ហេតុអ្វីបានជាតម្លៃប្រេងធ្លាក់ចុះបែរជាប៉ះពាល់ដល់សេដ្ឋកិច្ចអឺរ៉ុប?
ចុះផ្សាយនៅថ្ងៃ៖
ស្តាប់ - ០៣:៤០
កាលពីថ្ងៃចន្ទ ការិយាល័យស្ថិតិអឺរ៉ុបបានចេញផ្សាយនូវតួលេខមួយ ដែលបង្ហាញឲ្យឃើញ អំពីដំណើរវិវឌ្ឍដ៏គួរឲ្យបារម្ភ នៃសេដ្ឋកិច្ច នៅក្នុងតំបន់ចាយលុយអឺរ៉ូ។ អ្នកវិភាគជាច្រើនយល់ថា ការធ្លាក់ចុះនៃតម្លៃប្រេងឆៅ គឺជាកត្តាដ៏ចម្បងមួយ ដែលធ្វើឲ្យអឺរ៉ុបត្រូវប្រឈមមុខនឹងបញ្ហាសេដ្ឋកិច្ចនៅពេលនេះ។ តើហេតុអ្វីបានជាការធ្លាក់ចុះនៃតម្លៃប្រេងបែរជាបង្កផលប៉ះពាល់ទៅដល់សេដ្ឋកិច្ចបែបនេះទៅវិញ?
សម្រាប់អ្នកប្រើប្រាស់ប្រេង និងផលិតផលដែលធ្វើពីប្រេង ឬដែលប្រើប្រេង ការធ្លាក់ចុះនៃតម្លៃប្រេងឆៅ គឺជាដំណឹងល្អមួយ។ ក៏ប៉ុន្តែ សម្រាប់សេដ្ឋកិច្ចជាតិវិញ វាមិនប្រាកដថាជាចំណុចល្អនោះទេ។ នេះជាអ្វី ដែលកំពុងតែកើតឡើង នៅក្នុងតំបន់ចាយលុយអឺរ៉ូ។
នៅក្នុងតំបន់ចាយលុយអឺរ៉ូ តម្លៃប្រេង និងតម្លៃថាមពលដែលផលិតដោយប្រេងបានធ្លាក់ចុះរហូតដល់ទៅ ៨% នៅក្នុងខែកុម្ភៈនេះ ហើយការធ្លាក់ចុះនៃតម្លៃប្រេងនេះក៏បានទាញតម្លៃទំនិញជាច្រើនផ្សេងទៀតឲ្យធ្លាក់ចុះទៅតាមនោះដែរ។ ជាលទ្ធផល បើយោងតាមតួលេខចេញផ្សាយដោយការិយាល័យស្ថិតិអឺរ៉ុប ហៅកាត់ថា Eurostat នៅក្នុងខែកុម្ភៈកន្លងទៅនេះ តម្លៃទំនិញទូទៅគិតជាមធ្យមនៅក្នុងតំបន់ចាយលុយអឺរ៉ូ (ដែលមានសមាជិកចំនួន ១៩ប្រទេស) បានធ្លាក់ចុះរហូតដល់ទៅ ០,២% ដែលនេះគឺជាលើកទី១ ចាប់តាំងពីខែកញ្ញា ឆ្នាំទៅមិញ។
បើស្តាប់មើលទៅ តម្លៃទំនិញធ្លាក់ចុះគួរតែជាដំណឹងល្អ ជាពិសេស សម្រាប់អ្នកទិញ។ ក៏ប៉ុន្តែ តាមការពិត ការធ្លាក់ចុះនៃតម្លៃទំនិញជាទូទៅ អាចនឹងបង្កគ្រោះថ្នាក់ទៅដល់សេដ្ឋកិច្ចជាតិទាំងមូល រួមទាំងអ្នកទិញទំនិញផងដែរ គឺបញ្ហាដែលគេហៅថា “វិបត្តិបរិត្តផរណា”។ តើវិបត្តិនេះមានយន្តការបែបណា?
បើនិយាយឲ្យសាមញ្ញងាយយល់ នៅពេលដែលតម្លៃទំនិញជាទូទៅធ្លាក់ចុះ ហើយបន្តធ្លាក់ចុះជាលំដាប់ អ្នកទិញនាំគ្នាផ្អាកទិញទំនិញ ដោយចេះតែនាំគ្នាគិតថា ចាំទំនិញធ្លាក់ចុះកាន់តែទាបជាងនេះចាំទិញទើបចំណេញ។ នៅពេលដែលគ្រប់គ្នាគិតបែបនេះ ទំនិញនៅលើទីផ្សារត្រូវសល់លក់មិនដាច់ ហើយអ្នកលក់ត្រូវបង្ខំចិត្តបញ្ចុះតម្លៃបន្ថែមទៀត។
នៅពេលដែលតម្លៃទំនិញកាន់តែធ្លាក់ចុះ អ្នកលក់ត្រូវបាត់បង់ចំណូលកាន់តែច្រើន រោងចក្រផលិតទំនិញក៏បាត់បង់ចំណូល ហើយត្រូវបង្ខំចិត្តកាត់បន្ថយបុគ្គលិក ឬក៏អាចឈានទៅដល់បិទរោងចក្រតែម្តងក៏មាន។ នៅពេលនោះ វិបត្តិអ្នកអត់ការងារធ្វើនឹងកើតមានឡើង។ នៅពេលនោះហើយ ដែលបញ្ហាបរិត្តផរណានឹងជះឥទ្ធិពលអាក្រក់ ចំពោះសេដ្ឋកិច្ចជាតិជាទូទៅ។ អ្នកទិញទំនិញ ដែលពីដំបូង គិតថា ខ្លួនគួរតែជាអ្នកទទួលផលចំណេញពីការធ្លាក់ថ្លៃទំនិញនោះ ក៏នឹងត្រូវក្លាយជាជនរងគ្រោះវិញដែរ ដោយត្រូវប្រឈមមុខនឹងបញ្ហាអត់ការងារធ្វើ ហើយត្រូវបាត់បង់ប្រាក់ចំណូល។ ដល់ពេលនោះ បើទោះជាទំនិញមានតម្លៃថោកប៉ុណ្ណាក៏ដោយ បើគ្មានលុយទិញទេនោះ ក៏វាគ្មានប្រយោជន៍អ្វីនោះដែរ!
វិបត្តិបែបនេះ គេធ្លាប់ឃើញកើតមានជាច្រើនលើកណាស់មកហើយ កាលពីពេលកន្លងទៅ ដូចជា នៅក្រោយវិបត្តិសេដ្ឋកិច្ចពិភពលោកក្នុងទសវត្សរ៍ទី៣០ និងជាពិសេស គឺនៅប្រទេសជប៉ុន ដែលត្រូវជួបនឹងវិបត្តិបរិត្តផរណា តាំងពីទសវត្សរ៍ទី៩០ងើបខ្លួនមិនរួចរហូតមកទល់នឹងសព្វថ្ងៃ។
ចាប់តាំងពីក្រោយវិបត្តិសេដ្ឋកិច្ចពិភពលោកឆ្នាំ២០០៨មក បញ្ហាបរិត្តផរណា កំពុងតែជាក្តីបារម្ភដ៏ធំមួយ សម្រាប់តំបន់ចាយលុយអឺរ៉ូ។ ហេតុដូច្នេះហើយបានជាធនាគារកណ្តាលអឺរ៉ុបបានចាត់វិធានការជាច្រើន រួមមានការបញ្ចុះអត្រាការប្រាក់ និងការបញ្ចេញសាច់ប្រាក់ដ៏ច្រើនសន្ធឹកសន្ធាប់ទៅក្នុងទីផ្សារ ក្នុងគោលដៅធ្វើយ៉ាងណា ជំរុញអត្រាអតិផរណាប្រចាំឆ្នាំឲ្យកើនឡើងនៅក្នុងរង្វង់២% ដោយសារតែអ្នកសេដ្ឋកិច្ចជាទូទៅយល់ថា ទាល់តែមានអតិផរណាប្រចាំឆ្នាំក្នុងរង្វង់ ២% ទើបសេដ្ឋកិច្ចក្នុងតំបន់ចាយលុយអឺរ៉ូអាចមានកំណើនគ្រប់គ្រាន់ ក្នុងការបង្កើតការងារដល់ប្រជាជន ហើយអាចដោះស្រាយវិបត្តិអ្នកអត់ការងារធ្វើបាន។
គេនៅចាំបានថា កាលពីដើមខែកុម្ភៈនេះ លោកម៉ារីយ៉ូ ដ្រាហ្គី (Mario Draghi) អគ្គទេសាភិបាលនៃធនាគារកណ្តាលអឺរ៉ុបធ្លាប់បានអះអាងថា នយោបាយដែលធនាគារកណ្តាលអឺរ៉ុបបានដាក់ចេញកន្លងមក កំពុងតែផ្តល់មកវិញនូវលទ្ធផលជាវិជ្ជមាន។ ក៏ប៉ុន្តែ អត្រាអតិផរណាអវិជ្ជមាន -០,២% ដែលមាននៅក្នុងតួលេខរបស់ Eurostat កាលពីថ្ងៃចន្ទនេះ វាបង្ហាញផ្ទុយពីនេះទៅវិញ ហើយនេះប្រាកដជានឹងក្លាយជាសម្ពាធដ៏ធំមួយដល់ថ្នាក់ដឹកនាំនៃធនាគារកណ្តាលអឺរ៉ុប ដែលគ្រោងនឹងជួបប្រជុំគ្នា នៅថ្ងៃទី១០ ខែមីនាខាងមុខនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ