ចិនបន្តប្រើអាវុធពាណិជ្ជកម្មដើម្បីសងសឹកអូស្រ្តាលីដែលតាមឈ្នានីសចិនក្នុងរឿងកូវីដ ១៩
ចុះផ្សាយនៅថ្ងៃ៖
ស្តាប់ - ០៤:១៨
វិបត្តិជំងឺកូវីដ ១៩ កំពុងធ្វើឲ្យទំនាក់ទំនងរវាងចិន និងអូស្រ្តាលីឡើងតានតឹងកាន់តែខ្លាំង។ ទីក្រុងប៉េកាំងមិនទាន់បាត់ខឹងនឹងទីក្រុងកង់បេរ៉ាដែលបានទាមទារឲ្យមានការស៊ើបអង្កេតអន្តរជាតិមួយស្តីពីការផ្ទុះជំងឺកូវីដ ១៩ នៅក្រុងវូហាន ប្រទេសចិន។ មួយសប្តាហ៍ក្រោយពីបានសម្រេចផ្អាកនាំចូលសាច់គោអូស្រា្តលីមក ចិនបានប្រកាសដំឡើងពន្ធក្នុងអត្រាដល់ទៅ ៨០% លើគ្រាប់ធញ្ញជាតិអូស្រា្តលីនាំចូលចិន។ ដំណឹងមួយនេះបានធ្វើឲ្យអូស្រ្តាលីខកចិត្តយ៉ាងខ្លាំង និងចង់យករឿងរ៉ាវមួយនេះទៅប្តឹងអង្គការពាណិជ្ជកម្មពិភពលោក។ គួរបញ្ជាក់ថា ភាពប្រទូសរ៉ាយរបស់ក្រុងប៉េកាំង និងក្រុងកង់បេរ៉ាពេលនេះមិនមែនកើតឡើងដោយសារតែរឿងកូវីដ ១៩ មួយប៉ុណ្ណោះទេ។ តែជារឿងបន្តភាគពីពេលមុន។
ចាប់តាំងពីថ្ងៃទី១៩ ឧសភាមក ផលិផលគ្រាប់ធញ្ញជាតិអូស្រា្តលីនាំទៅចិនត្រូវបានចិនដំឡើងពន្ធបន្ថែមដល់ទៅ ៨០%។ ការសម្រេចយ៉ាងដូចនេះត្រូវបានក្រុងប៉េកាំងលើកយកហេតុផលទៅពន្យល់ថា មិនមែនដោយសារតែចិនក្តៅក្រហាយនឹងអូស្រ្តាលីដែលបានទាមទារឲ្យមានការស៊ើបអង្កេតអន្តរជាតិស្តីពីការផ្ទុះកូវីដ ១៩ នៅក្រុងវូហាន ប្រទេសចិនទេ តែមកពីរដ្ឋាភិបាលចិនរកឃើញថា រដ្ឋាភិបាលអូស្រ្តាលីបានអនុវត្តនយោបាយផ្តល់ប្រាក់ឧបត្ថម្ភធនជួយប្រជាកិសកររបស់ខ្លួន និងនយោបាយ Dumping ពោលលក់ថ្លៃនៅក្នុងស្រុក តែលក់ថោកសម្រាប់នាំចេញ។ សម្រាប់ក្រុងប៉េកាំង ការអនុវត្តន៍នយោបាយរបៀបនេះរបស់ក្រុងកង់បេរ៉ាបានបង្កផលវិបាកយ៉ាងខ្លាំងដល់ប្រជាកិសករចិន។
នេះជាហេតុផលផ្លូវការ ចំណែកហេតុផលក្រៅផ្លូវការវិញ គឺដោយសារតែចិនពិបាកបន្តទ្រាំអត់ធ្មត់សង្កត់ចិត្តនឹងការបន្តលូកដៃកកូរកកាយកិច្ចការផ្ទៃក្នុងរបស់ចិនពីសំណាក់អូស្រា្តលី។ រឿងកូវីដ-១៩ គ្រាន់តែជាការយកសាំងទៅចាក់លើគំនរភ្លើងដែលកំពុងក្តៅងំស្រាប់ប៉ុណ្ណោះ ព្រោះថា ការស៊ើបអង្កេតរបស់ចិនក្នុងរឿងប្រាក់ឧបត្ថម្ភធន និងរឿង Dumping របស់អូស្រា្តលីត្រូវបានចិនធ្វើតាំងតែពី ១ឆ្នាំកន្លះមកម្ល៉េះ។ កាលណោះ ចិនបានខឹងសម្បារនឹងអូស្រ្តាលីដែលបានគាំទ្រគំនិតផ្តួចផ្តើមរបស់អាមេរិកស្តីពីសមុទ្រចិនខាងត្បូង។ គឺតាំងពីពេលនោះមកឯងដែលអធិកររវាងប្រទេសទាំងពីរបានបន្តមានជាហូរហែមកដល់សព្វថ្ងៃ។
ភាពប្រទូសរ៉ាយកន្លងមករួមមាន ការចាប់អ្នកបញ្ញាវន្តអូស្រ្តាលីម្នាក់នៅចិន ការដែលរដ្ឋាភិបាលអូស្រា្តលីមិនទទួលយកប្រព័ន្ធ ៥G របស់ក្រុមហ៊ុនចិន Huawei អូស្រា្តលីបានបិទព្រំដែនមិនឲ្យពលរដ្ឋចិនចូលដោយខ្លាចជំងឺកូវីដ-១៩ និងថ្មីៗនៅសប្តាហ៍មុន ចិនបានព្យួរការនាំចូលសាច់គោពីអូស្រ្តាលី។ រឿងសាច់គោនេះត្រូវបានក្រសួងការបរទេសចិនធានាថា មិនមែនជាការសងសឹកនឹងអូស្រា្តលីដែលបានទាមទារឲ្យមានការស៊ើបអង្កេតអន្តរជាតិស្តីពីកូវីដ ១៩ ទេ ពោលជារឿងពីរដាច់ដោយឡែកពីគ្នាស្រឡះ។ តែគេមិនត្រូវភ្លេចនិយាយទេថា នៅមុនការសម្រេចចិត្តជាផ្លូវការរបស់ចិន ឯកអគ្គរដ្ឋទូតចិនប្រចាំអូស្រា្តលីលោកឆេង ជីងយីបានលើកឡើងច្បាស់ៗនាដំណាច់ខែមេសាពីការដែលប្រជាជនចិនអាចធ្វើពហិការលើផលិតផលអូស្រ្តាលី។
តាមលោកឆេង ជីងយី ប្រជាជនចិនអាចពិចារណា ២ ឬ ៣ដងមុននឹងសម្រេចចិត្តទិញស្រា ឬសាច់គោមកពីអូស្រ្តាលី ឬមួយក៏បញ្ជូនកូនឲ្យទៅសិក្សានៅអូស្រា្តលី។ ត្រឡប់មកនិយាយពីរឿងរ៉ាវចុងក្រោយទាក់ទងនឹងចិនសម្រេចដំឡើងពន្ធលើគ្រាប់ធញ្ញជាតិអូស្រ្តាលីនាំចូលចិនវិញ អ្នកដែលអាចរងគ្រោះខ្លាំងជាងគេ គឺគ្មាននរណាក្រៅពីប្រជាកសិករអូស្រ្តាលីទេ។ ចូរកុំភ្លេចថាក្នុងមួយឆ្នាំៗ ចិនក្នុងនាមជាដៃគូពាណិជ្ជកម្មដ៏សំខាន់របស់អូស្រា្តលីបានទិញគ្រាប់ធញ្ញជាតិអូស្រា្តលីច្រើនណាស់។ ចិនតែម្នាក់ឯងបានទិញជាង ៥០% នៃការនាំចេញគ្រាប់ធញ្ញជាតិអូស្រា្តលីសរុប។ ជាក់ស្តែងក្នុងឆ្នាំ ២០១៩ ចិនបានទិញគ្រាប់ធញ្ញជាតិអូស្រា្តលីក្នុងបរិមាណ ២ ៥០០ ០០០តោន ខណៈដែលជប៉ុនទិញមិនដល់ ១ ០០០ ០០០តោនផង។
តើរឿងរ៉ាវរវាងចិន និងអូស្រ្តាលីមួយនេះមិនមែនជាដំណឹងល្អដែលអាចធ្វើឲ្យប្រទេសគូប្រជែងផ្សេង ពិសេសក្រុមប្រទេសដែលមានគ្រាប់ធញ្ញជាតិលក់ ដូចជាបារាំងញញឹមបិទមាត់មិនជិតទេ ឬយ៉ាងណា ?។ មិនប្រាកដទេ នេះជាការយល់ឃើញរបស់ក្រុមហ៊ុនបារាំងជំនាញផ្នែកយុទ្ធសាស្រ្តនៃទីផ្សារកសិកម្ម និងកសិឧស្សាហកម្មឈ្មោះ Agritel។ មិនប្រាកដ ព្រោះតាំងពីប៉ុន្មានខែកន្លងទៅ ចិនបាននាំចូលគ្រាប់ធញ្ញជាតិតិចតួចណាស់។
គឺប្រហែលជាក្នុងហេតុផលនេះហើយបានជាក្រុងប៉េកាំងជ្រើសយកគ្រាប់ធញ្ញជាតិអូស្រា្តលីជាផ្ទាំងស៊ីបដើម្បីវាយបកនឹងក្រុងកង់បេរ៉ាវិញ។ គ្រប់គ្នាកំពុងចោទសួរថា ហេតុអ្វីបានជាចិនមិននិយាយដល់ផលិតផលអូស្រ្តាលីផ្សេងទៀតដែលចិនបានទិញ ដូចយ៉ាងរ៉ែ និងធ្យូងថ្មនោះ?។ គ្មានអ្វីគួរឲ្យឆ្ងល់ទេ ព្រោះសម្រាប់ចិន រ៉ែ និងធ្យូងថ្មជាផលិតផលយុទ្ធសាស្រ្តដែលមិនអាចខ្វះបាននៅក្នុងវិស័យឧស្សាហកម្មរបស់ខ្លួន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ