សាក្សីអះអាងថា យន្តហោះអ៊ុយក្រែនដែលធ្លាក់នៅតេហេរ៉ង់ មានភ្លើងឆេះមុននឹងធ្លាក់
កាលពីព្រឹកថ្ងៃពុធ ទី៨មករា យន្តហោះBoeing 737 របស់ក្រុមហ៊ុនអាកាសចរណ៍អ៊ុយក្រែនបានធ្លាក់ បន្ទាប់ពីបានហោះចេញបានបន្តិច ពីព្រលានយន្តហោះក្រុងតេហេរ៉ង់ ដោយបានបណ្តាលឲ្យស្លាប់មនុស្ស១៧៦នាក់។ យោងតាមលទ្ធផលស៊ើបអង្កេតបឋម របស់អាជ្ញាធរអ៊ីរ៉ង់ បានបញ្ជាក់ថា យន្តហោះនេះ មានភ្លើងឆេះរួចទៅហើយ មុននឹងធ្លាក់ចុះមកដល់ដី។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៤៧
អង្គភាពអាកាសចរណ៍ស៊ីវីលអ៊ីរ៉ង់ ទើបតែបានបង្ហាញឲ្យដឹង នូវរបាយការណ៍ស៊ើបអង្កេតបឋម ស្តីពីយន្តហោះ Boeing 737 របស់ក្រុមហ៊ុនUkraine International Airlines ដែលបានធ្លាក់នៅជាយក្រុងតេហេរ៉ង់ កាលពីព្រឹកថ្ងៃពុធ ទី៨មករា។ យោងតាមលទ្ធផលបឋម គឺយន្តហោះនេះ ទំនងជាមានភ្លើងឆេះរួចទៅហើយ មុននឹងធ្លាក់ដល់ដី។ នេះបើផ្អែកតាម សាក្សីមួយចំនួន ដែលបានឃើញ ទាំងសាក្សី ដែលនៅនឹងដី និងសាក្សីខ្លះ ដែលស្ថិតនៅក្នុងយន្តហោះផ្សេងមួយទៀត ដែលហោះនៅពីលើ។ សាក្សីខ្លះទៀត បានអះអាងថា យន្តហោះមានភ្លើងឆេះ ហើយបានបត់ក្បាល ទំនងជាសំដៅត្រលប់មកកាន់ព្រលានយន្តហោះតេហេរ៉ង់វិញ មុននឹងធ្លាក់។
របាយការណ៍សន្និដ្ឋានថា យន្តហោះបានហោះឡើងកំពស់ប្រមាណ២៤០០ម៉ែត្រពីដី មុននឹងបានជួបបញ្ហាបច្ចេកទេស ដែលបានធ្វើឲ្យអ្នកបើកបរ បានបញ្ជាប្តូរទិសដៅដើម្បីរកកន្លែងចុះចតបន្ទាន់។ តែអ្នកស៊ើបអង្កេតអ៊ីរ៉ង់ មិនបានលំអិតទេ ថាបញ្ហាបច្ចេកទេសនោះ ជាបញ្ហាអ្វីឲ្យប្រាកដ។ របាយការណ៍បន្តថា ទើបតែហោះឡើងបានរយៈពេល២នាទី យន្តហោះស្រាប់តែបាត់ខ្លួន ពីប្រព័ន្ធរ៉ាដា ហើយអ្នកបើកបរ មិនបានទាក់ទងផ្តល់ដំណឹង ឬសុំជំនួយទេ។
សូមបញ្ជាក់ថា យន្តហោះ Boeing 737 របស់ក្រុមហ៊ុនUkraine International Airlines នេះទើបតែមានអាយុបាន៣ឆ្នាំប៉ុណ្ណោះ ហើយក៏ទើបតែត្រូវបានត្រួតពិនិត្យបច្ចេកទេស កាលពីថ្ងៃចន្ទ ទី៦មករា។ យន្តហោះនេះហោះឡើង នៅព្រឹកម៉ោង៦និង១០នាទី ប៉ុន្មានម៉ោងប៉ុណ្ណោះ ក្រោយពេលដែលអ៊ីរ៉ង់ បានបាញ់មីស៊ីលជាច្រើនគ្រាប់ ទៅលើមូលដ្ឋានទ័ពអាមេរិកនៅអ៊ីរ៉ាក់។ ប្រការនេះ បានបង្កឲ្យមានពាក្យចចាមអារ៉ាម ប៉ាន់ស្មានថាយន្តហោះនេះ ទំនងជាត្រូវគ្រាប់មីស៊ីលហោះបុក។ តែយ៉ាងណា អាជ្ញាធរអ៊ីរ៉ង់ ក៏ដូចជាអ្នកជំនាញខ្លះ បានច្រានចោលទាំងស្រុង ពីមូលហេតុនេះ។
យោងតាមអាជ្ញាធរអ៊ីរ៉ង់ ក្នុងចំណោមជនរងគ្រោះដែលស្លាប់ទាំង១៧៦នាក់ មាន១៤៦នាក់ ជាជនជាតិអ៊ីរ៉ង់ ១០នាក់ជនជាតិអាហ្វហ្កានីស្ថាន ១១នាក់ជាជនជាតិអ៊ុយក្រែន ៥នាក់ជនជាតិកាណាដា និង៤នាក់ជាជនជាតិស៊ុយអ៊ែត។ អាជ្ញាធរកាណាដាអះអាង មានជនជាតិខ្លួនស្លាប់ក្នុងហេតុការណ៍នេះចំនួន១៤០នាក់។ តែអ៊ីរ៉ង់អះអាងថា មួយចំនួនធំនៃជនជាតិអ៊ីរ៉ង់ទាំង១៤៦នាក់ គឺជាអ្នកមានសញ្ជាតិ២ សញ្ជាតិកាណាដាផង សញ្ជាតិអ៊ុយក្រែនផង ដែលប្រការនេះហើយ បានធ្វើឲ្យមានតួលេខខុសគ្នា។
បើផ្អែកតាមអង្គភាពអាកាសចរណ៍ស៊ីវីលអ៊ីរ៉ង់ បានឲ្យដឹងថា មានអ្នកជំនាញរបស់អ៊ុយក្រែនបានទៅដល់ទីក្រុងតេហេរ៉ង់ហើយ ដើម្បីសហការក្នុងការស៊ើបអង្កេត។ កាលពីថ្ងៃពុធ អ៊ីរ៉ង់បានបដិសេធ មិនប្រគល់ប្រអប់ខ្មៅ ទៅឲ្យអ្នកជំនាញអាមេរិក របស់ក្រុមហ៊ុនBoeing ឡើយ។ នៅថ្ងៃព្រហស្បតិ៍អាជ្ញាធរអ៊ីរ៉ង់ បញ្ជាក់ថា នឹងផ្ញើប្រអប់ខ្មី ទៅកាន់ប្រទេសជំនាញមួយ ដោយមិនបញ្ជាក់ថាប្រទេសណាទេ។ បើតាមអ្នកជំនាញ មានតែបារាំង ឬ អាល្លឺម៉ងទេ ដែលមានជំនាញបច្ចេកទេស វិភាគប្រអប់ខ្មៅយន្តហោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ