វិបត្តិកូវីដ៖ សភាថៃអនុម័តផែនការជំរុញសេដ្ឋកិច្ច តម្លៃ ជិត ៦០ពាន់លានដុល្លារ
រដ្ឋសភាថៃ នៅថ្ងៃអាទិត្យម្សិលមិញ បានបោះឆ្នោត អនុម័តផែនការស្រោចស្រង់សេដ្ឋកិច្ច ដែលមានតម្លៃ ជិត ៦០ពាន់លានដុល្លារ។ នេះជាលើកទី១ នៅរាជាណាចក្រថៃ ដែលរដ្ឋាភិបាលចាក់បញ្ចេញ ថវិកាដ៏ច្រើនសម្បើម សម្រាប់ជំរុញសេដ្ឋកិច្ច ដែលចុះខ្សោយ ដោយសារជំងឺរាតត្បាតកូវីដ ១៩។
ចុះផ្សាយនៅថ្ងៃ៖
ស្តាប់ - ០២:១៨
ផែនការជំរុញសេដ្ឋកិច្ចតម្លៃ ៥៩ពាន់ ៧រយលានដុល្លារ (១៩០០ពាន់លានដុល្លារ) សំខាន់ណាស់សម្រាប់ប្រទេសថៃ ដែលត្រូវស្គាល់អត្រាកំណើនសេដ្ឋកិច្ចអវិជ្ជមាន ពី ៦ទៅ ៧%នៅឆ្នាំនេះ។ តាមរដ្ឋាភិបាលដែលជាអ្នកស្នើផែនការជំរុញសេដ្ឋកិច្ច លើកនេះ ថវិកាប្រមាណ ១,៧ពាន់លានដុល្លារ នឹងត្រូវយកទៅប្រើសម្រាប់ជួយកសិករ និងអ្នកធ្វើការនៅក្នុងសេដ្ឋកិច្ចក្រៅប្រព័ន្ធ ដូចជាអ្នកលក់ដូរតាមផ្លូវ បុគ្គលិកធ្វើការនៅហាងម៉ាស្សា និងនៅតាមរង្គសាល ដែលខាតបង់ គ្មានប្រាក់ចំណូល ដោយសារ វិធានការបិទទីក្រុង បិទព្រំដែន នៅក្នុងសម័យជំងឺរាតត្បាតកូវីដ។
រដ្ឋាភិបាល គ្រោងផងដែរនឹងចំណាយថវិកាមួយផ្នែកនៃផែនការសេដ្ឋកិច្ច សម្រាប់ រក្សាស្ថិរភាពទីផ្សារ និងជំរុញ ការប្រើប្រាស់ក្នុងស្រុក។ តាមគម្រោង រដ្ឋាភិបាលរបស់លោកប្រាយុទ្ធ ចាន់អូចានឹងចំណាយផងដែរ ទឹកប្រាក់១៤០០លានដុល្លារសម្រាប់វិស័យសុខាភិបាល។ ប៉ុន្តែ រដ្ឋាភិបាល មិនបានលម្អិតថា តើគេនឹងប្រើប្រាស់ ចែកចាយយ៉ាងម៉េចនោះទេ។
នៅសភា កាលពីថ្ងៃអាទិត្យ ក្រុមគណបក្សប្រឆាំងបានបោះឆ្នោតមិនគាំទ្រផែនការរបស់នាយករដ្ឋមន្រ្តី ដែលពួកគេចាត់ទុក គ្មានតម្លាភាព និងមិនច្បាស់លាស់។ គណបក្សប្រឆាំង បារម្ភខ្លាចថា ថវិកាសម្រាប់ផែនការជំរុញសេដ្ឋកិច្ច នឹងត្រូវគេបង្វែរយកទៅប្រើសម្រាប់គម្រោង បង្កើតឡើងដោយមន្រ្តីពុករលួយ។ “ជាជាងយកលុយទៅចំណាយជួយផ្តល់ប្រយោជន៍ប្រជាជន គេអាចបន្លំយកថវិកា សម្រាប់ហោប៉ៅ របស់មនុស្សមួយក្រុម” នេះជាការលើកឡើងរបស់សមាជិកសភា Pijan Chaopattanapong មក ពីគណបក្សប្រឆាំង Move Forward។
ប្រឈមនឹងអរិភាព និងការរិះគន់របស់សមាជិកសភាមកពីគណបក្សប្រឆាំង លោកនាយករដ្ឋមន្រ្តី ថៃ ប្រាយុទ្ធ ចាន់អូចា បានសន្យាថា នឹងការតាមដានត្រួតពិនិត្យ រាល់ដំណាក់កាលនៃការចំណាយកញ្ចប់ថវិកា។
នៅប្រទេសថៃ ជំងឺកូវីដ បានសម្លាប់មនុស្ស ៥៧នាក់ និងចម្លងទៅមនុស្សច្រើនជាង ៣ពាន់នាក់។ វិធានការបិទទីក្រុង បិទមជ្ឈមណ្ឌលពាណិជ្ជកម្ម និងបិទព្រំដែន ដើម្បី ទប់ស្កាត់ការឆ្លងរីករាលដាលជំងឺកូវីដ បានសម្លាប់វិស័យទេសចរណ៍ ដែលជាដង្ហើមសេដ្ឋកិច្ចសំខាន់របស់ថៃ។ ប្រជាជនថៃ ជាង២០លាននាក់បានចុះឈ្មោះសុំរបបជំនួយ ពីរដ្ឋាភិបាល ដែលបានផ្តល់ទឹកប្រាក់១៥០ដុល្លារ សម្រាប់ប្រជាជនថៃម្នាក់ ដែលរងគ្រោះគ្មាន ប្រាក់ចំណូលសម្រាប់ចិញ្ចឹមជីវិត នៅក្នុងកាលៈទេសៈកើតមានជំងឺកូវីដ៕
នៅប្រទេសថៃ ជាទីមានអ្នកឆ្លងមេរោគកូរ៉ូណា ជាង ៣ពាន់នាក់
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ