្ជាដោយផ្ទាល់ពីលោក ដូណាល់ ត្រាំ។
ដោយឡែក លោក Juan José Rendon អតីតទីប្រឹក្សានយោបាយធ្វើការឲ្យលោក រ្ហាន់ ហ្កៃដូ បានបញ្ជាក់ប្រាប់ទូរទស្សន៍CNN ថាគឺរូបលោកជាអ្នកចុះកិច្ចសន្យាមួយ ជាមួយនឹងក្រុមហ៊ុន Silvercorp USA មិនមែនលោក រ្ហាន់ ហ្កៃដូទេ។ តែកិច្ចសន្យានោះ គ្រាន់តែជាកិច្ចសន្យា « បើកការពិចារណាត្រិះរិះ » ក្នុងការរកវិធីចាប់ខ្លួនលោកនីកូឡាម៉ាឌូរ៉ូ ហើយបន្ទាប់មកទៀត បញ្ជូនខ្លួនមកសហរដ្ឋអាមេរិក ជាទីដែលតុលាការបានចោទប្រកាន់លោក ពីបទ ជួញដូរគ្រឿងញៀន។
យ៉ាងណាក៏ដោយ តំណាងរដ្ឋាភិបាលសហរដ្ឋអាមេរិក បានបដិសេធដំណឹង និងការចោទប្រកាន់ទាំង។ គេគ្រាន់តែបានអះអាងថា គេកំពុងព្យាយាមស្វែងរកវិធីចរចា ដើម្បីបញ្ជូនអតីតទាហានអាមេរិកទាំង២នាក់ ទៅកាន់សហរដ្ឋអាមេរិកវិញ។ ប៉ុន្តែបើយោងតាមការអះអាងរបស់លោកនូកូឡា ម៉ាឌូរ៉ូ អាមេរិកបានកាត់ផ្តាច់ រាល់ផ្លូវទំនាក់ទំនងទាំងអស់ ជាមួយវ៉េណេស៊ុយអេឡា ក្រោយផែនការខ្លួនក្លាយជាផេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ