វ៉េណេស៊ុយអេឡា ចាប់ខ្លួនទាហានអាមេរិកពីរនាក់ពីបទប៉ុនប៉ងចូលឈ្លានពាន
ប្រធានាធិបតីវ៉េណេស៊ុយអេឡា លោក នីកូឡា ម៉ាឌូរ៉ូ ( Nicolas Maduro) បានប្រកាសនៅថ្ងៃចន្ទទី ៤ ឧសភា ចាប់បានភេរវជនចំនួន១៣នាក់ ក្នុងនោះពីរនាក់ជាពលរដ្ឋអាមេរិក។ ទាហានអាមេរិក ដែលស៊ីឈ្នួលឱ្យមេបក្សប្រឆាំង ហ័ន ហ្កៃដូ (Juan Guaido) បានប៉ុនប៉ងចូលលុកលុយប្រទេសវ៉េណេស៊ុយអេឡា បានផ្លូវសមុទ្ទ ដើម្បីផ្តួលរដ្ឋាភិបាល។ នេះបើតាមសំដីរបស់លោកម៉ាឌូរ៉ូ។
ចុះផ្សាយនៅថ្ងៃ៖
ស្តាប់ - ០១:៥៦
នៅក្នុងសុន្ទរកថាតាមកញ្ចក់ទូរទស្សន៍ជាតិ លោក នីកូឡា ម៉ាឌូរ៉ូ បានចោទប្រកាន់ប្រមុខបក្សប្រឆាំង លោក ហ័ន ហ្កៃដូ (Juan Guaido) ដោយចំៗតែម្តង។ សម្រាប់ប្រធានាធិបតីវ៉េណេស៊ុយអេឡា លោក ហ្កៃដូ ជាអ្នកជ្រើសរើសទាហានស៊ីឈ្នួល ចេញពីកងកម្លាំងពិសេសរបស់អាមេរិក ឱ្យចូលមកឈ្លានពានប្រទេស ដើម្បីប៉ុនប៉ងផ្តួលរដ្ឋាភិបាល។
លោក ម៉ាឌូរ៉ូ បានបង្ហាញអត្តសញ្ញាណជនជាតិអាមេរិកចាប់ខ្លួនបានទាំងពីរ ( Luke Denman, អាយុ៣៤ឆ្នាំ និង Airan Berry អាយុ៤១ឆ្នាំ) ដោយលើកគ្រវីលិខិតឆ្លងដែនប្រាប់ផ ង។ ជនទាំងពីរនេះ ជានាយទាហានរបស់ក្រុមហ៊ុនសន្តិសុខ Silvercorp នៅ ផ្លរីដា។ ប្រធានក្រុមហ៊ុនសន្តិសុខ ឈ្មោះ Jordan Goudreau ដែលបានប្រកាសទទួលស្គាល់ថាបានប៉ុនប៉ងចូលលុកវ៉េណេស៊ុយអេឡា ក៏បានអះអាងបញ្ជាក់ប្រាប់ Reuteurs ទៀតថា ជនជាតិអាមេរិកពីរនាក់នេះពិតជាធ្វើការឱ្យក្រុមហ៊ុនខ្លួននៅវ៉េណេស៊ុយអេឡា និងជាអតីតទាហានធ្លាប់ចុះទៅសមរភូមិនៅអ៊ីរ៉ាក់និងអាហ្វហ្កានីស្ថាន។
សូមបញ្ជាក់ថា កាលពីថ្ងៃអាទិត្យ រដ្ឋាភិបាលវ៉េណេស៊ុយអេឡា បានបរិហារថាមានទាហានស៊ីឈ្នួល ប៉ុនប៉ុងចូលលុកប្រទេសតាមផ្លូវសមុទ្ទមកពីប្រទេសកូឡុំប៊ី។ ជាផែនការដែលគាំទ្រដោយសហរដ្ឋអាមេរិក។ ប្រធានាធិបតីវ៉េណេស៊ុយអេឡា បានទម្លាក់ទំនួលខុសត្រូវទៅលើលោកត្រាំ និងលោក អ៊ីវ៉ាន់ ឌូក (Ivan Duque)។
ពុំទាន់មានប្រតិកម្មអ្វីតបមកពីខាងសហរដ្ឋអាមេរិកទេ ទាក់ទងនឹងការចាប់ខ្លួនអតីតទាហានអាមេរិកពីរនាក់នេះ។ តែអ្នកតំណាងអាមេរិកបានបដិសេធ ថារដ្ឋាភិបាលអាមេរិកគ្មានពាក់ព័ន្ធនឹងផែនការលុកលុយដូចការចោទប្រកាន់របស់វ៉េណេស៊ុយអេឡាទេ។
ប្រមុខបក្សប្រឆាំង លោក ហ្កៃដូ (Juan Guaido)វិញ គិតថា រដ្ឋាភិបាល កំពុងស្វែងរកផ្លូវពង្វាងមតិសាធារណៈពីព្រឹត្តិការណ៍ហិង្សាបង្ហូរឈាម កណ្តាលរដ្ឋធានី។ នារយៈពេលប៉ុន្មានថ្ងៃនេះចុងក្រោយនេះ មានកុបកម្មមរណៈនៅក្នុងពន្ធនាគារផង និងការប្រយុទ្ធគ្នារវាងក្រុមបនឧក្រិដ្ឋជនផង។ បក្សប្រឆាំងបានបដិសេធ ថាមិនបានទៅពឹងពាក់ក្រុមហ៊ុនសន្តិសុខអាមេរិកដើម្បីមកផ្តួលលោកនីកូឡា ម៉ាឌូរ៉ូ ពីតំណែងទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ