អ៊ីស្រាអែលមាននាយករដ្ឋមន្រ្តី២រូប ដែលផ្លាស់ប្តូរវេនគ្នា ដឹកនាំ ម្តងម្នាក់
ចុះផ្សាយនៅថ្ងៃ៖
ស្តាប់ - ០៨:៣៥
ក្រោយវិបត្តិជាប់គាំងនយោបាយ អស់១ឆ្នាំកន្លះ តើអ៊ីស្រាអែល នឹងមានរដ្ឋាភិបាលដឹកនាំត្រឹមត្រូវ ដែរឬទេ? រដ្ឋាភិបាលថ្មីរបស់អ៊ីស្រាអែល ដែលជារដ្ឋាភិបាលចម្រុះ កើតចេញពីកិច្ចព្រមព្រៀង កាលពីខែមេសា ត្រូវស្បថចូលតំណែង នៅថ្ងៃអាទិត្យ នេះ។ តាមកិច្ចព្រមព្រៀង កាលពីខែ មេសា នាយករដ្ឋមន្រ្តីផុតអាណត្តិ គឺលោកបិនចាមីន នេតាន់យ៉ាហ៊ូ ត្រូវផ្លាស់ប្តូរវេនគ្នាដឹកនាំប្រទេស ជាមួយ ប្រមុខដឹកនាំបក្សប្រឆាំង អ៊ីស្រាអែល គឺលោក បេនី ហ្កង់។ ក្រៅពី បញ្ហាសេដ្ឋកិច្ច ជំងឺរាតត្បាតកូវីដ រដ្ឋាភិបាលរួបរួមអ៊ីស្រាអែល ត្រូវប្រឈមនឹងការរិះគន់ ដាក់សម្ពាធ ពីអន្តរជាតិ ដោយសារផែនការចង់កាត់យកទឹកដីប៉ាឡេស្ទីន នៅស៊ីហ្សកដានី និងជ្រលងភ្នំហ្សកដាំង របស់ហ្សកដានី មកធ្វើជាដែនដីរបស់ខ្លួន ចាប់ពីខែ កក្កដាឆ្នាំនេះ។
នៅអ៊ីស្រាអែល រដ្ឋសភា បើកសម័យប្រជុំនៅថ្ងៃនេះ ដើម្បីបោះឆ្នោត គាំទ្ររដ្ឋាភិបាលថ្មីរបស់អ៊ីស្រាអែល បន្ទាប់ពីមានវិបត្តិជាប់គាំងនយោបាយ អស់១ឆ្នាំកន្លះ។ តាមគម្រោង រដ្ឋាភិបាល ថ្មី ដែលជារដ្ឋាភិបាលចម្រុះ កើតចេញពីការចរចាដ៏ស្វិតស្វាញ រវាងអតីតគណបក្សកាន់អំណាច និងគណបក្សប្រឆាំង នឹងត្រូវស្បថចូលកាន់តំណែងនៅថ្ងៃអាទិត្យនេះ។ ការស្បថចូលកាន់តំណែងរបស់រដ្ឋាភិបាលថ្មី ត្រូវធ្វើតាំងពីថ្ងៃ ព្រហស្បតិ៍ម្ល៉េះ ប៉ុន្តែ ត្រូវបានលើកពេលមកធ្វើនៅថ្ងៃនេះវិញ ទៅតាមសំណូមពររបស់លោកបិនចាមីន នេតាន់យ៉ាហ៊ូ នាយករដ្ឋមន្រ្តីផុតអាណត្តិ។ លោកនាយករដ្ឋមន្រ្តីផុតអាណត្តិ បិនចាមីន នេតាន់យ៉ាហ៊ូ បានសុំលើកពេល ដោយមកពីលោកនៅរើសមិនទាន់បានគ្រប់សមាជិករដ្ឋាភិបាលថ្មី។ ឥលូវនេះ លោកនេតាន់យ៉ាហ៊ូ រកបានសមាជិកគ្រប់គ្រាន់ហើយ ដោយរង់ចាំតែការបោះឆ្នោត ផ្តល់ទំនុកចិត្តពីសភានៅថ្ងៃ អាទិត្យ នេះ តែប៉ុណ្ណោះ។ នៅក្នុងសុន្ទរកថា ថ្លែង នៅរដ្ឋសភា នៅ២ម៉ោង មុននេះ លោកនេតាន់យ៉ាហ៊ូបញ្ជាក់ថា រដ្ឋាភិបាលចម្រុះ នឹងត្រូវចេញរូបរាង នៅថ្ងៃអាទិត្យនេះ ដោយប្រាកដ ទៅតាមការទន្ទឹងចង់បានរបស់ប្រជាជន អ៊ីស្រាអែល។
រដ្ឋាភិបាលទី ៣៥ របស់អ៊ីស្រាអែល ដែលជារដ្ឋាភិបាលចម្រុះ កើតចេញមកពីការចាប់ដៃគ្នារវាងបក្សកាន់អំណាច និងបក្សប្រឆាំង គឺជារដ្ឋាភិបាលពិសេស ដែលអាចមានរដ្ឋមន្រ្តីដល់ទៅ ៣៦នាក់ និងអនុរដ្ឋមន្រ្តី១៦នាក់។ នៅក្នុងក្បាលម៉ាស៊ីនដឹកនាំរដ្ឋាភិបាលវិញ គឺមាននាយករដ្ឋមន្រ្តី ដល់ទៅ ២រូប គឺ លោកបិនចាមីន នេតាន់យ៉ាហ៊ូ និងបេនី ហ្កង់។ តាមកិច្ចព្រមព្រៀង រវាងគណបក្សរបស់អ្នកទាំងពីរ លោកនេតាន់យ៉ាហ៊ូ និងហ្កង់ ត្រូវផ្លាស់ប្តូរគ្នា ម្តងម្នាក់ ដើម្បី ដឹកនាំរដ្ឋាភិបាល។
លោកនេតាន់យ៉ាហ៊ូ ត្រូវកាន់តំណែងនាយករដ្ឋមន្រ្តី ក្នុងរយៈពេល ១ឆ្នាំកន្លះ ចំណែកលោកបេនី ហ្កង់វិញ ត្រូវកាន់តំណែងជារដ្ឋមន្រ្តីការពារជាតិ។ នៅ១៨ខែក្រោយ លោកហ្កង់ នឹងចូលកាន់តំណែងជានាយករដ្ឋមន្រ្តីអ៊ីស្រាអែលវិញម្តង ដោយទុកឲ្យលោកនេតាន់យ៉ាហ៊ូ ត្រូវមកធ្វើជានាយករដ្ឋមន្រ្តីត្រៀម ចាំផ្លាស់ប្តូរ។ រដ្ឋាភិបាលចម្រុះ រវាងគណបក្សស្តាំនិយមជ្រុល និងគណបក្សឆ្វេង កណ្តាលនិយម នឹងមានអាយុ ៣ឆ្នាំ មុនមានការបោះឆ្នោត ថ្មី ឬក៏ត្រូវពន្យារពេលតទៅទៀត។ នេះបើតាមកិច្ចព្រមព្រៀង រវាងគូភាគីនយោបាយទាំងពីរ។
ពីខាងលោកបេនី ហ្កង់ លោកបានចរចា ឲ្យ សមាជិកគណបក្សខៀវ ស របស់លោក អាចកាន់តំណែងសំខាន់ដែររបស់រដ្ឋាភិបាល ដូចជា ក្រសួង ការបរទេស និងក្រសួងយុត្តិធម៌ ជាដើម។ គោលដៅសំខាន់របស់រដ្ឋាភិបាលរួបរួមជាតិ អ៊ីស្រាអែលលើកនេះ គឺប្រយុទ្ធប្រឆាំងនឹងជំងឺរាតត្បាតកូវីដ ១៩ និងស្រោចស្រង់សេដ្ឋកិច្ច ដែលចុះខ្សោយដោយសារតែវិបត្តិកូវីដ។
លោកបិនចាមីន នេតាន់យ៉ាហ៊ូ នឹងត្រូវតុលាការបើកការជំនុំជម្រះ នៅថ្ងៃទី ២៤ឧសភា
តើនាយករដ្ឋមន្រ្តី ដែលកំពុងកាន់អំណាច អាចត្រូវចោទប្រកាន់ និងការជំនុំជម្រះ នៅតុលាការបានយ៉ាងម៉េច? នេះជាអ្វីដែលក្រុមបាតុករបានស្រែក តវ៉ាឡើង នៅក្នុងបាតុកម្ម ប្រឆាំង កាលពីថ្ងៃសុក្រ នៅមុខរដ្ឋសភាអ៊ីស្រាអែល។ សម្រាប់ពួកគេ បុគ្គលដែលតុលាការកំពុងចោទប្រកាន់ពីបទប្រព្រឹត្តអំពើពុករលួយគ្មានសិទ្ធិស្របច្បាប់ដើម្បីដឹកនាំប្រទេសនោះទេ។ ក្រុមបាតុករអ៊ីស្រាអែល បានរិះគន់ ផងដែរ លោកបេនី ហ្កង់ថា ដោយចូលរួមដឹកនាំរដ្ឋាភិបាល ចម្រុះ លោកបេនីហ្កង់ ក៏កំពុងចូលរួមផ្សំគំនិតជាមួយ លោក នេតាន់យ៉ាហ៊ូ ដែលជាមេដឹកនាំពុករលួយ។
តុលាការកំពូលឯណោះវិញ វាយតម្លៃថា នៅអ៊ីស្រាអែល គ្មានច្បាប់ណាដែលហាមឃាត់បុគ្គលដែលត្រូវរងការចោទប្រកាន់នៅតុលាការ មិនឲ្យកាន់តំណែងនាយករដ្ឋមន្រ្តីនោះទេ។ តុលាការកំពូលអ៊ីស្រាអែល ធ្លាប់បានបើកសវនការ ដើម្បីសិក្សាពីភាពស្របច្បាប់ នៃការបង្កើតរដ្ឋាភិបាលចម្រុះ ដែលមានបែងចែក ការដឹកនាំគ្នាម្តងម្នាក់ របស់គណបក្សទាំងពីរ និងពីស្ថានភាពរបស់លោក បិនចាមីន នេតាន់យ៉ាហ៊ូ។ ប៉ុន្តែ នៅទីបំផុត តុលាការកំពូល ក៏បានសម្រេចបើកភ្លើងខៀវ ឲ្យគេបង្កើតរដ្ឋាភិបាលចម្រុះ។ សម្រាប់ ចៅក្រមរបស់តុលាការកំពូល ការសម្រេចបែបនេះ មិនមែនមានន័យថា បទចោទប្រកាន់ទៅលើលោកនេតាន់យ៉ាហ៊ូ ចុះខ្សោយ នោះទេ។
នៅក្នុងពេលកាន់តំណែងជានាយករដ្ឋមន្រ្តី លោកនឹងប្រឈមនឹងការជំនុំជម្រះ ដដែល ទៅតាមការចោទប្រកាន់រដ្ឋអាជ្ញាអ៊ីស្រាអែល ដែលបានចោទលោក ពីបទ ប្រព្រឹត្តអំពើពុករលួយ លួចបន្លំ និងរំលោភទំនុកចិត្ត។ លោកនាយករដ្ឋមន្រ្តីអ៊ីស្រាអែល កំពុងជាប់សំណាញ់់ ក្នុងសំណុំរឿងសង្ស័យដ៏ធ្ងន់ធ្ងរមួយទាក់ទងនឹងការលួចចុះកិច្ចព្រមព្រៀងដោយស្ងាត់ៗជាមួយម្ចាស់សារព័ត៌មានជាតិអ៊ីស្រាអែល ដើម្បីឱ្យកាសែតនេះចុះផ្សាយតែព័ត៌មានល្អៗលើកតម្កើងលោកជានាយករដ្ឋមន្ត្រី។ នៅមានសំណុំរឿងសង្ស័យមួយទៀត ដែលថាលោកនេតាន់យ៉ាហ៊ូប្រព្រឹត្តអំពើពុករលួយ និងកេងបន្លំ ដោយបានទទួលកាដូខុសច្បាប់ពីក្រុមអ្នកជំនួញជាតិនិងអន្តរជាតិ។
ដរាបណា តុលាការនៅមិនទាន់ កាត់ទោសលោក ឲ្យជាប់ពន្ធនាគារ ឬថា បណ្តឹងក្តីក្តាំ នៅមិនទាន់ចប់សព្វគ្រប់ លោកនេតាន់យ៉ាហ៊ូ នៅតែអាចកាន់តំណែងជានាយករដ្ឋមន្រ្តីអ៊ីស្រាអែលដដែល។ លោកនេតាន់យ៉ាហ៊ូ ទំនងរួចផុតពីការដកតំណែង នាយករដ្ឋមន្រ្តី ដោយសារតែការសម្រេចផ្តន្ទាទោសណាមួយរបស់តុលាការ ពីព្រោះថា សវនការ លើសំណុំរឿងរបស់លោកអាចត្រូវការពេលដល់ទៅ ៤ឆ្នាំ គឺនៅក្រោយ លោកត្រូវបញ្ចប់អាណត្តិថ្មីទៅទៀត។
អឺរ៉ុបដុតដៃ ដុតជើង ដើម្បីបញ្ចុះបញ្ចូលរដ្ឋាភិបាលថ្មីរបស់អ៊ីស្រាអែល កុំឲ្យអនុវត្តផែនការកាត់យកទឹកដីប៉ាឡេស្ទីន
មិនទាន់ចូលកាន់តំណែងពេញលេញផង រដ្ឋាភិបាលចម្រុះអ៊ីស្រាអែលបានរងរិះគន់ និងការទាមទារ រួចទៅហើយ ពីសហគមន៍ អន្តរជាតិ ដោយសារ គម្រោងរបស់អ៊ីស្រាអែល ក្នុងការកាត់យកដែនដីប៉ាឡេស្ទីន ដែលអ៊ីស្រាអែលកាន់កាប់ នៅស៊ីហ្សកដានី។
នៅថ្ងៃសុក្រ ប្រមុខដឹកនាំការបរទេសរបស់បណ្តាប្រទេសអឺរ៉ុប បានត្រៀមរៀបចំសេចក្តីថ្លែងការណ៍មួយ ព្រមាន រដ្ឋាភិបាលថ្មី របស់អ៊ីស្រាអែល ពីផលវិបាក ក្នុងករណី កាត់យកទឹកដីប៉ាឡេស្ទីន មកធ្វើជាកម្មសិទ្ធិរបស់ខ្លួន ដែលផ្ទុយនឹងច្បាប់អន្តរជាតិ។
បន្ទាប់ពីសម្ព័ន្ធអារ៉ាប់ សហភាពអឺរ៉ុប នៅប៉ុន្មានថ្ងៃនេះ សកម្មខ្លាំងណាស់ដើម្បី បញ្ចុះបញ្ចូលរដ្ឋាភិបាលថ្មីរបស់អ៊ីស្រាអែល កុំឲ្យលេបយកទឹកដីរបស់ប៉ាឡេស្ទីន។ ប្រមុខការបរទេស អឺរ៉ុបបានធ្វើសំបុត្រព្រាង មួយ ដែលនឹងសម្រេចផ្ញើទៅរដ្ឋាភិបាលថ្មីរបស់អ៊ីស្រាអែល នៅថ្ងៃចន្ទ។ នៅក្នុងសំបុត្រ អ្នកតំណាងរបស់ប្រទេសអឺរ៉ុបចង់អបអរសាទររដ្ឋាភិបាលថ្មី។
ប៉ុន្តែ ជាមួយគ្នានេះ អឺរ៉ុបបានព្រមានផងដែរ បើសិន អ៊ីស្រាអែលគ្រោងអនុវត្តផែនការសន្តិភាពរបស់រដ្ឋបាលលោកដូណាល់ ត្រាំ ចាប់ពីខែកក្កដាខាងមុខមែននោះ។ តាមផែនការដោះស្រាយវិបត្តិនៅដើមបូព៌ា ដែលលោកដូណាល់ ត្រាំ បានផ្តល់ទៅឲ្យរដ្ឋាភិបាលអ៊ីស្រាអែល អ៊ីស្រាអែល អាចយកដីក្នុងតំបន់អាណានិគមកិច្ចរបស់ខ្លួន នៅស៊ីហ្សកដានី ដែលជាទឹកដីរបស់ប៉ាឡេស្ទីន មកធ្វើជាទឹកដីរបស់អ៊ីស្រាអែល។
សម្រាប់ភាគីអឺរ៉ុប ការភ្ជាប់យកទឹកដី ប៉ាឡេស្ទីន ដោយខុសច្បាប់អន្តរជាតិ មិនខុសអ្វី ពីការរំលោភយកទឹកដីគ្រីមេ របស់អ៊ុយក្រែន ពីសំណាក់រុស្ស៊ីនោះទេ។ ការកាត់យកទឹកដីគ្រីមេ របស់អ៊ុយក្រែន បានធ្វើឲ្យរុស្ស៊ីរងការដាកទណ្ឌកម្មសេដ្ឋកិច្ចពីសហគមន៍អន្តរជាតិ និងជាពិសេសពីអឺរ៉ុប។ នៅក្នុងករណីអ៊ីស្រាអែល ភាគីអឺរ៉ុបមិនទាន់ចង់និយាយពីការដាក់ទណ្ឌកម្មសេដ្ឋកិច្ចអ្វីទេ ដោយចង់ឲ្យមានការចរចា ដើម្បីជៀសវាងការដាក់ទណ្ឌកម្មណាមួយ។ គេវាយតម្លៃថា លោកបេនី ហ្កង់ និងរដ្ឋមន្រ្តីការបរទេសថ្មីរបស់អ៊ីស្រាអែល ដែលជាអ្នកនយោបាយអ៊ីស្រាអែល មិនជ្រុលនិយម និងមិនចង់បានការថ្កោលទោសពីសហគមន៍អន្តរជាតិ ទំនងជានឹងជួយ ពន្យឺត អូសទាញ មិនឲ្យលោកនេតាន់យ៉ាហ៊ូ អាចសម្រេចតាមផែនការ ក្នុងការកាត់យកទឹកដី ប៉ាឡេស្ទីន ដោយខុសច្បាប់អន្តរជាតិ ដែលគ្រោងធ្វើចាប់ពីខែកក្កដា ឆ្នាំ២០២០។
អឺរ៉ុបអាចដាក់ទណ្ឌកម្មទៅលើអ៊ីស្រាអែល ដូចជា ឈប់អនុគ្រោះពន្ធលើទំនិញអ៊ីស្រាអែល ឈប់សហការផ្នែកស្រាវជ្រាវ និងដោះដូរពាណិជ្ជកម្មផ្សេងៗ។ ប៉ុន្តែ សម្រាប់អ្នកវិភាគ ការដាក់ទណ្ឌកម្មណាមួយទៅលើអ៊ីស្រាអែល ពីសំណាក់សហភាពអឺរ៉ុបពិបាកនឹងកើតឡើង ព្រោះថា ប្រទេសសមាជិកអឺរ៉ុប បែកបាក់គ្នា គ្មានការយល់ស្របគ្នាទាំងស្រុងនោះទេ ក្នុងរឿងដាក់ទណ្ឌកម្មលើអ៊ីស្រាអែល នោះទេ។ ចង់ មិនចង់ អ៊ីស្រាអែលជាដៃគូសំខាន់មួយរបស់អឺរ៉ុប នៅតំបន់ដើមបូព៌ា។
មួយវិញទៀត ក្រៅតែពីចង់កាត់យកទឹកដីប៉ាឡេស្ទីន អ៊ីស្រាអែលមានគម្រោងផងដែរ ចង់កាត់យកជ្រលងភ្នំហ្សកដាំង ដែលជាប់ជាមួយព្រំដែនហ្សកដានីមកធ្វើជាទឹកដីរបស់ខ្លួន។ ប្រតិកម្មទៅនឹងផែនការរបស់អ៊ីស្រាអែល អាមេរិក ព្រះចៅហ្សកដានី នៅថ្ងៃសៅរ៍នេះ បានប្រាប់ កាសែតអាល្លឺម៉ង់ថា ផែនការរបស់អ៊ីស្រាអែល នឹងបង្កភ្លើងកំហឹង ជម្លោះជាមួយហ្សកដានី។ អ្នកជំនាញវិញធ្លាប់ព្រមានថា ហ្សកដានី នឹងឈប់អនុវត្តកិច្ចព្រមព្រៀងសន្តិភាពជាមួយអ៊ីស្រាអែល ឆ្នាំ ១៩៩៤ បើសិនអ៊ីស្រាអែលផ្គើនចង់ភ្ជាប់យកជ្រលងភ្នំហ្សកដាំង ទៅធ្វើជាទឹកដីរបស់ខ្លួន។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ