OMC/WTO អំពាវនាវឲ្យពង្រឹងសហប្រតិបត្តិការ ដើម្បីការពារប្រព័ន្ធពាណិជ្ជកម្មពិភពលោក ប្រឈមនឹងវិបត្តិធ្ងន់ផ្សេងទៀត
វិបត្តិកូវីដ១៩ បានធ្វើឲ្យរាំងស្ទះដល់ដំណើរការដោះដូរពាណិជ្ជកម្ម។ យោងតាមរបាយការណ៍ថ្មីមួយរបស់អង្គការពាណិជ្ជកម្មពិភពលោក ចេញផ្សាយកាលពីថ្ងៃអង្គារទី១៦វិច្ឆិកា ថ្វីបើសន្ទុះនៃចរាចរណ៍ទំនិញបរិក្ខាពេទ្យ បានងើបឡើងយ៉ាងរហ័សក្នុងអំឡុងពេលវិបត្តិកូវីដក្តី តែទំនិញយុទ្ធសាស្ត្រផ្សេងទៀត បានជួបនូវបញ្ហារងស្ទះ។ អង្គការពាណិជ្ជកម្មពិភពលោក បានលើកឡើងជាអនុសាសន៍មួយចំនួន ជំរុញឲ្យប្រទេសសមាជិកទាំងអស់ រួមសហប្រតិបត្តិការគ្នាឲ្យបានប្រសើរជាងនេះ ព្រោះថាវិបត្តិ មហន្តរាយផ្សេងៗទៀត អាចនឹងកើតមាននៅថ្ងៃខាងមុខ។
ចុះផ្សាយនៅថ្ងៃ៖
ស្តាប់ - ០២:២១
វិបត្តិកូវីដ១៩ បានស្តែងឲ្យឃើញនូវ ភាពងាយរងគ្រោះ នៃវិស័យពាណិជ្ជកម្មពិភពលោក។ វិស័យផលិតកម្មបានរាំងស្ទះ បណ្តាញដឹកជញ្ជូនផ្គត់ផ្គង់ ត្រូវនៅទ្រឹងមួយកន្លែង គ្មានចរាចរណ៍។ មានតែវិស័យទំនិញបរិក្ខាពេទ្យទេ ដែលបានស្ទុះឡើង យ៉ាងរហ័ស នៅក្នុងការដោះដូរពាណិជ្ជកម្ម។ ដោយឡែក ទំនិញផ្សេងទៀត ជាក់ស្តែង ឧបករណ៍សឺមីកុងឌុចទឺ ដែលចាំបាច់បំផុត ក្នុងការផលិតរថយន្ត និងផលិតអេឡិចត្រូនិក កំពុងតែខ្វះខ្លាំង និងចោទជាបញ្ហា។
នៅក្នុងរបាយការណ៍ ចេញផ្សាយកាលពីថ្ងៃអង្គារ ទី១៦មិថុនា អង្គការពាណិជ្ជកម្មពិភពលោក បានផ្ញើសារ ឲ្យដល់ប្រទេសសមាជិកទាំងអស់ ដើម្បីធ្វើយ៉ាងណា ពង្រឹកការពារ ប្រព័ន្ធពាណិជ្ជកម្មពិភពលោក ឲ្យមានភាពរឹងមាំ និងមានការតស៊ូ ក្នុងករណីមានវិបត្តិថ្មីទៀត។ ជាងនេះទៀត ពិភពលោកយើង ស្ថិតក្នុងបរិបទកាន់តែប្រឈមខ្លាំងឡើងៗ នូវគ្រោះមហន្តរាយនានា ជាក់ស្តែងមហន្តរាយធម្មជាតិ និងសុខភាព ជាដើម។
ប្រសិនបើពិភពលោកយើង ចង់ឲ្យប្រព័ន្ធពាណិជ្ជកម្ម អាចមានកម្លាំងត្រៀមរឹងមាំគ្រប់គ្រាន់ ទៅថ្ងៃអនាគត គឺយើងត្រូវតែធ្វើការសហការគ្នាឲ្យបានច្រើន។ ជាការចំណងសហប្រតិបត្តិការពហុភាគីនិយម និងនៅតាមតំបន់។ អង្គការពាណិជ្ជកម្មពិភពលោក បានសង្កត់ធ្ងន់លើប្រការនេះ ព្រោះថាពិភពលោកយើង ត្រូវតែដោះស្រាយបញ្ហា បម្រែបម្រួលអាកាសធាតុ ការពារបរិស្ថាន និង ការពារលំនឹងទីផ្សារហិរញ្ញវត្ថុ។ ការងារទាំងអស់នេះ តោងចាំបាច់ ត្រូវមានសហប្រតិបត្តិការល្អរវាងប្រទេសទាំងអស់។
អង្គការពាណិជ្ជកម្មពិភពលោក បានលើកឡើងថា ប្រទេសទាំងអស់ ត្រូវតែធ្វើការជាមួយគ្នា ក្នុងករណីមានវិបត្តិថ្មីណាមួយ ទៅថ្ងៃខាងមុខ។ វិស័យផលិតកម្ម ទំនិញយុទ្ធសាស្ត្រមួយចំនួន ត្រូវតែបានទទួលការការពារ ដកចេញនូវឧបសគ្គក្នុងការផ្គត់ផ្គង់ និងនាំចេញជាដើម។ ភាពចាក់ស្រែសនៃប្រព័ន្ធពាណិជ្ជកម្មពិភលោក ត្រូវបានប្រទេសខ្លះយល់ថាវាចំណុចខ្សោយ។ ក៏ប៉ុន្តែអង្គការពាណិជ្ជកម្មពិភពលោក យល់ថា គំនិត ចង់ចាកចេញពីសមាហរណកម្មពាណិជ្ជកម្ម លើកប្រមូលការផលិត មកធ្វើតែក្នុងស្រុកឯង ឬការពង្រឹងភាពគ្រប់គ្រាន់ខ្លួនឯង វាអាចជះផលអវិជ្ជមានទៅវិញទេ។ ដំណោះស្រាយទាំងនេះ វាអាចធ្វើឲ្យប្រព័ន្ធសេដ្ឋកិច្ចបាត់បង់ភាពរឹងមាំ មិនអាចទប់ជាប់ ក្នុងករណីមានវិបត្តិធ្ងន់ធ្ងរណាមួយផ្សេងទៀត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ