ហេតុអ្វីបានជាលោកស្រីប្រធានាធិបតីកូរ៉េខាងត្បូងទៅទស្សនកិច្ចនៅអ៊ីរ៉ង់?
ចុះផ្សាយនៅថ្ងៃ៖
ស្តាប់ - ០៤:៥២
លោកស្រីប្រធានាធិបតីកូរ៉េខាងត្បូងប៉ាក់ គុនហេបានទៅបំពេញទស្សនកិច្ចក្នុងប្រទេសអ៊ីរ៉ង់រយៈពេល ៣ថ្ងៃ។ នាដំណើរទស្សនកិច្ចនោះ លោកស្រីប៉ាក់ គុនហេបាននាំទៅជាមួយនូវរដ្ឋមន្រ្តីជាច្រើនរូប រួមទាំងក្រុមអ្នកជំនួញកូរ៉េខាងត្បូងជាង ២០០នាក់។ នៅក្នុងសន្និសីទកាសែតរួមគ្នាជាមួយសមភាគីអ៊ីរ៉ង់លោកហាសាន រ៉ូហានីនាថ្ងៃចន្ទ ទី២ ឧសភា ទីក្រុងសេអ៊ូល និងទីក្រុងតេហេរ៉ង់បានប្រកាសឲ្យដឹងពីការគុណ ១ ជា ៣ នូវការដោះដូរពាណិជ្ជកម្មរវាងគ្នា។ តើកូរ៉េខាងត្បូង និងអ៊ីរ៉ង់មានប្រវត្តិទំនាក់ទំនងយ៉ាងម៉េចខ្លះ និងថាហេតុអ្វីបានជាប្រមុខរដ្ឋកូរ៉េខាងត្បូងដាក់ជើងជាន់ទឹកដីអ៊ីរ៉ង់ពេលនេះ?
គឺក្នុងឆ្នាំ ១៩៦២ ពោលមានរយៈពេល ៥៤ឆ្នាំមកហើយដែលកូរ៉េខាងត្បូង និងប្រទេសអ៊ីរ៉ង់បានភ្ជាប់ទំនាក់ទំនងការទូតរវាងគ្នា។ ក្នុងឆ្នាំ ១៩៦២ ដែលកូរ៉េខាងត្បូងស្ថិតក្រោមការកាន់កាប់របស់លោកប៉ាក់ ជុងហ៊ីដែលជាឱពុករបស់លោកស្រីប៉ាក់ គុនហេ។ ក៏ប៉ុន្តែ នេះជាលើកទី១ បង្អស់ដែលមានប្រមុខរដ្ឋកូរ៉េខាងត្បូងម្នាក់បានដាក់ជើងជាន់ទឹកដីអ៊ីរ៉ង់ប្រទេសកាន់សាសនាអ៊ីស្លាមនិកាយឈីអ៊ីតដ៏ធំជាងគេនៅក្នុងតំបន់ដើមបូព៌ា។ តាមពិតទៅ លោកប៉ាក់ ជុងហ៊ីដែលកាន់តំណែងប្រធានាធិបតីកូរ៉េខាងត្បូងពីឆ្នាំ ១៩៦២ ដល់ឆ្នាំ ១៩៧៩ ក៏មានគម្រោងទៅបំពេញទស្សនកិច្ចនៅអ៊ីរ៉ង់ដែរ។
តែដំណើរទស្សនកិច្ចដែលគ្រោងធ្វើក្នុងឆ្នាំ ១៩៧៩ ត្រូវបានលុបចោលយ៉ាងទាន់ហន់ភ្លាមៗដោយសារមូលហេតុពីរយ៉ាង ទី១ ចំពេលដែលអ៊ីរ៉ង់ធ្លាក់ក្នុងបដិវត្តន៍ផ្តួលរំលំរបបផ្តាច់ការរបស់ស្តេចស្ហា និងទី២ ចំពេលដែលលោកប្រធានាធិបតីកូរ៉េខាងត្បូងប៉ាក់ ជុងហ៊ីត្រូវបានគេធ្វើឃាតសម្លាប់ក្នុងថ្ងៃទី២៦ តុលា ឆ្នាំ ១៩៧៩។ បន្ទាប់មកទៀត ពោលចំពេលដែលវិបត្តិនុយក្លេអ៊ែរអ៊ីរ៉ង់បានផ្ទុះឡើង និងចំពេលដែលអ៊ីរ៉ង់បានទទួលរងទណ្ឌកម្មសេដ្ឋកិច្ចអន្តរជាតិ គម្រោងទស្សនកិច្ចរបស់ថ្នាក់ដឹកនាំកូរ៉េខាងត្បូងទៅអ៊ីរ៉ង់ ឬមួយក៏គម្រោងទស្សនកិច្ចរបស់ថ្នាក់ដឹកនាំអ៊ីរ៉ង់ទៅកូរ៉េខាងត្បូងក៏ត្រូវបានព្យួរមួយរយៈ តែមិនមែនបំភ្លេចចោលទាំងស្រុងទេ។
ជាទូទៅ និងដោយមិននិយាយពីអ៊ីរ៉ង់ជាប់ ឬមិនជាប់ទ័ណ្ឌកម្មសេដ្ឋកិច្ចអន្តរជាតិ ក៏ទំនាក់ទំនងរវាងអ៊ីរ៉ង់ជាមួយកូរ៉េខាងត្បូង ឬរវាងអ៊ីរ៉ង់ជាមួយកូរ៉េខាងជើងនៅតែល្អ និងនៅបន្តជាលក្ខណៈមិត្តភាពដដែល គ្រាន់តែថា ជាទំនាក់ទំនងមិនដូចគ្នា និងមានប្រយោជន៍ខុសគ្នា។ គេអាចនិយាយបានថា ទំនាក់ទំនងរវាងសេអ៊ូល និងតេហេរ៉ង់បានផ្តោតសំខាន់លើសេដ្ឋកិច្ច និងពាណិជ្ជកម្ម ចំណែកទំនាក់ទំនងរវាងសេអ៊ូល និងព្យុងយ៉ាងវិញបានផ្តោតសំខាន់លើវិស័យយោធា ពិសេសក្នុងវិស័យនុយក្លេអ៊ែរ។ អ្វីដែលថ្នាក់ដឹកនាំអ៊ីរ៉ង់បានព្យាយាមមិនលូកដៃចូលនោះ គឺជម្លោះផ្ទៃក្នុងរវាងបងប្អូនបង្កើតគូសត្រូវកូរ៉េទាំងពីរ។ សាររបស់អ៊ីរ៉ង់សម្រាប់កូរ៉េមានតែមួយ គឺសន្តិភាព និងស្ថិរភាពនៅក្នុងឧបទ្វីបកូរ៉េ។
នៅខាងកូរ៉េឯណោះវិញ ពិសេសនៅខាងត្បូង ទីក្រុងសេអ៊ូលបានព្យាយាមឈរកណ្តាលដោយមិនរវីរវល់ លូកលាន់នឹងសំណុំរឿងនុយក្លេអ៊ែរអ៊ីរ៉ង់ដែលសហគមន៍អន្តរជាតិ និងទីក្រុងតេហេរ៉ង់បានប្រឈមមុខដាក់គ្នាអស់រយៈពេលជាច្រើនឆ្នាំ។ គឺទើបតែនៅពេលនេះទេដែលការប្រឈមមុខដាក់គ្នារវាងសហគមន៍អន្តរជាតិ និងអ៊ីរ៉ង់បានបិទបញ្ចប់តាមរយៈកិច្ចព្រមព្រៀងជាប្រវត្តិសាស្រ្តមួយកាលពីថ្ងៃទី១៤ កក្កដា ឆ្នាំ ២០១៥។ តាមរយៈកិច្ចព្រមព្រៀងនេះ អ៊ីរ៉ង់យល់ព្រមបង្ហាញពីតម្លាភាពនៅក្នុងកម្មវិធីនុយក្លរអ៊ែររបស់ខ្លួនជាថ្នូរនឹងការលើកទ័ណ្ឌកម្មសេដ្ឋកិច្ចអន្តរជាតិ។ អ៊ីចឹងហើយបានជានៅពេលនេះ ក្រុមប្រទេសបស្ចិមលោក រាប់ទាំងប្រទេសដាក់ទ័ណ្ឌកម្មអ៊ីរ៉ង់ផងកំពុងបន្តកន្ទុយគ្នាចូលទៅចែចូវទីផ្សារអ៊ីរ៉ង់។ គឺជាទីផ្សារដែលមានសក្កានុពលធំធេងណាស់សម្រាប់ក្រុមអ្នកវិនិយោគបរទេស។
នៅក្នុងន័យនេះ កូរ៉េខាងត្បូងពិតជាយល់មិនច្រឡំទេថា វាល្មមដល់ពេលដែលខ្លួនត្រូវចូលប្រកួតប្រជែងដណ្តើមទីផ្សារអ៊ីរ៉ង់ជាមួយប្រទេសផ្សេងដែលកូរ៉េខាងត្បូងកំពុងមានប្រៀបរួចស្រេចទៅហើយ។ អ៊ីចឹងហើយបានជានៅក្នុងដំណើរទស្សនកិច្ចរយៈពេល ៣ថ្ងៃក្នុងទឹកដីជង្រុកប្រេងនៅដើមបូព៌ាមួយនេះ លោកស្រីបាននាំទៅជាមួយនូវរដ្ឋមន្រ្តីសំខាន់ៗជាច្រើនរូប ពិសេសអ្នកជំនួញគ្រាក់ៗជាង ២០០នាក់។ លោកស្រីប៉ាក់ គុនហេបានដឹងច្បាស់ថា សមមិត្តអ៊ីរ៉ង់ពិតជាមិនអាចភ្លេចរាត្រីទឹកឃ្មុំដែលធ្លាប់មានជាមួយកូរ៉េខាងត្បូងបានឡើយ ពោលរាត្រីទឹកឃ្មុំដែលបានបន្សល់ទុកតាំងពីជំនាន់ឱពុកលោកស្រី គឺលោកប៉ាក់ ជុងហ៊ី។
ក្តីសង្ឃឹមបានក្លាយជាការពិតជាក់ស្តែង ព្រោះនៅក្នុងសន្និសីទកាសែតរួមគ្នានៅក្រោយជំនួបរវាងលោកស្រីប៉ាក់ គុនហេ និងសមភាគីអ៊ីរ៉ង់លោកហាសាន រ៉ូហានី ទីក្រុងសេអ៊ូល និងតេហេរ៉ង់បានប្រកាសឲ្យដឹងពីឆន្ទៈក្នុងការគុណ ១ជាង៣ នូវទឹកប្រាក់ដោះដូរពាណិជ្ជកម្មពី ៥ ២០០លានដុល្លារទៅដល់ ១៨ ០០០លានដុល្លារក្នុងមួយឆ្នាំ។ ជាសរុប មានកិច្ចព្រមព្រៀងចំនួន ១៩ ត្រូវបានចុះហត្ថលេខារវាងកូរ៉េខាងត្បូង និងអ៊ីរ៉ង់នាទស្សនកិច្ចរយៈពេល ៣ថ្ងៃរបស់លោកស្រីប៉ាក់ គុនហេ។ គឺជាកិច្ចសហប្រតិបត្តិការនៅសឹងគ្រប់វិស័យ មានតាំងពីវិស័យប្រេងឥន្ធនៈ ដឹកជញ្ជូនផ្លូវដែក កំពង់ផែ ឧស្ម័ន និងហេដ្ឋារចនាសម្ព័ន្ធ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ