ការនាំចូលរបស់ចិន ថយចុះខ្លាំងមិនធ្លាប់មានក្នុងរយៈពេល ៤ឆ្នាំកន្លងទៅនេះ
ចុះផ្សាយនៅថ្ងៃ៖
ស្តាប់ - ០៧:០៤
បន្ទាប់ពីបានទទួលជោគជ័យក្នុងការទប់ស្កាត់ជំងឺកូវីដ១៩ ចិនបានខិតខំស្តារសេដ្ឋកិច្ចរបស់ខ្លួនឡើងវិញយ៉ាងខ្លាំង។ ក៏ប៉ុន្តែ មិនខុសពីប្រទេសដទៃជាច្រើនទៀតក្នុងពិភពលោកឡើយ សេដ្ឋកិច្ចចិន រហូតមកទល់នឹងនេះនៅតែមិនទាន់អាចងើបចេញពីវិបត្តិដែលបង្កឡើងដោយរោគរាតត្បាតកូវីដនោះទេ។ ជាក់ស្តែង បើយោងតាមទិន្នន័យផ្លូវការមួយបង្ហាញនៅថ្ងៃអាទិត្យ ទី៧ មិថុនានេះ ការនាំចេញរបស់ចិនបានធ្លាក់ចុះខ្លាំងក្នុងខែឧសភា ចំណែកឯការនាំចូលវិញបានធ្លាក់ចុះខ្លាំងយ៉ាងគំហុកមិនធ្លាប់មានក្នុងរយៈពេល ៤ ឆ្នាំកន្លងទៅនេះ។
ហេតុអ្វីសេដ្ឋកិច្ចចិននៅតែមិនទាន់អាចដើរចេញពីវិបត្តិធ្ងន់ធ្ងរបាន?
យោងតាមរបាយការណ៍ជាផ្លូវការមួយបញ្ចេញនៅថ្ងៃអាទិត្យ ទី៧ មិថុនា ចិននៅតែរងនូវវិបត្តិសេដ្ឋកិច្ចធ្ងន់ធ្ងរនៅឡើយទោះបីជាចិនទទួលជោគជ័យក្នុងការទប់ស្កាត់វិបត្តិកូវីដ និងបានចាប់ផ្តើមសកម្មភាពឧស្សាហកម្មឡើងវិញប្រមាណជា ២-៣ ខែទៅហើយក្តី។
ថ្វីបើចិន គឺជាប្រទេសកំពូលមហាអំណាចសេដ្ឋកិច្ចពិភពលោកទី២ បន្ទាប់ពីសហរដ្ឋអាមេរិកយ៉ាងណាដោយ ក៏សេដ្ឋកិច្ចចិនរស់ពឹងផ្អែកខ្លាំងលើក្រុមប្រទេសដៃគូដែរ។ មានន័យថា ទោះចិនអាចគ្រប់គ្រងជំងឺកូវីដបាន ទោះបីចិនខិតខំធ្វើឲ្យសេដ្ឋកិច្ចរបស់ខ្លួនមានដំណើរការល្អឡើងវិញក្តី តែបើប្រទេសជាដៃគូសេដ្ឋកិច្ចចិននៅតែកំពុងរងគ្រោះពីវិបត្តិកូវីដ នោះសេដ្ឋកិច្ចចិនក៏ពិបាកនឹងងើបដើរចេញពីវិបត្តិដែរ ពីព្រោះមិនដឹងជារកស៊ីជួញដូរជាមួយអ្នកណា។
ជាក់ស្តែង គេឃើញទាំងសកម្មភាពនាំចេញនាំចូលរបស់ចិនបានធ្លាក់ចុះខ្លាំងនៅក្នុងខែឧសភាកន្លងទៅ ដោយសារតែលែងមានតម្រូវការពីបណ្តាប្រទេសដែលជាអតិថិជន។ ក្រុមហ៊ុននាំចេញចិនជាច្រើនលក់ទំនិញលែងដាច់ ទំនិញជាច្រើនក៏ត្រូវជាប់គាំងគរទុកក្នុងស្តុកដោយហេតុថាគ្មានអ្នកបញ្ជាទិញ ហើយទំនិញខ្លះទៀតក៏ត្រូវអតិថិជនដែលកុម្មង់ទិញហើយបែរជាលុបចោលលែងទិញទៅវិញ។
យោងតាមទិន្នន័យគយបង្ហាញនៅថ្ងៃអាទិត្យនេះ ការនាំចេញទៅក្រៅប្រទេសរបស់ចិនក្នុងខែឧសភាបានធ្លាក់ចុះ ៣,៣% បើប្រៀបធៀបនឹងឆ្នាំ ២០១៩។ យ៉ាងណាក៏ដោយ អត្រាធ្លាក់ចុះនៃការនាំចេញរបស់ចិននេះ មានចំនួនតិចជាងការស្ទង់មតិរបស់ទីភ្នាក់ងារសារព័ត៌មាន Reuters ដែលថាការនាំចេញចិនក្នុងខែឧសភាអាចនឹងធ្លាក់ចុះរហូតដល់ចំនួន ៧ % ឯណោះ។ នេះ ទំនងមកពីចិនទទួលបានកំណើននាំចេញគួរឲ្យភ្ញាក់ផ្អើលចំនួន ៣,៥% កាលពីខែមេសា ដែលភាគច្រើនគឺការនាំចេញផ្នែកវេជ្ជសាស្ត្រដូចជាម៉ាស់ សម្លៀកបំពាក់ និងសម្ភារៈពេទ្យសម្រាប់ជំងឺកូវីដ១៩។
ការនាំចូលរបស់ចិនធ្លាក់ចុះខ្លាំងមិនធ្លាប់មានក្នុងរយៈពេល ៤ ឆ្នាំកន្លងទៅនេះ
ការនាំចេញរបស់ចិននៅក្នុងខែឧសភាបានធ្លាក់ចុះ ក៏ប៉ុន្តែការធ្លាក់ចុះនេះ មិនច្រើនខ្លាំងដូចជាការនាំចូលនោះទេ។ ការនាំចូលរបស់ចិនបានថយចុះរហូតដល់ចំនួន ១៦,៧% ក្នុងខែឧសភា បើប្រៀបធៀបទៅនឹងឆ្នាំ ២០១៩ និងជាការថយចុះយ៉ាងខ្លាំងបំផុតក្នុងរយៈពេល៤ ឆ្នាំ ពោលចាប់តាំងពីឆ្នាំ ២០១៦មក។
អត្រាធ្លាក់ចុះនេះ មានចំនួនខ្ពស់ជាងឆ្ងាយណាស់ពីការជាងការព្យាករណ៍ទុករបស់ក្រុមអ្នកវិភាគដែលថាការនាំចូលរបស់ចិនក្នុងខែឧសភាអាចនឹងធ្លាក់ចុះត្រឹមចំនួន ៧,៨ % ពោលអាចធ្លាក់ចុះតិចជាងខែមេសាដែលមានចំនួន ១៤,២ %។
កាលពីចុងខែឧសភាកន្លងទៅ ដោយមើលឃើញថាបរិបទសេដ្ឋកិច្ច និងពាណិជ្ជកម្មលើពិភពលោកបច្ចុប្បន្នកំពុងបន្តស្ថិតក្នុងភាពស្រពេចស្រពិល ពីព្រោះតែវិបត្តិកូវីដ១៩ រដ្ឋាភិបាលចិន មិនបានកំណត់ពីកំណើនសេដ្ឋកិច្ចដែលចិនចង់សម្រេចបានប្រចាំឆ្នាំ ២០២១ នោះទេ។ នេះ ឆ្លុះបញ្ចាំងពីជំហរប្រុងប្រយ័ត្នខ្ពស់របស់ចិនចំពោះការបន្ធូរបន្ថយគោលនយោបាយ ដើម្បើស្តារសេដ្ឋកិច្ចដែលបានធ្លាក់ចុះ ៦,៨% នៅក្នុងត្រីមាសទី ១ នៃឆ្នាំ ២០២០ ធៀបនឹងឆ្នាំមុន។
ក្រុមអ្នកវិភាគព្រមានពីការបន្តដើរថយក្រោយរបស់សេដ្ឋកិច្ចចិន
ឧស្សាហកម្មក្នុងស្រុកចិនបាននិងកំពុងចាប់ផ្តើមដំណើរការឡើងវិញតាំងពី ២-៣ ខែកន្លងមកហើយ បន្ទាប់ពីអាជ្ញាធរចិនបានចាប់ផ្តើមបន្ធូរបន្ថយការរឹតត្បិតក្នុងការធ្វើដំណើរ និងដកបម្រាមតម្រូវឲ្យប្រជាជននៅតែក្នុងផ្ទះ។
សម្រាប់ក្រុមអ្នកវិភាគ ទោះជាសង្វាក់សេដ្ឋកិច្ចចិនចាប់មានសកម្មភាពច្រើនយ៉ាងណាក្តី ក៏ប៉ុន្តែ សេដ្ឋកិច្ចចិនអាចនៅមិនទាន់វិលត្រលប់ទៅរកសភាពធម្មតាឆាប់ៗនោះទេ។ ផ្ទុយ ទៅវិញ សេដ្ឋកិច្ចចិន អាចប្រឈមនឹងការដើរថយក្រោយបន្ថែមទៀតក្នុងពេលអនាគតដោយសារតែស្ថានភាពនៃវិបត្តិកូវីដ កំពុងបន្តស្ថិតក្នុងភាពស្រពេចស្រពិលនៅឡើយ។ រហូតមកទល់នឹងពេលនេះ គេនៅមិនទាន់ដឹងច្បាស់នៅឡើយទេ ថាតើវិបត្តិកូវីដនឹងត្រូវបិទបញ្ចប់ទៅទាំងស្រុងនៅពេលណា។
លោក Julian Evans-Pritchard អ្នកជំនាញខាងសេដ្ឋកិច្ច បានមានប្រសាសន៍ថា ស្ថិតក្នុងកាលៈទេសៈដូចពេលបច្ចុប្បន្ន ការនាំចេញរបស់ចិនអាចនឹងបន្តធ្លាក់ចុះ ពីព្រោះថាតម្រូវការរបស់ពិភពលោកនៅបន្តស្ងប់ស្ងៀម។
បើក្រុមប្រទេសដៃគូសេដ្ឋកិច្ចរបស់ចិនសឹងតែទាំងអស់លើលោកនៅតែជាប់គាំង និងជួបវិបត្តិហើយ ចិនដែលត្រូវបានគេចាត់ទុកជារោងចក្រ សហគ្រាសពិភពលោកក៏ត្រូវជាប់គាំង ហើយការនាំចេញរបស់ចិនក៏មិនអាចកើនឡើងវិញរួចដែរ។
ដោយសារតែការបញ្ជាទិញពីបរទេសធ្លាក់ចុះខ្លាំងជាគំហុក និងមិនដឹងថាពេលវេលាដ៏លំបាកនេះ នឹងត្រូវបិទបញ្ចប់ទៅវិញនៅពេលណាឲ្យប្រាកដនោះ ចិនបានដាក់ចេញនូវវិធានការជំរុញឲ្យមានតម្រូវការក្នុងស្រុកកើនឡើង។
កាលពីសប្តាហ៍ រដ្ឋាភិបាលក្រុងប៉េកាំងបានប្រកាសថានឹងបញ្ចេញថវិកាចំនួន ១២,២ ពាន់លានយ័ន (១,៧ ពាន់លានដុល្លារ) ដើម្បីជំរុញការប្រើប្រាស់ក្នុងស្រុក។ នេះ បើតាមការចុះផ្សាយរបស់ទីភ្នាក់ងារសារពត៌មានចិនស៊ីនហួ (Xinhua)៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ