កូវីដ១៩៖ សេដ្ឋកិច្ចអាមេរិកក្នុងត្រីមាសទី១ នៃឆ្នាំ២០២០ ធ្លាក់ចុះខ្លាំងកម្រមាន
ចុះផ្សាយនៅថ្ងៃ៖
ស្តាប់ - ០៧:៣៩
សហរដ្ឋអាមេរិក ជាប្រទេសដែលរងគ្រោះខ្លាំងជាងគេបំផុតមួយពីជំងឺរាតត្បាតកូវីដ១៩។ គិតត្រឹមថ្ងៃពុធ ទី២៩ មេសានេះ ចំនួនអ្នកឆ្លងកូវីដ១៩ នៅអាមេរិក ហក់ឡើងដល់ជាង ១ លាននាក់។ ក្រៅតែពីបង្កជាមន្តរាយផ្នែកសុខាភិបាលធ្ងន់ធ្ងរ កូវីដ១៩ ក៏បានវាយប្រហារយ៉ាងខ្លាំងក្លាណាស់ដែរ ដល់សេដ្ឋកិច្ចរបស់អាមេរិក។ បើតាមសេដ្ឋវិទូ វិបត្តិកូវីដ១៩ ទំនងជាបានធ្វើឲ្យសេដ្ឋកិច្ចអាមេរិកនៅក្នុងត្រីមាសទី១ ឆ្នាំ២០២០នេះ ធ្លាក់ចុះខ្លាំងបំផុតកម្រមាន រាប់ចាប់តាំងពីត្រីមាសទី១ នៃឆ្នាំ ២០០៩ ក្នុងអំឡុងវិបត្តិសេដ្ឋកិច្ចសកល។
បច្ចុប្បន្នភាពស្តីអំពីការឆ្លងរាលដាលនៃជំងឺកូវីដ១៩នៅសហរដ្ឋអាមេរិក
រហូតមកទល់នឹងពេលនេះ មេរោគកូរ៉ូណាថ្មី ឬកូវីដ១៩ បានចម្លងទៅដល់មនុស្សជាង ៣ លាន ១៤ ម៉ឺននាក់នៅទូទាំងពិភពលោក និងសម្លាប់មនុស្សជិត ២២ ម៉ឺននាក់។
ជាការពិតណាស់ សហរដ្ឋអាមេរិក នៅតែជាប្រទេសដែលរងគ្រោះខ្លាំងជាងគេពីជំងឺកូវីដ១៩ និងមានអ្នកឆ្លងជំងឺនេះកើនឡើងដល់ជាង ១ លាន ៣ម៉ឺននាក់ ពោលគឺស្មើនឹងជិតមួយភាគបីនៃចំនួនអ្នកឆ្លងសរុបទាំងអស់នៅទូទាំងពិភពលោក។ ចំណែកចំនួនអ្នកស្លាប់ដោយកូវីដ១៩ នៅអាមេរិកបានហក់ឡើងដល់ជិត ៦ ម៉ឺននាក់ ពោលគឺច្រើនជាងពលរដ្ឋអាមេរិកដែលស្លាប់នៅក្នុងសម័យសង្គ្រាមវៀតណាមទៅទៀត។
ដើម្បីទប់ស្កាត់ការឆ្លងរាលដាល នៃជំងឺកូវីដ១៩ រដ្ឋាភិបាលអាមេរិកបានសម្រេចបិទការចេញចូលក្នុងទីក្រុងជាច្រើនស្ទើរតែពាសពេញផ្ទៃប្រទេសទៅហើយ រហូតធ្វើឲ្យសង្វាក់ផលិតកម្មក្នុងប្រទេសលែងអាចដំណើររលូនដូចមុន។ ដំណើរការជាប់គាំងស្ទើរគ្រប់វិស័យ បានធ្វើឲ្យសេដ្ឋកិច្ចអាមេរិក ធ្លាក់ក្នុងវិបត្តិធ្ងន់ធ្ងរមិនធ្លាប់មានពីមុនមកនោះទេ។
បើតាមក្រុមអ្នកជំនាញសេដ្ឋកិច្ច វិបត្តិកូវីដ១៩ ទំនងជាបានធ្វើឲ្យសេដ្ឋកិច្ចអាមេរិកនៅក្នុងត្រីមាសទី១ ឆ្នាំ២០២០នេះ ធ្លាក់ចុះខ្លាំងបំផុតកម្រមាន រាប់ចាប់តាំងពីត្រីមាសទី១ ឆ្នាំ២០០៩។ ឆ្នាំ ២០០៩ ជាអំឡុងពេលដែលពិភពលោកទាំងមូលពើបប្រទះវិបត្តិសេដ្ឋកិច្ច។
កត្តាស្នូលចំបងៗដែលរុញច្រានឲ្យសេដ្ឋកិច្ចអាមេរិកធ្លាក់ចុះខ្លាំង
កត្តាស្នូលដំបូងដែលធ្វើឲ្យសេដ្ឋកិច្ចអាមេរិក ធ្លាក់ចុះខ្លាំងបំផុតកម្រមាននៅត្រីមាសទី១ ឆ្នាំ ២០២០នេះ គឺការធ្លាក់ចុះនៃផលិតផលក្នុងស្រុកសរុប (GDP)។ GDP ថយចុះ ឆ្លុះបញ្ចាំងពីការធ្លាក់ចុះនៃសកម្មភាពសេដ្ឋកិច្ចរបស់អាមេរិក ក្នុងរយៈពេលពីរអាទិត្យចុងក្រោយនៃខែមីនាកន្លងទៅថ្មីៗនេះ។
សកម្មភាពសេដ្ឋកិច្ចធ្លាក់ចុះ វាជាប់ពាក់ព័ន្ធនឹងអត្រាអ្នកគ្មានការងារធ្វើដែរ។ គិតត្រឹមថ្ងៃទី ២៩ មេសានេះ ពលរដ្ឋអាមេរិកចំនួនរាប់លាននាក់ ពោលគឺជាង ២៦ លាននាក់ បានបាតបង់ការងារធ្វើ និងកំពុងស្វះស្វែងរកជំនួយពីរដ្ឋាភិបាល។
យោងទៅតាមការស្ទង់មតិមួយ ធ្វើឡើងដោយសារព័ត៌មាន Reuters ជាមួយក្រុមអ្នកជំនាញសេដ្ឋកិច្ច ផលិតផលក្នុងស្រុកសរុបរបស់អាមេរិក ទំនងជាថយចុះក្នុងចំនួន ៤ % បើប្រៀបធៀបនឹងត្រីមាសទី១ ក្នុងឆ្នាំ ២០១៩។ ការថយចុះនេះ គឺដោយសារតែការចំណាយរបស់អ្នកប្រើប្រាស់ មានចំនួនតិចជាងមុន ហើយសង្វាក់ផលិតកម្មទៀតសោត ក៏ធ្លាក់ចុះដូចគ្នាដែរ។
ជាមួយគ្នានេះ បើតាមក្រុមអ្នកជំនាញសេដ្ឋកិច្ច ការធ្លាក់ចុះផលិតផលក្នុងស្រុកសរុបរបស់អាមេរិកក្នុងឆ្នាំ ២០២០ នេះ គឺជាការធ្លាក់ចុះខ្លាំងបំផុត នៃផលិតផលក្នុងស្រុកសរុបរបស់អាមេរិក ចាប់តាំងពីត្រីមាសទី ១ ឆ្នាំ ២០០៩ នៅក្នុងអំឡុងវិបត្តិសេដ្ឋកិច្ចពិភពលោក។
ទាក់ទងរឿងនេះ លោក Kwok Ping Tsang សាស្រ្តាចារ្យផ្នែកសេដ្ឋកិច្ចម្នាក់នៅមហាវិទ្យាល័យវិទ្យាសាស្ត្របច្ចេកវិទ្យា Virginia បានលើកឡើងថា ចាប់ពីថ្ងៃទី ១៩ ខែមីនា ដល់ថ្ងៃទី១៥ ខែមេសា GDP របស់អាមេរិក អាចធ្លាក់ចុះជិត ១,២ ទ្រីលានដុល្លារ ពោលគឺស្មើនឹង ២៦% បើប្រៀបធៀបនឹងរយៈពេលដូចគ្នាកាលពីឆ្នាំមុន។
ចំណែក កត្តាដ៏សំខាន់មួយទៀតដែលធ្វើឲ្យសេដ្ឋកិច្ចអាមេរិកថមថយកម្លាំង គឺការធ្លាក់ចុះ នៃការរកស៊ីរបស់អាជីវកម្មនានា កាលពីត្រីមាសមុន។ ដោយសារតែវិបត្តិកូវីដ១៩ អាជីវកម្មជាច្រើននៅអាមេរិក ត្រូវបង្ខំចិត្តបិទទ្វារ ហើយបាត់បង់ប្រាក់ចំណូលរាប់ពាន់លានដុល្លារ។ ចំណែក រដ្ឋាភិបាលអាមេរិកវិញត្រូវចំណាយថវិកាជាច្រើនដើម្បីជួយអាជីវកម្មទាំងនោះ។
គួរជ្រាបថា ដើម្បីជួយអាជីវកម្មក្នុងស្រុក សភាអាមេរិកបានអនុម័តកញ្ចប់ថវិកាប្រមាណ ៣ ទ្រីលានដុល្លារ ហើយធនាគារកណ្តាលអាមេរិក ក៏បានកាត់បន្ថយអត្រាការប្រាក់ស្ទើរជិតសូន្យ។ យ៉ាងណាក៏ដោយ អ្នកជំនាញសេដ្ឋកិច្ច និយាយថា វិធានការរបស់រដ្ឋាភិបាលទាំងនេះ មិនគ្រប់គ្រាន់នោះទេ។
សេដ្ឋកិច្ចអាមេរិកនឹងជួបវិបត្តិកាន់តែធ្ងន់ធ្ងរក្នុងពេលអនាគតដ៏ខ្លី
ជាការពិត បើតាមអ្នកជំនាញ សេដ្ឋកិច្ចអាមេរិកកំពុងធ្លាក់ចុះខ្លាំង ហើយទំនងជាធ្លាក់ចុះកាន់តែធ្ងន់ធ្ងរជាងនេះទៅទៀតក្នុងពេលខាងមុខដ៏ខ្លីនេះ។
នាខណៈពេលនេះ សម្រាប់សេដ្ឋវិទូ វាឆាប់រហ័សពេកណាស់ក្នុងការនិយាយអំពីការស្ទុះងើបឡើងវិញនៃសេដ្ឋកិច្ចអាមេរិក ពីព្រោះថាមានការព្យាករថានឹងមានវិបត្តិក្ស័យធនយ៉ាងច្រើនសម្រាប់អាជីវកម្មខ្នាតតូច និងមធ្យមនៅសហរដ្ឋអាមេរិក។
នៅពេលអាជីកម្មជាច្រើនត្រូវជួបវិបត្តិក្ស័យធន សកម្មភាពសេដ្ឋកិច្ចអាមេរិក ក៏មិនអាចដំណើរការល្អឡើងវិញបាន ហើយមនុស្សជាច្រើននឹងបន្តអត់ការងារធ្វើ។ បន្ទាប់មកទៀត ផលិតផលក្នុងស្រុកសរុបរបស់អាមេរិក ក៏នឹងត្រូវបន្តដាំក្បាលចុះបន្ថែមទៀតដែរ។
ជុំវិញបញ្ហានេះ លោក Joe Brusuelas ប្រធានសេដ្ឋវិទូប្រចាំក្រុមហ៊ុន RSM ក្នុងទីក្រុងញូវយ៉កបាននិយាយថា ផលិតផលក្នុងផលិតផលក្នុងស្រុកសរុបរបស់អាមេរិក អាចនឹងធ្លាក់ចុះដល់ជិត ៤០% នៅក្នុងត្រីមាសទី ២ នៃឆ្នាំ ២០២០នេះ។
ការធ្លាក់ចុះនៃផលិតផលក្នុងស្រុកសរុប រួមជាមួយអត្រាអត់ការងារធ្វើកំពុងតែដាក់សម្ពាធយ៉ាងខ្លាំងទៅលើរដ្ឋាភិបាលរបស់លោកប្រធានាធិបតីដូណាល់ ត្រាំ។ មានប្រជាពលរដ្ឋអាមេរិកមួយចំនួន បានចេញតវ៉ាឲ្យមានការបើកសកម្មភាពសេដ្ឋកិច្ចឡើងវិញ។
ក្រុមអ្នកជំនាញបានលើកឡើងថា ការបើកដំណើរការសេដ្ឋកិច្ចឡើងវិញ មិនប្រាកដថាអាចជួយស្តារសេដ្ឋកិច្ចអាមេរិកនោះទេ។ ក៏ប៉ុន្តែ វាអាចនាំមកនូវហានិភ័យថ្មី នៃការឆ្លងខ្លាំងជាលើកទី២ នៃជំងឺកូវីដ ១៩ ហើយវិធានការបិទការចេញចូលក៏ត្រលប់មកវិញសាជាថ្មី ចំណែកឯសេដ្ឋកិច្ចអាមេរិកទៀតសោត នឹងត្រូវធ្លាក់ចូលក្នុងវិបត្តិកាន់តែអាកក្រ់ជាងមុនដោយជៀសមិនរួច៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ