តួកគីប្រើយុទ្ធសាស្រ្តព្រួញមួយ បាញ់បានសត្វពីរ ដើម្បី កម្ទេចក្រុមឧទ្ទាមក្នុងស្រុក PKK
ចុះផ្សាយនៅថ្ងៃ៖
ស្តាប់ - ០៤:១៨
តាំងពីថ្ងៃសៅរ៍ សប្តាហ៍មុន កងទ័ពតួកគីបានវាយប្រហារតាមជើងអាកាសទៅលើទីតាំងរបស់ក្រុមជីហាតរដ្ឋអ៊ីស្លាម ក្នុងទឹកដីស៊ីរី ដើម្បីសងសឹកនឹងក្រុមនេះដែលបានធ្វើភេរវកម្មសម្លាប់ប្រជាជនគួកឌីស្ថាន ៣២នាក់ នៅក្នុងទឹកដីភាគខាងត្បូងតួកគី។ រដ្ឋាភិបាលតួកគីវាយប្រហារទៅលើក្រុមជីហាត រដ្ឋអ៊ីស្លាម ទៅតាមការទន្ទឹងចង់បានរបស់សហគមន៍អន្តរជាតិក៏ពិតមែនហើយ ប៉ុន្តែ អ្វីដែលធ្វើឲ្យគេភ្ញាក់ផ្អើល និងចម្លែកចិត្ត គឺត្រង់ថា យន្តហោះចម្បាំងតួកគីក៏បានហោះទៅទម្លាក់គ្រាប់បែកលើទីតាំងពួកឧទ្ទាម គួឌីស្ថាន PKK ក្នុងប្រទេសអ៊ីរ៉ាក់ និងស៊ីរី ដែលតាមពិតក៏កំពុងជាប់ដៃ ប្រយុទ្ធប្រឆាំង នឹងក្រុមជីហាត រដ្ឋអ៊ីស្លាមនោះ។ តើក្រុមឧទ្ទាមគួឌីស្ថាន PKK ជាអ្នកណា? ហើយហេតុអ្វីបានជាក្រុមនេះ មកធ្លាក់ រងគ្រោះ ដោយសារគ្រាប់យន្តហោះចម្បាំងតួកគីដែរ?
ក្រុមឧទ្ទាម PKK ឬ គណបក្សពលករគួឌីស្ថាន ត្រូវបានបង្កើតឡើង នៅឆ្នាំ ១៩៧៨ នៅតួកគី ដោយក្រុមនិស្សិតមួយក្រុម។ PKK ត្រូវបានបង្កើតឡើង ក្នុងគោលដៅ ទាមទារការទទួលស្គាល់ជនជាតិគួឌីស្ថាន។ បើគេមើលទៅលើផែនទី តំបន់ដែលមានរស់នៅ ផ្តុំគ្នា ជនជាតិគួឌីស្ថាន គ្របដណ្តប់ទៅលើប្រទេសជិតខាងគ្នា ចំនួន ៤ ដូចជា តួកគី ស៊ីរី អ៊ីរ៉ាក់ និងអ៊ីរ៉ង់។
គណបក្សពលករ គួឌីស្ថាន បង្កើតឡើងដោយបុគ្គល អាប់ឌុលឡា អូកាឡង់ ដែលត្រូវបានរដ្ឋាភិបាលតួកគី ចាប់ដាក់ គុករហូតមកដល់សព្វថ្ងៃនេះ។ ថ្វីត្បិតតែជាប់ក្នុងគុកតួកគី អាប់ឌុលឡា អូកាឡង់ នៅតែជាមេដឹកនាំចលនា PKK។ មេដឹកនាំរូបនេះតែងតែប្រើមេធាវី ជាបណ្តាញនាំសារ នាំបញ្ជាទៅឲ្យសមាជិករបស់ PKK។
នៅឆ្នាំ១៩៨៤ ចលនា PKK ក្នុងទឹកដីតួកគី បានប្រែក្លាយខ្លួនជាពួកឧទ្ទាម និងចាប់ផ្តើមកាន់អាវុធ ក្រោមជំនួយហិរញ្ញវត្ថុដំបូងរបស់រដ្ឋាភិបាលស៊ីរី។ ក្រុមនេះបានទទួលការហ្វឹកហ្វឺន ក្នុងជំរំទ័ពរបស់អង្គការដើម្បីសេរីភាព ប៉ាឡេស្ទីន។ អាមេរិក បារាំង អាល្លឺម៉ង់ បានចាត់ទុកចលនា PKK ថា ជាអង្គការភេរវនិយម។
បច្ចុប្បន្ននេះ ក្រុមឧទ្ទាម PKKមានវត្តមាន ក្នុងប្រទេសបី គឺតួកគី ស៊ីរី និងអ៊ីរ៉ាក់។ ក្នុងប្រទេសនីមួយៗ បណ្តាញរបស់ PKK មានទិសដៅ អភិវឌ្ឍតំបន់គួឌីស្ថាន ឲ្យដូចតំបន់ស្វយ័តរបស់ពួកគួក នៅអ៊ីរ៉ាក់។ តំបន់ស្វយ័ត ជាមហិច្ឆតាចង់បាន របស់ក្រុមឧទ្ទាម PKK ប៉ុន្តែ មិនមែនការទាមទារឯករាជ្យ ផ្តាច់ទឹកដី ដូចមុនទៀតនោះទេ។
ដោយវាយប្រហារតាមផ្លូវអាកាសទៅលើក្រុមជីហាត ក្នុងទឹកដីស៊ីរី ទីក្រុងអង់ការ៉ាចង់ ចូលរួមជាមួយសម្ព័ន្ធអន្តរជាតិ តាមកម្ចាត់ក្រុមជីហាតរដ្ឋអ៊ីស្លាមដល់សំបុក ប៉ុន្តែ គ្មានអ្នកណានឹកស្មានដល់ថា រដ្ឋាភិបាលអង់ការ៉ា ក៏ឆ្លៀត បើកការវាយប្រហារផងដែរ ទៅលើក្រុមឧទ្ទាម PKK នោះទេ។ ហេតុផលរបស់រដ្ឋាភិបាលតួកគី គឺដើម្បីស្តារសណ្តាប់ធ្នាប់ឡើងវិញ នៅក្នុងប្រទេស។ ប៉ុន្តែ ការប្រហារទៅលើទីតាំង គួឌីស្ថាន និងចាប់សមាជិករបស់ PKK នឹងអាចធ្វើឲ្យបទឈប់បាញ់ ដែលភាគីទាំងពីរ ចុះធ្វើជាមួយគ្នា កាលពី២០១៣ កាន់តែផុយស្រួយទៅទៀត។ ត្រូវដឹងថា ការប្រយុទ្ធបង្ហូរឈាម ជាង ៣០ឆ្នាំ រវាងពួកឧទ្ទាម និងរដ្ឋាភិបាល បានសម្លាប់មនុស្ស ជាង ៤ម៉ឺននាក់។
គណបក្សក្នុងស្រុកតួកគី ដែលគាំទ្រក្រុមគួឌីស្ថាន បានបរិហារនយោបាយបង្រ្កាប បិទមាត់ ក្រុមប្រឆាំង ដោយសាររដ្ឋាភិបាលប្រើលេស ប្រយុទ្ធប្រឆាំងនឹងក្រុមភេរវនិយម។ ជាក់ស្តែង ក្នុងរយៈពេលតែ២ថ្ងៃ អាជ្ញាធរតួកគីបានបើកសំណាញ់ចាប់មនុស្ស ជាង ៥០០នាក់ ដែលគេសង្ស័យថា មានពាក់ព័ន្ធនឹងក្រុមជីហាត រដ្ឋអ៊ីស្លាម ឬក្រុមឧទ្ទាមគួឌីស្ថាន បន្ទាប់ពីក្រុម PKK នៅស៊ីរី ប្រកាសទទួលស្គាល់ថា ខ្លួនជាអ្នកបំផ្ទុះគ្រាប់សម្លាប់ទាហានតួកគី ២នាក់ កាលពីថ្ងៃសៅរ៍។ តាមគណបក្សប្រឆាំង នៅក្នុងចំណោមអ្នកដែលត្រូវប៉ូលិសតួកគីចាប់ខ្លួន នោះ ក៏មានផងដែរសមាជិករបស់គណបក្សប្រឆាំង គណបក្សគាំទ្រក្រុមគួកឌីស្ថាន។
ក្រុមឧទ្ទាមPKKវិញ បានប្រកាសរួចហើយ កាលពីថ្ងៃចន្ទថា ខ្លួនលែងគោរព បទឈប់បាញ់ដែលភាគីPKKបានចុះព្រមព្រៀងជាមួយរដ្ឋាភិបាលតួកគី កាលពីឆ្នាំ ២០១៣ទៀតហើយ បន្ទាប់ពីយន្តហោះចម្បាំងតួកគី ទម្លាក់គ្រាប់លើទីតាំងរបស់ក្រុម PKK នៅអ៊ីរ៉ាក់ កាលពីថ្ងៃអាទិត្យ និងលើសម្ព័ន្ធមិត្តរបស់ PKK នៅស៊ីរី កាលពីថ្ងៃចន្ទ។
ដោយបញ្ជូនយន្តហោះ ចម្បាំង ទៅវាយប្រហារលើក្រុមជីហាត រដ្ឋអ៊ីស្លាម ដោយមិនភ្លេច វាយប្រហារផងដែរ លើពួកឧទ្ទាម ដែលជាបន្លាក្នុងកែវភ្នែក អស់ជាង ៣០ឆ្នាំមកហើយនោះ តួកគីចង់បង្ហាញ ថា ខ្លួនបានចូលរួមជាមួយសម្ព័ន្ធមិត្ត ដើម្បីកម្ចាត់ក្រុមជីហាត។ ប៉ុន្តែ ជាមួយគ្នានោះ គេក៏មើលឃើញផងដែរថា តួកគីមិនបានលះបង់ចោល ការចិញ្ចឹមចិត្ត ដែលចង់បំផ្លាញ កម្ចាយក្រុមឧទ្ទាម គួឌីស្ថាន PKKឲ្យចេញអស់ពីទឹកដីតួកគី ដែរ។ នៅក្នុងកាលៈទេសៈដែលសង្រ្គាមកំពុងឆេះសន្ធោសន្ធៅ នៅប្រទេសជិតខាង អ៊ីរ៉ាក់ និងស៊ីរី នយោបាយរបស់រដ្ឋាភិបាល ចង់កម្ចាត់ក្រុមឧទ្ទាម PKK ប្រៀបបាននឹងការយកសាំងទៅចាក់លើភ្លើងសង្រ្គាម ដែលនឹងអាចហៀរចូល ឆេះ ផ្ទះតួកគីខ្លួនឯងនោះទេ។ ក្រុមគួឌីស្ថាន ក្នុងប្រទេសតួកគី ថ្វីត្បិត មិនមែនជាសមាជិករបស់ក្រុមឧទ្ទាម ភេរវនិយម PKK ប៉ុន្តែ ពួកគេ ពិតជាមិនព្រមឈរឱបដៃ ទុកឲ្យតួកគី បាញ់សម្លាប់ជនជាតិរបស់ខ្លួន ដាច់ខាត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ