ថៃគ្រោងបើកព្រំដែន ជាបឋម ជាមួយតែបណ្តាប្រទេសក្នុងតំបន់
ប្រទេសថៃដែលសេដ្ឋកិច្ចជាតិរំពឹងយ៉ាងខ្លាំងលើវិស័យទេសចរណ៍ កំពុងពិចារណាបើកព្រំដែនឡើងវិញ។ បើតាមគម្រោង ទ្វារព្រំដែនថៃនឹងបើកចំហទទួលតែបណ្តាពលរដ្ឋនៃប្រទេសជិតខាងក្នុងតំបន់មួយចំនួនប៉ុណ្ណោះ។ នេះបើតាមសេចក្តីប្រកាសរបស់អាជ្ញាធរ ដែលគេអាចកាត់យល់បានថាថៃនៅមិនទាន់ស្វាគមន៍ទេសចរអឺរ៉ុប និងអាមេរិកទេ ក្នុងគ្រាដំបូងនេះ។
ចុះផ្សាយនៅថ្ងៃ៖
ស្តាប់ - ០២:១៦
វិស័យទេសចរណ៍តំណាងឱ្យ២០%នៃផលិតផលសរុបជាតិ។ តែតាំងពីដើមខែមេសា២០២០ ថ្ងៃដែលថៃបានសម្រេចបិទខ្ទប់ប្រទេសដើម្បីទប់ស្កាត់ជំងឺរាតត្បាតកូវីដ១៩មក មានបុគ្គលិក-កម្មកររាប់លាននាក់បម្រើការក្នុងវិស័យឧស្សាហកម្មគ្មានផ្សែងទេសចរណ៍បានធ្លាក់ខ្លួនអត់ជាជនអត់ការងារធ្វើ។ អ្នកដំណើរថៃ ឬបរទេស ក្នុងចំនួនដ៏តិចតួចដែលអាចមកដល់ជាន់ទឹកដីថៃបាន ត្រូវជាប់ក្នុងបម្រាមបង្ឃាំងខ្លួនចំនួន១៤ថ្ងៃ ក្នុងមជ្ឈមណ្ឌលតម្រូវដោយរដ្ឋាភិបាល តែត្រូវចេញថ្លៃចំណាយខ្លួនឯង។
កូវីដ១៩ ចាប់ចុះថយអំណាចរាតត្បាតយ៉ាងខ្លាំងនារយៈពេលប៉ុន្មានសប្តាហ៍ចុងក្រោយនេះ ដោយនៅមានអ្នកផ្ទុកជំងឺតែជាង៣១០០ករណី និងស្លាប់សរុបអស់៥៨នាក់។ ហេតុដូច្នេះហើយបានជារដ្ឋាភិបាល ចាប់ពិចារណាបើកព្រំដែនឡើងវិញ ជាដំណាក់ៗ។ ដំណាក់កាលទីមួយគឺបើកព្រំដែនតែជាមួយប្រទេសណាដែលបានយកឈ្នះនិងគ្រប់គ្រងស្ថានភាពជំងឺកូវីដ១៩បាន។
តើជាប្រទេសណាខ្លះ ? ទេសចរចិន កូរ៉ខាងត្បូង វៀតណាម អូស្ត្រាលី ឬនូវែលហ្សេឡង់ អាចធ្វើដំណើរមកប្រទេសថៃបាន។ នេះបើតាមអ្នកនាំពាក្យរបស់មជ្ឈមណ្ឌលគ្រប់គ្រងវិបត្តិកូរ៉ូណាវីរុស ដែលបញ្ជាក់បន្ថែមទៀតថា គ្រប់អ្នកដំណើរ/ទេសចរ ត្រូវមានលខិតបញ្ជាក់សុខភាព (ថាគ្មានជំងឺកូវីដ១៩) មានការធានារ៉ាប់រងសុខភាព ទើបមិនជាប់បម្រាមដាច់ខាតថាត្រូវបង្ឃាំងខ្លួន១៤ថ្ងៃ។
ភ្ញៀវទេសចរដែលថៃចង់ទាក់ទាញខ្លាំងជាពិសេសគឺទេសចរជាអ្នកមានធូរធារ ដែលស្វែងរកការកំសាន្តលេងវាយកូនហ្គោល អ្នកជំនួញ និងទេសចរសុខភាពដែលមកព្យាបាលជំងឺ និងដែលជាប្រភពនាំចំណូលយ៉ាងសំខាន់មួយដល់ប្រទេស។
ប៉ុន្តែអាជ្ញាធរថៃមិនបានបញ្ជាក់អំពីកាលបរិច្ឆេទ នៃការបើកព្រំដែនឱ្យបានច្បាស់លាស់ទេ។ ហើយក៏មិនបានបញ្ជាក់អ្វីទាក់ទងនឹងទេសចរមកពីអឺរ៉ុបនិងសហរដ្ឋអាមេរិកដែរ។ មានន័យថាថៃពុំទាន់ត្រៀមលក្ខណៈរួចនឹងទទួលទេសចរទូទៅនៅឡើយទេ។
រងសម្ពាធខ្លាំង ប្រទេសត្រូវបង្ខំចិត្តបើកព្រំដែនឡើងវិញ។ កូវីដ១៩ បានធ្វើឱ្យថៃខាតបង់ចំណូលទេសចរណ៍អស់រាប់ពាន់លានដុល្លារ និងទំនងជាអាចទទួលភ្ញៀវបានត្រឹម១៤លាននៅឆ្នាំ២០២០នេះ ទល់នឹងជិត៤០លាននាក់កាលពីឆ្នាំ២០១៩៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ