ប្រធានាធិបតីកូរ៉េខាងត្បូងបំពេញទស្សនកិច្ចផ្លូវរដ្ឋនៅអ៊ីរ៉ង់ជាលើកដំបូង
លោកស្រី ប៉ាក់ គុនហេ គឺជាប្រធានាធិបតីកូរ៉េខាងត្បូង ដំបូងគេបង្អស់ ដែលអញ្ជើញទៅបំពេញទស្សនកិច្ចផ្លូវរដ្ឋជាលើកទីមួយ នៅក្នុងប្រទេសអ៊ីរ៉ង់ គិតចាប់តាំងពីជាងកន្លះសតវត្សរ៍មក។ ជាទស្សនកិច្ចដែលមានលក្ខណៈពិសេសប្រកបដោយអត្ថន័យបែបប្រវត្តិសាស្ត្រផង និងមានកម្មវត្ថុពង្រឹងកិច្ចសហប្រតិបត្តិការទ្វេភាគីផង។
ចុះផ្សាយនៅថ្ងៃ៖
ស្តាប់ - ០១:៣៧
ដំណើរទស្សនកិច្ចរបស់លោកស្រី ប៉ាក់ គុនហេ នៅប្រទេសអ៊ីរ៉ង់ ត្រូវបានចាត់ទុកជាទស្សនកិច្ចដ៏ពិសេស ពីព្រោះនេះគឺជាលើកទីមួយហើយដែលមានជំនួបថ្នាក់ប្រមុខរដ្ឋរវាងប្រទេសទាំងពីរ គិតចាប់តាំង៥៤ឆ្នាំ ឆ្នាំដែលកូរ៉េខាងត្បូងនិងអ៊ីរ៉ង់ភ្ជាប់ទំនាក់ទំនងទូតនឹងគ្នាមក។
ថ្នាក់ដឹកនាំកំពូលទាំងពីរប្រទេសបានសាកល្បងជួបគ្នាម្តងកាលពីឆ្នាំ ១៩៧៩ តែត្រូវបរាជ័យលុបចោលទៅវិញ។ កាលណោះ នៅក្នុងប្រទេសកូរ៉េខាងត្បូងមានវិបត្តិផ្តួលរំលំរដ្ឋាភិបាល និងឃាតកម្មសម្លាប់ប្រធានាធិបតី លោក ប៉ាក់ ជុងអេ ដែលជាឪពុកលោកស្រីប្រធានាធិបតីប៉ាក់ គុនហេ ផ្ទាល់តែម្តងពីសំណាក់ភ្នាក់ងារសម្ងាត់របស់ប្រទេស។
កូរ៉េខាងត្បូងរំពឹងខ្លាំងលើដំណើរទស្សនកិច្ចផ្លូវរដ្ឋមួយនេះ បើមើលទៅលើទំហំនៃគណៈប្រតិភូ និងអ្នកនិយោគគ្រាក់ៗ ដែលអមដំណើរលោកស្រីប្រធានាធិបតី។ ចៅកែ ប្រធានក្រុមហ៊ុន ចំនួន ២៤០រូប មានជាអាទិ៍ប្រធានក្រុមហ៊ុនSamsun និងHyandai មានវត្តមានគ្រប់គ្នាលើទឹកដីអ៊ីរ៉ង់ ដើម្បីសាកល្បងចុះហត្ថលេខាកិច្ចសន្យាមួយខ្សែរវាងអ៊ីរ៉ង់និងកូរ៉េខាងត្បូង។
តាំងពីអ៊ីរ៉ង់បើកចំហទីផ្សារដល់អន្តរជាតិមក មានការប្រកួតប្រជែងដណ្តើមទីផ្សារគ្នាខ្លាំងណាស់ ប៉ុន្តែសេអ៊ូលសង្ឃឹមថាតេអេរ៉ង់នឹងនឹកឃើញអំពីកិច្ចសហប្រតិបត្តិការដ៏រលូនប្រសើរបំផុតរវាងប្រទេសទាំងពីរ ជាពិសេសក្នុងពេលដែលអ៊ីរ៉ង់កំពុងជាប់ទណ្ឌកម្មអន្តរជាតិ។
លោកស្រីប្រធានាធិបតី ប៉ាក់ គុនហេ សង្ឃឹមថានឹងអាចពង្រឹងកិច្ចសហប្រតិបត្តិការទ្វេភាគី ដែលអាចមានទំហំដល់ទៅ១០ពាន់លានដុល្លារ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ