អារ៉ាប៊ីសាអូឌីតសុខចិត្តសហការដើម្បីឲ្យប្រេងឆៅបានឡើងថ្លៃឡើងវិញ
ជិតមួយខែមកហើយ ដែលតំលៃប្រេងឆៅនៅលើទីផ្សារអន្តរជាតិ បានធ្លាក់ចុះមកនៅតែត្រឹមជាង៣០ដុល្លារ ក្នុងមួយធុងបារីល។ ប្រទេសសមាជិកអង្គការអ្នកនាំប្រេងចេញ កំពុងតែស្វះស្វែងរកវិធី ដើម្បីផ្តល់សន្ទុះឲ្យប្រេងឆៅបានឡើងថ្លៃឡើងវិញ។ រុស្ស៊ីដែលមិនមែនជាសមាជិកអង្គការនេះ បានអំពាវនាវកាលពីថ្ងៃសុក្រ ថាខ្លួនសុខចិត្តសហការ ព្រោះខ្លួនក៏កំពុងតែខាតបង់ច្រើនដែរ។ អារ៉ាប៊ីសាអូឌីត ដែលជាប្រទេសនាំប្រេងចេញសំខាន់ជាងគេ បានសន្យានៅថ្ងៃអាទិត្យនេះថា ខ្លួនសុខចិត្តសហការ ដើម្បីឲ្យប្រេងឡើងថ្លៃឡើងវិញ តែមិនបានបញ្ជាក់ទេថា នឹងសុខចិត្តកាត់បន្ថយការផលិត។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២៩
កាលពីដើមខែមករា តម្លៃប្រេងឆៅធ្លាក់នៅត្រឹមតែ ៣០ដុល្លារក្នុងមួយធុងបារីល។ នេះជាតម្លៃទៀបបំផុត គិតចាប់តាំងពីឆ្នាំ២០០៣មក។ ហើយបើប្រៀបធៀបទៅឆ្នាំ២០១៤ តម្លៃប្រេងឆៅបានធ្លាក់ដល់ទៅ ៧០% ដែលកាលនោះមួយធុងបារីសថ្លៃដល់ទៅ ១១០ដុល្លារ។
វ៉េណេហ្ស៊ុយអេឡា អ្នកខាតធំ៖
ប្រទេសវ៉េណេហ្ស៊ុយអេឡា សមាជិកមួយរូបនៃអង្គការប្រទេសអ្នកនាំប្រេងចេញហៅកាត់ថា OPEP កំពុងតែខ្នះខ្នែងរកដំណោះស្រាយ ដោយសារតែខ្លួនជាអ្នកខាតបង់ជាងគេ ព្រោះចំណូលរដ្ឋកំពុងធ្លាក់ចុះយ៉ាងខ្លាំង។ វ៉េណេហ្ស៊ុយអេឡា បានអំពាវនាវឲ្យអង្គការ OPEP ត្រូវប្រជុំបន្ទាន់នៅដើមខែកុម្ភៈនេះ។ ហើយបើតាមការប្រកាស របស់លោកប្រធានាធិបតីវ៉េណេហ្ស៊ុយអេឡា ប្រទេសមាជិកអង្គការ OPEP កំពុងតែជិតត្រូវរូវគ្នាហើយ លើវិធានការមួយចំនួន ដើម្បីផ្តល់សន្ទុះ ដល់តម្លៃប្រេងឆៅឡើងវិញ។
ការប្រកាសបែបនេះ គឺស្របពេលដែលរដ្ឋមន្ត្រីក្រសួងប្រេងកាតរបស់វេណេហ្ស៊ុយអេឡា បានទៅដល់ក្រុងមូស្គូ សុំការគាំទ្រពីរុស្ស៊ី មុននឹងបន្តតំណើរទៅកាន់ប្រទេសផលិតប្រេងផ្សេងទៀត។ ជាការពិត រុស្ស៊ីមិនមែនជាសមាជិកអង្គការ OPEP ទេ តែរុស្ស៊ីក៏មានចំណែកធំ នៅលើការនាំចេញប្រេងលើទីផ្សារប្រេងផងដែរ។ រុស្ស៊ីដែលកំពុងតែជួបវិបត្តិសេដ្ឋកិច្ច គួរឲ្យព្រួយបារម្ភ កំពុងតែលៃលកវិធី រកចំណូលឲ្យបានច្រើន។
កាលពីថ្ងៃសុក្រទី ២៩ មករា រដ្ឋមន្ត្រីក្រសួងធនធានរ៉ែរុស្ស៊ី បានសន្យាថានឹងចូលរួមសហការជាមួយអង្គការ OPEP ហើយបានព្រលយពាក្យថា តាមការស្មាន អារ៉ាប៊ីសាអូឌីត អាចនឹងសុខចិត្តកាត់បន្ថយការផលិតចំនួន ៥% ដើម្បីឲ្យទីផ្សារមានលំនឹងឡើងវិញ។ ការប្រកាសនេះ ត្រូវបានខាងអារ៉ាប៊ីសាអូឌីត បដិសេធភ្លាមៗ ថាគេមិនដែលបាននិយាយដូច្នេះទេ។ តែយ៉ាងណាក៏ដោយ នៅថ្ងៃអាទិត្យទី ៣១មករានេះ អារ៉ាប៊ីសាអូឌីត បានបន្ទន់ឥរិយាបថ ដោយបានប្រកាសថាខ្លួនសុខចិត្តសហការ ប៉ុន្តែនៅតែមិនបញ្ជាក់ឲ្យច្បាស់ដដែលថា សុខចិត្តកាត់បន្ថយការផលិតនោះទេ។
កាត់បន្ថយការផលិត ជាមធ្យោបាយល្អ តែពិបាកស្រុះស្រួលគ្នា៖
ជាការពិតណាស់ មធ្យោបាយមួយ ដើម្បីផ្តល់សន្ទុះដល់តំលៃប្រេង គឺត្រូវកាត់បន្ថយការផលិត ដើម្បីកុំឲ្យប្រេងច្រាល់នៅលើទីផ្សារ។ ជាក់ស្តែងគ្រាន់តែពាក្យចចាមអារ៉ាមថា អារ៉ាប៊ីសាអូឌីត នឹងបន្ថយការផលិត៥% ប្រេងបានឡើងថ្លៃដល់៣៨ដុល្លារ ក្នុងមួយធុងបារីល មុននឹងចុះមកនៅប្រមាណជា ៣៣ដុល្លារវិញ។ ក៏ប៉ុន្តែ អារ៉ាប៊ីសាអូឌីត ធ្លាប់បានប្រកាសហើយថា ខ្លួនមិនសុខចិត្តកាត់បន្ថយតែម្នាក់ឯងទេ គឺត្រូវគ្រប់ប្រទេសនាំប្រេងចេញទាំងអស់ធ្វើដូចគ្នា។
ចំណុចខ្ទាស់មួយទៀត គឺអ៊ីរ៉ង់ ដែលជាសមាជិកមួយរូបផងដែរ នៃអង្គការ OPEP។ អ៊ីរ៉ង់ ដែលនៅក្រៅសៃវៀនយូរហើយ ទើបតែឈានជើងត្រឡប់មកកាន់ទីផ្សារសារជាថ្មី បន្ទាប់ពីដកទណ្ឌកម្មសេដ្ឋកិច្ចចេញ។ ដូច្នេះ គេពិបាកនឹងសង្ឃឹមណាស់ ថាអ៊ីរ៉ង់ សុខចិត្តកាត់បន្ថយការផលិត។ ម្យ៉ាងទៀតទំនាស់រវាងអ៊ីរ៉ង់ និងអារ៉ាប៊ីសាអូឌីត រឹតតែធ្វើឲ្យការចរចារកដំណោះស្រាយ ដែលគ្រោងធ្វើនៅដើមខែកុម្ភៈនេះ ឲ្យកាន់តែស្មុគស្មាញថែមទៀត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ