តំបន់ស្វ័យតគួឌីស្ថានអ៊ីរ៉ាក់ត្រៀមប្រជាមតិ ដាក់សម្ពាធរដ្ឋាភិបាលក្រុងបាក់ដាដ
ចុះផ្សាយនៅថ្ងៃ៖
ស្តាប់ - ០៤:០១
ថ្ងៃ២៥កញ្ញាខាងមុខនេះ តំបន់ស្វ័យតគួឌីស្ថានអ៊ីរ៉ាក់ នឹងរៀបចំបោះឆ្នោតប្រជាមតិទាមទារឯករាជ្យ ពីអ៊ីរ៉ាក់។ រដ្ឋអំណាចក្រុងបាក់ដាដមិនទទួលស្គាល់ប្រជាមតិនេះទេ។ ក្រុមជំនាញមើលឃើញថា ប្រជាមតិនេះមានតែឈ្មោះថា ទាមទារឯករាជ្យទេ តែតាមធាតុពិត គួឌីស្ថានចង់ដាក់សម្ពាធ ចរចាចែកអំណាចគ្រប់គ្រងនយោបាយនិងសេដ្ឋកិច្ចជាមួយរដ្ឋាភិបាលអ៊ីរ៉ាក់តែប៉ុណ្ណោះ។
ប្រធានរដ្ឋអំណាចតំបន់ស្វ័យតគួឌីស្ថានអ៊ូរ៉ាក់ បានប្រកាសថ្ងៃបោះឆ្នោតប្រជាមតិទាមទារឯករាជ្យគួឌីស្ថាន តាំងពីខែមិថុនាម្ល៉េះ។ វាជាឯករាជ្យដែលជនជាតិគួឌីស្ថានគ្រប់រូបស្រមើស្រមៃយូរហើយ។ ប៉ុន្តែ តាមធាតុពិត រដ្ឋអំណាចតំបន់គួឌីស្ថានចង់យកប្រជាមតិនេះ ធ្វើជាសម្ពាធ ដើម្បីចរចាជំរុញរដ្ឋាភិបាលក្រុងបាក់ដាដ អោយចែករំលែកអំណាចនយោបាយនិងសេដ្ឋកិច្ចជាមួយខ្លួនប៉ុណ្ណោះ។ នេះបើយោងតាមក្រុមវិភាគស្ថានការណ៍នយោបាយអ៊ីរ៉ាក់។ គេមើលឃើញដែរថា ប្រជាមតិនេះក៏ដើម្បីជួយអោយលោកម៉ាស៊ូត បាហ្សានី ជាប្រធានរដ្ឋអំណាចគួឌីស្ថាន ដែលផុតអាណត្តិហើយនោះ អាចបន្តដឺកនាំតទៅទៀត។
គួឌីស្ថាន ជាតំបន់ស្វ័យតស្ថិតនៅភាគខាងជើងអ៊ីរ៉ាក់ លាតដែនដីពីអ៊ីរ៉ង់ ទៅតួកគី រហូតដល់ស៊ីរី។ គួឌីស្ថានមានរដ្ឋធានីឈ្មោះថា អ៊ែរប៊ីល មានក្រុមប្រឹក្សាច្បាប់ស្វ័យត គ្រប់គ្រងថវិកាចាយវយាដោយខ្លួនឯង។ គួឌីស្ថានអ៊ីរ៉ាក់ ត្រូវបានគេស្គាល់ថា សំបូរធនធានរ៉ែ ជាតំបន់កសិកម្មនិងតំបន់ប្រេង។ គួឌីស្ថាននិងរដ្ឋអំណាចក្រុងបាក់ដាដ មិនសូវត្រូវគ្នាទេ ដោយសារតែរឿងដណ្តើមប្រេងគ្នាគ្រប់គ្រង ពិសេសប្រេងនៅខែត្រគៀកគូកភាគខាងជើងប្រទេសអ៊ីរ៉ាក់តែម្តង។ គួឌីស្ថាននិងអ៊ីរ៉ាក់មានចុះកិច្ចព្រមព្រៀងនឹងគ្នា ដើម្បីចែករំលែកថវិកាបានពីផលិតកម្មប្រេង នៅខែត្រគៀកគូក អោយបានស្មើគ្នា។ ប៉ុន្តែ រដ្ឋអំណាចគួឌីស្ថានមិនគោរពតាមកិច្ចព្រមព្រៀងនេះទេ ថែមទាំងនាំប្រេងចេញទៅក្រៅស្រុក ដោយមិនឆ្លងកាត់តាមរដ្ឋអំណាចកណ្តាលក្រុងបាក់ដាដទៀតផង។ ឥឡូវនេះ គួឌីស្ថានបានទាងចុះកិច្ចព្រមព្រៀងឧស្ម័នជាមួយក្រុមហ៊ុនប្រេងរុស្ស៊ីទៀត។
ដោយឡែក ទោះជាមិនត្រូវគ្នាជាមួយរដ្ឋាភិបាលអ៊ីរ៉ាក់ ទោះជាជនជាតិគួឌីស្ថានស្រមៃចង់បានឯករាជ្យពីអ៊ីរ៉ាក់ ក៏គួឌីស្ថានមិនទាន់បានត្រៀមខ្លួនផ្តាច់ចេញពីអ៊ីរ៉ាក់ដែរ។ ប្រធានរដ្ឋអំណាចតំបន់ស្វ័យតគួឌីស្ថាន លោកម៉ាស៊ូត បាហ្សានី លើកឡើងថា ទោះជាប្រជាជនបោះឆ្នោតគាំទ្រអោយឯករាជ្យ នៅថ្ងៃ២៥កញ្ញាខាងមុខ ក៏លទ្ធផលនេះមិននាំទៅដល់ឯករាជ្យភ្លាមៗដែរ។ លោកបាហ្សានី លើកឡើងថា លទ្ធផលនេះ គឺជាការចាប់ផ្តើមចរចាហ្មត់ចត់ជាមួយរដ្ឋអំណាចក្រុងបាក់ដាដដើម្បីដោះស្រាយបញ្ហា។ ក្រុមជំនាញមើលឃើញថា ប្រធានរដ្ឋអំណាចគួឌីស្ថានចង់ទាមទារអោយជនជាតិគួឌីស្ថានមានសិទ្ធិពេញលេញក្នុងការផលិតប្រេង និងនាំចេញប្រេងទៅក្រៅស្រុក។ ប្រជាមតិគួឌីស្ថាននេះ ក៏ជាសម្ពាធដាក់ទៅអាមេរិកផងដែរ អោយបន្ថែមជំនួយជួយតំបន់គួឌីស្ថាន ពិសេសជំនួយយោធា។
អាមេរិក និងប្រទេសជិតខាងអ៊ីរ៉ាក់មិនចង់អោយគួឌីស្ថានធ្វើប្រជាមតិឯករាជ្យពីអ៊ីរ៉ាក់ទេ។ វាជាគ្រោះថ្នាក់ ព្រោះពេលនេះ អ៊ីរ៉ាក់កំពុងប្រឈមនឹងការគំរាមពីក្រុមជីហាតរដ្ឋអ៊ីស្លាម ក្រុមជីហាតនៅត្រួតតំបន់២នៅអ៊ីរ៉ាក់នៅឡើយ។ បើត្រូវកាត់ផ្តាច់គួឌីស្ថានពីអ៊ីរ៉ាក់ គ្រោះថ្នាក់នឹងមានកាន់តែធ្ងន់។ លើសពីនេះទៀត ការធ្វើប្រជាមតិឯករាជ្យអាចជាកត្តាជំរុញអោយជនជាតិគួដឌីស្ថាននៅអ៊ីរ៉ង់ និងតួកគី មានគំនិតធ្វើប្រជាមតិដូចគ្នាដែរ ប្រឈមនឹងក្រុមជីហាតរដ្ឋអ៊ីស្លាម រួមនឹងបំណងចង់បានប្រជាមតិដូចគួឌីស្ថានអ៊ីរ៉ាក់ នយោបាយអ៊ីរ៉ង់និងតួកគី អាចជួបបញ្ហាស្មុគស្មាញ។ ស្ថិរភាពតំបន់កាន់តែផុយស្រួយ។ តួកគីកំពុងបារម្ភខ្លាចក្រុមគួឌីស្ថានក្នុងស្រុកបះបោរផ្តាច់ទឹកដីស្រាប់ផង តួកគីព្រមានរដ្ឋអំណាចគួឌីស្ថានអ៊ីរ៉ាក់ទុកជាមុនរួចហើយថា មិនលើកលែងទេ ករណីអ្នកបោះឆ្នោតសម្រេចអោយគួឌីស្ថានឯករាជ្យពីអ៊ីរ៉ាក់។
នៅខែត្រគីគូក ជាខែត្រដែលគួឌីស្ថាននិងអ៊ីរ៉ាក់ដណ្តើមប្រេងគ្នា មាននិកាយសាសនានិងសហគមន៍ភាគតិចច្រើននៅចម្រុះគ្នា តែគួឌីស្ថានមានប្រៀបជាងគេ។ ឥឡូវនេះ ទន្ទឹមនឹងប្រជាមតិទាមទារឯករាជ្យរបស់គួឌីស្ថាន ខាងនិកាយស្ហ៊ីអ៊ីតដែលអ៊ីរ៉ង់គាំទ្រនោះ បានសំដែងការបារម្ភពីស្ថានការណ៍នៅគីកគូក ដោយសារថា មានពាក្យចចាមអារ៉ាមថា មានការចែកអាវុធគ្នានៅតាមសហគមន៍ភាគតិចទាំងនេះ។ ម្យ៉ាងទៀត គេបារម្ភផងដែរ ថាប្រជាមតិនេះអាចបង្កអោយគួឌីស្ថានមានជម្លោះប្រដាប់អាវុធជាមួយកងកម្លាំងអ៊ីរ៉ាក់។
ដោយឡែក ក្រុមជំនាញលើកឡើងថា បើរដ្ឋអំណាចគួឌីស្ថានចង់អោយប្រជាមតិទាមទារឯករាជ្យពីអ៊ីរ៉ាក់ មានទំងន់ដើម្បីដាក់សម្ពាធលើរដ្ឋអំណាចអ៊ីរ៉ាក់អោយចរចាចែករំលែកការគ្រប់គ្រងជាមួយខ្លួននោះ ទាល់តែមានអ្នកបោះឆ្នោតយ៉ាងហោច៧០ភាគរយ នៅថ្ងៃប្រជាមតិ២៥កញ្ញាដែរ មិនដូច្នោះទេ វាជាបរាជ័យទាំងស្រុង ព្រោះវាបង្ហាញថា គួឌីស្ថានមិនទាន់អាចធ្វើអ្វីបានពេញលេញខ្លួនឯងទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ