កូវីដ-១៩៖លោកដូណាល់ ត្រាំប្រកាសផែនការផ្តល់សន្ទុះសេដ្ឋកិច្ចអាមេរិកឡើងវិញជា ៣ដំណាក់កាល
នៅសហរដ្ឋអាមេរិក ប្រធានាធិបតីលោកដូណាល់ ត្រាំបានបង្ហាញចេញនាថ្ងៃព្រហស្បតិ៍ ទី១៦ មេសានូវផែនការផ្តល់សន្ទុះសកម្មភាពសេដ្ឋកិច្ចឡើងវិញជា ៣ដំណាក់កាលដោយផ្អែកលើស្ថានភាពជាក់ស្តែងនៃជំងឺកូវីដ-១៩ នៅក្នុងរដ្ឋនីមួយៗ។ ការសម្រេចរបស់លោកត្រាំពេលនេះបានធ្វើឡើង ក្នុងពេលដែលចំនួនអ្នកការងារធ្វើថ្មីបានកើនឡើងដល់ ៥ ២០០ ០០០នាក់ គិតតាំងពីថ្ងៃផ្ទុះកូវីដ-១៩។ គ្រាន់តែក្នុងរយៈពេល ១ខែចុងក្រោយ ចំនួនអ្នកការងារធ្វើថ្មីមានដល់ទៅជាង ២ ២០០ ០០០នាក់។ ក្នុងពេលជាមួយគ្នានេះ ចំនួនអ្នកស្លាប់ដោយកូវីដ-១៩ នៅអាមេរិកបានឡើងដល់ ៣២ ៩០០នាក់គិតត្រឹមថ្ងៃព្រហស្បតិ៍ ទី១៦ មេសា។ តើផែនការផ្តល់សន្ទុះសកម្មភាពសេដ្ឋកិច្ចឡើងវិញជា ៣ដំណាក់ការរបស់លោកត្រាំមានអ្វីខ្លះ?។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២១
លោកដូណាល់ ត្រាំបានថ្លែងយ៉ាងដូចនេះពីសេតវិមាននាថ្ងៃព្រហស្បតិ៍ ទី១៦ មេសានៅក្នុងសន្និសីទកាសែតប្រចាំថ្ងៃស្តីពីស្ថានភាពកូវីដ-១៩។ « Opening Up America again » ឬបើកសហរដ្ឋអាមេរិកឡើងវិញ គឺជាឈ្មោះផែនការផ្តល់សន្ទុះសកម្មភាពសេដ្ឋកិច្ចឡើងវិញរបស់លោកត្រាំ រួចបន្ថែមថា វាដល់ពេលដែលសហរដ្ឋអាមេរិកត្រូវផ្តើមដំណើរការឡើងវិញហើយ។ តែលោកត្រាំបានគូសបញ្ជាក់ថា ផែនការរបស់លោកគ្រាន់ជាផែនទីចង្អុលផ្លូវមួយប៉ុណ្ណោះដោយលោកទុកឲ្យអភិបាលរដ្ឋនីមួយៗជាអ្នកសម្រេចដោយផ្អែកលើស្ថានភាពជាក់ស្តែងនៃការវិវឌ្ឍន៍របស់ជំងឺកូវីដ-១៩។
នៅក្នុងផែនការផ្តល់សន្ទុះសកម្មភាពសេដ្ឋកិច្ចរបស់ប្រទេសឡើងវិញ លោកត្រាំមិនបានកំណត់ពេលវេលាដែលត្រូវអនុវត្តទេ តែបានផ្តល់ជាអនុសាសន៍ថា រដ្ឋមួយអាចបើកការបិទខ្ទប់ឡើងវិញបាន លុះត្រាតែរដ្ឋនោះបានសម្គាល់ឃើញពីករណីធ្លាក់ចុះនៃកូវីដ-១៩ ចំនួន ១៤ថ្ងៃជាប់ៗគ្នា មន្ទីរពេទ្យមានសមត្ថភាព និងលទ្ធផលក្នុងការទទួលអ្នកឆ្លងកូវីដ-១៩ ថ្មី ឬមួយក៏មានការធ្វើតេស្តរកជំងឺកូវីដ-១៩ ក្រោមទ្រង់ទ្រាយធំជាដើម។ លោកត្រាំយល់ថា ការបើកប្រទេសឡើងវិញមួយជំហានម្តងៗ និងពីរដ្ឋមួយទៅរដ្ឋមួយទៀតដោយប្រយ័ត្នប្រយែង គឺដើម្បីចៀសវាងការឆ្លងរាលដាលមេរោគកូរ៉ូណាថ្មីជាលើកទី២។ តាមលោកត្រាំ រដ្ឋណាដែលមានសុខភាពល្អ ពោលមិនសូវមានករណីកូវីដ-១៩ អាចចាប់ផ្តើមសកម្មភាពសេដ្ឋកិច្ចពីឥឡូវទៅ ដូចយ៉ាងរដ្ឋ Montana Wyoming ឬមួយរដ្ឋ North Dakota។
ការប្រកាសចេញនូវផែនការផ្តល់សន្ទុះសកម្មភាពសេដ្ឋកិច្ចប្រទេសឡើងវិញរបស់លោកត្រាំបានធ្វើឡើង ខណៈដែលចំនួនអ្នកអត់ការងារធ្វើថ្មីក្នុងរយៈពេល ១ខែចុងក្រោយមានជាង ២ ២០០ ០០០នាក់ ហើយបើគិតតាំងពីថ្ងៃផ្ទុះជំងឺកូវីដ-១៩ មក ចំនួនពលរដ្ឋអាមេរិកថ្មីបាត់បង់ការងារមានដល់ទៅ ៥ ២០០ ០០០នាក់។ ទន្ទឹមគ្នានេះ អាមេរិកក៏បានក្លាយជាប្រទេសដែលមានអ្នកឆ្លង និងអ្នកស្លាប់ដោយជំងឺកូវីដ-១៩ ច្រើនជាងគេ។ គិតត្រឹមថ្ងៃព្រហស្បតិ៍ ទី១៦ មេសា ចំនួនអ្នកឆ្លងមានជាងកន្លះលាននាក់ ហើយចំនួនអ្នកស្លាប់មាន ៣២ ៩០០នាក់ ក្នុងនោះមានជិត ១៥ ០០០នាក់នៅក្នុងរដ្ឋញូយ៉កតែមួយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ