ប្រជាជនលីបង់ ធ្វើបាតុកម្មប្រឆាំងនឹងរដ្ឋាភិបាលក្រោយហេតុការណ៍ផ្ទុះនៅក្រុងបេរូត
ចុះផ្សាយនៅថ្ងៃ៖
ស្តាប់ - ០៦:៤២
ថ្នាក់ដឹកនាំប្រទេសលីបង់ បានទទួលរងនូវការរិះគន់ជាខ្លាំងពីប្រជាជន ក្រោយហេតុការណ៍ផ្ទុះដ៏សាហាវនៅក្រុងបេរូតដែលបានសម្លាប់មនុស្សយ៉ាងហោច ១៥៧ នាក់ និងរបួសជាង ៥ ពាន់នាក់។ ហេតុការណ៍ផ្ទុះ មិនត្រឹមតែឆក់យកជីវិតមនុស្សយ៉ាងច្រើននោះទេ តែវាក៏បានបង្កជាការខូតខាតជាច្រើនទៀតដែររួមមានស្បៀងអាហារ ផ្ទះសម្បែង និងមន្ទីរពេទ្យជាដើម។ល។ ទុក្ខព្រួយបានប្រែទៅជាកំហឹងនិងបានរុញច្រានឲ្យប្រជាជនលីបង់ចេញធ្វើបាតុកម្មប្រឆាំងនឹងរដ្ឋាភិបាលទៀតផងកាលពីល្ងាចថ្ងៃព្រហស្បតិ៍ម្សិលមិញនេះ។
ហេតុអ្វីអាជ្ញាធរលីបង់ស្តុកអាម៉ូញ៉ូមនីត្រាតនៅកំពង់ផែចំកណ្តាលទីក្រុងបេរូត?
រដ្ឋាភិបាលលីបង់ មិនដែលបានបញ្ចេញឈ្មោះប្រភពនៃសារធាតុគីមីអាម៉ូញ៉ូមនីត្រាតនេះពីមុនមកនោះទេ។ ក៏ប៉ុន្តែ បើយោងទៅតាមមន្ត្រីសន្តិសុខលីបង់ម្នាក់ និយាយក្នុងលក្ខខណ្ឌសុំមិនបញ្ចេញឈ្មោះ សារធាតុគីមីអាម៉ូញ៉ូមនីត្រាតបរិមាណរហូតដល់ ២ ៧៥០ តោន បានទៅដល់ប្រទេសលីបង់កាលពីឆ្នាំ ២០១៣។
កាលណោះ សារធាតុគីមីអាម៉ូញ៉ូមនីត្រាតទៅដល់លីបង់តាមរយៈកប៉ាល់ដឹកទំនិញមួយឈ្មោះរ៉ូសេស (Rhosus) និងដែលមានបំពាក់ទង់ជាតិប្រទេសម៉ុលដាវី។ កប៉ាល់ដែលមានផ្ទុកសារធាតុគីមីដ៏ច្រើនសម្បើមនេះ ធ្វើដំណើរចេញពីប្រទេសហ្សកហ្ស៊ីឆ្ពោះទៅកាន់ប្រទេសម៉ូសំប៊ិក។
ខណៈពេលដែលកំពុងបើកឆ្លងកាត់សមុទ្រមេឌីទែរ៉ាណេខាងកើត កប៉ាល់ខាងលើក៏មានបញ្ហាបច្ចេកទេស ហើយត្រូវបង្ខំចិត្តចូលសុំចតនៅកំពង់ផែទីក្រុងបេរូតតែម្តង។ នេះបើយោង ទៅតាមរបាយការណ៍កាលពីឆ្នាំ ២០១៥ របស់ក្រុមហ៊ុនច្បាប់លីបង់ Barudi & Associates ដែលតំណាងឲ្យនាវិកនៃកប៉ាល់រ៉ូសេស។
មន្ត្រីសន្តិសុខលីបង់ជាច្រើននាក់ បានប្រាប់ទីភ្នាក់ងារព័ត៌មានបារាំង AFP ថា ដំបូងឡើយ កប៉ាល់ដឹកនាំទំនិញនេះត្រូវចូលចតនៅកំពង់ផែបេរូតជាបណ្តោះអាសន្នតែប៉ុណ្ណោះ។ ក៏ប៉ុន្តែដោយក្រោយមកទៀត ពោលបន្ទាប់ពីក្រុមហ៊ុនលីបង់មួយ បានដាក់ពាក្យបណ្តឹងប្រឆាំងនឹងម្ចាស់កប៉ាល់ខាងលើ អាជ្ញាធរលីបង់ក៏បានចុះឆែកឆេរកប៉ាល់ និងបានហាមមិនឲ្យបើកកប៉ាល់ចេញទៅបានឡើយ។
បន្ទាប់មកទៀត មន្ត្រីកំពង់ផែបេរូតក៏បានផ្ទុកទុកចោលអាម៉ូញ៉ូមនីត្រាត ដែលគេស្គាល់ថាជាសារធាតុគីមីមានគ្រោះថ្នាក់និងងាយផ្ទុះ រហូតដល់ទៅរាប់ឆ្នាំនៅឃ្លាំងកំពង់ផែដែលមានសភាពចាស់និងមានស្នាមប្រេះនៅតាមជញ្ជាំង ចំកណ្តាលទីក្រុងបេរូត។
អាជ្ញាធរលីបង់ បានបើកការស៊ើបអង្កេតមួយដែរកាលពី ឆ្នាំ ២០១៩ បន្ទាប់ពីឃ្លាំងនេះ បានចាប់ផ្តើមបញ្ចេញក្លិនចម្លែក ហើយអាជ្ញាធរបានសន្និដ្ឋានថាសារធាតុអាម៉ូញ៉ូមនីត្រាតនេះមាន "គ្រោះថ្នាក់" ហើយចាំបាច់ត្រូវយកចេញពីកំពង់ផែ។ ក៏ប៉ុន្តែ ការនិយាយបានតែនិយាយប៉ុណ្ណោះ គេមិនឃើញអាជ្ញាធរលីបង់ធ្វើសកម្មភាព យកសារធាតុគីមីទាំងជាង ២ ពាន់ ៧រយ តោន ចេញពីឃ្លាំងនៅកំពង់ផែក្រុងបេរូតនោះទេ រហូតដល់កើតមានហេតុការណ៍ផ្ទុះដ៏សាហាវនៅថ្ងៃអង្គារ ទី៤ សីហាតែម្តង។
ផ្ទុះបាតុកម្មនៅលីបង់ដើម្បីប្រឆាំងនឹងរដ្ឋាភិបាល
ហេតុការណ៍ផ្ទុះនៅក្រុងបេរូត ប្រៀបបីដូចជាតំណក់ទឹកមួយតំណក់ចុងក្រោយ ចាក់ចូលទៅក្នុងកែវមួយដែលមានទឹកពេញ ឲ្យហៀរចេញនូវកំហឹងដ៏ខ្លាំងរបស់ប្រជាជនលីបង់ ដែលរស់នៅក្រោមសម្ពាធនៃវិបត្តិជាច្រើនមានជាអាទិ៍ វិបត្តិនយោបាយ សេដ្ឋកិច្ច និងវិបត្តិកូវីដ។
បើគ្មានការផ្ទុះនៅថ្ងៃអង្គារនោះទេ ប្រជាជនលីបង់មិនជឿសោះឡើយថាសារធាតុគីមីងាយផ្ទុះទម្ងន់រហូតដល់ទៅជាង ២ ពាន់តោន ត្រូវអាជ្ញាធរស្តុកទុកចោលនៅខាងក្នុងឃ្លាំងចំកណ្តាលក្រុង ដោយគ្មានចាត់វិធានការសុវត្ថិភាពអស់រយៈពេលជាង ៦ ឆ្នាំមកហើយទេ។
ប្រជាជនជាច្រើននៅក្នុងប្រទេសលីបង់ និយាយថាការធ្វេសប្រហែសរបស់រដ្ឋាភិបាលជាមូលហេតុនាំឲ្យមានហេតុការណ៍ផ្ទុះ ដែលបានសម្លាប់មនុស្សយ៉ាងហោច ១៥៧ នាក់ របួសជាង ៥ ពាន់នាក់ និងបាត់បង់ទីជម្រកប្រមាណ ៣០ ម៉ឺននាក់។
ដោយទ្រាំទប់កំហឹងលែងជាប់ ប្រជាជនលីបង់ ក៏បាននាំគ្នាចុះផ្លូវធ្វើបាតុកម្ម។ ក្រុមអ្នកតវ៉ា បានប៉ះទង្គិចគ្នាជាមួយនឹងកម្លាំងសន្តិសុខលីបង់ នៅឯបាតុកម្មប្រឆាំងរដ្ឋាភិបាល នៅទីក្រុង បេរូត កាលពីល្ងាចថ្ងៃព្រហស្បតិ៍ម្សិលមិញ។ ក្នុងពេលប៉ះទង្គិចគ្នា អាជ្ញាធរលីបង់ បាន បាញ់ឧស្ម័នបង្ហូរទឹកភ្នែកទៅលើហ្វូងបាតុកររាប់សិបនាក់ផងដែរនៅក្បែរវិមានរដ្ឋសភា។
ដំណើរការស៊ើបអង្កេតរបស់រដ្ឋាភិបាលលីបង់ពាក់ព័ន្ធករណីផ្ទុះនៅបេរូត
ចាប់តាំងពីមានហេតុការណ៍ផ្ទុះឃ្លាំងនៅកំពង់ផែក្រុងបេរូត មានមនុស្សចំនួន ១៦នាក់ ហើយ ត្រូវបានចាប់ខ្លួនដែលវាគឺជាផ្នែកមួយនៃការស៊ើបអង្កេតដែលត្រូវបានប្រកាសឡើងដោយរដ្ឋាភិបាលលីបង់នៅសប្តាហ៍នេះ។ នេះ បើតាមការចុះផ្សាយរបស់ទីភ្នាក់ងារព័ត៌មានរដ្ឋលីបង់។
តើហេតុការណ៍ផ្ទុះនៅបេរូតកើតចេញពីការធ្វេសប្រហែសរបស់អាជ្ញាធរដូចការលើកឡើងរបស់ប្រជាជនលីបង់ ឬក៏មានមូលហេតុអ្វីផ្សេងទៀតនៅពីក្រោយនេះ?
យ៉ាងណាក៏ដោយ គេនៅមិនទាន់ទទួលបានព័ត៌មានអ្វីលើសពីការចាប់ខ្លួនមនុស្សចំនួន ១៦នាក់នោះទេ នៅពេលនេះ។ ដោយឡែក ក្រោយហេតុការណ៍ផ្ទុះដ៏កក្រើកនៅថ្ងៃអង្គាររួចមក មន្ត្រីលីបង់ចំនួន២ រូបបានលាលែងចេញពីតំណែង ដែលក្នុងនោះរួមមានសមាជិកសភាលោកម៉ាវ៉ាន ហាម៉ាដេ (Marwan Hamadeh) បានស្នើលាឈប់ពីតំណែងនៅថ្ងៃពុធ ខណៈដែលឯកអគ្គរដ្ឋទូតលីបង់ប្រចាំប្រទេសហ្សកដានីលោក Tracy Chamoun បានសុំលាលែងពីតំណែងកាលពីថ្ងៃព្រហស្បតិ៍ម្សិលមិញ។
គួរជម្រាបជូនដែរ ថាកាលពីថ្ងៃព្រហស្បតិ៍ម្សិលមិញ ប្រធានាធិបតីបារាំងលោក អេម៉ានុយអែល ម៉ាក្រុងបានធ្វើដំណើរទស្សនកិច្ចនៅទីក្រុងបេរូត។ នៅពេលបំពេញទស្សនកិច្ចនៅទីនោះ លោកម៉ាក្រុងបាននិយាយថា ប្រទេសលីបង់ចាំបាច់ត្រូវធ្វើកំណែទម្រង់ស៊ីជម្រៅដើម្បីងើបចេញពីវិបត្តិនានា។
ក្រៅពីនេះ លោកប្រមុខរដ្ឋបារាំង បានលើកឡើងពីគម្រោងបើកធ្វើសន្និសីទអន្តរជាតិដើម្បីប្រមែប្រមូលជំនួយជួយលីបង់ និងបានអំពាវនាវផងដែរឲ្យមានការស៊ើបអង្កេតជាអន្តរជាតិលើគ្រោះថ្នាក់ផ្ទុះឃ្លាំងដ៏ធំនៅទីក្រុងបេរូតប្រទេសលីបង់នេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ