ឃាតកម្មអ្នកកាសែតឥណ្ឌា៖សហព័ន្ធអ្នកកាសែតអន្តរជាតិជំរុញឥណ្ឌាឲ្យវែកមុខឃាតករ និងបញ្ចប់និទណ្ឌភាព
នៅក្នុងប្រទេសឥណ្ឌា ក្រោយឃាតកម្មបាញ់សម្លាប់អ្នកកាសែតចំនួន ២នាក់ សហព័ន្ធអ្នកកាសែតអន្តរជាតិបានអំពាវនាវនាថ្ងៃអាទិត្យ ទី១៥ ឧសភាឲ្យរដ្ឋាភិបាលក្រុងញូដែលីបិទបញ្ចប់និទណ្ឌភាព និងបើកការស៊ើបអង្កេតស្វែងរកឃាតករជាបន្ទាន់។ សហព័ន្ធអ្នកកាសែតអន្តរជាតិបានឲ្យដឹងថាក្នុងរយៈពេល ១ឆ្នាំ មានអ្នកកាសែតឥណ្ឌាចំនួន ៩នាក់ត្រូវបានគេបាញ់សម្លាប់ក្នុងពេលបំពេញការងាររបស់ខ្លួន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៤
គឺតាមរយៈសេចក្តីជូនដំណឹងមួយចេញផ្សាយក្នុងថ្ងៃអាទិត្យ ទី១៥ ឧសភាដែលសហព័ន្ធអ្នកកាសែតអន្តរជាតិបានធ្វើការថ្កោលទោសចាស់ដៃចំពោះឃាតកម្មសម្លាប់អ្នកកាសែតឥណ្ឌាចំនួនពីរនាក់ក្នុងយប់ថ្ងៃព្រហស្បតិ៍ ទី១២ និងយប់ថ្ងៃសុក្រ ទី១៣ ឧសភាកន្លងទៅ។ លោក Jim Boumelha ប្រធានសហព័ន្ធអ្នកកាសែតអន្តរជាតិដែលមានទីស្នាក់ការកណ្តាលក្នុងទីក្រុងព្រុចសែល ប្រទេសបែលហ្ស៊ិកបានជំរុញឲ្យរដ្ឋាភិបាលក្រុងញូដែលីបើកការស៊ើបអង្កេតជាបន្ទាន់។
យោងតាមតួលេខផ្តល់ដោយសហព័ន្ធអ្នកកាសែតអន្តរជាតិ មានអ្នកកាសែតឥណ្ឌាចំនួន ៩នាក់ត្រូវបានគេសម្លាប់ក្នុងរយៈពេល ១ឆ្នាំដោយសារតែការប្រកបអាជីពរបស់ខ្លួន។ គឺជាតួលេខមួយដែលលោក Jim Boumelha បានចាត់ទុកជាការគំរាមកំហែងសេរីភាពសារព័ត៌មាន ហើយដែលរដ្ឋាភិបាល និងប៉ូលិសឥណ្ឌាត្រូវស្វែងតាមចាប់ឃាតករទៅកាត់ទោស ព្រមទាំងបិទបញ្ចប់និទណ្ឌភាព។
សូមរម្លឹកជូនថា គ្រាន់តែក្នុងរយៈពេលមិនដល់ ២៤ម៉ោងផង មានឃាតកម្មសម្លាប់អ្នកកាសែតចំនួនពីរនាក់ ក្នុងនោះ ម្នាក់ត្រូវបានជនប្រដាប់អាវុធបាញ់ ៥គ្រាប់ស្លាប់ភ្លាមៗនាយប់ថ្ងៃសុក្រ ទី១៣ ឧសភាក្នុងពេលដែលអ្នកកាសែតរូបនោះកំពុងជិះម៉ូតូក្នុងរដ្ឋ Bihar ចំណែកអ្នកកាសែតទី២ ត្រូវបានជនប្រដាប់អាវុធបាញ់សម្លាប់ក្នុងរដ្ឋ Jharkhand នាយប់ថ្ងៃព្រហស្បតិ៍ ទី១២ ឧសភាក្នុងពេលដែលរូបអ្នកកាសែតនោះកំពុងជិះម៉ូតូត្រឡប់ទៅផ្ទះ។
គេនៅមិនទាន់ដឹងមូលហេតុផ្លូវការជុំវិញឃាតកម្មសម្លាប់អ្នកកាសែតទាំងពីរនាក់នោះទេ តែសមាគមអ្នកកាសែតឥណ្ឌាបានប្រាប់ឲ្យដឹងថា រូបអ្នកកាសែតទាំងពីរបានធ្វើការស៊ើបអង្កេតរឿងអាស្រូវពុករលួយ និងសកម្មភាពបទឧក្រិដ្ឋមួយចំនួនជាប់ពាក់ព័ន្ធនឹងមន្រ្តីនៅក្នុងរដ្ឋ Bihar និងរដ្ឋ Jharkhand ដែលជារដ្ឋក្រីក្រជាងគេនៅឥណ្ឌា។
នៅក្នុងរបាយការណ៍ប្រចាំឆ្នាំ ២០១៥ អង្គការអ្នកយកការណ៍គ្មានព្រំដែន Reporters sans frontières បានដាក់ចំណាត់ថ្នាក់ឥណ្ឌាជាប្រទេសទី១៣៣ លើ ១៨០ប្រទេសស្តីពីសេរីភាពសារព័ត៌មាន។ ជាមួយនឹងចំណាត់ថ្នាក់នេះបានធ្វើឲ្យឥណ្ឌាក្លាយជាប្រទេសអាស៊ីដែលមានឃាតកម្មសម្លាប់អ្នកកាសែតច្រើនជាងគេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ