លីបង់៖ រដ្ឋមន្ត្រី៤នាក់សុំចុះពីតំណែងជាបន្តបន្ទាប់ក្រោយហេតុការណ៍ផ្ទុះ
គិតត្រឹមថ្ងៃចន្ទទី១០សីហា រដ្ឋមន្ត្រីលីបង់ ចំនួន៤នាក់ហើយ ដែលសុំលាឈប់ពីតំណែងជាបន្តបន្ទាប់គ្នា ក្រោយពីហេតុការណ៍ផ្ទុះនៅកំពង់ផែបេរូត កាលពីថ្ងៃអង្គារ៍សប្តាហ៍មុន។ រយៈពេល៧ថ្ងៃ សមាជិករដ្ឋាភិបាល៤នាក់សុំចុះចេញពីតំណែង ឯកអគ្គរដ្ឋម្នាក់ក៏សុំឈប់ ចំណែកនៅក្នុងរដ្ឋសភាវិញ អ្នកតំណាងរាស្ត្រ ចំនួន៨នាក់ ក៏បានប្រកាស លាឈប់ដែរ។ ហេតុការណ៍ផ្ទុះនៅកំពង់ផែលីបង់ បានសម្លាប់មនុស្សយ៉ាងហោចជិត១៦០នាក់ និងរបួសប្រមាណ៦ ពាន់នាក់។ ហេតុការណ៍សោកនាដកម្មនេះ បានដុតបញ្ឆេះកំហឹងពលរដ្ឋ ឱ្យខឹងរដ្ឋាភិបាល កាន់តែខ្លាំង។
ចុះផ្សាយនៅថ្ងៃ៖
ស្តាប់ - ០២:២៥
រដ្ឋមន្ត្រីលាឈប់ ពីថ្ងៃចន្ទ គឺរដ្ឋមន្ត្រីខាងហិរញ្ញវត្ថុ ដែលសុំចុះពីតំណែងបន្តកន្ទុយពីរដ្ឋមន្ត្រីក្រសួងយុត្តិធម៌, ក្រសួងបរិស្ថាន និងក្រសួងព័ត៌មាន។ ពេលមុនហេតុការណ៍ផ្ទុះវិញ រដ្ឋមន្ត្រីក្រសួងការបរទេស ក៏បានសុំលាឈប់ តាំងពីប៉ុន្មានថ្ងៃមុនសោកនាដកម្មនោះម្ល៉េះ។
ជាការរម្លឹក រដ្ឋមន្ត្រីស្រីនៃក្រសួងព័ត៌មាន ប្រកាសលាឈប់ពីតំណែង តាមទូរទស្សន៍ពីថ្ងៃសៅរ៍ ថ្លែងសុំទោសប្រជាជាតិ ដែលខ្លួនមិនអាចបំពេញក្តីរំពឹងទុករបស់ប្រជារាស្ត្របាន និងថ្កោលទោសរដ្ឋាភិបាលថាអសមត្ថភាព និងមិនអាចឱ្យខ្លួននៅបំពេញការងារ តទៅទៀតនោះឡើយ។
ទោះបីជាមានរដ្ឋមន្ត្រីជាច្រើនរូប សុំចុះពីតំណែង មានអង្គទូតក៏លាឈប់ និងអ្នកតំណាងរាស្ត្រយ៉ាងហោច៨នាក់ ប្រកាសសុំឈប់ពីតួនាទី ទៅហើយក្តី ក៏នៅមិនទាន់គ្រប់គ្រាន់ដែរ ចំពោះបាតុករវ័យក្មេងៗ ដែលកំពុងក្តៅស្លឹកត្រចៀក។ បាតុករមួយចំនួនចេញវោហារថា «ទាល់តែថ្នាក់ដឹកនាំដែលពុករលួយ ចុះចេញពីតំណែងអស់តែម្តង ទើបពួកគេសុខចិត្ត។»
បើតាមរដ្ឋធម្មនុញ្ញលីបង់ ទាល់តែសមាជិករដ្ឋភិបាល ចំនួន១ភាគ៣ សុំលាឈប់ ទើបរដ្ឋាភិបាលរលំ។ នាយករដ្ឋមន្ត្រី ហានសាន ឌីយ៉ាប ដែលបានប្រកាសឱ្យមានការបោះឆ្នោតមុនកាលកំណត់ និយាយកាលពីថ្ងៃសៅរ៍ថាលោកនឹងនៅកាន់តំណែងបន្តទៀត រហូតដល់ពេលបោះឆ្នោតនោះ។
ស្ថានភាពណ៍នៅលីបង់នាពេលនេះ កំពុងលំបាកគ្រប់គ្រង។ ហ្វូងបាតុករដែលក្រពុលមុខ ចុះផ្លូវ តវ៉ាពេញក្រុងធំៗ និងប៉ះទង្គិចជាមួយប៉ូលីសផង។ ក្រុមអ្នកនយោបាយខ្វែងគំនិតគ្នា ខណៈសេដ្ឋកិច្ចជាតិដាំក្បាលចុះ បញ្ហាអត់ការងារធ្វើកើនឡើងខ្ពស់ ដែលត្រូវរងផលវិបាកនៃកូវីដ១៩ធ្ងន់កមួយជាន់ទៀត។
ក្រោយហេតុការណ៍ផ្ទុះនៅកំពង់ផែ មនុស្ស៣សែននាក់ គ្មានជម្រកស្នាក់នៅ ហើយមនុស្សជាង២០នាក់ទៀត កំពុងតែបន្តបាត់ខ្លួន គ្មានសង្ឃឹមថាមានជីវិតរស់នោះទេ។ ក្រុមគ្រួសារពួកគេ បានស្តីបន្ទោសរដ្ឋាភិបាល ថាយឺតយ៉ាវខ្លាំងក្នុងការរុករកជនរងគ្រោះ។
ថ្ងៃអាទិត្យ ប្រទេសបារាំង សហគមអន្តរជាតិ និងអង្គការសហប្រជាជាតិ បានសម្រេចផ្តល់ជំនួយបន្ទាន់ ប្រហែល២៥០លានអឺរ៉ូឱ្យលីបង់ និងស្នើឱ្យមានស៊ើបអង្កេតអន្តរជាតិឱ្យតម្លាភាពចំពោះហេតុការណ៍ផ្ទុះ ប៉ុន្តែប្រធានាធិបតីលីបង់ បានបដិសេធទាត់ចោលសំណើស៊ើបអង្កេតនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ