ពលរដ្ឋថៃ១ម៉ឺននាក់ រៀបចំការរត់ប្រណាំង ប្រឆាំងនឹងអំណាចផ្តាច់ការ
ពលរដ្ឋថៃរាប់សិបពាន់នាក់ បាននាំគ្នាចូលរួមរត់ប្រណាំង នៅទីក្រុងបាងកក ដើម្បីប្រឆាំងនឹងអំណាចផ្តាច់ការ។ នេះជាទម្រង់នៃបាតុកម្មទ្រង់ទ្រាយធំបង្អស់មួយ ប្រឆាំងនឹងរដ្ឋាភិបាល គិតចាប់តាំងពីរដ្ឋប្រហារឆ្នាំ២០១៤ ដែលបានរុញលោកឧត្តមសេនីយ៍ប្រាយុទ្ធចាន់អូចា ឱ្យឡើងកាន់អំណាច មុនក្លាយជាមេដឹកនាំរដ្ឋាភិបាលបែបស៊ីវិលវិញមក។
ចុះផ្សាយនៅថ្ងៃ៖
ភាគច្រើនជាយុវជនយុវតីក្មេងៗ អ្នកចូលរួមរត់ប្រណាំងមានគ្នាប្រមាណ១ម៉ឺននាក់ និងបានមកជួបជុំគ្នាតាំងពីព្រឹកព្រលឹម នៅក្នុងឧទ្យានមួយនៃទីក្រុងបាងកក។ នេះបើតាមតួលេខផ្តល់ដោយអ្នករៀបចំកម្មវិធី។ ក្នុងពេលរត់ អ្នកចូលរួម បាននាំគ្នាស្រែកជ័យឃោស ទាមទារនិងគាំទ្រលទ្ធិប្រជាធិបតេយ្យ ស្រែកបណ្តេញលោក ប្រាយុទ្ធ ចាន់អូចា និងលើកម្រាមដៃបីឡើងទៅលើ ជាសញ្ញាថាពួកគេភ្ជាប់ខ្លួនជាសកម្មជន “ទៅមុខដើម្បីអនាគត” បក្សនយោបាយដ៏សំខាន់មួយ ក្នុងចំណោមបក្សប្រឆាំងធំៗនៅក្នុងប្រទេស។
តាំងពីរដ្ឋប្រហារឆ្នាំ២០១៤មក ពុំដែលមានទេការប្រមូលផ្តុំក្នុងទ្រង់ទ្រាយធំបែបនេះ។ កាលពីខែធ្នូ ក្រោមការអំពាវនាវរបស់លោក ថាណាថន ប្រធានគណបក្ស “ដើម្បីអនាគត” មានពលរដ្ឋថៃប្រមាណពីរបីពាន់បានមកជួបផ្តុំគ្នា។ មហាសេដ្ឋីវ័យក្មេង ថាណាថន ក៏បានចូលរួមក្នុងកម្មវិធីរត់ប្រណាំងថ្ងៃនេះដែរ។ លោកបានអះអាងថា នេះគឺដំណាក់កាលដំបូងនៃការប្តូរផ្លាស់ជាទូទៅរបស់ប្រទេស។ សេដ្ឋកិច្ចមានវិបត្តិ គ្មានសេរីភាពនយោបាយ ប្រជាពលរដ្ឋមិនអាចអត់ទ្រាំនឹងរដ្ឋាភិបាលនេះបានទៀតទេ !
គ្រាន់តែបានចូលប្រលូកក្នុងនយោបាយ លោកថាណាថន មានប្រជាប្រិយភាពខ្ពស់ ក្លាយជាចរន្តនយោបាយលំដាប់ទីបី និងប្រមូលសំឡេងគាំទ្របានជាង៦លានសំឡេង នៅក្នុងសម័យបោះឆ្នោតសភាកាលពីឆ្នាំ២០១៩ ប៉ុន្តែលោកក៏ជាផ្ទាំងស៊ីបនៃវាយប្រហាររបស់ក្រុមយោធាមហាអភិរក្សនិយមបំផុតផង និងពីអាជ្ញាធរតុលាការផង ជាមួយនឹងសំណុំរឿងចោទប្រកាន់ជាច្រើន។ តុលាការបានដកហូតតួនាទីលោកជាសមាជិកសភាកាលពីខែវិច្ឆិកា។ ចំណែកតំណាងរាស្ត្ររបស់គណបក្សនេះ ចំនួន៨០រូបទៀត អាចនឹងត្រូវតុលាការសម្រេចនៅថ្ងៃទី ២១មករា ដកហូតតំណែងទៀត ព្រោះគណបក្សអនាគតថៃកំពុងជាប់ចោទថាប៉ុនប៉ងផ្តួលរលំរបបរាជានិយម។
ក្រៅអំពីបាតុកម្មប្រឆាំងក្នុងទម្រង់ជាការរត់ប្រណាំង មានសកម្មជនរបស់រដ្ឋាភិបាល ៣ទៅ៤ពាន់នាក់ ក៏បានប្រមូលផ្តុំគ្នានៅថ្ងៃអាទិត្យនេះដើម្បីការពារលោកនាយករដ្ឋមន្ត្រី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ