ជាប់ឆ្នោតជាប្រធានាធិបតីភ្លាម លោកស្រី ត្សៃ អ៊ីងវេន ប្រាប់ចិនឲ្យបោះបង់ចោលនយោបាយគំរាមកំហែងតៃវ៉ាន់
លោកស្រី ត្សៃ អ៊ីងវេន បានទទួលជ័យជំនះយ៉ាងធំធេង នៅក្នុងការបោះឆ្នោតប្រធានាធិបតីតៃវ៉ាន់ កាលពីថ្ងៃសៅរ៍ម្សិលមិញ។ គូប្រជែងរបស់លោកស្រី គឺលោក ហាន គួរយូបានប្រកាសចុះចាញ់ និងទូរស័ព្ទ ជូនពរ លោកស្រី ត្សៃ អ៊ីងវេន ដែលឈ្នះឆ្នោត ធ្វើជាប្រធានាធិបតីតៃវ៉ាន់មួយអាណត្តិ បន្តទៀត។ តៃវ៉ាន់ ត្រូវដឹកនាំ ដោយ លោកស្រី ត្សៃ អ៊ីងវេន ៤ឆ្នាំបន្តទៀត។ នោះជារឿងឈឺក្បាល មួយទៀត សម្រាប់ទីក្រុងប៉េកាំង ដែលមិនចូលចិត្ត លោកស្រី ត្សៃ អ៊ីងវេន ដោយសារលោកស្រី បដិសេធទទួលស្គាល់ គំនិតដែលថា តៃវ៉ាន់ ជាផ្នែកមួយ របស់ប្រទេសចិន។
ចុះផ្សាយនៅថ្ងៃ៖
នៅយប់ថ្ងៃសៅរ៍ នៅពេលលោកស្រី ត្សៃ អ៊ីងវេន មកពីគណបក្សកាន់អំណាចប្រកាស ជ័យជំនះរបស់ខ្លួន គណៈកម្មការបោះឆ្នោត តៃវ៉ាន់ កំពុងបន្តរាប់សន្លឹកឆ្នោតនៅឡើយ។ គូប្រជែងរបស់លោកស្រី ត្សៃ អ៊ីងវេន គឺលោក ហាន គួរយូ មកពីគណបក្សគួមីងតង់ បានប្រកាសចុះចាញ់រួចទៅហើយដែរ ដោយសារតែចំនួន សន្លឹកឆ្នោត មានគម្លាតគ្នាខ្លាំងពេក។ លទ្ធផលបណ្តោះអាសន្នរបស់គណៈកម្មការបោះឆ្នោតតៃវ៉ាន់បង្ហាញថា លោកស្រី ត្សៃ អ៊ីងវេនបានទទួល សំឡេងគាំទ្រ ចំនួន ៥៧ភាគរយ ចំណែក បេក្ខជនដែលមាននិន្នាការចង់ខិតចូលជិតទីក្រុងប៉េកាំង បានទទួលសំឡេងគាំទ្រ តែ ៣៨ភាគរយប៉ុណ្ណោះ។
នៅក្នុងសុន្ទរកថាថ្លែងពីជ័យជំនះរបស់លោកស្រី នៅទីស្នាក់ការ ក្នុងទីក្រុងតៃប៉ិ លោកស្រី ត្សៃ អ៊ីងវេន បាននិយាយថា តៃវ៉ាន់កំពុងបង្ហាញដល់ពិភពលោក ឲ្យឃើញថា តើតៃវ៉ាន់ ស្រឡាញ់សេរីភាព លទ្ធិប្រជាធិបតេយ្យ របៀបរស់នៅ និងជាតិតៃវ៉ាន់ ប៉ុណ្ណា។
ជ័យជំនះរបស់លោកស្រី ត្សៃ អ៊ីងវេន ដែលមានជំហរ ប្រឆាំងគោលការណ៍ ចិនតែមួយ ប្រៀបបាននឹងការវាយបកខ្លាំងមួយ ទៅលើរដ្ឋអំណាចប៉េកាំង ដែលប្រាថ្នាចង់ឲ្យគណបក្សប្រឆាំង គួមីងតង់ ចូលមកជំនួស គណបក្សលោកស្រី ត្សៃ អ៊ីងវេន។
គេវាយតម្លៃថា ប្រជាជនតៃវ៉ាន់ បានបោះឆ្នោត ជ្រើសរើសលោកស្រី ត្សៃ អ៊ីងវេន ដោយសារគេយល់ឃើញថា លោកស្រី ត្សៃ អ៊ីងវេន ដែលមាននិន្នាការទាមទារឯករាជ្យ ឲ្យតៃវ៉ាន់ នឹងការពារមិនឲ្យលទ្ធិប្រជាធិបតេយ្យ តៃវ៉ាន់ ធ្លាក់ទៅក្នុងស្ថានភាព ដូចទីក្រុងហុងកុង ដែលកំពុងប្រឈមខ្លាំងនឹងការដាក់សម្ពាធពីប្រទេសចិនដីគោក។ ប្រទេសចិន ធ្លាប់បានលើកឡើងថា នឹងអនុវត្តគំរូនយោបាយ ប្រទេសមួយ ប្រព័ន្ធពីរ ទៅលើតៃវ៉ាន់ នៅពេលតៃវ៉ាន់ ស្ថិតនៅក្រោមការដឹកនាំរបស់ចិន នៅថ្ងៃណាមួយ។
នៅថ្ងៃសៅរ៍ លោកស្រីត្សៃ អ៊ីងវេនបាននិយាយដែរថា លោកស្រីនឹងចរចា ជាមួយ មេដឹកនាំប្រទេសចិន និងថា លោកស្រី ចង់បានសន្តិភាព។ ប៉ុន្តែ លោកស្រីត្សៃ បានព្រមានប្រាប់ផងដែរ ទីក្រុងប៉េកាំង ឲ្យឈប់ ប្រើកម្លាំងយោធា ដើម្បីគំរាមគំហែង បំផិតបំភ័យតៃវ៉ាន់ និងត្រូវគោរពដល់គំនិតដែលថា គឺ ប្រជាជនតៃវ៉ាន់ ទាំង២៣លាននាក់ ដែលជាអ្នកសម្រេចចិត្តលើជោគវាសនារបស់តៃវ៉ាន់។ “ ខ្ញុំសង្ឃឹមដែរថា អាជ្ញាធរប៉េកាំងនឹងយល់ថា ប្រជាធិបតេយ្យនៅតៃវ៉ាន់ និងរដ្ឋាភិបាលថ្មី ដែលកើតចេញពីការបោះឆ្នោតតាមបែបប្រជាធិបតេយ្យ នឹងមិនចុះចាញ់ ចុះញ៉ម នឹងការគំរាមកំហែង និងការបំភិតបំភ័យនោះទេ” នេះជាប្រសាសន៍របស់លោកស្រីប្រធានាធិបតីថ្មីរបស់តៃវ៉ាន់។
សម្រាប់ អ្នកវិភាគនយោបាយ តៃវ៉ាន់ ការបោះឆ្នោត គាំទ្រ ឲ្យលោកស្រីត្សៃ អ៊ីងវេនដឹកនាំតៃវ៉ាន់ មួយអាណត្តិបន្តទៀត មានន័យថា អ្នកបោះឆ្នោត តៃវ៉ាន់ មិនចុះញ៉មនឹងការបំភិតបំភ័យ របស់ប្រទេសចិន។ នៅពេលនេះ គេនៅរង់ចាំមើលប្រតិកម្មរបស់រដ្ឋាភិបាលទីក្រុងប៉េកាំង ថា តើចិននឹងប្រើនយោបាយស្រទន់ ជាមួយតៃវ៉ាន់ ឬក៏ត្រូវពង្រឹងនយោបាយ ដាក់សម្ពាធ ទាំងផ្លូវសេដ្ឋកិច្ច ការទូត និងយោធា បន្តទៅទៀត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ