ផ្ទុះនៅកំពង់ផែបេរូត៖ ហេតុអ្វីអ៊ីស្រាអែលបោះដៃជួយលីបង់ដែលជាសត្រូវនឹងខ្លួន?
ចុះផ្សាយនៅថ្ងៃ៖
ស្តាប់ - ០៤:៣៩
ភ្លាមៗ នៅក្រោយបដិសេធថា ខ្លួន គ្មានជាប់ពាក់ព័ន្ធ នឹងហេតុការណ៍ផ្ទុះនៅកំពង់ផែបេរូត អ៊ីស្រាអែលដែលនៅមិនទាន់ចុះកិច្ចព្រមព្រៀងសន្តិភាពជាមួយលីបង់នៅឡើយ បានស្នើផ្តល់ជំនួយមនុស្សធម៌ដល់ប្រជាជនលីបង់។ ម្ខាងជាអ្នកបោះដៃ ចង់ជួយក្នុងស្មារតីមនុស្សធម៌ ប៉ុន្តែ ម្ខាងទៀត មើលឃើញថា ជាកាយវិការលាក់ពុត ១០០ជំពូករបស់អ៊ីស្រាអែល ព្រោះថា ទើបតែប៉ុន្មានថ្ងៃមុនសោះ ទាហានអ៊ីស្រាអែលបានវាយប្រហារលើទឹកដីភាគខាងត្បូងលីបង់ ដែលជាប់ព្រំដែនជាមួយអ៊ីស្រាអែល។ ស្ថិតក្នុងកាលៈទេសៈបែបនេះ តើលីបង់ សុខចិត្តលាដៃ ទទួលជំនួយរបស់អ៊ីស្រាអែល ដែរឬទេ?
មួយថ្ងៃក្រោយ ហេតុការណ៍ផ្ទុះនៅកំពង់ផែបេរូត នាយករដ្ឋមន្រ្តីអ៊ីស្រាអែល នៅក្នុងឱកាសឆ្លើយសំណួរនៅរដ្ឋសភាបាននិយាយរំលែកទុក្ខជាមួយប្រជាជនរងគ្រោះលីបង់។ នៅយប់ថ្ងៃដដែល ចៅហ្វាយក្រុងតែល អាវីវ បានសំដែងសាមគ្គីភាពជាមួយ ប្រជាជនលីបង់ ដោយបានបញ្ជាឲ្យគេបញ្ចាំងភ្លើង ពណ៌ទង់ជាតិលីបង់ ទៅលើអគារសាលាក្រុង។ កាយវិការរបស់ចៅហ្វាយក្រុងតែលអាវីវ បានបង្កឲ្យមានតវ៉ា រិះគន់ ពីសំណាក់ក្រុមស្តាំនិយមជ្រុល រួមទាំងកូនប្រុសរបស់នាយករដ្ឋមន្រ្តីអ៊ីស្រាអែលផងដែលសរសេរនៅលើទំព័រហ្វេសប៊ុករបស់ខ្លួន ថា លីបង់ ជាប្រទេសសត្រូវរបស់អ៊ីស្រាអែល។ បង្ហោះបណ្តែតទង់ជាតិរបស់សត្រូវនៅកណ្តាលក្រុងយ៉ាងដូច្នេះ គឺជារឿង មិនត្រឹមត្រូវ និងជាបទឧក្រិដ្ឋ។ នៅមុនប្រតិកម្មអវិជ្ជមានរបស់ក្រុមស្តាំនិយមជ្រុល នេះទៅទៀត ចៅហ្វាយក្រុង តែលអាវីវបាន សរសេរសារTwitterថា “មនុស្សជាតិមានតម្លៃខ្ពស់ជាងជម្លោះ។ យើងគិតដល់ប្រជាជនលីបង់ ដែលរងគ្រោះដោយសារមហន្តរាយលើកនេះ”។
អ៊ីស្រាអែលបានបង្ហាញសមានចិត្តចង់ជួយលីបង់ តាំងពីនៅយប់ថ្ងៃដែលមានហេតុការណ៍ផ្ទុះនៅកំពង់ផែម្ល៉េះ។ បន្ទាប់ពីអះអាងថា ខ្លួនគ្មានពាក់ព័ន្ធនឹងហេតុការណ៍ផ្ទុះ នៅកំពង់ផែបេរូត កងទ័ពអ៊ីស្រាអែលបានចេញមុខមុនគេ ដើម្បីស្នើបញ្ជូន ជំនួយមនុស្សធម៌ និងថ្នាំពេទ្យ តាមរយៈ អង្គការសហប្រជាជាតិ។ ប៉ុន្តែ ការប៉ុនប៉ងរបស់អ៊ីស្រាអែល មិនបានសម្រេចនោះទេ។ រដ្ឋាភិបាលលីបង់ដែលកំពុងទទួលបានជំនួយជាបន្តបន្ទាប់ពីបរទេស ពីបារាំង ពីសម្ព័ន្ធអារ៉ាប់ ពី អ៊ីរ៉ង់ ដែលជាសម្ព័ន្ធមិត្តរបស់ក្រុមអេស្បូឡាលីបង់ មិនបាននិយាយឆ្លើយតបអ្វីទេ ទៅនឹងសំណើផ្តល់ជំនួយរបស់អ៊ីស្រាអែល។
ឥរិយាបថរបស់អ៊ីស្រាអែល ដែលចង់ជួយ លីបង់នៅពេលនេះ គឺជារឿងដែលគេមិនបានទន្ទឹងទុកមុននោះទេ។ អ៊ីស្រាអែល និងលីបង់ ប្រទេសគូសត្រូវ ទាំងពីរ នៅមិនទាន់ចុះកិច្ចព្រមព្រៀងសន្តិភាពជាមួយគ្នា និងអាចផ្ទុះសង្រ្គាមដាក់គ្នាគ្រប់ពេលវេលា។ លីបង់ សមាជិកមួយរបស់សម្ព័ន្ធអារ៉ាប់ មិនទទួលស្គាល់រដ្ឋអ៊ីស្រាអែលនោះទេ។ អ៊ីស្រាអែល បានធ្វើសង្រ្គាម វាយប្រហារលីបង់ដល់ទៅ២ដង។ សង្រ្គាមប្រយុទ្ធគ្នារវាងទាហានអ៊ីស្រាអែល និងក្រុមអេស្បូឡា លីបង់ នៅឆ្នាំ ២០០៦ បានសម្លាប់មនុស្សជាង ១២០០នាក់។ អ៊ីស្រាអែល និងលីបង់នៅតែតានតឹងគ្នា ជាពិសេស នៅតាមព្រំដែនភាគខាងត្បូងលីបង់ ជាមួយអ៊ីស្រាអែល ជាទីដែលអ៊ីស្រាអែល កាលពីចុងខែកក្កដាមុននេះ បានបាញ់សម្លាប់ជនប្រដាប់អាវុធ ដែលអ៊ីស្រាអែលចោទថា ជាភេរវជន របស់ក្រុមអេស្បូឡា លីបង់។
អ៊ីស្រាអែល មិនមែនជាមិត្តរបស់លីបង់។ នៅពេលកំពុងជាប់រងគ្រោះ រងទុក្ខ ដោយសារហេតុការណ៍ផ្ទុះលើកនេះផង ប្រជាជនលីបង់ គ្មានពេលរវល់ចាប់អារម្មណ៍នឹងពាក្យស្នើផ្តល់ជំនួយរបស់អ៊ីស្រាអែលនោះទេ។ អ្នកប្រើប្រាស់អ៊ីនធ័រនែត របស់លីបង់ម្នាក់ នៅបាន សរសេរប្រាប់អ៊ីស្រាអែល កុំឲ្យឆ្លៀតកេងចំណេញ យកវិបត្តិ សោកនាដកម្មលើកនេះ ដើម្បីលាងសម្អាត ឧក្រិដ្ឋកម្មដែលខ្លួនបាន និង កំពុងប្រព្រឹត្តលើប្រជាជនលីបង់នោះ។
សាស្រ្តាចារ្យនៅសកលវិទ្យាល័យ វិទ្យាសាស្រ្តនយោបាយ នៅទីក្រុងប៉ារីសម្នាក់យល់ថា អ៊ីស្រាអែលបានបោះដៃ ចង់ផ្តល់ជំនួយ ជួយលីបង់ នៅពេល នេះ ក៏ដោយសារបរិបទនយោបាយនៅក្នុងតំបន់។ ទី១ តាមរយៈ ការស្នើសុំផ្តល់ជំនួយសម្រាប់ប្រជាជនលីបង់ អ៊ីស្រាអែលចង់បញ្ជាក់ថា ខ្លួនមិនមែនជាអ្នកនៅពីក្រោយ ហេតុការណ៍ផ្ទុះនៅកំពង់ផែបេរូតនោះទេ។ មួយវិញ អ៊ីស្រាអែល ដែលចង់បង្ហាញទៅពិភពលោកថា ខ្លួនមានជំហរសន្តិភាព ចង់ជួយប្រជាជនដែលកំពុងមានទុក្ខលំបាក បើទោះជាពួកគេទាំងនោះ រស់នៅក្នុងប្រទេសជាសត្រូវក៏ដោយ។
សម្រាប់អតីតប្រធានស៊ើបការណ៍សម្ងាត់យោធាអ៊ីស្រាអែល កាយវិការមនុស្សធម៌របស់អ៊ីស្រាអែល នឹងអាចបង្រួបបង្រួមប្រជាជាតិទាំងពីរ អ៊ីស្រាអែល និងលីបង់។ មន្រ្តីអ៊ីស្រាអែល បញ្ជាក់ ហើយ បញ្ជាក់ទៀតថា សត្រូវរបស់អ៊ីស្រាអែល មិនមែនប្រជាជនលីបង់ទេ ប៉ុន្តែ គឺ ក្រុមប្រដាប់អាវុធ អេស្បូឡាលីបង់ ដែលគាំទ្រដោយប្រទេសអ៊ីរ៉ង់។ អ៊ីស្រាអែលមិនចូលចិត្តរដ្ឋាភិបាលលីបង់សព្វថ្ងៃនេះ ព្រោះថា ជារដ្ឋាភិបាល ស្និទ្ធនឹងអេស្បូឡាលីបង់។
អ៊ីស្រាអែល បានស្នើសុំផ្តល់ជំនួយមនុស្សធម៌ សម្រាប់ប្រជាជនលីបង់ ក៏ព្រោះតែបានសំឡឹងឃើញប្រទេសអារ៉ាប់ និងអ៊ីរ៉ង់ជាដើម ដែលជាសត្រូវរបស់ខ្លួន នៅក្នុងតំបន់ បានដឹកនាំយកជំនួយ ទៅជួយប្រជាជនលីបង់។ អ៊ីស្រាអែល មិនចង់បាត់បង់ឱកាសរបស់ខ្លួននោះទេ។ អ៊ីស្រាអែលចង់នាំជំនួយទៅជួយប្រជាជនលីបង់ដែរ។ ប្រជាជនលីបង់ ដែលកំពុងមានកំហឹងក្រេវក្រោធ ទាមទារឲ្យរដ្ឋាភិបាល លីបង់ ចុះចេញពីតំណែង ដែលនោះជាក្តីប្រាថ្នាចង់បានផងដែរ របស់អ៊ីស្រាអែល។ កន្លងមក នៅពេលលីបង់កំពុងធ្លាក់ក្នុងវិបត្តិ គ្មានប្រាក់សងបំណុល អ៊ីស្រាអែលក៏ធ្លាប់បានចូលរួម ចរចាបញ្ចុះបញ្ចូលមូលនិធិហិរញ្ញវត្ថុអន្តរជាតិឲ្យជួយលីបង់ដែរ ប៉ុន្តែ អ៊ីស្រាអែលបានដាក់លក្ខខណ្ឌហើយថា រដ្ឋាភិបាលលីបង់ ត្រូវតែសន្យាកាត់បន្ថយឥទ្ធិពលរបស់អេស្បូឡា លីបង់ ឲ្យនៅតិចតួច បំផុត បើសិនចង់បានជំនួយពីអ៊ីស្រាអែល។ អាចថា ជំនួយរបស់អ៊ីស្រាអែលមិនមែនជាប្រភេទជំនួយ ដែលគ្មានចំណងនោះទេ។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ