បោះឆ្នោតតៃវ៉ាន់៖ ចិនទិតៀន អាមេរិកដែលអបអរជ័យជំនះរបស់លោកស្រី ត្សៃ អ៊ីងវេន
ប្រទេសចិន កាលពីថ្ងៃអាទិត្យម្សិលមិញ បានរិះគន់ ទិតៀន ខ្លាំងៗ មន្រ្តីអាមេរិក និងប្រទេសមួយចំនួនទៀត ដែលបានចេញមុខ ស្វាគម អបអរជ័យជំនះរបស់លោកស្រី ត្សៃ អ៊ីងវេន ដែលកាលពីថ្ងៃសៅរ៍ បានឈ្នះឆ្នោត ធ្វើជាប្រធានាធិបតីតៃវ៉ាន់ មួយអាណត្តិបន្តទៀត។ កាសែតក្នុងស្រុកចិន វិញ បានសរសេរវាយប្រហារ លោកស្រី ត្សៃ អ៊ីងវេន ថា បានប្រើល្បិចស្មោគគ្រោក ដើម្បីផលប្រយោជន៍សំឡេងឆ្នោត នៅតៃវ៉ាន់។
ចុះផ្សាយនៅថ្ងៃ៖
ទីក្រុងប៉េកាំង តាមរយៈ អ្នកនាំពាក្យរបស់ក្រសួងការបរទេសចិន បានប្រតិកម្មរិះគន់ខ្លាំងៗ បន្ទាប់ពី រដ្ឋមន្រ្តីអាមេរិក និងមន្រ្តីទូតអង់គ្លេស រួមទាំងជប៉ុនផង បានចេញសេចក្តីថ្លែងការណ៍ អបអរលោកស្រី ត្សៃ អ៊ីងវេន នៅក្រោយលោកស្រី ទទួលជ័យជំនះ ដ៏ធំធេង នៅក្នុងការបោះឆ្នោតប្រធានាធិបតីតៃវ៉ាន់ កាលពីថ្ងៃ សៅរ៍។ ចិន ដែលចាត់ទុកតៃវ៉ាន់ ជាផ្នែកមួយទឹកដីរបស់ខ្លួន បានបរិហារចាត់ទុកសកម្មភាពខាងលើ ថា ជាការរំលោភលើគោលការណ៍ចិនតែមួយ។
“ភាគីចិន សំដែងការមិនពេញចិត្តខ្លាំង ហើយនិងប្រឆាំងដាច់ខាត រាល់ទម្រង់ឆ្លើយឆ្លង ជាផ្លូវការរវាងតៃវ៉ាន់ ជាមួយ បណ្តាប្រទេស ដែលមានចំណងការទូតជាមួយចិន”។ អ្នកនាំពាក្យរបស់ក្រសួងការបរទេសចិន បាននិយាយ យ៉ាងដូច្នេះ ទៅកាន់អ្នកកាសែត កាលពីថ្ងៃអាទិត្យ។
ទីក្រុងប៉េកាំងដែលធ្លាប់ប្រកាសថា នឹងយកតៃវ៉ាន់ មកគ្រប់គ្រងវិញ នៅថ្ងៃណាមួយ បើទោះបីជាត្រូវកម្លាំងបាយ មិនចូលចិត្ត គណបក្សប្រជាធិបតេយ្យចម្រើននិយម និងលោកស្រី ត្សៃ អ៊ីងវេន ដោយសារតែ លោកស្រី ប្រធានាធិបតីតៃវ៉ាន់ ប្រឆាំង មិនទទួលស្គាល់គំនិត ដែលថា តៃវ៉ាន់ ជាផ្នែកមួយនៃប្រទេសចិន។
តាមអ្នកនាំពាក្យក្រសួងការបរទេសចិន នៅក្រោយ ជ័យជំនះរបស់លោកស្រី ត្សៃ អ៊ីងវេន ដែលត្រូវធ្វើជាប្រធានាធិបតី តៃវ៉ាន់ ៤ឆ្នាំ ទៅមុខទៀត ចិននឹងសង្កត់ធ្ងន់បន្ថែមទៀត លើគោលនយោបាយចិនតែមួយ។ សម្រាប់មន្រ្តីចិន ជំហររដ្ឋាភិបាលចិន នឹងមិនផ្លាស់ប្តូរ ហើយមានការពិតជាមូលដ្ឋានមួយ នោះគឺ មានចិនតែមួយនៅលើលោក ហើយតៃវ៉ាន់ ជាផ្នែកមួយរបស់ចិន។
នៅក្នុងរយៈពេល៤ឆ្នាំ នៃការកាន់អំណាចរបស់លោកស្រី ប្រធានាធិបតីត្សៃ អ៊ីងវេន ទីក្រុងប៉េកាំងបានដាក់សំពាធ ខ្លាំងទៅលើកោះតៃវ៉ាន់ ក្នុងផ្នែកសេដ្ឋកិច្ច ការទូត និងយោធា ក្នុងបំណងបញ្ចុះបញ្ចូលពលរដ្ឋតៃវ៉ាន់ ឲ្យបោះឆ្នោត គណបក្សប្រឆាំងរដ្ឋាភិបាល គឺគណបក្សគួរមីងតង់ដែលស្និទ្ធទៅខាងរដ្ឋាភិបាលចិន។ ប៉ុន្តែ អ្នកវិភាគវាយតម្លៃថា ការចាត់ចែង មិនបានល្អរបស់រដ្ឋអំណាចចិន ទៅលើទីក្រុងស្វ័យត ហុងកុង ជាហេតុផលមួយ ដែលជំរុញ ឲ្យពលរដ្ឋតៃវ៉ាន់ បែរខ្នងដាក់គណបក្សគួរមីងតង់ ដែលជាសម្ព័ន្ធមិត្តរបស់ទីក្រុងប៉េកាំង។ ដោយបោះឆ្នោត ជ្រើសរើស លោកស្រី ត្សៃ អ៊ីងវេន មកពីគណបក្សដែលមាននិន្នាការឯករាជ្យនិយម ពលរដ្ឋតៃវ៉ាន់ មួយចំនួនសង្ឃឹមថា លោកស្រីប្រធានាធិបតី តៃវ៉ាន់ នឹងជួយការពារ មិនឲ្យសេរីភាព និងលទ្ធិប្រជាធិបតេយ្យ នៅតៃវ៉ាន់ ធ្លាក់ទៅក្នុងស្ថានភាព អាក្រក់ ដូចនៅទីក្រុងហុងកុង។
សម្រាប់កាសែតក្នុងស្រុកចិន លោកស្រី ត្សៃ អ៊ីងវេន បានប្រើយុទ្ធសាស្រ្តកខ្វក់ ល្បិច អាក្រក់ ព្រោះលោកស្រី មិនត្រឹមតែ លើកយកហេតុការណ៍ នៅហុងកុង ដើម្បី បង្កើតភាពភ័យខ្លាច ក្នុងចំណោមម្ចាស់ឆ្នោតតៃវ៉ាន់តែប៉ុណ្ណោះទេ លោកស្រី នៅថែមទាំងបានលាបពណ៌ គូប្រជែងរបស់លោកស្រី ថា មនុស្សដែលស្និទ្ធនឹងរដ្ឋាភិបាល ចិនទៀតផង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ